੨੬. ਥੋਮਕਵਗ੍ਗੋ
੧. ਥੋਮਕਤ੍ਥੇਰਅਪਦਾਨਂ
੧. ‘‘ਦੇਵਲੋਕੇ ਠਿਤੋ ਸਨ੍ਤੋ, ਵਿਪਸ੍ਸਿਸ੍ਸ ਮਹੇਸਿਨੋ;
ਧਮ੍ਮਂ ਸੁਣਿਤ੍ਵਾ ਮੁਦਿਤੋ, ਇਮਂ ਵਾਚਂ ਅਭਾਸਹਂ.
੨. ‘‘‘ਨਮੋ ਤੇ ਪੁਰਿਸਾਜਞ੍ਞ, ਨਮੋ ਤੇ ਪੁਰਿਸੁਤ੍ਤਮ;
ਬਹੁਜ੍ਜਨਂ [ਬਹੁਂ ਜਨਂ (ਸੀ.)] ਤਾਰਯਸਿ, ਦੇਸੇਨ੍ਤੋ ਅਮਤਂ ਪਦਂ’.
੩. ‘‘ਏਕਨਵੁਤਿਤੋ ਕਪ੍ਪੇ, ਯਂ ਵਾਚਮਭਣਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਥੋਮਨਾਯ ਇਦਂ ਫਲਂ.
੪. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;
ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਥੋਮਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਥੋਮਕਤ੍ਥੇਰਸ੍ਸਾਪਦਾਨਂ ਪਠਮਂ.
੨. ਏਕਾਸਨਦਾਯਕਤ੍ਥੇਰਅਪਦਾਨਂ
੫. ‘‘ਵਿਜਹਿਤ੍ਵਾ ਦੇਵਵਣ੍ਣਂ, ਸਭਰਿਯੋ ਇਧਾਗਮਿਂ;
ਅਧਿਕਾਰਂ ਕਤ੍ਤੁਕਾਮੋ, ਬੁਦ੍ਧਸੇਟ੍ਠਸ੍ਸ ਸਾਸਨੇ.
੬. ‘‘ਦੇਵਲੋ ਨਾਮ ਨਾਮੇਨ, ਪਦੁਮੁਤ੍ਤਰਸਾਵਕੋ;
ਤਸ੍ਸ ਭਿਕ੍ਖਾ ਮਯਾ ਦਿਨ੍ਨਾ, ਵਿਪ੍ਪਸਨ੍ਨੇਨ ਚੇਤਸਾ.
੭. ‘‘ਸਤਸਹਸ੍ਸਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਪਿਣ੍ਡਪਾਤਸ੍ਸਿਦਂ ਫਲਂ.
੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਏਕਾਸਨਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਏਕਾਸਨਦਾਯਕਤ੍ਥੇਰਸ੍ਸਾਪਦਾਨਂ ਦੁਤਿਯਂ.
੩. ਚਿਤਕਪੂਜਕਤ੍ਥੇਰਅਪਦਾਨਂ
੯. ‘‘ਆਨਨ੍ਦੋ ਨਾਮ ਸਮ੍ਬੁਦ੍ਧੋ, ਸਯਮ੍ਭੂ ਅਪਰਾਜਿਤੋ;
ਅਰਞ੍ਞੇ ਪਰਿਨਿਬ੍ਬਾਯਿ, ਅਮਨੁਸ੍ਸਮ੍ਹਿ ਕਾਨਨੇ.
੧੦. ‘‘ਦੇਵਲੋਕਾ ਇਧਾਗਨ੍ਤ੍ਵਾ, ਚਿਤਂ ਕਤ੍ਵਾਨਹਂ ਤਦਾ;
ਸਰੀਰਂ ਤਤ੍ਥ ਝਾਪੇਸਿਂ, ਸਕ੍ਕਾਰਞ੍ਚ ਅਕਾਸਹਂ.
੧੧. ‘‘ਏਕਨਵੁਤਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.
੧੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਚਿਤਕਪੂਜਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਚਿਤਕਪੂਜਕਤ੍ਥੇਰਸ੍ਸਾਪਦਾਨਂ ਤਤਿਯਂ.
੪. ਤਿਚਮ੍ਪਕਪੁਪ੍ਫਿਯਤ੍ਥੇਰਅਪਦਾਨਂ
੧੩. ‘‘ਹਿਮਵਨ੍ਤਸ੍ਸਾਵਿਦੂਰੇ, ਵਿਕਤੋ [ਵਿਕਨੋ (ਸੀ. ਸ੍ਯਾ.)] ਨਾਮ ਪਬ੍ਬਤੋ;
ਤਸ੍ਸ ਵੇਮਜ੍ਝੇ ਵਸਤਿ, ਸਮਣੋ ਭਾਵਿਤਿਨ੍ਦ੍ਰਿਯੋ.
