੯. ਏਕਞ੍ਜਲਿਕਤ੍ਥੇਰਅਪਦਾਨਂ

੧੮੦. ‘‘ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਂ, ਗਚ੍ਛਨ੍ਤਂ ਅਨ੍ਤਰਾਪਣੇ;

ਵਿਪਸ੍ਸਿਂ ਸਤ੍ਥਵਾਹਗ੍ਗਂ, ਨਰਵਰਂ ਵਿਨਾਯਕਂ.

੧੮੧. ‘‘ਅਦਨ੍ਤਦਮਨਂ ਤਾਦਿਂ, ਮਹਾਵਾਦਿਂ ਮਹਾਮਤਿਂ;

ਦਿਸ੍ਵਾ ਪਸਨ੍ਨੋ ਸੁਮਨੋ, ਏਕਞ੍ਜਲਿਮਕਾਸਹਂ.

੧੮੨. ‘‘ਏਕਨਵੁਤਿਤੋ ਕਪ੍ਪੇ, ਯਮਞ੍ਜਲਿਂ ਕਰਿਂ [ਯਂ ਅਞ੍ਜਲਿਮਕਰਿਂ (ਸ੍ਯਾ.), ਅਞ੍ਜਲਿਮਕਰਿਂ (ਕ.)] ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਅਞ੍ਜਲਿਸ੍ਸ ਇਦਂ ਫਲਂ.

੧੮੩. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਏਕਞ੍ਜਲਿਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਏਕਞ੍ਜਲਿਕਤ੍ਥੇਰਸ੍ਸਾਪਦਾਨਂ ਨਵਮਂ.