੨. ਉਪਵਾਨਤ੍ਥੇਰਅਪਦਾਨਂ

੫੨. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਬ੍ਬਧਮ੍ਮਾਨ ਪਾਰਗੂ;

ਜਲਿਤ੍ਵਾ ਅਗ੍ਗਿਕ੍ਖਨ੍ਧੋਵ, ਸਮ੍ਬੁਦ੍ਧੋ ਪਰਿਨਿਬ੍ਬੁਤੋ.

੫੩. ‘‘ਮਹਾਜਨਾ ਸਮਾਗਮ੍ਮ, ਪੂਜਯਿਤ੍ਵਾ ਤਥਾਗਤਂ;

ਚਿਤਂ ਕਤ੍ਵਾਨ ਸੁਕਤਂ, ਸਰੀਰਂ ਅਭਿਰੋਪਯੁਂ.

੫੪. ‘‘ਸਰੀਰਕਿਚ੍ਚਂ ਕਤ੍ਵਾਨ, ਧਾਤੁਂ ਤਤ੍ਥ ਸਮਾਨਯੁਂ;

ਸਦੇਵਮਾਨੁਸਾ ਸਬ੍ਬੇ, ਬੁਦ੍ਧਥੂਪਂ ਅਕਂਸੁ ਤੇ.

੫੫. ‘‘ਪਠਮਾ ਕਞ੍ਚਨਮਯਾ, ਦੁਤਿਯਾਸਿ ਮਣੀਮਯਾ;

ਤਤਿਯਾ ਰੂਪਿਯਮਯਾ, ਚਤੁਤ੍ਥੀ ਫਲਿਕਾਮਯਾ.

੫੬. ‘‘ਤਥਾ [ਤਤ੍ਥ (ਸ੍ਯਾ. ਕ.)] ਪਞ੍ਚਮਿਯਾ ਭੂਮਿ [ਨੇਮਿ (ਸੀ.)], ਲੋਹਿਤਙ੍ਗਮਯਾ ਅਹੁ;

ਛਟ੍ਠਾ ਮਸਾਰਗਲ੍ਲਸ੍ਸ, ਸਬ੍ਬਰਤਨਮਯੂਪਰਿ.

੫੭. ‘‘ਜਙ੍ਘਾ ਮਣਿਮਯਾ ਆਸਿ, ਵੇਦਿਕਾ ਰਤਨਮਯਾ;

ਸਬ੍ਬਸੋਣ੍ਣਮਯੋ ਥੂਪੋ, ਉਦ੍ਧਂ ਯੋਜਨਮੁਗ੍ਗਤੋ.

੫੮. ‘‘ਦੇਵਾ ਤਤ੍ਥ ਸਮਾਗਨ੍ਤ੍ਵਾ, ਏਕਤੋ ਮਨ੍ਤਯੁਂ ਤਦਾ;

ਮਯਮ੍ਪਿ ਥੂਪਂ ਕਸ੍ਸਾਮ, ਲੋਕਨਾਥਸ੍ਸ ਤਾਦਿਨੋ.

੫੯. ‘‘ਧਾਤੁ ਆਵੇਣਿਕਾ ਨਤ੍ਥਿ, ਸਰੀਰਂ ਏਕਪਿਣ੍ਡਿਤਂ;

ਇਮਮ੍ਹਿ ਬੁਦ੍ਧਥੂਪਮ੍ਹਿ, ਕਸ੍ਸਾਮ ਕਞ੍ਚੁਕਂ ਮਯਂ.

੬੦. ‘‘ਦੇਵਾ ਸਤ੍ਤਹਿ ਰਤ੍ਨੇਹਿ [ਸਤ੍ਤਰਤਨੇਹਿ (ਸੀ.)], ਅਞ੍ਞਂ ਵਡ੍ਢੇਸੁ ਯੋਜਨਂ;

ਥੂਪੋ ਦ੍ਵਿਯੋਜਨੁਬ੍ਬੇਧੋ, ਤਿਮਿਰਂ ਬ੍ਯਪਹਨ੍ਤਿ ਸੋ.

