੨. ਪੁਪ੍ਫਧਾਰਕਤ੍ਥੇਰਅਪਦਾਨਂ

੬. ‘‘ਵਾਕਚੀਰਧਰੋ ਆਸਿਂ, ਅਜਿਨੁਤ੍ਤਰਵਾਸਨੋ;

ਅਭਿਞ੍ਞਾ ਪਞ੍ਚ ਨਿਬ੍ਬਤ੍ਤਾ, ਚਨ੍ਦਸ੍ਸ ਪਰਿਮਜ੍ਜਕੋ.

੭. ‘‘ਵਿਪਸ੍ਸਿਂ ਲੋਕਪਜ੍ਜੋਤਂ, ਦਿਸ੍ਵਾ ਅਭਿਗਤਂ ਮਮਂ;

ਪਾਰਿਚ੍ਛਤ੍ਤਕਪੁਪ੍ਫਾਨਿ, ਧਾਰੇਸਿਂ ਸਤ੍ਥੁਨੋ ਅਹਂ.

੮. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਧਾਰਣਾਯ ਇਦਂ ਫਲਂ.

੯. ‘‘ਸਤ੍ਤਾਸੀਤਿਮ੍ਹਿਤੋ ਕਪ੍ਪੇ, ਏਕੋ ਆਸਿਂ ਮਹੀਪਤਿ;

ਸਮਨ੍ਤਧਾਰਣੋ ਨਾਮ, ਚਕ੍ਕਵਤ੍ਤੀ ਮਹਬ੍ਬਲੋ.

੧੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪੁਪ੍ਫਧਾਰਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪੁਪ੍ਫਧਾਰਕਤ੍ਥੇਰਸ੍ਸਾਪਦਾਨਂ ਦੁਤਿਯਂ.