੨੭. ਪਦੁਮੁਕ੍ਖਿਪਵਗ੍ਗੋ

੧. ਆਕਾਸੁਕ੍ਖਿਪਿਯਤ੍ਥੇਰਅਪਦਾਨਂ

੧. ‘‘ਸੁਵਣ੍ਣਵਣ੍ਣਂ ਸਿਦ੍ਧਤ੍ਥਂ, ਗਚ੍ਛਨ੍ਤਂ ਅਨ੍ਤਰਾਪਣੇ;

ਜਲਜਗ੍ਗੇ ਦੁਵੇ ਗਯ੍ਹ, ਉਪਾਗਚ੍ਛਿਂ ਨਰਾਸਭਂ.

੨. ‘‘ਏਕਞ੍ਚ ਪੁਪ੍ਫਂ ਪਾਦੇਸੁ, ਬੁਦ੍ਧਸੇਟ੍ਠਸ੍ਸ ਨਿਕ੍ਖਿਪਿਂ;

ਏਕਞ੍ਚ ਪੁਪ੍ਫਂ ਪਗ੍ਗਯ੍ਹ, ਆਕਾਸੇ ਉਕ੍ਖਿਪਿਂ ਅਹਂ.

੩. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਪੁਪ੍ਫਦਾਨਸ੍ਸਿਦਂ ਫਲਂ.

੪. ‘‘ਇਤੋ ਛਤ੍ਤਿਂਸਕਪ੍ਪਮ੍ਹਿ, ਏਕੋ ਆਸਿਂ ਮਹੀਪਤਿ;

ਅਨ੍ਤਲਿਕ੍ਖਕਰੋ ਨਾਮ, ਚਕ੍ਕਵਤ੍ਤੀ ਮਹਬ੍ਬਲੋ.

੫. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਆਕਾਸੁਕ੍ਖਿਪਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਆਕਾਸੁਕ੍ਖਿਪਿਯਤ੍ਥੇਰਸ੍ਸਾਪਦਾਨਂ ਪਠਮਂ.

੨. ਤੇਲਮਕ੍ਖਿਯਤ੍ਥੇਰਅਪਦਾਨਂ

੬. ‘‘ਸਿਦ੍ਧਤ੍ਥਮ੍ਹਿ ਭਗਵਤਿ, ਨਿਬ੍ਬੁਤਮ੍ਹਿ ਨਰਾਸਭੇ;

ਬੋਧਿਯਾ ਵੇਦਿਕਾਯਾਹਂ, ਤੇਲਂ ਮਕ੍ਖੇਸਿ ਤਾਵਦੇ.

੭. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਤੇਲਂ ਮਕ੍ਖਯਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਮਕ੍ਖਨਾਯ ਇਦਂ ਫਲਂ.

੮. ‘‘ਚਤੁਵੀਸੇ ਇਤੋ ਕਪ੍ਪੇ, ਸੁਚ੍ਛਵਿ ਨਾਮ ਖਤ੍ਤਿਯੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਤੇਲਮਕ੍ਖਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਤੇਲਮਕ੍ਖਿਯਤ੍ਥੇਰਸ੍ਸਾਪਦਾਨਂ ਦੁਤਿਯਂ.

੩. ਅਡ੍ਢਚਨ੍ਦਿਯਤ੍ਥੇਰਅਪਦਾਨਂ

੧੦. ‘‘ਤਿਸ੍ਸਸ੍ਸ ਖੋ ਭਗਵਤੋ, ਬੋਧਿਯਾ ਪਾਦਪੁਤ੍ਤਮੇ;

ਅਡ੍ਢਚਨ੍ਦਂ ਮਯਾ ਦਿਨ੍ਨਂ, ਧਰਣੀਰੁਹਪਾਦਪੇ.

੧੧. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਚਨ੍ਦ [ਯਂ ਪੁਪ੍ਫ (ਕ.)] ਮਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੋਧਿਪੂਜਾਯਿਦਂ ਫਲਂ.

੧੨. ‘‘ਪਞ੍ਚਵੀਸੇ ਇਤੋ ਕਪ੍ਪੇ, ਦੇਵਲੋ ਨਾਮ ਖਤ੍ਤਿਯੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੧੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਅਡ੍ਢਚਨ੍ਦਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਅਡ੍ਢਚਨ੍ਦਿਯਤ੍ਥੇਰਸ੍ਸਾਪਦਾਨਂ ਤਤਿਯਂ.

੪. ਪਦੀਪਦਾਯਕਤ੍ਥੇਰਅਪਦਾਨਂ

੧੪. ‘‘ਦੇਵਭੂਤੋ ਅਹਂ ਸਨ੍ਤੋ, ਓਰੁਯ੍ਹ ਪਥਵਿਂ ਤਦਾ;

ਪਦੀਪੇ ਪਞ੍ਚ ਪਾਦਾਸਿਂ, ਪਸਨ੍ਨੋ ਸੇਹਿ ਪਾਣਿਭਿ.

