੩. ਤਿਸਰਣਗਮਨਿਯਤ੍ਥੇਰਅਪਦਾਨਂ

੧੦੬. ‘‘ਨਗਰੇ ਚਨ੍ਦਵਤਿਯਾ [ਬਨ੍ਧੁਮਤਿਯਾ (ਅਟ੍ਠ.)], ਮਾਤੁਉਪਟ੍ਠਾਕੋ [ਮਾਤੁਪਟ੍ਠਾਯਕੋ (ਸੀ.), ਮਾਤੁਪਟ੍ਠਾਨਕੋ (ਸ੍ਯਾ.)] ਅਹੁਂ;

ਅਨ੍ਧਾ ਮਾਤਾ ਪਿਤਾ ਮਯ੍ਹਂ, ਤੇ ਪੋਸੇਮਿ ਅਹਂ ਤਦਾ.

੧੦੭. ‘‘ਰਹੋਗਤੋ ਨਿਸੀਦਿਤ੍ਵਾ, ਏਵਂ ਚਿਨ੍ਤੇਸਹਂ ਤਦਾ;

ਪੋਸੇਨ੍ਤੋ ਮਾਤਾਪਿਤਰੋ, ਪਬ੍ਬਜ੍ਜਂ ਨ ਲਭਾਮਹਂ.

੧੦੮. ‘‘ਮਹਨ੍ਧਕਾਰਪਿਹਿਤਾ [ਤਮਨ੍ਧਕਾਰਪਿਹਿਤਾ (ਸ੍ਯਾ.)], ਤਿਵਿਧਗ੍ਗੀਹਿ ਡਯ੍ਹਰੇ;

ਏਤਾਦਿਸੇ ਭਵੇ [ਭਯੇ (ਸੀ.)] ਜਾਤੇ, ਨਤ੍ਥਿ ਕੋਚਿ ਵਿਨਾਯਕੋ.

੧੦੯. ‘‘ਬੁਦ੍ਧੋ ਲੋਕੇ ਸਮੁਪ੍ਪਨ੍ਨੋ, ਦਿਪ੍ਪਤਿ [ਦਿਬ੍ਬਤਿ (ਕ.)] [ਜਿਨਸਾਸਨਂ (ਸੀ.)] ਦਾਨਿ ਸਾਸਨਂ;

ਸਕ੍ਕਾ ਉਦ੍ਧਰਿਤੁਂ ਅਤ੍ਤਾ, ਪੁਞ੍ਞਕਾਮੇਨ ਜਨ੍ਤੁਨਾ.

੧੧੦. ‘‘ਉਗ੍ਗਯ੍ਹ ਤੀਣਿ ਸਰਣੇ, ਪਰਿਪੁਣ੍ਣਾਨਿ ਗੋਪਯਿਂ;

ਤੇਨ ਕਮ੍ਮੇਨ ਸੁਕਤੇਨ, ਪਟਿਮੋਕ੍ਖਾਮਿ ਦੁਗ੍ਗਤਿਂ.

੧੧੧. ‘‘ਨਿਸਭੋ ਨਾਮ ਸਮਣੋ, ਬੁਦ੍ਧਸ੍ਸ ਅਗ੍ਗਸਾਵਕੋ;

ਤਮਹਂ ਉਪਗਨ੍ਤ੍ਵਾਨ, ਸਰਣਗਮਨਂ ਗਹਿਂ.

੧੧੨. ‘‘ਵਸ੍ਸਸਤਸਹਸ੍ਸਾਨਿ, ਆਯੁ ਵਿਜ੍ਜਤਿ ਤਾਵਦੇ;

ਤਾਵਤਾ ਸਰਣਗਮਨਂ, ਪਰਿਪੁਣ੍ਣਂ ਅਗੋਪਯਿਂ.

੧੧੩. ‘‘ਚਰਿਮੇ ਵਤ੍ਤਮਾਨਮ੍ਹਿ, ਸਰਣਂ ਤਂ ਅਨੁਸ੍ਸਰਿਂ;

ਤੇਨ ਕਮ੍ਮੇਨ ਸੁਕਤੇਨ, ਤਾਵਤਿਂਸਂ ਅਗਚ੍ਛਹਂ.