੬੧. ‘‘ਨਾਗਾ ਤਤ੍ਥ ਸਮਾਗਨ੍ਤ੍ਵਾ, ਏਕਤੋ ਮਨ੍ਤਯੁਂ ਤਦਾ;

ਮਨੁਸ੍ਸਾ ਚੇਵ ਦੇਵਾ ਚ, ਬੁਦ੍ਧਥੂਪਂ ਅਕਂਸੁ ਤੇ.

੬੨. ‘‘ਮਾ ਨੋ ਪਮਤ੍ਤਾ ਅਸ੍ਸੁਮ੍ਹ [ਅਸ੍ਸੁਮ੍ਹਾ (ਸੀ. ਸ੍ਯਾ.), ਆਸਿਮ੍ਹਾ (?)], ਅਪ੍ਪਮਤ੍ਤਾ ਸਦੇਵਕਾ;

ਮਯਮ੍ਪਿ ਥੂਪਂ ਕਸ੍ਸਾਮ, ਲੋਕਨਾਥਸ੍ਸ ਤਾਦਿਨੋ.

੬੩. ‘‘ਇਨ੍ਦਨੀਲਂ ਮਹਾਨੀਲਂ, ਅਥੋ ਜੋਤਿਰਸਂ ਮਣਿਂ;

ਏਕਤੋ ਸਨ੍ਨਿਪਾਤੇਤ੍ਵਾ, ਬੁਦ੍ਧਥੂਪਂ ਅਛਾਦਯੁਂ.

੬੪. ‘‘ਸਬ੍ਬਂ ਮਣਿਮਯਂ ਆਸਿ, ਤਾਵਤਾ ਬੁਦ੍ਧਚੇਤਿਯਂ;

ਤਿਯੋਜਨਸਮੁਬ੍ਬਿਦ੍ਧਂ [ਤੀਣਿ ਯੋਜਨਮੁਬ੍ਬਿਦ੍ਧਂ (ਸੀ. ਕ.)], ਆਲੋਕਕਰਣਂ ਤਦਾ.

੬੫. ‘‘ਗਰੁਲ਼ਾ ਚ ਸਮਾਗਨ੍ਤ੍ਵਾ, ਏਕਤੋ ਮਨ੍ਤਯੁਂ ਤਦਾ;

ਮਨੁਸ੍ਸਾ ਦੇਵਾ ਨਾਗਾ ਚ, ਬੁਦ੍ਧਥੂਪਂ ਅਕਂਸੁ ਤੇ.

੬੬. ‘‘‘ਮਾ ਨੋ ਪਮਤ੍ਤਾ ਅਸ੍ਸੁਮ੍ਹ, ਅਪ੍ਪਮਤ੍ਤਾ ਸਦੇਵਕਾ;

ਮਯਮ੍ਪਿ ਥੂਪਂ ਕਸ੍ਸਾਮ, ਲੋਕਨਾਥਸ੍ਸ ਤਾਦਿਨੋ’.

੬੭. ‘‘ਸਬ੍ਬਂ ਮਣਿਮਯਂ ਥੂਪਂ, ਅਕਰੁਂ ਤੇ ਚ ਕਞ੍ਚੁਕਂ [ਸਬ੍ਬਮਣਿਮਯਂ ਥੂਪੇ, ਅਕਰੁਤ੍ਤਰਕਞ੍ਚੁਕਂ (ਸੀ.)];

ਯੋਜਨਂ ਤੇਪਿ ਵਡ੍ਢੇਸੁਂ, ਆਯਤਂ ਬੁਦ੍ਧਚੇਤਿਯਂ.

੬੮. ‘‘ਚਤੁਯੋਜਨਮੁਬ੍ਬਿਦ੍ਧੋ, ਬੁਦ੍ਧਥੂਪੋ ਵਿਰੋਚਤਿ;

ਓਭਾਸੇਤਿ ਦਿਸਾ ਸਬ੍ਬਾ, ਸਤਰਂਸੀਵ ਉਗ੍ਗਤੋ.

