੨੨. ਹਤ੍ਥਿਵਗ੍ਗੋ

੧. ਹਤ੍ਥਿਦਾਯਕਤ੍ਥੇਰਅਪਦਾਨਂ

੧. ‘‘ਸਿਦ੍ਧਤ੍ਥਸ੍ਸ ਭਗਵਤੋ, ਦ੍ਵਿਪਦਿਨ੍ਦਸ੍ਸ ਤਾਦਿਨੋ;

ਨਾਗਸੇਟ੍ਠੋ ਮਯਾ ਦਿਨ੍ਨੋ, ਈਸਾਦਨ੍ਤੋ ਉਰੂਲ਼੍ਹਵਾ.

੨. ‘‘ਉਤ੍ਤਮਤ੍ਥਂ ਅਨੁਭੋਮਿ, ਸਨ੍ਤਿਪਦਮਨੁਤ੍ਤਰਂ;

ਨਾਗਦਾਨਂ [ਅਗ੍ਗਦਾਨਂ (ਸੀ. ਕ.)] ਮਯਾ ਦਿਨ੍ਨਂ, ਸਬ੍ਬਲੋਕਹਿਤੇਸਿਨੋ.

੩. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਨਾਗ [ਦਾਨ (ਸੀ. ਕ.)] ਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਨਾਗਦਾਨਸ੍ਸਿਦਂ ਫਲਂ.

੪. ‘‘ਅਟ੍ਠਸਤ੍ਤਤਿਕਪ੍ਪਮ੍ਹਿ, ਸੋਲ਼ਸਾਸਿਂਸੁ ਖਤ੍ਤਿਯਾ;

ਸਮਨ੍ਤਪਾਸਾਦਿਕਾ ਨਾਮ, ਚਕ੍ਕਵਤ੍ਤੀ ਮਹਬ੍ਬਲਾ.

੫. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਹਤ੍ਥਿਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਹਤ੍ਥਿਦਾਯਕਤ੍ਥੇਰਸ੍ਸਾਪਦਾਨਂ ਪਠਮਂ.

੨. ਪਾਨਧਿਦਾਯਕਤ੍ਥੇਰਅਪਦਾਨਂ

੬. ‘‘ਆਰਞ੍ਞਿਕਸ੍ਸ ਇਸਿਨੋ, ਚਿਰਰਤ੍ਤਤਪਸ੍ਸਿਨੋ [ਝਾਯਿਨੋ, ਮੇਤ੍ਤਚਿਤ੍ਤਤਪਸ੍ਸਿਨੋ (ਸ੍ਯਾ.)];

ਬੁਦ੍ਧਸ੍ਸ [ਧਮ੍ਮਸ੍ਸ (ਸ੍ਯਾ. ਕ.)] ਭਾਵਿਤਤ੍ਤਸ੍ਸ, ਅਦਾਸਿਂ ਪਾਨਧਿਂ ਅਹਂ.

੭. ‘‘ਤੇਨ ਕਮ੍ਮੇਨ ਦ੍ਵਿਪਦਿਨ੍ਦ, ਲੋਕਜੇਟ੍ਠ ਨਰਾਸਭ;

ਦਿਬ੍ਬਯਾਨਂ [ਸਬ੍ਬਂ ਯਾਨਂ (ਸੀ.)] ਅਨੁਭੋਮਿ, ਪੁਬ੍ਬਕਮ੍ਮਸ੍ਸਿਦਂ ਫਲਂ.

੮. ‘‘ਚਤੁਨ੍ਨਵੁਤੇ ਇਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਪਾਨਧਿਸ੍ਸ ਇਦਂ ਫਲਂ.

੯. ‘‘ਸਤ੍ਤਸਤ੍ਤਤਿਤੋ ਕਪ੍ਪੇ, ਅਟ੍ਠ ਆਸਿਂਸੁ ਖਤ੍ਤਿਯਾ;

ਸੁਯਾਨਾ ਨਾਮ ਨਾਮੇਨ, ਚਕ੍ਕਵਤ੍ਤੀ ਮਹਬ੍ਬਲਾ.

੧੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਾਨਧਿਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਾਨਧਿਦਾਯਕਤ੍ਥੇਰਸ੍ਸਾਪਦਾਨਂ ਦੁਤਿਯਂ.

