੪. ਪਞ੍ਚਸੀਲਸਮਾਦਾਨਿਯਤ੍ਥੇਰਅਪਦਾਨਂ
੧੩੪. ‘‘ਨਗਰੇ ਚਨ੍ਦਵਤਿਯਾ, ਭਤਕੋ ਆਸਹਂ ਤਦਾ;
ਪਰਕਮ੍ਮਾਯਨੇ ਯੁਤ੍ਤੋ, ਪਬ੍ਬਜ੍ਜਂ ਨ ਲਭਾਮਹਂ.
੧੩੫. ‘‘ਮਹਨ੍ਧਕਾਰਪਿਹਿਤਾ, ਤਿਵਿਧਗ੍ਗੀਹਿ ਡਯ੍ਹਰੇ;
ਕੇਨ ਨੁ ਖੋ ਉਪਾਯੇਨ, ਵਿਸਂਯੁਤ੍ਤੋ ਭਵੇ ਅਹਂ.
੧੩੬. ‘‘ਦੇਯ੍ਯਧਮ੍ਮੋ ਚ ਮੇ ਨਤ੍ਥਿ, ਵਰਾਕੋ ਭਤਕੋ ਅਹਂ;
ਯਂਨੂਨਾਹਂ ਪਞ੍ਚਸੀਲਂ, ਰਕ੍ਖੇਯ੍ਯਂ ਪਰਿਪੂਰਯਂ.
੧੩੭. ‘‘ਅਨੋਮਦਸ੍ਸਿਸ੍ਸ ਮੁਨਿਨੋ, ਨਿਸਭੋ ਨਾਮ ਸਾਵਕੋ;
ਤਮਹਂ ਉਪਸਙ੍ਕਮ੍ਮ, ਪਞ੍ਚਸਿਕ੍ਖਾਪਦਗ੍ਗਹਿਂ.
੧੩੮. ‘‘ਵਸ੍ਸਸਤਸਹਸ੍ਸਾਨਿ, ਆਯੁ ਵਿਜ੍ਜਤਿ ਤਾਵਦੇ;
ਤਾਵਤਾ ਪਞ੍ਚਸੀਲਾਨਿ, ਪਰਿਪੁਣ੍ਣਾਨਿ ਗੋਪਯਿਂ.
੧੩੯. ‘‘ਮਚ੍ਚੁਕਾਲੇ ਚ ਸਮ੍ਪਤ੍ਤੇ, ਦੇਵਾ ਅਸ੍ਸਾਸਯਨ੍ਤਿ ਮਂ;
‘ਰਥੋ ਸਹਸ੍ਸਯੁਤ੍ਤੋ ਤੇ, ਮਾਰਿਸਾਯਂ [ਮਾਰਿਸਸ੍ਸ (ਕ.)] ਉਪਟ੍ਠਿਤੋ’.
੧੪੦. ‘‘ਵਤ੍ਤਨ੍ਤੇ ਚਰਿਮੇ ਚਿਤ੍ਤੇ, ਮਮ ਸੀਲਂ ਅਨੁਸ੍ਸਰਿਂ;
ਤੇਨ ਕਮ੍ਮੇਨ ਸੁਕਤੇਨ, ਤਾਵਤਿਂਸਂ ਅਗਚ੍ਛਹਂ.
੧੪੧. ‘‘ਤਿਂਸਕ੍ਖਤ੍ਤੁਞ੍ਚ ਦੇਵਿਨ੍ਦੋ, ਦੇਵਰਜ੍ਜਮਕਾਰਯਿਂ;
ਦਿਬ੍ਬਸੁਖਂ [ਦਿਬ੍ਬਂ ਸੁਖਂ (ਸੀ.)] ਅਨੁਭਵਿਂ, ਅਚ੍ਛਰਾਹਿ ਪੁਰਕ੍ਖਤੋ.
੧੪੨. ‘‘ਪਞ੍ਚਸਤ੍ਤਤਿਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਅਹੋਸਹਂ;
ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.
੧੪੩. ‘‘ਦੇਵਲੋਕਾ ਚਵਿਤ੍ਵਾਨ, ਸੁਕ੍ਕਮੂਲੇਨ ਚੋਦਿਤੋ;
ਪੁਰੇ ਵੇਸਾਲਿਯਂ ਜਾਤੋ, ਮਹਾਸਾਲੇ ਸੁਅਡ੍ਢਕੇ.
