੧. ਆਕਾਸੁਕ੍ਖਿਪਿਯਤ੍ਥੇਰਅਪਦਾਨਂ
੧. ‘‘ਸੁਵਣ੍ਣਵਣ੍ਣਂ ਸਿਦ੍ਧਤ੍ਥਂ, ਗਚ੍ਛਨ੍ਤਂ ਅਨ੍ਤਰਾਪਣੇ;
ਜਲਜਗ੍ਗੇ ਦੁਵੇ ਗਯ੍ਹ, ਉਪਾਗਚ੍ਛਿਂ ਨਰਾਸਭਂ.
੨. ‘‘ਏਕਞ੍ਚ ਪੁਪ੍ਫਂ ਪਾਦੇਸੁ, ਬੁਦ੍ਧਸੇਟ੍ਠਸ੍ਸ ਨਿਕ੍ਖਿਪਿਂ;
ਏਕਞ੍ਚ ਪੁਪ੍ਫਂ ਪਗ੍ਗਯ੍ਹ, ਆਕਾਸੇ ਉਕ੍ਖਿਪਿਂ ਅਹਂ.
੩. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਪੁਪ੍ਫਦਾਨਸ੍ਸਿਦਂ ਫਲਂ.
੪. ‘‘ਇਤੋ ਛਤ੍ਤਿਂਸਕਪ੍ਪਮ੍ਹਿ, ਏਕੋ ਆਸਿਂ ਮਹੀਪਤਿ;
ਅਨ੍ਤਲਿਕ੍ਖਕਰੋ ਨਾਮ, ਚਕ੍ਕਵਤ੍ਤੀ ਮਹਬ੍ਬਲੋ.
੫. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;
ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਆਕਾਸੁਕ੍ਖਿਪਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਆਕਾਸੁਕ੍ਖਿਪਿਯਤ੍ਥੇਰਸ੍ਸਾਪਦਾਨਂ ਪਠਮਂ.