੮. ਅਕ੍ਕਨ੍ਤਸਞ੍ਞਕਤ੍ਥੇਰਅਪਦਾਨਂ

੩੭. ‘‘ਕੁਸਾਟਕਂ ਗਹੇਤ੍ਵਾਨ, ਉਪਜ੍ਝਾਯਸ੍ਸਹਂ ਪੁਰੇ;

ਮਨ੍ਤਞ੍ਚ ਅਨੁਸਿਕ੍ਖਾਮਿ, ਗਨ੍ਥਾਦੋਸਸ੍ਸ [ਕਣ੍ਡਭੇਦਸ੍ਸ (ਸੀ.), ਗਣ੍ਡਭੇਦਸ੍ਸ (ਸ੍ਯਾ.)] ਪਤ੍ਤਿਯਾ.

੩੮. ‘‘ਅਦ੍ਦਸਂ ਵਿਰਜਂ ਬੁਦ੍ਧਂ, ਆਹੁਤੀਨਂ ਪਟਿਗ੍ਗਹਂ;

ਉਸਭਂ ਪਵਰਂ ਅਗ੍ਗਂ, ਤਿਸ੍ਸਂ ਬੁਦ੍ਧਂ ਗਣੁਤ੍ਤਮਂ [ਗਜੁਤ੍ਤਮਂ (ਸ੍ਯਾ.)].

੩੯. ‘‘ਕੁਸਾਟਕਂ ਪਤ੍ਥਰਿਤਂ, ਅਕ੍ਕਮਨ੍ਤਂ ਨਰੁਤ੍ਤਮਂ;

ਸਮੁਗ੍ਗਤਂ ਮਹਾਵੀਰਂ, ਲੋਕਜੇਟ੍ਠਂ ਨਰਾਸਭਂ.

੪੦. ‘‘ਦਿਸ੍ਵਾ ਤਂ ਲੋਕਪਜ੍ਜੋਤਂ, ਵਿਮਲਂ ਚਨ੍ਦਸਨ੍ਨਿਭਂ;

ਅਵਨ੍ਦਿਂ ਸਤ੍ਥੁਨੋ ਪਾਦੇ, ਵਿਪ੍ਪਸਨ੍ਨੇਨ ਚੇਤਸਾ.

੪੧. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਅਦਾਸਿਂ ਕੁਸਾਟਕਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਕੁਸਾਟਕਸ੍ਸਿਦਂ ਫਲਂ.

੪੨. ‘‘ਸਤ੍ਤਤਿਂਸੇ ਇਤੋ ਕਪ੍ਪੇ, ਏਕੋ ਆਸਿਂ ਜਨਾਧਿਪੋ;

ਸੁਨਨ੍ਦੋ ਨਾਮ ਨਾਮੇਨ, ਚਕ੍ਕਵਤ੍ਤੀ ਮਹਬ੍ਬਲੋ.

੪੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਅਕ੍ਕਨ੍ਤਸਞ੍ਞਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ;

ਅਕ੍ਕਨ੍ਤਸਞ੍ਞਕਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.