੧੪੪. ‘‘ਵਸ੍ਸੂਪਨਾਯਿਕੇ ਕਾਲੇ, ਦਿਪ੍ਪਨ੍ਤੇ [ਦਿਬ੍ਬਨ੍ਤਿ (ਕ.)] ਜਿਨਸਾਸਨੇ;
ਮਾਤਾ ਚ ਮੇ ਪਿਤਾ ਚੇਵ, ਪਞ੍ਚਸਿਕ੍ਖਾਪਦਗ੍ਗਹੁਂ.
੧੪੫. ‘‘ਸਹ ਸੁਤ੍ਵਾਨਹਂ ਸੀਲਂ, ਮਮ ਸੀਲਂ ਅਨੁਸ੍ਸਰਿਂ;
ਏਕਾਸਨੇ ਨਿਸੀਦਿਤ੍ਵਾ, ਅਰਹਤ੍ਤਮਪਾਪੁਣਿਂ.
੧੪੬. ‘‘ਜਾਤਿਯਾ ਪਞ੍ਚਵਸ੍ਸੇਨ, ਅਰਹਤ੍ਤਮਪਾਪੁਣਿਂ;
ਉਪਸਮ੍ਪਾਦਯਿ ਬੁਦ੍ਧੋ, ਗੁਣਮਞ੍ਞਾਯ ਚਕ੍ਖੁਮਾ.
੧੪੭. ‘‘ਪਰਿਪੁਣ੍ਣਾਨਿ ਗੋਪੇਤ੍ਵਾ, ਪਞ੍ਚਸਿਕ੍ਖਾਪਦਾਨਹਂ;
ਅਪਰਿਮੇਯ੍ਯੇ ਇਤੋ ਕਪ੍ਪੇ, ਵਿਨਿਪਾਤਂ ਨ ਗਚ੍ਛਹਂ.
੧੪੮. ‘‘ਸ੍ਵਾਹਂ ਯਸਮਨੁਭਵਿਂ, ਤੇਸਂ ਸੀਲਾਨ ਵਾਹਸਾ;
ਕਪ੍ਪਕੋਟਿਮ੍ਪਿ ਕਿਤ੍ਤੇਨ੍ਤੋ, ਕਿਤ੍ਤਯੇ ਏਕਦੇਸਕਂ.
੧੪੯. ‘‘ਪਞ੍ਚਸੀਲਾਨਿ ਗੋਪੇਤ੍ਵਾ, ਤਯੋ ਹੇਤੂ ਲਭਾਮਹਂ;
ਦੀਘਾਯੁਕੋ ਮਹਾਭੋਗੋ, ਤਿਕ੍ਖਪਞ੍ਞੋ ਭਵਾਮਹਂ.
੧੫੦. ‘‘ਸਂਕਿਤ੍ਤੇਨ੍ਤੋ ਚ [ਪਕਿਤ੍ਤੇਨ੍ਤੋਵ (ਸੀ.), ਪਕਿਤ੍ਤੇਨ੍ਤੇ ਚ (ਸ੍ਯਾ.)] ਸਬ੍ਬੇਸਂ, ਅਭਿਮਤ੍ਤਞ੍ਚ ਪੋਰਿਸਂ;
ਭਵਾਭਵੇ ਸਂਸਰਿਤ੍ਵਾ, ਏਤੇ ਠਾਨੇ ਲਭਾਮਹਂ.
੧੫੧. ‘‘ਅਪਰਿਮੇਯ੍ਯਸੀਲੇਸੁ, ਵਤ੍ਤਨ੍ਤਾ ਜਿਨਸਾਵਕਾ;
ਭਵੇਸੁ ਯਦਿ ਰਜ੍ਜੇਯ੍ਯੁਂ, ਵਿਪਾਕੋ ਕੀਦਿਸੋ ਭਵੇ.
੧੫੨. ‘‘ਸੁਚਿਣ੍ਣਂ ਮੇ ਪਞ੍ਚਸੀਲਂ, ਭਤਕੇਨ ਤਪਸ੍ਸਿਨਾ [ਵਿਪਸ੍ਸਿਨਾ (ਸੀ.)];
ਤੇਨ ਸੀਲੇਨਹਂ ਅਜ੍ਜ, ਮੋਚਯਿਂ ਸਬ੍ਬਬਨ੍ਧਨਾ.
੧੫੩. ‘‘ਅਪਰਿਮੇਯ੍ਯੇ ਇਤੋ ਕਪ੍ਪੇ, ਪਞ੍ਚਸੀਲਾਨਿ ਗੋਪਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਪਞ੍ਚਸੀਲਾਨਿਦਂ ਫਲਂ.
੧੫੪. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;
ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਪਞ੍ਚਸੀਲਸਮਾਦਾਨਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਪਞ੍ਚਸੀਲਸਮਾਦਾਨਿਯਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.