੧੪. ‘‘ਦਿਸ੍ਵਾਨ ਤਸ੍ਸੋਪਸਮਂ, ਵਿਪ੍ਪਸਨ੍ਨੇਨ ਚੇਤਸਾ;
ਤੀਣਿ ਚਮ੍ਪਕਪੁਪ੍ਫਾਨਿ, ਗਹੇਤ੍ਵਾਨ ਸਮੋਕਿਰਿਂ.
੧੫. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.
੧੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਤਿਚਮ੍ਪਕਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਤਿਚਮ੍ਪਕਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.
੫. ਸਤ੍ਤਪਾਟਲਿਯਤ੍ਥੇਰਅਪਦਾਨਂ
੧੭. ‘‘ਕਣਿਕਾਰਂਵ ਜੋਤਨ੍ਤਂ, ਨਿਸਿਨ੍ਨਂ ਪਬ੍ਬਤਨ੍ਤਰੇ;
ਸਤ੍ਤ ਪਾਟਲਿਪੁਪ੍ਫਾਨਿ, ਬੁਦ੍ਧਸ੍ਸ ਅਭਿਰੋਪਯਿਂ.
੧੮. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.
੧੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਸਤ੍ਤਪਾਟਲਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਸਤ੍ਤਪਾਟਲਿਯਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.
੬. ਉਪਾਹਨਦਾਯਕਤ੍ਥੇਰਅਪਦਾਨਂ
੨੦. ‘‘ਅਹੋਸਿਂ ਚਨ੍ਦਨੋ ਨਾਮ, ਸਮ੍ਬੁਦ੍ਧਸ੍ਸਤ੍ਰਜੋ ਤਦਾ;
ਏਕੋਪਾਹਨੋ ਮਯਾ ਦਿਨ੍ਨੋ, ਬੋਧਿਂ ਸਮ੍ਪਜ੍ਜ ਮੇ ਤੁਵਂ.
੨੧. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪਾਨਧਿਂ [ਯਮੁਪਾਹਨਂ (ਸੀ.), ਯਂ ਪਾਦੁਂ (ਸ੍ਯਾ.)] ਦਦਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਉਪਾਹਨਸ੍ਸਿਦਂ ਫਲਂ.
੨੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਉਪਾਹਨਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਉਪਾਹਨਦਾਯਕਤ੍ਥੇਰਸ੍ਸਾਪਦਾਨਂ ਛਟ੍ਠਂ.
੭. ਮਞ੍ਜਰਿਪੂਜਕਤ੍ਥੇਰਅਪਦਾਨਂ
੨੩. ‘‘ਮਞ੍ਜਰਿਕਂ ਕਰਿਤ੍ਵਾਨ, ਰਥਿਯਂ ਪਟਿਪਜ੍ਜਹਂ;
ਅਦ੍ਦਸਂ ਸਮਣਾਨਗ੍ਗਂ, ਭਿਕ੍ਖੁਸਙ੍ਘਪੁਰਕ੍ਖਤਂ.
੨੪. ‘‘ਪਸਨ੍ਨਚਿਤ੍ਤੋ ਸੁਮਨੋ, ਪਰਮਾਯ ਚ ਪੀਤਿਯਾ;
ਉਭੋ ਹਤ੍ਥੇਹਿ ਪਗ੍ਗਯ੍ਹ, ਬੁਦ੍ਧਸ੍ਸ ਅਭਿਰੋਪਯਿਂ.
੨੫. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਪੁਪ੍ਫਪੂਜਾਯਿਦਂ ਫਲਂ.
੨੬. ‘‘ਇਤੋ ਤੇਸਤ੍ਤਤਿਕਪ੍ਪੇ, ਏਕੋ ਆਸਿਂ ਮਹੀਪਤਿ;
ਜੋਤਿਯੋ ਨਾਮ ਨਾਮੇਨ, ਚਕ੍ਕਵਤ੍ਤੀ ਮਹਬ੍ਬਲੋ.
੨੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਮਞ੍ਜਰਿਪੂਜਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਮਞ੍ਜਰਿਪੂਜਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.
੮. ਪਣ੍ਣਦਾਯਕਤ੍ਥੇਰਅਪਦਾਨਂ
੨੮. ‘‘ਪਬ੍ਬਤੇ ਹਿਮਵਨ੍ਤਮ੍ਹਿ, ਵਾਕਚੀਰਧਰੋ ਅਹਂ;
ਅਲੋਣਪਣ੍ਣਭਕ੍ਖੋਮ੍ਹਿ, ਨਿਯਮੇਸੁ ਚ ਸਂਵੁਤੋ.
