੬. ਕਿਸਲਯਪੂਜਕਤ੍ਥੇਰਅਪਦਾਨਂ

੨੮. ‘‘ਨਗਰੇ ਦ੍ਵਾਰਵਤਿਯਾ, ਮਾਲਾਵਚ੍ਛੋ ਮਮਂ ਅਹੁ;

ਉਦਪਾਨੋ ਚ ਤਤ੍ਥੇਵ, ਪਾਦਪਾਨਂ ਵਿਰੋਹਨੋ.

੨੯. ‘‘ਸਬਲੇਨ ਉਪਤ੍ਥਦ੍ਧੋ, ਸਿਦ੍ਧਤ੍ਥੋ ਅਪਰਾਜਿਤੋ;

ਮਮਾਨੁਕਮ੍ਪਮਾਨੋ ਸੋ, ਗਚ੍ਛਤੇ ਅਨਿਲਞ੍ਜਸੇ.

੩੦. ‘‘ਅਞ੍ਞਂ ਕਿਞ੍ਚਿ ਨ ਪਸ੍ਸਾਮਿ, ਪੂਜਾਯੋਗ੍ਗਂ ਮਹੇਸਿਨੋ;

ਅਸੋਕਂ ਪਲ੍ਲਵਂ ਦਿਸ੍ਵਾ, ਆਕਾਸੇ ਉਕ੍ਖਿਪਿਂ ਅਹਂ.

੩੧. ‘‘ਬੁਦ੍ਧਸ੍ਸ ਤੇ ਕਿਸਲਯਾ, ਗਚ੍ਛਤੋ ਯਨ੍ਤਿ ਪਚ੍ਛਤੋ;

ਤਾਹਂ ਦਿਸ੍ਵਾਨ ਸਂਵਿਜਿਂ [ਸੋਹਂ ਦਿਸ੍ਵਾਨ ਤਂ ਇਦ੍ਧਿਂ (ਸੀ. ਸ੍ਯਾ.)], ਅਹੋ ਬੁਦ੍ਧਸ੍ਸੁਲ਼ਾਰਤਾ.

੩੨. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਪਲ੍ਲਵਂ ਅਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੩੩. ‘‘ਸਤ੍ਤਤਿਂਸੇ [ਸਤ੍ਤਵੀਸੇ (ਸੀ. ਸ੍ਯਾ.)] ਇਤੋ ਕਪ੍ਪੇ, ਏਕੋ ਏਕਿਸ੍ਸਰੋ ਅਹੁ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੩੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਕਿਸਲਯਪੂਜਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਕਿਸਲਯਪੂਜਕਤ੍ਥੇਰਸ੍ਸਾਪਦਾਨਂ ਛਟ੍ਠਂ.