੬. ਧੂਪਦਾਯਕਤ੍ਥੇਰਅਪਦਾਨਂ
੧੬੧. ‘‘ਸਿਦ੍ਧਤ੍ਥਸ੍ਸ ਭਗਵਤੋ, ਲੋਕਜੇਟ੍ਠਸ੍ਸ ਤਾਦਿਨੋ;
ਕੁਟਿਧੂਪਂ ਮਯਾ ਦਿਨ੍ਨਂ, ਵਿਪ੍ਪਸਨ੍ਨੇਨ ਚੇਤਸਾ.
੧੬੨. ਯਂ ਯਂ ਯੋਨੁਪਪਜ੍ਜਾਮਿ, ਦੇਵਤ੍ਤਂ ਅਥ ਮਾਨੁਸਂ;
ਸਬ੍ਬੇਸਮ੍ਪਿ ਪਿਯੋ ਹੋਮਿ, ਧੂਪਦਾਨਸ੍ਸਿਦਂ ਫਲਂ.
੧੬੩. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਧੂਪਮਦਦਿਂ ਤਦਾ [ਯਂ ਧੂਪਨਮਦਾਸਹਂ (ਕ.)];
ਦੁਗ੍ਗਤਿਂ ਨਾਭਿਜਾਨਾਮਿ, ਧੂਪਦਾਨਸ੍ਸਿਦਂ ਫਲਂ.
੧੬੪. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;
ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਧੂਪਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਧੂਪਦਾਯਕਤ੍ਥੇਰਸ੍ਸਾਪਦਾਨਂ ਛਟ੍ਠਂ.