੮. ਉਤ੍ਤਿਯਤ੍ਥੇਰਅਪਦਾਨਂ
੧੬੯. ‘‘ਚਨ੍ਦਭਾਗਾਨਦੀਤੀਰੇ, ਸੁਸੁਮਾਰੋ ਅਹਂ ਤਦਾ;
ਸਗੋਚਰਪ੍ਪਸੁਤੋਹਂ [ਸਭੋਜਨਪਸੁਤਾਹਂ (ਸ੍ਯਾ. ਕ.)], ਨਦੀਤਿਤ੍ਥਂ ਅਗਚ੍ਛਹਂ.
੧੭੦. ‘‘ਸਿਦ੍ਧਤ੍ਥੋ ਤਮ੍ਹਿ ਸਮਯੇ, ਸਯਮ੍ਭੂ ਅਗ੍ਗਪੁਗ੍ਗਲੋ;
ਨਦਿਂ ਤਰਿਤੁਕਾਮੋ ਸੋ, ਨਦੀਤਿਤ੍ਥਂ ਉਪਾਗਮਿ.
੧੭੧. ‘‘ਉਪਾਗਤੇ ਚ [ਉਪਾਗਤਮ੍ਹਿ (ਸ੍ਯਾ. ਕ.)] ਸਮ੍ਬੁਦ੍ਧੇ, ਅਹਮ੍ਪਿ ਤਤ੍ਥੁਪਾਗਮਿਂ;
ਉਪਗਨ੍ਤ੍ਵਾਨ ਸਮ੍ਬੁਦ੍ਧਂ, ਇਮਂ ਵਾਚਂ ਉਦੀਰਯਿਂ.
੧੭੨. ‘‘‘ਅਭਿਰੂਹ ਮਹਾਵੀਰ, ਤਾਰੇਸ੍ਸਾਮਿ ਅਹਂ ਤੁਵਂ;
ਪੇਤ੍ਤਿਕਂ ਵਿਸਯਂ ਮਯ੍ਹਂ, ਅਨੁਕਮ੍ਪ ਮਹਾਮੁਨਿ’.
੧੭੩. ‘‘ਮਮ ਉਗ੍ਗਜ੍ਜਨਂ ਸੁਤ੍ਵਾ, ਅਭਿਰੂਹਿ ਮਹਾਮੁਨਿ;
ਹਟ੍ਠੋ ਹਟ੍ਠੇਨ ਚਿਤ੍ਤੇਨ, ਤਾਰੇਸਿਂ ਲੋਕਨਾਯਕਂ.
੧੭੪. ‘‘ਨਦਿਯਾ ਪਾਰਿਮੇ ਤੀਰੇ, ਸਿਦ੍ਧਤ੍ਥੋ ਲੋਕਨਾਯਕੋ;
ਅਸ੍ਸਾਸੇਸਿ ਮਮਂ ਤਤ੍ਥ, ਅਮਤਂ ਪਾਪੁਣਿਸ੍ਸਸਿ.
੧੭੫. ‘‘ਤਮ੍ਹਾ ਕਾਯਾ ਚਵਿਤ੍ਵਾਨ, ਦੇਵਲੋਕਂ ਆਗਚ੍ਛਹਂ;
ਦਿਬ੍ਬਸੁਖਂ ਅਨੁਭਵਿਂ, ਅਚ੍ਛਰਾਹਿ ਪੁਰਕ੍ਖਤੋ.
੧੭੬. ‘‘ਸਤ੍ਤਕ੍ਖਤ੍ਤੁਞ੍ਚ ਦੇਵਿਨ੍ਦੋ, ਦੇਵਰਜ੍ਜਮਕਾਸਹਂ;
ਤੀਣਿਕ੍ਖਤ੍ਤੁਂ ਚਕ੍ਕਵਤ੍ਤੀ, ਮਹਿਯਾ ਇਸ੍ਸਰੋ ਅਹੁਂ.
੧੭੭. ‘‘ਵਿਵੇਕਮਨੁਯੁਤ੍ਤੋਹਂ, ਨਿਪਕੋ ਚ ਸੁਸਂਵੁਤੋ;
ਧਾਰੇਮਿ ਅਨ੍ਤਿਮਂ ਦੇਹਂ, ਸਮ੍ਮਾਸਮ੍ਬੁਦ੍ਧਸਾਸਨੇ.
੧੭੮. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਤਾਰੇਸਿਂ ਯਂ ਨਰਾਸਭਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਤਰਣਾਯ ਇਦਂ ਫਲਂ.
੧੭੯. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;
ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਉਤ੍ਤਿਯੋ [ਉਤ੍ਤਿਰਿਯੋ (ਸੀ.)] ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਉਤ੍ਤਿਯਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.