੫. ਅਨ੍ਨਸਂਸਾਵਕਤ੍ਥੇਰਅਪਦਾਨਂ
੧੫੫. ‘‘ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਂ, ਗਚ੍ਛਨ੍ਤਂ ਅਨ੍ਤਰਾਪਣੇ;
ਕਞ੍ਚਨਗ੍ਘਿਯਸਂਕਾਸਂ, ਬਾਤ੍ਤਿਂਸਵਰਲਕ੍ਖਣਂ.
੧੫੬. ‘‘ਸਿਦ੍ਧਤ੍ਥਂ ਲੋਕਪਜ੍ਜੋਤਂ, ਅਪ੍ਪਮੇਯ੍ਯਂ ਅਨੋਪਮਂ;
ਅਲਤ੍ਥਂ ਪਰਮਂ ਪੀਤਿਂ, ਦਿਸ੍ਵਾ ਦਨ੍ਤਂ ਜੁਤਿਨ੍ਧਰਂ.
੧੫੭. ‘‘ਸਮ੍ਬੁਦ੍ਧਂ ਅਭਿਨਾਮੇਤ੍ਵਾ, ਭੋਜਯਿਂ ਤਂ ਮਹਾਮੁਨਿਂ;
ਮਹਾਕਾਰੁਣਿਕੋ ਲੋਕੇ [ਨਾਥੋ (ਸੀ.)], ਅਨੁਮੋਦਿ ਮਮਂ ਤਦਾ.
੧੫੮. ‘‘ਤਸ੍ਮਿਂ ਮਹਾਕਾਰੁਣਿਕੇ, ਪਰਮਸ੍ਸਾਸਕਾਰਕੇ;
ਬੁਦ੍ਧੇ ਚਿਤ੍ਤਂ ਪਸਾਦੇਤ੍ਵਾ, ਕਪ੍ਪਂ ਸਗ੍ਗਮ੍ਹਿ ਮੋਦਹਂ.
੧੫੯. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਭਿਕ੍ਖਾਦਾਨਸ੍ਸਿਦਂ ਫਲਂ.
੧੬੦. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;
ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਅਨ੍ਨਸਂਸਾਵਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਅਨ੍ਨਸਂਸਾਵਕਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.