੩. ਸਚ੍ਚਸਞ੍ਞਕਤ੍ਥੇਰਅਪਦਾਨਂ

੧੧. ‘‘ਵੇਸ੍ਸਭੂ ਤਮ੍ਹਿ ਸਮਯੇ, ਭਿਕ੍ਖੁਸਙ੍ਘਪੁਰਕ੍ਖਤੋ;

ਦੇਸੇਤਿ ਅਰਿਯਸਚ੍ਚਾਨਿ, ਨਿਬ੍ਬਾਪੇਨ੍ਤੋ ਮਹਾਜਨਂ.

੧੨. ‘‘ਪਰਮਕਾਰੁਞ੍ਞਪਤ੍ਤੋਮ੍ਹਿ, ਸਮਿਤਿਂ ਅਗਮਾਸਹਂ;

ਸੋਹਂ ਨਿਸਿਨ੍ਨਕੋ ਸਨ੍ਤੋ, ਧਮ੍ਮਮਸ੍ਸੋਸਿ ਸਤ੍ਥੁਨੋ.

੧੩. ‘‘ਤਸ੍ਸਾਹਂ ਧਮ੍ਮਂ ਸੁਤ੍ਵਾਨ, ਦੇਵਲੋਕਂ ਅਗਚ੍ਛਹਂ;

ਤਿਂਸਕਪ੍ਪਾਨਿ ਦੇਵੇਸੁ, ਅਵਸਿਂ ਤਤ੍ਥਹਂ ਪੁਰੇ.

੧੪. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਸਞ੍ਞਮਲਭਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਸਚ੍ਚਸਞ੍ਞਾਯਿਦਂ ਫਲਂ.

੧੫. ‘‘ਛਬ੍ਬੀਸਮ੍ਹਿ ਇਤੋ ਕਪ੍ਪੇ, ਏਕੋ ਆਸਿਂ ਜਨਾਧਿਪੋ;

ਏਕਫੁਸਿਤਨਾਮੇਨ, ਚਕ੍ਕਵਤ੍ਤੀ ਮਹਬ੍ਬਲੋ.

੧੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਚ੍ਚਸਞ੍ਞਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਚ੍ਚਸਞ੍ਞਕਤ੍ਥੇਰਸ੍ਸਾਪਦਾਨਂ ਤਤਿਯਂ.

੪. ਏਕਸਞ੍ਞਕਤ੍ਥੇਰਅਪਦਾਨਂ

੧੭. ‘‘ਦੁਮਗ੍ਗੇ ਪਂਸੁਕੂਲਿਕਂ [ਪਂਸੁਕੂਲਕਂ (?)], ਲਗ੍ਗਂ ਦਿਸ੍ਵਾਨ ਸਤ੍ਥੁਨੋ;

ਅਞ੍ਜਲਿਂ ਪਗ੍ਗਹੇਤ੍ਵਾਨ, ਪਂਸੁਕੂਲਂ ਅਵਨ੍ਦਹਂ.

੧੮. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਸਞ੍ਞਮਲਭਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੧੯. ‘‘ਪਞ੍ਚਵੀਸੇ ਇਤੋ ਕਪ੍ਪੇ, ਏਕੋ ਆਸਿਂ ਜਨਾਧਿਪੋ;

ਅਮਿਤਾਭੋਤਿ ਨਾਮੇਨ, ਚਕ੍ਕਵਤ੍ਤੀ ਮਹਬ੍ਬਲੋ.

੨੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਏਕਸਞ੍ਞਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਏਕਸਞ੍ਞਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.

੫. ਰਂਸਿਸਞ੍ਞਕਤ੍ਥੇਰਅਪਦਾਨਂ

੨੧. ‘‘ਉਦੇਨ੍ਤਂ ਸਤਰਂਸਿਂਵ, ਪੀਤਰਂਸਿਂਵ [ਸਿਤਰਂਸਿਂ ਵ (ਸੀ. ਸ੍ਯਾ.)] ਭਾਣੁਮਂ;

ਬ੍ਯਗ੍ਘੂਸਭਂਵ ਪਵਰਂ, ਸੁਜਾਤਂ ਪਬ੍ਬਤਨ੍ਤਰੇ.

