੧. ਉਮਾਪੁਪ੍ਫਿਯਤ੍ਥੇਰਅਪਦਾਨਂ
੧. ‘‘ਸਮਾਹਿਤਂ ਸਮਾਪਨ੍ਨਂ, ਸਿਦ੍ਧਤ੍ਥਮਪਰਾਜਿਤਂ;
ਸਮਾਧਿਨਾ ਉਪਵਿਟ੍ਠਂ, ਅਦ੍ਦਸਾਹਂ ਨਰੁਤ੍ਤਮਂ.
੨. ‘‘ਉਮਾਪੁਪ੍ਫਂ ਗਹੇਤ੍ਵਾਨ, ਬੁਦ੍ਧਸ੍ਸ ਅਭਿਰੋਪਯਿਂ;
ਸਬ੍ਬਪੁਪ੍ਫਾ ਏਕਸੀਸਾ, ਉਦ੍ਧਂਵਣ੍ਟਾ ਅਧੋਮੁਖਾ.
੩. ‘‘ਸੁਚਿਤ੍ਤਾ ਵਿਯ ਤਿਟ੍ਠਨ੍ਤੇ, ਆਕਾਸੇ ਪੁਪ੍ਫਸਨ੍ਥਰਾ;
ਤੇਨ ਚਿਤ੍ਤਪ੍ਪਸਾਦੇਨ, ਤੁਸਿਤਂ ਉਪਪਜ੍ਜਹਂ.
੪. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.
੫. ‘‘ਪਞ੍ਚਪਞ੍ਞਾਸਿਤੋ ਕਪ੍ਪੇ, ਏਕੋ ਆਸਿਂ ਮਹੀਪਤਿ;
ਸਮਨ੍ਤਛਦਨੋ ਨਾਮ, ਚਕ੍ਕਵਤ੍ਤੀ ਮਹਬ੍ਬਲੋ.
੬. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;
ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ.
ਇਤ੍ਥਂ ਸੁਦਂ ਆਯਸ੍ਮਾ ਉਮਾਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਉਮਾਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਪਠਮਂ.