੧. ਸੁਭੂਤਿਤ੍ਥੇਰਅਪਦਾਨਂ

੧. ‘‘ਹਿਮਵਨ੍ਤਸ੍ਸਾਵਿਦੂਰੇ, ਨਿਸਭੋ ਨਾਮ ਪਬ੍ਬਤੋ;

ਅਸ੍ਸਮੋ ਸੁਕਤੋ ਮਯ੍ਹਂ, ਪਣ੍ਣਸਾਲਾ ਸੁਮਾਪਿਤਾ.

੨. ‘‘ਕੋਸਿਯੋ ਨਾਮ ਨਾਮੇਨ, ਜਟਿਲੋ ਉਗ੍ਗਤਾਪਨੋ;

ਏਕਾਕਿਯੋ [ਏਕਾਕਿਕੋ (ਕ.)] ਅਦੁਤਿਯੋ, ਵਸਾਮਿ ਨਿਸਭੇ ਤਦਾ.

੩. ‘‘ਫਲਂ ਮੂਲਞ੍ਚ ਪਣ੍ਣਞ੍ਚ, ਨ ਭੁਞ੍ਜਾਮਿ ਅਹਂ ਤਦਾ;

ਪਵਤ੍ਤਂਵ ਸੁਪਾਤਾਹਂ [ਪਵਤ੍ਤਪਣ੍ਡੁਪਤ੍ਤਾਨਿ (ਸੀ.)], ਉਪਜੀਵਾਮਿ ਤਾਵਦੇ.

੪. ‘‘ਨਾਹਂ ਕੋਪੇਮਿ ਆਜੀਵਂ, ਚਜਮਾਨੋਪਿ ਜੀਵਿਤਂ;

ਆਰਾਧੇਮਿ ਸਕਂ ਚਿਤ੍ਤਂ, ਵਿਵਜ੍ਜੇਮਿ ਅਨੇਸਨਂ.

੫. ‘‘ਰਾਗੂਪਸਂਹਿਤਂ ਚਿਤ੍ਤਂ, ਯਦਾ ਉਪ੍ਪਜ੍ਜਤੇ ਮਮ;

ਸਯਂਵ ਪਚ੍ਚਵੇਕ੍ਖਾਮਿ, ਏਕਗ੍ਗੋ ਤਂ ਦਮੇਮਹਂ.

੬. ‘‘‘ਰਜ੍ਜਸੇ ਰਜ੍ਜਨੀਯੇ ਚ, ਦੁਸ੍ਸਨੀਯੇ ਚ ਦੁਸ੍ਸਸੇ;

ਮੁਯ੍ਹਸੇ ਮੋਹਨੀਯੇ ਚ, ਨਿਕ੍ਖਮਸ੍ਸੁ ਵਨਾ ਤੁਵਂ.

੭. ‘‘‘ਵਿਸੁਦ੍ਧਾਨਂ ਅਯਂ ਵਾਸੋ, ਨਿਮ੍ਮਲਾਨਂ ਤਪਸ੍ਸਿਨਂ;

ਮਾ ਖੋ ਵਿਸੁਦ੍ਧਂ ਦੂਸੇਸਿ, ਨਿਕ੍ਖਮਸ੍ਸੁ ਵਨਾ ਤੁਵਂ.

੮. ‘‘‘ਅਗਾਰਿਕੋ ਭਵਿਤ੍ਵਾਨ, ਯਦਾ ਪੁਤ੍ਤਂ [ਸਦਾਯੁਤ੍ਤਂ (ਸੀ.), ਯਦਾਯੁਤ੍ਤਂ (ਸ੍ਯਾ.)], ਲਭਿਸ੍ਸਸਿ;

ਉਭੋਪਿ ਮਾ ਵਿਰਾਧੇਸਿ, ਨਿਕ੍ਖਮਸ੍ਸੁ ਵਨਾ ਤੁਵਂ.

੯. ‘‘‘ਛਵਾਲਾਤਂ ਯਥਾ ਕਟ੍ਠਂ, ਨ ਕ੍ਵਚਿ ਕਿਚ੍ਚਕਾਰਕਂ;

ਨੇਵ ਗਾਮੇ ਅਰਞ੍ਞੇ ਵਾ, ਨ ਹਿ ਤਂ ਕਟ੍ਠਸਮ੍ਮਤਂ.

੧੦. ‘‘‘ਛਵਾਲਾਤੂਪਮੋ ਤ੍ਵਂਸਿ, ਨ ਗਿਹੀ ਨਾਪਿ ਸਞ੍ਞਤੋ;

ਉਭਤੋ ਮੁਤ੍ਤਕੋ ਅਜ੍ਜ, ਨਿਕ੍ਖਮਸ੍ਸੁ ਵਨਾ ਤੁਵਂ.

੧੧. ‘‘‘ਸਿਯਾ ਨੁ ਖੋ ਤਵ ਏਤਂ, ਕੋ ਪਜਾਨਾਤਿ ਤੇ ਇਦਂ;

ਸਦ੍ਧਾਧੁਰਂ ਵਹਿਸਿ [ਸਦ੍ਧਾਧੁਰਂ ਜਹਸਿ (ਸੀ.), ਸੀਘਂ ਧੁਰਂ ਵਹਿਸਿ (ਸ੍ਯਾ.)] ਮੇ, ਕੋਸਜ੍ਜਬਹੁਲਾਯ ਚ.

੧੨. ‘‘‘ਜਿਗੁਚ੍ਛਿਸ੍ਸਨ੍ਤਿ ਤਂ ਵਿਞ੍ਞੂ, ਅਸੁਚਿਂ ਨਾਗਰਿਕੋ ਯਥਾ;

ਆਕਡ੍ਢਿਤ੍ਵਾਨ ਇਸਯੋ, ਚੋਦਯਿਸ੍ਸਨ੍ਤਿ ਤਂ ਸਦਾ.

੧੩. ‘‘‘ਤਂ ਵਿਞ੍ਞੂ ਪਵਦਿਸ੍ਸਨ੍ਤਿ, ਸਮਤਿਕ੍ਕਨ੍ਤਸਾਸਨਂ;

ਸਂਵਾਸਂ ਅਲਭਨ੍ਤੋ ਹਿ, ਕਥਂ ਜੀਵਿਹਿਸਿ [ਜੀਵਿਸ੍ਸਸਿ (ਸੀ.)] ਤੁਵਂ.

੧੪. ‘‘‘ਤਿਧਾਪਭਿਨ੍ਨਂ ਮਾਤਙ੍ਗਂ, ਕੁਞ੍ਜਰਂ ਸਟ੍ਠਿਹਾਯਨਂ;

ਬਲੀ ਨਾਗੋ ਉਪਗਨ੍ਤ੍ਵਾ, ਯੂਥਾ ਨੀਹਰਤੇ ਗਜਂ.

੧੫. ‘‘‘ਯੂਥਾ ਵਿਨਿਸ੍ਸਟੋ ਸਨ੍ਤੋ, ਸੁਖਂ ਸਾਤਂ ਨ ਵਿਨ੍ਦਤਿ;

ਦੁਕ੍ਖਿਤੋ ਵਿਮਨੋ ਹੋਤਿ, ਪਜ੍ਝਾਯਨ੍ਤੋ ਪਵੇਧਤਿ.

੧੬. ‘‘‘ਤਥੇਵ ਜਟਿਲਾ ਤਮ੍ਪਿ, ਨੀਹਰਿਸ੍ਸਨ੍ਤਿ ਦੁਮ੍ਮਤਿਂ;

ਤੇਹਿ ਤ੍ਵਂ ਨਿਸ੍ਸਟੋ ਸਨ੍ਤੋ, ਸੁਖਂ ਸਾਤਂ ਨ ਲਚ੍ਛਸਿ.

੧੭. ‘‘‘ਦਿਵਾ ਵਾ ਯਦਿ ਵਾ ਰਤ੍ਤਿਂ, ਸੋਕਸਲ੍ਲਸਮਪ੍ਪਿਤੋ;

ਡਯ੍ਹਸਿ ਪਰਿਲ਼ਾਹੇਨ, ਗਜੋ ਯੂਥਾਵ ਨਿਸ੍ਸਟੋ.

੧੮. ‘‘‘ਜਾਤਰੂਪਂ ਯਥਾ ਕੂਟਂ, ਨੇਵ ਝਾਯਤਿ [ਯਾਯਤਿ (ਸ੍ਯਾ.)] ਕਤ੍ਥਚਿ;

ਤਥਾ ਸੀਲਵਿਹੀਨੋ ਤ੍ਵਂ, ਨ ਝਾਯਿਸ੍ਸਸਿ [ਯਾਰਿਸ੍ਸਤਿ (ਸ੍ਯਾ.)] ਕਤ੍ਥਚਿ.

੧੯. ‘‘‘ਅਗਾਰਂ ਵਸਮਾਨੋਪਿ, ਕਥਂ ਜੀਵਿਹਿਸਿ ਤੁਵਂ;

ਮਤ੍ਤਿਕਂ ਪੇਤ੍ਤਿਕਞ੍ਚਾਪਿ, ਨਤ੍ਥਿ ਤੇ ਨਿਹਿਤਂ ਧਨਂ.

੨੦. ‘‘‘ਸਯਂ ਕਮ੍ਮਂ ਕਰਿਤ੍ਵਾਨ, ਗਤ੍ਤੇ ਸੇਦਂ ਪਮੋਚਯਂ;

ਏਵਂ ਜੀਵਿਹਿਸਿ ਗੇਹੇ, ਸਾਧੁ ਤੇ ਤਂ ਨ ਰੁਚ੍ਚਤਿ.

੨੧. ‘‘‘ਏਵਾਹਂ ਤਤ੍ਥ ਵਾਰੇਮਿ, ਸਂਕਿਲੇਸਗਤਂ ਮਨਂ;

ਨਾਨਾਧਮ੍ਮਕਥਂ ਕਤ੍ਵਾ, ਪਾਪਾ ਚਿਤ੍ਤਂ ਨਿਵਾਰਯਿਂ’.

੨੨. ‘‘ਏਵਂ ਮੇ ਵਿਹਰਨ੍ਤਸ੍ਸ, ਅਪ੍ਪਮਾਦਵਿਹਾਰਿਨੋ;

ਤਿਂਸਵਸ੍ਸਸਹਸ੍ਸਾਨਿ, ਵਿਪਿਨੇ ਮੇ ਅਤਿਕ੍ਕਮੁਂ.

੨੩. ‘‘ਅਪ੍ਪਮਾਦਰਤਂ ਦਿਸ੍ਵਾ, ਉਤ੍ਤਮਤ੍ਥਂ ਗਵੇਸਕਂ;

ਪਦੁਮੁਤ੍ਤਰਸਮ੍ਬੁਦ੍ਧੋ, ਆਗਚ੍ਛਿ ਮਮ ਸਨ੍ਤਿਕਂ.

੨੪. ‘‘ਤਿਮ੍ਬਰੂਸਕਵਣ੍ਣਾਭੋ, ਅਪ੍ਪਮੇਯ੍ਯੋ ਅਨੂਪਮੋ;

ਰੂਪੇਨਾਸਦਿਸੋ ਬੁਦ੍ਧੋ, ਆਕਾਸੇ ਚਙ੍ਕਮੀ ਤਦਾ.

੨੫. ‘‘ਸੁਫੁਲ੍ਲੋ ਸਾਲਰਾਜਾਵ, ਵਿਜ੍ਜੂਵਬ੍ਭਘਨਨ੍ਤਰੇ;

ਞਾਣੇਨਾਸਦਿਸੋ ਬੁਦ੍ਧੋ, ਆਕਾਸੇ ਚਙ੍ਕਮੀ ਤਦਾ.

੨੬. ‘‘ਸੀਹਰਾਜਾ ਵਸਮ੍ਭੀਤੋ [ਛਮ੍ਭਿਤੋ (ਕ.)],

ਗਜਰਾਜਾਵ ਦਪ੍ਪਿਤੋ [ਦਮ੍ਮਿਤੋ (ਕ.)].

ਲਾਸਿਤੋ [ਅਭੀਤੋ (ਸ੍ਯਾ.)] ਬ੍ਯਗ੍ਘਰਾਜਾਵ, ਆਕਾਸੇ ਚਙ੍ਕਮੀ ਤਦਾ.

੨੭. ‘‘ਸਿਙ੍ਗੀਨਿਕ੍ਖਸਵਣ੍ਣਾਭੋ, ਖਦਿਰਙ੍ਗਾਰਸਨ੍ਨਿਭੋ;

ਮਣਿ ਯਥਾ ਜੋਤਿਰਸੋ, ਆਕਾਸੇ ਚਙ੍ਕਮੀ ਤਦਾ.

੨੮. ‘‘ਵਿਸੁਦ੍ਧਕੇਲਾਸਨਿਭੋ, ਪੁਣ੍ਣਮਾਯੇਵ ਚਨ੍ਦਿਮਾ;

ਮਜ੍ਝਨ੍ਹਿਕੇਵ [ਮਜ੍ਝਨ੍ਤਿਕੇਵ (ਸਬ੍ਬਤ੍ਥ)] ਸੂਰਿਯੋ, ਆਕਾਸੇ ਚਙ੍ਕਮੀ ਤਦਾ.

੨੯. ‘‘ਦਿਸ੍ਵਾ ਨਭੇ ਚਙ੍ਕਮਨ੍ਤਂ, ਏਵਂ ਚਿਨ੍ਤੇਸਹਂ ਤਦਾ;

‘ਦੇਵੋ ਨੁ ਖੋ ਅਯਂ ਸਤ੍ਤੋ, ਉਦਾਹੁ ਮਨੁਜੋ ਅਯਂ.

੩੦. ‘‘‘ਨ ਮੇ ਸੁਤੋ ਵਾ ਦਿਟ੍ਠੋ ਵਾ, ਮਹਿਯਾ ਏਦਿਸੋ ਨਰੋ;

ਅਪਿ ਮਨ੍ਤਪਦਂ ਅਤ੍ਥਿ, ਅਯਂ ਸਤ੍ਥਾ ਭਵਿਸ੍ਸਤਿ’.

੩੧. ‘‘ਏਵਾਹਂ ਚਿਨ੍ਤਯਿਤ੍ਵਾਨ, ਸਕਂ ਚਿਤ੍ਤਂ ਪਸਾਦਯਿਂ;

ਨਾਨਾਪੁਪ੍ਫਞ੍ਚ ਗਨ੍ਧਞ੍ਚ, ਸਨ੍ਨਿਪਾਤੇਸਹਂ [ਸਨ੍ਨਿਪਾਤੇਤ੍ਵਾਹਂ (ਸੀ.)] ਤਦਾ.

੩੨. ‘‘ਪੁਪ੍ਫਾਸਨਂ ਪਞ੍ਞਪੇਤ੍ਵਾ, ਸਾਧੁਚਿਤ੍ਤਂ ਮਨੋਰਮਂ;

ਨਰਸਾਰਥਿਨਂ ਅਗ੍ਗਂ, ਇਦਂ ਵਚਨਮਬ੍ਰਵਿਂ.

੩੩. ‘‘‘ਇਦਂ ਮੇ ਆਸਨਂ ਵੀਰ, ਪਞ੍ਞਤ੍ਤਂ ਤਵਨੁਚ੍ਛਵਂ;

ਹਾਸਯਨ੍ਤੋ ਮਮਂ ਚਿਤ੍ਤਂ, ਨਿਸੀਦ ਕੁਸੁਮਾਸਨੇ’.

੩੪. ‘‘ਨਿਸੀਦਿ ਤਤ੍ਥ ਭਗਵਾ, ਅਸਮ੍ਭੀਤੋਵ [ਅਛਮ੍ਭਿਤੋਵ (ਕ.)] ਕੇਸਰੀ;

ਸਤ੍ਤਰਤ੍ਤਿਨ੍ਦਿਵਂ ਬੁਦ੍ਧੋ, ਪਵਰੇ ਕੁਸੁਮਾਸਨੇ.

੩੫. ‘‘ਨਮਸ੍ਸਮਾਨੋ ਅਟ੍ਠਾਸਿਂ, ਸਤ੍ਤਰਤ੍ਤਿਨ੍ਦਿਵਂ ਅਹਂ;

ਵੁਟ੍ਠਹਿਤ੍ਵਾ ਸਮਾਧਿਮ੍ਹਾ, ਸਤ੍ਥਾ ਲੋਕੇ ਅਨੁਤ੍ਤਰੋ;

ਮਮ ਕਮ੍ਮਂ ਪਕਿਤ੍ਤੇਨ੍ਤੋ, ਇਦਂ ਵਚਨਮਬ੍ਰਵਿ.

੩੬. ‘‘‘ਭਾਵੇਹਿ ਬੁਦ੍ਧਾਨੁਸ੍ਸਤਿਂ, ਭਾਵਨਾਨਮਨੁਤ੍ਤਰਂ;

ਇਮਂ ਸਤਿਂ ਭਾਵਯਿਤ੍ਵਾ, ਪੂਰਯਿਸ੍ਸਸਿ ਮਾਨਸਂ.

੩੭. ‘‘‘ਤਿਂਸਕਪ੍ਪਸਹਸ੍ਸਾਨਿ, ਦੇਵਲੋਕੇ ਰਮਿਸ੍ਸਸਿ;

ਅਸੀਤਿਕ੍ਖਤ੍ਤੁਂ ਦੇਵਿਨ੍ਦੋ, ਦੇਵਰਜ੍ਜਂ ਕਰਿਸ੍ਸਸਿ;

ਸਹਸ੍ਸਕ੍ਖਤ੍ਤੁਂ ਚਕ੍ਕਵਤ੍ਤੀ, ਰਾਜਾ ਰਟ੍ਠੇ ਭਵਿਸ੍ਸਸਿ.