੨੨. ‘‘ਬੁਦ੍ਧਸ੍ਸ ਆਨੁਭਾਵੋ ਸੋ, ਜਲਤੇ ਪਬ੍ਬਤਨ੍ਤਰੇ;

ਰਂਸੇ [ਰਂਸ੍ਯਾ (?)] ਚਿਤ੍ਤਂ ਪਸਾਦੇਤ੍ਵਾ, ਕਪ੍ਪਂ ਸਗ੍ਗਮ੍ਹਿ ਮੋਦਹਂ.

੨੩. ‘‘ਅਵਸੇਸੇਸੁ ਕਪ੍ਪੇਸੁ, ਕੁਸਲਂ ਚਰਿਤਂ ਮਯਾ;

ਤੇਨ ਚਿਤ੍ਤਪ੍ਪਸਾਦੇਨ, ਬੁਦ੍ਧਾਨੁਸ੍ਸਤਿਯਾਪਿ ਚ.

੨੪. ‘‘ਤਿਂਸਕਪ੍ਪਸਹਸ੍ਸੇਤੋ, ਯਂ ਸਞ੍ਞਮਲਭਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਸਞ੍ਞਾਯਿਦਂ ਫਲਂ.

੨੫. ‘‘ਸਤ੍ਤਪਞ੍ਞਾਸਕਪ੍ਪਮ੍ਹਿ, ਏਕੋ ਆਸਿਂ ਜਨਾਧਿਪੋ;

ਸੁਜਾਤੋ ਨਾਮ ਨਾਮੇਨ, ਚਕ੍ਕਵਤ੍ਤੀ ਮਹਬ੍ਬਲੋ.

੨੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਰਂਸਿਸਞ੍ਞਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਰਂਸਿਸਞ੍ਞਕਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.

੬. ਸਨ੍ਧਿਤਤ੍ਥੇਰਅਪਦਾਨਂ

੨੭. ‘‘ਅਸ੍ਸਤ੍ਥੇ ਹਰਿਤੋਭਾਸੇ, ਸਂਵਿਰੂਲ਼੍ਹਮ੍ਹਿ ਪਾਦਪੇ;

ਏਕਂ ਬੁਦ੍ਧਗਤਂ ਸਞ੍ਞਂ, ਅਲਭਿਂਹਂ [ਅਲਭਿਸ੍ਸਂ (ਸੀ.)] ਪਤਿਸ੍ਸਤੋ.

੨੮. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਸਞ੍ਞਮਲਭਿਂ ਤਦਾ;

ਤਸ੍ਸਾ ਸਞ੍ਞਾਯ ਵਾਹਸਾ, ਪਤ੍ਤੋ ਮੇ ਆਸਵਕ੍ਖਯੋ.

੨੯. ‘‘ਇਤੋ ਤੇਰਸਕਪ੍ਪਮ੍ਹਿ, ਧਨਿਟ੍ਠੋ ਨਾਮ ਖਤ੍ਤਿਯੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੩੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਨ੍ਧਿਤੋ [ਸਣ੍ਠਿਤੋ (ਸੀ.)] ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਨ੍ਧਿਤਤ੍ਥੇਰਸ੍ਸਾਪਦਾਨਂ ਛਟ੍ਠਂ.

੭. ਤਾਲਵਣ੍ਟਦਾਯਕਤ੍ਥੇਰਅਪਦਾਨਂ

੩੧. ‘‘ਤਾਲਵਣ੍ਟਂ ਮਯਾ ਦਿਨ੍ਨਂ, ਤਿਸ੍ਸਸ੍ਸਾਦਿਚ੍ਚਬਨ੍ਧੁਨੋ;

ਗਿਮ੍ਹਨਿਬ੍ਬਾਪਨਤ੍ਥਾਯ, ਪਰਿਲ਼ਾਹੋਪਸਨ੍ਤਿਯਾ.

੩੨. ‘‘ਸਨ੍ਨਿਬ੍ਬਾਪੇਮਿ ਰਾਗਗ੍ਗਿਂ, ਦੋਸਗ੍ਗਿਞ੍ਚ ਤਦੁਤ੍ਤਰਿਂ;

ਨਿਬ੍ਬਾਪੇਮਿ ਚ ਮੋਹਗ੍ਗਿਂ, ਤਾਲਵਣ੍ਟਸ੍ਸਿਦਂ ਫਲਂ.