੬੯. ‘‘ਕੁਮ੍ਭਣ੍ਡਾ ਚ ਸਮਾਗਨ੍ਤ੍ਵਾ, ਏਕਤੋ ਮਨ੍ਤਯੁਂ ਤਦਾ;

ਮਨੁਸ੍ਸਾ ਚੇਵ ਦੇਵਾ ਚ, ਨਾਗਾ ਚ ਗਰੁਲ਼ਾ ਤਥਾ.

ਪਚ੍ਚੇਕਂ ਬੁਦ੍ਧਸੇਟ੍ਠਸ੍ਸ, ਅਕਂਸੁ ਥੂਪਮੁਤ੍ਤਮਂ.

੭੦. ‘‘‘ਮਾ ਨੋ ਪਮਤ੍ਤਾ ਅਸ੍ਸੁਮ੍ਹ, ਅਪ੍ਪਮਤ੍ਤਾ ਸਦੇਵਕਾ;

ਮਯਮ੍ਪਿ ਥੂਪਂ ਕਸ੍ਸਾਮ, ਲੋਕਨਾਥਸ੍ਸ ਤਾਦਿਨੋ;

ਰਤਨੇਹਿ ਛਾਦੇਸ੍ਸਾਮ, ਆਯਤਂ ਬੁਦ੍ਧਚੇਤਿਯਂ’.

੭੧. ‘‘ਯੋਜਨਂ ਤੇਪਿ ਵਡ੍ਢੇਸੁਂ, ਆਯਤਂ ਬੁਦ੍ਧਚੇਤਿਯਂ;

ਪਞ੍ਚਯੋਜਨਮੁਬ੍ਬਿਦ੍ਧੋ, ਥੂਪੋ ਓਭਾਸਤੇ ਤਦਾ.

੭੨. ‘‘ਯਕ੍ਖਾ ਤਤ੍ਥ ਸਮਾਗਨ੍ਤ੍ਵਾ, ਏਕਤੋ ਮਨ੍ਤਯੁਂ ਤਦਾ;

ਮਨੁਸ੍ਸਾ ਦੇਵਾ ਨਾਗਾ ਚ, ਗਰੁਲ਼ਾ ਕੁਮ੍ਭਅਣ੍ਡਕਾ.

੭੩. ‘‘ਪਚ੍ਚੇਕਂ ਬੁਦ੍ਧਸੇਟ੍ਠਸ੍ਸ, ਅਕਂਸੁ ਥੂਪਮੁਤ੍ਤਮਂ;

‘ਮਾ ਨੋ ਪਮਤ੍ਤਾ ਅਸ੍ਸੁਮ੍ਹ, ਅਪ੍ਪਮਤ੍ਤਾ ਸਦੇਵਕਾ.

੭੪. ‘‘‘ਮਯਮ੍ਪਿ ਥੂਪਂ ਕਸ੍ਸਾਮ, ਲੋਕਨਾਥਸ੍ਸ ਤਾਦਿਨੋ;

ਫਲਿਕਾਹਿ ਛਾਦੇਸ੍ਸਾਮ, ਆਯਤਂ ਬੁਦ੍ਧਚੇਤਿਯਂ’.

੭੫. ‘‘ਯੋਜਨਂ ਤੇਪਿ ਵਡ੍ਢੇਸੁਂ, ਆਯਤਂ ਬੁਦ੍ਧਚੇਤਿਯਂ;

ਛ ਯੋਜਨਾਨਿ ਉਬ੍ਬਿਦ੍ਧੋ, ਥੂਪੋ ਓਭਾਸਤੇ ਤਦਾ.

੭੬. ‘‘ਗਨ੍ਧਬ੍ਬਾ ਚ ਸਮਾਗਨ੍ਤ੍ਵਾ, ਏਕਤੋ ਮਨ੍ਤਯੁਂ ਤਦਾ;

‘ਮਨੁਜਾ ਦੇਵਤਾ ਨਾਗਾ, ਗਰੁਲ਼ਾ ਕੁਮ੍ਭਯਕ੍ਖਕਾ.

੭੭. ‘‘‘ਸਬ੍ਬੇਕਂਸੁ ਬੁਦ੍ਧਥੂਪਂ, ਮਯਮੇਤ੍ਥ ਅਕਾਰਕਾ;

ਮਯਮ੍ਪਿ ਥੂਪਂ ਕਸ੍ਸਾਮ, ਲੋਕਨਾਥਸ੍ਸ ਤਾਦਿਨੋ’.

੭੮. ‘‘ਵੇਦਿਯੋ ਸਤ੍ਤ ਕਤ੍ਵਾਨ, ਛਤ੍ਤਮਾਰੋਪਯਿਂਸੁ ਤੇ;

ਸਬ੍ਬਸੋਣ੍ਣਮਯਂ ਥੂਪਂ, ਗਨ੍ਧਬ੍ਬਾ ਕਾਰਯੁਂ ਤਦਾ.

੭੯. ‘‘ਸਤ੍ਤਯੋਜਨਮੁਬ੍ਬਿਦ੍ਧੋ, ਥੂਪੋ ਓਭਾਸਤੇ ਤਦਾ;

ਰਤ੍ਤਿਨ੍ਦਿਵਾ ਨ ਞਾਯਨ੍ਤਿ, ਆਲੋਕੋ ਹੋਤਿ [ਆਲੋਕਾ ਹੋਨ੍ਤਿ (ਸ੍ਯਾ. ਕ.)] ਸਬ੍ਬਦਾ.

੮੦. ‘‘ਅਭਿਭੋਨ੍ਤਿ ਨ ਤਸ੍ਸਾਭਾ, ਚਨ੍ਦਸੂਰਾ ਸਤਾਰਕਾ;

ਸਮਨ੍ਤਾ ਯੋਜਨਸਤੇ, ਪਦੀਪੋਪਿ ਨ ਪਜ੍ਜਲਿ.

੮੧. ‘‘ਤੇਨ ਕਾਲੇਨ ਯੇ ਕੇਚਿ, ਥੂਪਂ ਪੂਜੇਨ੍ਤਿ ਮਾਨੁਸਾ;

ਨ ਤੇ ਥੂਪਮਾਰੁਹਨ੍ਤਿ, ਅਮ੍ਬਰੇ ਉਕ੍ਖਿਪਨ੍ਤਿ ਤੇ.

੮੨. ‘‘ਦੇਵੇਹਿ ਠਪਿਤੋ ਯਕ੍ਖੋ, ਅਭਿਸਮ੍ਮਤਨਾਮਕੋ;

ਧਜਂ ਵਾ ਪੁਪ੍ਫਦਾਮਂ ਵਾ, ਅਭਿਰੋਪੇਤਿ ਉਤ੍ਤਰਿ.

੮੩. ‘‘ਨ ਤੇ ਪਸ੍ਸਨ੍ਤਿ ਤਂ ਯਕ੍ਖਂ, ਦਾਮਂ ਪਸ੍ਸਨ੍ਤਿ ਗਚ੍ਛਤੋ;

ਏਵਂ ਪਸ੍ਸਿਤ੍ਵਾ ਗਚ੍ਛਨ੍ਤਾ, ਸਬ੍ਬੇ ਗਚ੍ਛਨ੍ਤਿ ਸੁਗ੍ਗਤਿਂ.

੮੪. ‘‘ਵਿਰੁਦ੍ਧਾ [ਵਿਸਦ੍ਧਾ (ਸੀ.)] ਯੇ ਪਾਵਚਨੇ, ਪਸਨ੍ਨਾ ਯੇ ਚ ਸਾਸਨੇ;

ਪਾਟਿਹੇਰਂ ਦਟ੍ਠੁਕਾਮਾ, ਥੂਪਂ ਪੂਜੇਨ੍ਤਿ ਮਾਨੁਸਾ.

੮੫. ‘‘ਨਗਰੇ ਹਂਸਵਤਿਯਾ, ਅਹੋਸਿਂ ਭਤਕੋ [ਵਰਕੋ (ਸ੍ਯਾ. ਕ.)] ਤਦਾ;

ਆਮੋਦਿਤਂ ਜਨਂ ਦਿਸ੍ਵਾ, ਏਵਂ ਚਿਨ੍ਤੇਸਹਂ ਤਦਾ.