੨੯. ‘‘ਪਾਤਰਾਸੇ ਅਨੁਪ੍ਪਤ੍ਤੇ, ਸਿਦ੍ਧਤ੍ਥੋ ਉਪਗਚ੍ਛਿ ਮਂ;
ਤਾਹਂ ਬੁਦ੍ਧਸ੍ਸ ਪਾਦਾਸਿਂ, ਪਸਨ੍ਨੋ ਸੇਹਿ ਪਾਣਿਭਿ.
੩੦. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਪਣ੍ਣਮਦਦਿਂ ਤਦਾ;
ਦੁਗ੍ਗਤਿਂ ਨਾਭਿਜਾਨਾਮਿ, ਪਣ੍ਣਦਾਨਸ੍ਸਿਦਂ ਫਲਂ.
੩੧. ‘‘ਸਤ੍ਤਵੀਸਤਿਕਪ੍ਪਮ੍ਹਿ, ਰਾਜਾ ਆਸਿਂ ਸਦਤ੍ਥਿਯੋ [ਯਦਤ੍ਥਿਯੋ (ਸੀ. ਸ੍ਯਾ.)];
ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.
੩੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਪਣ੍ਣਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਪਣ੍ਣਦਾਯਕਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.
੯. ਕੁਟਿਦਾਯਕਤ੍ਥੇਰਅਪਦਾਨਂ
੩੩. ‘‘ਵਿਪਿਨਚਾਰੀ ਸਮ੍ਬੁਦ੍ਧੋ, ਰੁਕ੍ਖਮੂਲੇ ਵਸੀ ਤਦਾ;
ਪਣ੍ਣਸਾਲਂ ਕਰਿਤ੍ਵਾਨ, ਅਦਾਸਿਂ ਅਪਰਾਜਿਤੇ.
੩੪. ‘‘ਏਕਨਵੁਤਿਤੋ ਕਪ੍ਪੇ, ਯਂ ਪਣ੍ਣਕੁਟਿਕਂ ਅਦਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਕੁਟਿਦਾਨਸ੍ਸਿਦਂ ਫਲਂ.
੩੫. ‘‘ਅਟ੍ਠਵੀਸੇ [ਅਟ੍ਠਤਿਂਸੇ (ਸ੍ਯਾ.)] ਇਤੋ ਕਪ੍ਪੇ, ਸੋਲ਼ਸਾਸਿਂਸੁ ਰਾਜਾਨੋ;
ਸਬ੍ਬਤ੍ਥ ਅਭਿਵਸ੍ਸੀਤਿ, ਵੁਚ੍ਚਰੇ ਚਕ੍ਕਵਤ੍ਤਿਨੋ.
੩੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਕੁਟਿਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਕੁਟਿਦਾਯਕਤ੍ਥੇਰਸ੍ਸਾਪਦਾਨਂ ਨਵਮਂ.
੧੦. ਅਗ੍ਗਪੁਪ੍ਫਿਯਤ੍ਥੇਰਅਪਦਾਨਂ
੩੭. ‘‘ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਂ, ਨਿਸਿਨ੍ਨਂ ਪਬ੍ਬਤਨ੍ਤਰੇ;
ਓਭਾਸਯਨ੍ਤਂ ਰਂਸੇਨ [ਰਂਸਿਯਾ (ਸ੍ਯਾ.)], ਸਿਖਿਨਂ ਸਿਖਿਨਂ ਯਥਾ.
੩੮. ‘‘ਅਗ੍ਗਜਂ ਪੁਪ੍ਫਮਾਦਾਯ, ਉਪਾਗਚ੍ਛਿਂ ਨਰੁਤ੍ਤਮਂ;
ਪਸਨ੍ਨਚਿਤ੍ਤੋ ਸੁਮਨੋ, ਬੁਦ੍ਧਸ੍ਸ ਅਭਿਰੋਪਯਿਂ.
੩੯. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;
ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.
੪੦. ‘‘ਪਞ੍ਚਵੀਸਤਿਕਪ੍ਪਮ੍ਹਿ, ਅਹੋਸਿ ਅਮਿਤੋਗਤੋ [ਅਮਿਤਵ੍ਹਯੋ (ਸੀ.)];
ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.
੪੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਅਗ੍ਗਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਅਗ੍ਗਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਦਸਮਂ.
ਥੋਮਕਵਗ੍ਗੋ ਛਬ੍ਬੀਸਤਿਮੋ.