੧੧੪. ‘‘ਦੇਵਲੋਕਗਤੋ ਸਨ੍ਤੋ, ਪੁਞ੍ਞਕਮ੍ਮਸਮਾਹਿਤੋ;

ਯਂ ਦੇਸਂ [ਯਂ ਯਂ ਦੇਸਂ (ਸ੍ਯਾ.)] ਉਪਪਜ੍ਜਾਮਿ [ਉਪਗਚ੍ਛਾਮਿ (ਸੀ.)], ਅਟ੍ਠ ਹੇਤੂ ਲਭਾਮਹਂ.

੧੧੫. ‘‘ਦਿਸਾਸੁ ਪੂਜਿਤੋ ਹੋਮਿ, ਤਿਕ੍ਖਪਞ੍ਞੋ ਭਵਾਮਹਂ;

ਸਬ੍ਬੇ ਦੇਵਾਨੁਵਤ੍ਤਨ੍ਤਿ, ਅਮਿਤਭੋਗਂ ਲਭਾਮਹਂ.

੧੧੬. ‘‘ਸੁਵਣ੍ਣਵਣ੍ਣੋ ਸਬ੍ਬਤ੍ਥ, ਪਟਿਕਨ੍ਤੋ ਭਵਾਮਹਂ;

ਮਿਤ੍ਤਾਨਂ ਅਚਲੋ ਹੋਮਿ, ਯਸੋ ਅਬ੍ਭੁਗ੍ਗਤੋ ਮਮਂ.

੧੧੭. ‘‘ਅਸੀਤਿਕ੍ਖਤ੍ਤੁ ਦੇਵਿਨ੍ਦੋ, ਦੇਵਰਜ੍ਜਮਕਾਰਯਿਂ;

ਦਿਬ੍ਬਸੁਖਂ ਅਨੁਭਵਿਂ, ਅਚ੍ਛਰਾਹਿ ਪੁਰਕ੍ਖਤੋ.

੧੧੮. ‘‘ਪਞ੍ਚਸਤ੍ਤਤਿਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਅਹੋਸਹਂ;

ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.

੧੧੯. ‘‘ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਪੁਞ੍ਞਕਮ੍ਮਸਮਾਹਿਤੋ;

ਪੁਰੇ ਸਾਵਤ੍ਥਿਯਂ ਜਾਤੋ, ਮਹਾਸਾਲੇ ਸੁਅਡ੍ਢਕੇ.

੧੨੦. ‘‘ਨਗਰਾ ਨਿਕ੍ਖਮਿਤ੍ਵਾਨ, ਦਾਰਕੇਹਿ ਪੁਰਕ੍ਖਤੋ;

ਹਸਖਿਡ੍ਡਸਮਙ੍ਗੀਹਂ [ਸਾਹਂ ਖਿਡ੍ਡਸਮਙ੍ਗੀ (ਸ੍ਯਾ.)], ਸਙ੍ਘਾਰਾਮਂ ਉਪਾਗਮਿਂ.

੧੨੧. ‘‘ਤਤ੍ਥਦ੍ਦਸਾਸਿਂ [ਤਤ੍ਥਦ੍ਦਸਾਹਂ (ਕ.)] ਸਮਣਂ, ਵਿਪ੍ਪਮੁਤ੍ਤਂ ਨਿਰੂਪਧਿਂ;

ਸੋ ਮੇ ਧਮ੍ਮਮਦੇਸੇਸਿ, ਸਰਣਞ੍ਚ ਅਦਾਸਿ ਮੇ.

੧੨੨. ‘‘ਸੋਹਂ ਸੁਤ੍ਵਾਨ ਸਰਣਂ, ਸਰਣਂ ਮੇ ਅਨੁਸ੍ਸਰਿਂ;

ਏਕਾਸਨੇ ਨਿਸੀਦਿਤ੍ਵਾ, ਅਰਹਤ੍ਤਮਪਾਪੁਣਿਂ.

੧੨੩. ‘‘ਜਾਤਿਯਾ ਸਤ੍ਤਮੇ ਵਸ੍ਸੇ, ਅਰਹਤ੍ਤਮਪਾਪੁਣਿਂ;

ਉਪਸਮ੍ਪਾਦਯਿ ਬੁਦ੍ਧੋ, ਗੁਣਮਞ੍ਞਾਯ ਚਕ੍ਖੁਮਾ.