੮੬. ‘‘‘ਉਲ਼ਾਰੋ ਭਗਵਾ ਹੇਸੋ, ਯਸ੍ਸ ਧਾਤੁਧਰੇਦਿਸਂ;

ਇਮਾ ਚ ਜਨਤਾ ਤੁਟ੍ਠਾ, ਕਾਰਂ ਕੁਬ੍ਬਂ ਨ ਤਪ੍ਪਰੇ [ਕੁਬ੍ਬਨ੍ਤਨਪ੍ਪਕਂ (ਸੀ.)].

੮੭. ‘‘‘ਅਹਮ੍ਪਿ ਕਾਰਂ ਕਸ੍ਸਾਮਿ, ਲੋਕਨਾਥਸ੍ਸ ਤਾਦਿਨੋ;

ਤਸ੍ਸ ਧਮ੍ਮੇਸੁ ਦਾਯਾਦੋ, ਭਵਿਸ੍ਸਾਮਿ ਅਨਾਗਤੇ’.

੮੮. ‘‘ਸੁਧੋਤਂ ਰਜਕੇਨਾਹਂ, ਉਤ੍ਤਰੇਯ੍ਯਪਟਂ ਮਮ;

ਵੇਲ਼ਗ੍ਗੇ ਆਲਗੇਤ੍ਵਾਨ, ਧਜਂ ਉਕ੍ਖਿਪਿਮਮ੍ਬਰੇ.

੮੯. ‘‘ਅਭਿਸਮ੍ਮਤਕੋ ਗਯ੍ਹ, ਅਮ੍ਬਰੇਹਾਸਿ ਮੇ ਧਜਂ;

ਵਾਤੇਰਿਤਂ ਧਜਂ ਦਿਸ੍ਵਾ, ਭਿਯ੍ਯੋ ਹਾਸਂ ਜਨੇਸਹਂ.

੯੦. ‘‘ਤਤ੍ਥ ਚਿਤ੍ਤਂ ਪਸਾਦੇਤ੍ਵਾ, ਸਮਣਂ ਉਪਸਙ੍ਕਮਿਂ;

ਤਂ ਭਿਕ੍ਖੁਂ ਅਭਿਵਾਦੇਤ੍ਵਾ, ਵਿਪਾਕਂ ਪੁਚ੍ਛਹਂ ਧਜੇ.

੯੧. ‘‘ਸੋ ਮੇ ਕਥੇਸਿ ਆਨਨ੍ਦ, ਪੀਤਿਸਞ੍ਜਨਨਂ ਮਮ;

‘ਤਸ੍ਸ ਧਜਸ੍ਸ ਵਿਪਾਕਂ, ਅਨੁਭੋਸ੍ਸਸਿ ਸਬ੍ਬਦਾ.

੯੨. ‘‘‘ਹਤ੍ਥੀ ਅਸ੍ਸਾ ਰਥਾ ਪਤ੍ਤੀ, ਸੇਨਾ ਚ ਚਤੁਰਙ੍ਗਿਨੀ;

ਪਰਿਵਾਰੇਸ੍ਸਨ੍ਤਿ ਤਂ ਨਿਚ੍ਚਂ, ਧਜਦਾਨਸ੍ਸਿਦਂ ਫਲਂ.

੯੩. ‘‘‘ਸਟ੍ਠਿਤੂਰਿਯਸਹਸ੍ਸਾਨਿ, ਭੇਰਿਯੋ ਸਮਲਙ੍ਕਤਾ;

ਪਰਿਵਾਰੇਸ੍ਸਨ੍ਤਿ ਤਂ ਨਿਚ੍ਚਂ, ਧਜਦਾਨਸ੍ਸਿਦਂ ਫਲਂ.

੯੪. ‘‘‘ਛਲ਼ਾਸੀਤਿਸਹਸ੍ਸਾਨਿ, ਨਾਰਿਯੋ ਸਮਲਙ੍ਕਤਾ;

ਵਿਚਿਤ੍ਤਵਤ੍ਥਾਭਰਣਾ, ਆਮੁਤ੍ਤਮਣਿਕੁਣ੍ਡਲਾ.