੩੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਧਾਰੇਮਿ ਅਨ੍ਤਿਮਂ ਦੇਹਂ, ਸਮ੍ਮਾਸਮ੍ਬੁਦ੍ਧਸਾਸਨੇ.

੩੪. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਤਾਲਵਣ੍ਟਸ੍ਸਿਦਂ ਫਲਂ.

੩੫. ‘‘ਤੇਸਟ੍ਠਿਮ੍ਹਿ ਇਤੋ ਕਪ੍ਪੇ, ਮਹਾਨਾਮਸਨਾਮਕੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੩੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਤਾਲਵਣ੍ਟਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਤਾਲਵਣ੍ਟਦਾਯਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.

੮. ਅਕ੍ਕਨ੍ਤਸਞ੍ਞਕਤ੍ਥੇਰਅਪਦਾਨਂ

੩੭. ‘‘ਕੁਸਾਟਕਂ ਗਹੇਤ੍ਵਾਨ, ਉਪਜ੍ਝਾਯਸ੍ਸਹਂ ਪੁਰੇ;

ਮਨ੍ਤਞ੍ਚ ਅਨੁਸਿਕ੍ਖਾਮਿ, ਗਨ੍ਥਾਦੋਸਸ੍ਸ [ਕਣ੍ਡਭੇਦਸ੍ਸ (ਸੀ.), ਗਣ੍ਡਭੇਦਸ੍ਸ (ਸ੍ਯਾ.)] ਪਤ੍ਤਿਯਾ.

੩੮. ‘‘ਅਦ੍ਦਸਂ ਵਿਰਜਂ ਬੁਦ੍ਧਂ, ਆਹੁਤੀਨਂ ਪਟਿਗ੍ਗਹਂ;

ਉਸਭਂ ਪਵਰਂ ਅਗ੍ਗਂ, ਤਿਸ੍ਸਂ ਬੁਦ੍ਧਂ ਗਣੁਤ੍ਤਮਂ [ਗਜੁਤ੍ਤਮਂ (ਸ੍ਯਾ.)].

੩੯. ‘‘ਕੁਸਾਟਕਂ ਪਤ੍ਥਰਿਤਂ, ਅਕ੍ਕਮਨ੍ਤਂ ਨਰੁਤ੍ਤਮਂ;

ਸਮੁਗ੍ਗਤਂ ਮਹਾਵੀਰਂ, ਲੋਕਜੇਟ੍ਠਂ ਨਰਾਸਭਂ.

੪੦. ‘‘ਦਿਸ੍ਵਾ ਤਂ ਲੋਕਪਜ੍ਜੋਤਂ, ਵਿਮਲਂ ਚਨ੍ਦਸਨ੍ਨਿਭਂ;

ਅਵਨ੍ਦਿਂ ਸਤ੍ਥੁਨੋ ਪਾਦੇ, ਵਿਪ੍ਪਸਨ੍ਨੇਨ ਚੇਤਸਾ.

੪੧. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਅਦਾਸਿਂ ਕੁਸਾਟਕਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਕੁਸਾਟਕਸ੍ਸਿਦਂ ਫਲਂ.

੪੨. ‘‘ਸਤ੍ਤਤਿਂਸੇ ਇਤੋ ਕਪ੍ਪੇ, ਏਕੋ ਆਸਿਂ ਜਨਾਧਿਪੋ;

ਸੁਨਨ੍ਦੋ ਨਾਮ ਨਾਮੇਨ, ਚਕ੍ਕਵਤ੍ਤੀ ਮਹਬ੍ਬਲੋ.

੪੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਅਕ੍ਕਨ੍ਤਸਞ੍ਞਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ;

ਅਕ੍ਕਨ੍ਤਸਞ੍ਞਕਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.

੯. ਸਪ੍ਪਿਦਾਯਕਤ੍ਥੇਰਅਪਦਾਨਂ

੪੪. ‘‘ਨਿਸਿਨ੍ਨੋ ਪਾਸਾਦਵਰੇ, ਨਾਰੀਗਣਪੁਰਕ੍ਖਤੋ;

ਬ੍ਯਾਧਿਤਂ ਸਮਣਂ ਦਿਸ੍ਵਾ, ਅਭਿਨਾਮੇਸਹਂ ਘਰਂ.