੧੨੪. ‘‘ਅਪਰਿਮੇਯ੍ਯੇ ਇਤੋ ਕਪ੍ਪੇ, ਸਰਣਾਨਿ ਅਗਚ੍ਛਹਂ;

ਤਤੋ ਮੇ ਸੁਕਤਂ ਕਮ੍ਮਂ, ਫਲਂ ਦਸ੍ਸੇਸਿ ਮੇ ਇਧ.

੧੨੫. ‘‘ਸੁਗੋਪਿਤਂ ਮੇ ਸਰਣਂ, ਮਾਨਸਂ ਸੁਪ੍ਪਣੀਹਿਤਂ;

ਅਨੁਭੋਤ੍ਵਾ ਯਸਂ ਸਬ੍ਬਂ, ਪਤ੍ਤੋਮ੍ਹਿ ਅਚਲਂ ਪਦਂ.

੧੨੬. ‘‘ਯੇਸਂ ਸੋਤਾਵਧਾਨਤ੍ਥਿ, ਸੁਣੋਥ ਮਮ ਭਾਸਤੋ;

ਅਹਂ [ਅਤ੍ਥਂ (ਸ੍ਯਾ.)] ਵੋ ਕਥਯਿਸ੍ਸਾਮਿ, ਸਾਮਂ ਦਿਟ੍ਠਂ ਪਦਂ ਮਮ.

੧੨੭. ‘‘‘ਬੁਦ੍ਧੋ ਲੋਕੇ ਸਮੁਪ੍ਪਨ੍ਨੋ, ਵਤ੍ਤਤੇ ਜਿਨਸਾਸਨਂ;

ਅਮਤਾ ਵਾਦਿਤਾ ਭੇਰੀ, ਸੋਕਸਲ੍ਲਵਿਨੋਦਨਾ.

੧੨੮. ‘‘‘ਯਥਾਸਕੇਨ ਥਾਮੇਨ, ਪੁਞ੍ਞਕ੍ਖੇਤ੍ਤੇ ਅਨੁਤ੍ਤਰੇ;

ਅਧਿਕਾਰਂ ਕਰੇਯ੍ਯਾਥ, ਪਸ੍ਸਯਿਸ੍ਸਥ ਨਿਬ੍ਬੁਤਿਂ.

੧੨੯. ‘‘‘ਪਗ੍ਗਯ੍ਹ ਤੀਣਿ ਸਰਣੇ, ਪਞ੍ਚਸੀਲਾਨਿ ਗੋਪਿਯ;

ਬੁਦ੍ਧੇ ਚਿਤ੍ਤਂ ਪਸਾਦੇਤ੍ਵਾ, ਦੁਕ੍ਖਸ੍ਸਨ੍ਤਂ ਕਰਿਸ੍ਸਥ.

੧੩੦. ‘‘‘ਸਮ੍ਮਾ ਧਮ੍ਮਂ ਭਾਵੇਤ੍ਵਾਨ [ਮਮੋਪਮਂ ਕਰਿਤ੍ਵਾਨ (ਸੀ. ਸ੍ਯਾ.)], ਸੀਲਾਨਿ ਪਰਿਗੋਪਿਯ;

ਅਚਿਰਂ ਅਰਹਤ੍ਤਂ ਵੋ, ਸਬ੍ਬੇਪਿ ਪਾਪੁਣਿਸ੍ਸਥ.

੧੩੧. ‘‘‘ਤੇਵਿਜ੍ਜੋ ਇਦ੍ਧਿਪਤ੍ਤੋਮ੍ਹਿ, ਚੇਤੋਪਰਿਯਕੋਵਿਦੋ;

ਸਾਵਕੋ ਤੇ ਮਹਾਵੀਰ, ਸਰਣੋ [ਚਰਣੇ (ਸੀ. ਸ੍ਯਾ.)] ਵਨ੍ਦਤਿ ਸਤ੍ਥੁਨੋ’.

੧੩੨. ‘‘ਅਪਰਿਮੇਯ੍ਯੇ ਇਤੋ ਕਪ੍ਪੇ, ਸਰਣਂ ਬੁਦ੍ਧਸ੍ਸ ਗਚ੍ਛਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਸਰਣਂ ਗਮਨੇ ਫਲਂ.

੧੩੩. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਤਿਸਰਣਗਮਨਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਤਿਸਰਣਗਮਨਿਯਤ੍ਥੇਰਸ੍ਸਾਪਦਾਨਂ ਤਤਿਯਂ.