੯੫. ‘‘‘ਅਲ਼ਾਰਪਮ੍ਹਾ ਹਸੁਲਾ, ਸੁਸਞ੍ਞਾ ਤਨੁਮਜ੍ਝਿਮਾ;

ਪਰਿਵਾਰੇਸ੍ਸਨ੍ਤਿ ਤਂ ਨਿਚ੍ਚਂ, ਧਜਦਾਨਸ੍ਸਿਦਂ ਫਲਂ.

੯੬. ‘‘‘ਤਿਂਸਕਪ੍ਪਸਹਸ੍ਸਾਨਿ, ਦੇਵਲੋਕੇ ਰਮਿਸ੍ਸਸਿ;

ਅਸੀਤਿਕ੍ਖਤ੍ਤੁਂ ਦੇਵਿਨ੍ਦੋ, ਦੇਵਰਜ੍ਜਂ ਕਰਿਸ੍ਸਸਿ.

੯੭. ‘‘‘ਸਹਸ੍ਸਕ੍ਖਤ੍ਤੁਂ ਰਾਜਾ ਚ, ਚਕ੍ਕਵਤ੍ਤੀ ਭਵਿਸ੍ਸਸਿ;

ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.

੯੮. ‘‘‘ਕਪ੍ਪਸਤਸਹਸ੍ਸਮ੍ਹਿ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੯੯. ‘‘‘ਦੇਵਲੋਕਾ ਚਵਿਤ੍ਵਾਨ, ਸੁਕ੍ਕਮੂਲੇਨ ਚੋਦਿਤੋ;

ਪੁਞ੍ਞਕਮ੍ਮੇਨ ਸਂਯੁਤ੍ਤੋ, ਬ੍ਰਹ੍ਮਬਨ੍ਧੁ ਭਵਿਸ੍ਸਸਿ.

੧੦੦. ‘‘‘ਅਸੀਤਿਕੋਟਿਂ ਛਡ੍ਡੇਤ੍ਵਾ, ਦਾਸੇ ਕਮ੍ਮਕਰੇ ਬਹੂ;

ਗੋਤਮਸ੍ਸ ਭਗਵਤੋ, ਸਾਸਨੇ ਪਬ੍ਬਜਿਸ੍ਸਸਿ.

੧੦੧. ‘‘‘ਆਰਾਧਯਿਤ੍ਵਾ ਸਮ੍ਬੁਦ੍ਧਂ, ਗੋਤਮਂ ਸਕ੍ਯਪੁਙ੍ਗਵਂ;

ਉਪਵਾਨੋਤਿ ਨਾਮੇਨ, ਹੇਸ੍ਸਸਿ ਸਤ੍ਥੁ ਸਾਵਕੋ’.

੧੦੨. ‘‘ਸਤਸਹਸ੍ਸੇ ਕਤਂ ਕਮ੍ਮਂ, ਫਲਂ ਦਸ੍ਸੇਸਿ ਮੇ ਇਧ;

ਸੁਮੁਤ੍ਤੋ ਸਰਵੇਗੋਵ ਕਿਲੇਸੇ ਝਾਪਯੀ ਮਮ.

੧੦੩. ‘‘ਚਕ੍ਕਵਤ੍ਤਿਸ੍ਸ ਸਨ੍ਤਸ੍ਸ, ਚਤੁਦੀਪਿਸ੍ਸਰਸ੍ਸ ਮੇ;

ਤਿਯੋਜਨਾਨਿ ਸਮਨ੍ਤਾ, ਉਸ੍ਸੀਸਨ੍ਤਿ ਧਜਾ ਸਦਾ.

੧੦੪. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਧਜਦਾਨਸ੍ਸਿਦਂ ਫਲਂ.

੧੦੫. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਉਪਵਾਨੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਉਪਵਾਨਤ੍ਥੇਰਸ੍ਸਾਪਦਾਨਂ ਦੁਤਿਯਂ.