੧੫. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਪਦੀਪਮਦਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਦੀਪਦਾਨਸ੍ਸਿਦਂ ਫਲਂ.

੧੬. ‘‘ਪਞ੍ਚਪਞ੍ਞਾਸਕੇ ਕਪ੍ਪੇ, ਏਕੋ ਆਸਿਂ ਮਹੀਪਤਿ;

ਸਮਨ੍ਤਚਕ੍ਖੁਨਾਮੇਨ, ਚਕ੍ਕਵਤ੍ਤੀ ਮਹਬ੍ਬਲੋ.

੧੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਦੀਪਦਾਯਕੋ [ਅਪਣ੍ਣਦੀਪਿਯੋ (ਸੀ. ਕ.)] ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਦੀਪਦਾਯਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.

੫. ਬਿਲ਼ਾਲਿਦਾਯਕਤ੍ਥੇਰਅਪਦਾਨਂ

੧੮. ‘‘ਹਿਮਵਨ੍ਤਸ੍ਸਾਵਿਦੂਰੇ, ਰੋਮਸੋ ਨਾਮ ਪਬ੍ਬਤੋ;

ਤਮ੍ਹਿ ਪਬ੍ਬਤਪਾਦਮ੍ਹਿ, ਸਮਣੋ ਭਾਵਿਤਿਨ੍ਦ੍ਰਿਯੋ.

੧੯. ‘‘ਬਿਲ਼ਾਲਿਯੋ ਗਹੇਤ੍ਵਾਨ, ਸਮਣਸ੍ਸ ਅਦਾਸਹਂ;

ਅਨੁਮੋਦਿ ਮਹਾਵੀਰੋ, ਸਯਮ੍ਭੂ ਅਪਰਾਜਿਤੋ.

੨੦. ‘‘ਬਿਲ਼ਾਲੀ ਤੇ ਮਮ ਦਿਨ੍ਨਾ, ਵਿਪ੍ਪਸਨ੍ਨੇਨ ਚੇਤਸਾ;

ਭਵੇ ਨਿਬ੍ਬਤ੍ਤਮਾਨਮ੍ਹਿ, ਫਲਂ ਨਿਬ੍ਬਤ੍ਤਤਂ ਤਵ.

੨੧. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਬਿਲ਼ਾਲਿਮਦਾਸਹਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬਿਲ਼ਾਲਿਯਾ ਇਦਂ ਫਲਂ.

੨੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਬਿਲ਼ਾਲਿਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਬਿਲ਼ਾਲਿਦਾਯਕਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.

੬. ਮਚ੍ਛਦਾਯਕਤ੍ਥੇਰਅਪਦਾਨਂ

੨੩. ‘‘ਚਨ੍ਦਭਾਗਾਨਦੀਤੀਰੇ, ਉਕ੍ਕੁਸੋ ਆਸਹਂ ਤਦਾ;

ਮਹਨ੍ਤਂ ਮਚ੍ਛਂ ਪਗ੍ਗਯ੍ਹ, ਸਿਦ੍ਧਤ੍ਥਮੁਨਿਨੋ ਅਦਂ.

੨੪. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਮਚ੍ਛਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਮਚ੍ਛਦਾਨਸ੍ਸਿਦਂ ਫਲਂ.

੨੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਮਚ੍ਛਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਮਚ੍ਛਦਾਯਕਤ੍ਥੇਰਸ੍ਸਾਪਦਾਨਂ ਛਟ੍ਠਂ.

੭. ਜਵਹਂਸਕਤ੍ਥੇਰਅਪਦਾਨਂ

੨੬. ‘‘ਚਨ੍ਦਭਾਗਾਨਦੀਤੀਰੇ, ਆਸਿਂ ਵਨਚਰੋ ਤਦਾ;

ਸਿਦ੍ਧਤ੍ਥਂ ਅਦ੍ਦਸਂ ਬੁਦ੍ਧਂ, ਗਚ੍ਛਨ੍ਤਂ ਅਨਿਲਞ੍ਜਸੇ.

੨੭. ‘‘ਅਞ੍ਜਲਿਂ ਪਗ੍ਗਹੇਤ੍ਵਾਨ, ਉਲ੍ਲੋਕੇਨ੍ਤੋ ਮਹਾਮੁਨਿਂ;

ਸਕਂ ਚਿਤ੍ਤਂ ਪਸਾਦੇਤ੍ਵਾ, ਅਵਨ੍ਦਿਂ ਨਾਯਕਂ ਅਹਂ.

੨੮. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਮਵਨ੍ਦਿਂ ਨਰਾਸਭਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਵਨ੍ਦਨਾਯ ਇਦਂ ਫਲਂ.

੨੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਜਵਹਂਸਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਜਵਹਂਸਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.

