੬. ਅਨ੍ਨਸਂਸਾਵਕਤ੍ਥੇਰਅਪਦਾਨਂ

੩੪. ‘‘ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਂ, ਗਚ੍ਛਨ੍ਤਂ ਅਨ੍ਤਰਾਪਣੇ;

ਕਞ੍ਚਨਗ੍ਘਿਯਸਙ੍ਕਾਸਂ, ਬਾਤ੍ਤਿਂਸਵਰਲਕ੍ਖਣਂ.

੩੫. ‘‘ਸਿਦ੍ਧਤ੍ਥਂ ਸਬ੍ਬਸਿਦ੍ਧਤ੍ਥਂ, ਅਨੇਜਂ ਅਪਰਾਜਿਤਂ;

ਸਮ੍ਬੁਦ੍ਧਂ ਅਤਿਨਾਮੇਤ੍ਵਾ, ਭੋਜਯਿਂ ਤਂ ਮਹਾਮੁਨਿਂ.

੩੬. ‘‘ਮੁਨਿ ਕਾਰੁਣਿਕੋ ਲੋਕੇ, ਓਭਾਸਯਿ ਮਮਂ ਤਦਾ;

ਬੁਦ੍ਧੇ ਚਿਤ੍ਤਂ ਪਸਾਦੇਤ੍ਵਾ, ਕਪ੍ਪਂ ਸਗ੍ਗਮ੍ਹਿ ਮੋਦਹਂ.

੩੭. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਭਿਕ੍ਖਾਦਾਨਸ੍ਸਿਦਂ ਫਲਂ.

੩੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਅਨ੍ਨਸਂਸਾਵਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ;

ਅਨ੍ਨਸਂਸਾਵਕਤ੍ਥੇਰਸ੍ਸਾਪਦਾਨਂ ਛਟ੍ਠਂ.