੭. ਪੁਲਿਨਪੂਜਕਤ੍ਥੇਰਅਪਦਾਨਂ

੧੬੫. ‘‘ਵਿਪਸ੍ਸਿਸ੍ਸ ਭਗਵਤੋ, ਬੋਧਿਯਾ ਪਾਦਪੁਤ੍ਤਮੇ;

ਪੁਰਾਣਪੁਲਿਨਂ ਹਿਤ੍ਵਾ [ਛਡ੍ਡੇਤ੍ਵਾ (ਸੀ. ਸ੍ਯਾ.)], ਸੁਦ੍ਧਪੁਲਿਨਮਾਕਿਰਿਂ.

੧੬੬. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਲਿਨਮਦਾਸਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਪੁਲਿਨਦਾਨਸ੍ਸਿਦਂ ਫਲਂ.

੧੬੭. ‘‘ਤਿਂਸਤਿਮੇ [ਤਿਪਞ੍ਞਾਸੇ (ਸੀ. ਸ੍ਯਾ.)] ਇਤੋ ਕਪ੍ਪੇ, ਰਾਜਾ ਆਸਿਂ ਜਨਾਧਿਭੂ;

ਮਹਾਪੁਲਿਨਨਾਮੇਨ, ਚਕ੍ਕਵਤ੍ਤੀ ਮਹਬ੍ਬਲੋ.

੧੬੮. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪੁਲਿਨਪੂਜਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪੁਲਿਨਪੂਜਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.