੮. ਸਲ਼ਲਪੁਪ੍ਫਿਯਤ੍ਥੇਰਅਪਦਾਨਂ

੩੦. ‘‘ਚਨ੍ਦਭਾਗਾਨਦੀਤੀਰੇ, ਅਹੋਸਿਂ ਕਿਨ੍ਨਰੋ ਤਦਾ;

ਵਿਪਸ੍ਸਿਂ ਅਦ੍ਦਸਂ ਬੁਦ੍ਧਂ, ਰਂਸਿਜਾਲਸਮਾਕੁਲਂ.

੩੧. ‘‘ਪਸਨ੍ਨਚਿਤ੍ਤੋ ਸੁਮਨੋ, ਪਰਮਾਯ ਚ ਪੀਤਿਯਾ;

ਪਗ੍ਗਯ੍ਹ ਸਲ਼ਲਂ ਪੁਪ੍ਫਂ, ਵਿਪਸ੍ਸਿਂ ਓਕਿਰਿਂ ਅਹਂ.

੩੨. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੩੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਲ਼ਲਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਲ਼ਲਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.

੯. ਉਪਾਗਤਾਸਯਤ੍ਥੇਰਅਪਦਾਨਂ

੩੪. ‘‘ਹਿਮਵਨ੍ਤਸ੍ਸ ਵੇਮਜ੍ਝੇ, ਸਰੋ ਆਸਿ ਸੁਨਿਮ੍ਮਿਤੋ;

ਤਤ੍ਥਾਹਂ ਰਕ੍ਖਸੋ ਆਸਿਂ, ਹੇਠਸੀਲੋ ਭਯਾਨਕੋ.

੩੫. ‘‘ਅਨੁਕਮ੍ਪਕੋ ਕਾਰੁਣਿਕੋ, ਵਿਪਸ੍ਸੀ ਲੋਕਨਾਯਕੋ;

ਮਮੁਦ੍ਧਰਿਤੁਕਾਮੋ ਸੋ, ਆਗਚ੍ਛਿ ਮਮ ਸਨ੍ਤਿਕਂ.

੩੬. ‘‘ਉਪਾਗਤਂ ਮਹਾਵੀਰਂ, ਦੇਵਦੇਵਂ ਨਰਾਸਭਂ;

ਆਸਯਾ ਅਭਿਨਿਕ੍ਖਮ੍ਮ, ਅਵਨ੍ਦਿਂ ਸਤ੍ਥੁਨੋ ਅਹਂ.

੩੭. ‘‘ਏਕਨਵੁਤਿਤੋ ਕਪ੍ਪੇ, ਯਂ ਵਨ੍ਦਿਂ ਪੁਰਿਸੁਤ੍ਤਮਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਵਨ੍ਦਨਾਯ ਇਦਂ ਫਲਂ.

੩੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਉਪਾਗਤਾਸਯੋ [ਉਪਾਗਤਹਾਸਨਿਯੋ (ਸ੍ਯਾ.), ਉਪਾਗਤਾਹਾਸਨਿਯੋ (ਕ.)] ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਉਪਾਗਤਾਸਯਤ੍ਥੇਰਸ੍ਸਾਪਦਾਨਂ ਨਵਮਂ.

੧੦. ਤਰਣਿਯਤ੍ਥੇਰਅਪਦਾਨਂ

੩੯. ‘‘ਸੁਵਣ੍ਣਵਣ੍ਣੋ ਸਮ੍ਬੁਦ੍ਧੋ, ਵਿਪਸ੍ਸੀ ਦਕ੍ਖਿਣਾਰਹੋ;

ਨਦੀਤੀਰੇ ਠਿਤੋ ਸਤ੍ਥਾ, ਭਿਕ੍ਖੁਸਙ੍ਘਪੁਰਕ੍ਖਤੋ.

੪੦. ‘‘ਨਾਵਾ ਨ ਵਿਜ੍ਜਤੇ ਤਤ੍ਥ, ਸਨ੍ਤਾਰਣੀ ਮਹਣ੍ਣਵੇ;

ਨਦਿਯਾ ਅਭਿਨਿਕ੍ਖਮ੍ਮ, ਤਾਰੇਸਿਂ ਲੋਕਨਾਯਕਂ.

੪੧. ‘‘ਏਕਨਵੁਤਿਤੋ ਕਪ੍ਪੇ, ਯਂ ਤਾਰੇਸਿਂ ਨਰੁਤ੍ਤਮਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਤਰਣਾਯ ਇਦਂ ਫਲਂ.

੪੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਤਰਣਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਤਰਣਿਯਤ੍ਥੇਰਸ੍ਸਾਪਦਾਨਂ ਦਸਮਂ.

ਪਦੁਮੁਕ੍ਖਿਪਵਗ੍ਗੋ ਸਤ੍ਤਵੀਸਤਿਮੋ.