੩. ਪਰਮਨ੍ਨਦਾਯਕਤ੍ਥੇਰਅਪਦਾਨਂ

੯. ‘‘ਕਣਿਕਾਰਂਵ ਜੋਤਨ੍ਤਂ, ਉਦਯਨ੍ਤਂਵ ਭਾਣੁਮਂ;

ਵਿਪਸ੍ਸਿਂ ਅਦ੍ਦਸਂ ਬੁਦ੍ਧਂ, ਲੋਕਜੇਟ੍ਠਂ ਨਰਾਸਭਂ.

੧੦. ‘‘ਅਞ੍ਜਲਿਂ ਪਗ੍ਗਹੇਤ੍ਵਾਨ, ਅਭਿਨੇਸਿਂ ਸਕਂ ਘਰਂ;

ਅਭਿਨੇਤ੍ਵਾਨ ਸਮ੍ਬੁਦ੍ਧਂ, ਪਰਮਨ੍ਨਮਦਾਸਹਂ.

੧੧. ‘‘ਏਕਨਵੁਤਿਤੋ ਕਪ੍ਪੇ, ਪਰਮਨ੍ਨਮਦਿਂ [ਪਰਮਨ੍ਨਂ ਦਦਿਂ (ਸੀ.), ਪਰਮਨ੍ਨਮਦਂ (ਸ੍ਯਾ.)] ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਪਰਮਨ੍ਨਸ੍ਸਿਦਂ ਫਲਂ.

੧੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਰਮਨ੍ਨਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਰਮਨ੍ਨਦਾਯਕਤ੍ਥੇਰਸ੍ਸਾਪਦਾਨਂ ਤਤਿਯਂ.