੪੫. ‘‘ਉਪਵਿਟ੍ਠਂ ਮਹਾਵੀਰਂ, ਦੇਵਦੇਵਂ ਨਰਾਸਭਂ;

ਸਪ੍ਪਿਤੇਲਂ ਮਯਾ ਦਿਨ੍ਨਂ, ਸਿਦ੍ਧਤ੍ਥਸ੍ਸ ਮਹੇਸਿਨੋ.

੪੬. ‘‘ਪਸ੍ਸਦ੍ਧਦਰਥਂ ਦਿਸ੍ਵਾ, ਵਿਪ੍ਪਸਨ੍ਨਮੁਖਿਨ੍ਦ੍ਰਿਯਂ;

ਵਨ੍ਦਿਤ੍ਵਾ ਸਤ੍ਥੁਨੋ ਪਾਦੇ, ਅਨੁਸਂਸਾਵਯਿਂ ਪੁਰੇ.

੪੭. ‘‘ਦਿਸ੍ਵਾ ਮਂ ਸੁਪ੍ਪਸਨ੍ਨਤ੍ਤਂ [ਸੁਪ੍ਪਸਨ੍ਨਨ੍ਤਂ (ਸ੍ਯਾ. ਕ.) ਸੁਪ੍ਪਸਨ੍ਨਚਿਤ੍ਤਨ੍ਤਿ ਅਤ੍ਥੋ], ਇਦ੍ਧਿਯਾ ਪਾਰਮਿਙ੍ਗਤੋ;

ਨਭਂ ਅਬ੍ਭੁਗ੍ਗਮੀ ਧੀਰੋ, ਹਂਸਰਾਜਾਵ ਅਮ੍ਬਰੇ.

੪੮. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਸਪ੍ਪਿਤੇਲਸ੍ਸਿਦਂ ਫਲਂ.

੪੯. ‘‘ਇਤੋ ਸਤ੍ਤਰਸੇ ਕਪ੍ਪੇ, ਜੁਤਿਦੇਵ [ਦੁਤਿਦੇਵ (ਸ੍ਯਾ.), ਤੁਤਿਦੇਵ (ਕ.)] ਸਨਾਮਕੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੫੦. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਪ੍ਪਿਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਪ੍ਪਿਦਾਯਕਤ੍ਥੇਰਸ੍ਸਾਪਦਾਨਂ ਨਵਮਂ.

੧੦. ਪਾਪਨਿਵਾਰਿਯਤ੍ਥੇਰਅਪਦਾਨਂ

੫੧. ‘‘ਪਿਯਦਸ੍ਸਿਸ੍ਸ ਭਗਵਤੋ, ਚਙ੍ਕਮਂ ਸੋਧਿਤਂ ਮਯਾ;

ਨਲ਼ਕੇਹਿ ਪਟਿਚ੍ਛਨ੍ਨਂ, ਵਾਤਾਤਪਨਿਵਾਰਣਂ.

੫੨. ‘‘ਪਾਪਂ ਵਿਵਜ੍ਜਨਤ੍ਥਾਯ, ਕੁਸਲਸ੍ਸੁਪਸਮ੍ਪਦਾ;

ਕਿਲੇਸਾਨਂ ਪਹਾਨਾਯ, ਪਦਹਿਂ ਸਤ੍ਥੁ ਸਾਸਨੇ.

੫੩. ‘‘ਇਤੋ ਏਕਾਦਸੇ ਕਪ੍ਪੇ, ਅਗ੍ਗਿਦੇਵੋਤਿ ਵਿਸ੍ਸੁਤੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੫੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਾਪਨਿਵਾਰਿਯੋ [ਵਾਤਾਤਪਨਿਵਾਰਿਯੋ (?)] ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਾਪਨਿਵਾਰਿਯਤ੍ਥੇਰਸ੍ਸਾਪਦਾਨਂ ਦਸਮਂ.

ਹਤ੍ਥਿਵਗ੍ਗੋ ਬਾਵੀਸਤਿਮੋ.