੩੮. ‘‘‘ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ;

ਅਨੁਭੋਸ੍ਸਸਿ ਤਂ ਸਬ੍ਬਂ, ਬੁਦ੍ਧਾਨੁਸ੍ਸਤਿਯਾ ਫਲਂ.

੩੯. ‘‘‘ਭਵਾਭਵੇ ਸਂਸਰਨ੍ਤੋ, ਮਹਾਭੋਗਂ ਲਭਿਸ੍ਸਸਿ;

ਭੋਗੇ ਤੇ ਊਨਤਾ ਨਤ੍ਥਿ, ਬੁਦ੍ਧਾਨੁਸ੍ਸਤਿਯਾ ਫਲਂ.

੪੦. ‘‘‘ਕਪ੍ਪਸਤਸਹਸ੍ਸਮ੍ਹਿ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੪੧. ‘‘‘ਅਸੀਤਿਕੋਟਿਂ ਛਡ੍ਡੇਤ੍ਵਾ, ਦਾਸੇ ਕਮ੍ਮਕਰੇ ਬਹੂ;

ਗੋਤਮਸ੍ਸ ਭਗਵਤੋ, ਸਾਸਨੇ ਪਬ੍ਬਜਿਸ੍ਸਸਿ.

੪੨. ‘‘‘ਆਰਾਧਯਿਤ੍ਵਾ ਸਮ੍ਬੁਦ੍ਧਂ, ਗੋਤਮਂ ਸਕ੍ਯਪੁਙ੍ਗਵਂ;

ਸੁਭੂਤਿ ਨਾਮ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ.

੪੩. ‘‘‘ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਦਕ੍ਖਿਣੇਯ੍ਯਗੁਣਮ੍ਹਿ ਤਂ;

ਤਥਾਰਣਵਿਹਾਰੇ ਚ, ਦ੍ਵੀਸੁ ਅਗ੍ਗੇ ਠਪੇਸ੍ਸਤਿ’.

੪੪. ‘‘ਇਦਂ ਵਤ੍ਵਾਨ ਸਮ੍ਬੁਦ੍ਧੋ, ਜਲਜੁਤ੍ਤਮਨਾਮਕੋ;

ਨਭਂ ਅਬ੍ਭੁਗ੍ਗਮੀ ਵੀਰੋ, ਹਂਸਰਾਜਾਵ ਅਮ੍ਬਰੇ.

੪੫. ‘‘ਸਾਸਿਤੋ ਲੋਕਨਾਥੇਨ, ਨਮਸ੍ਸਿਤ੍ਵਾ ਤਥਾਗਤਂ;

ਸਦਾ ਭਾਵੇਮਿ ਮੁਦਿਤੋ, ਬੁਦ੍ਧਾਨੁਸ੍ਸਤਿਮੁਤ੍ਤਮਂ.

੪੬. ‘‘ਤੇਨ ਕਮ੍ਮੇਨ ਸੁਕਤੇਨ, ਚੇਤਨਾਪਣਿਧੀਹਿ ਚ;

ਜਹਿਤ੍ਵਾ ਮਾਨੁਸਂ ਦੇਹਂ, ਤਾਵਤਿਂਸਂ ਅਗਚ੍ਛਹਂ.

੪੭. ‘‘ਅਸੀਤਿਕ੍ਖਤ੍ਤੁਂ ਦੇਵਿਨ੍ਦੋ, ਦੇਵਰਜ੍ਜਮਕਾਰਯਿਂ;

ਸਹਸ੍ਸਕ੍ਖਤ੍ਤੁਂ ਰਾਜਾ ਚ, ਚਕ੍ਕਵਤ੍ਤੀ ਅਹੋਸਹਂ.

੪੮. ‘‘ਪਦੇਸਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ;

ਅਨੁਭੋਮਿ ਸੁਸਮ੍ਪਤ੍ਤਿਂ, ਬੁਦ੍ਧਾਨੁਸ੍ਸਤਿਯਾ ਫਲਂ.

੪੯. ‘‘ਭਵਾਭਵੇ ਸਂਸਰਨ੍ਤੋ, ਮਹਾਭੋਗਂ ਲਭਾਮਹਂ;

ਭੋਗੇ ਮੇ ਊਨਤਾ ਨਤ੍ਥਿ, ਬੁਦ੍ਧਾਨੁਸ੍ਸਤਿਯਾ ਫਲਂ.

੫੦. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਾਨੁਸ੍ਸਤਿਯਾ ਫਲਂ.

੫੧. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੁਭੂਤਿ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸੁਭੂਤਿਤ੍ਥੇਰਸ੍ਸਾਪਦਾਨਂ ਪਠਮਂ.