੨੦. ਤਮਾਲਪੁਪ੍ਫਿਯਵਗ੍ਗੋ

੧. ਤਮਾਲਪੁਪ੍ਫਿਯਤ੍ਥੇਰਅਪਦਾਨਂ

੧. ‘‘ਚੁਲ੍ਲਾਸੀਤਿਸਹਸ੍ਸਾਨਿ, ਥਮ੍ਭਾ ਸੋਵਣ੍ਣਯਾ ਅਹੂ;

ਦੇਵਲਟ੍ਠਿਪਟਿਭਾਗਂ, ਵਿਮਾਨਂ ਮੇ ਸੁਨਿਮ੍ਮਿਤਂ.

੨. ‘‘ਤਮਾਲਪੁਪ੍ਫਂ ਪਗ੍ਗਯ੍ਹ, ਵਿਪ੍ਪਸਨ੍ਨੇਨ ਚੇਤਸਾ;

ਬੁਦ੍ਧਸ੍ਸ ਅਭਿਰੋਪਯਿਂ, ਸਿਖਿਨੋ ਲੋਕਬਨ੍ਧੁਨੋ.

੩. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੪. ‘‘ਇਤੋ ਵੀਸਤਿਮੇ ਕਪ੍ਪੇ, ਚਨ੍ਦਤਿਤ੍ਤੋਤਿ ਏਕਕੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੫. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਤਮਾਲਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਤਮਾਲਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਪਠਮਂ.

੨. ਤਿਣਸਨ੍ਥਾਰਕਤ੍ਥੇਰਅਪਦਾਨਂ

੬. ‘‘ਯਦਾ ਵਨਵਾਸੀ [ਯਂ ਦਾਯਵਾਸਿਕੋ (ਸੀ.)] ਇਸਿ, ਤਿਣਂ ਲਾਯਤਿ ਸਤ੍ਥੁਨੋ;

ਸਬ੍ਬੇ ਪਦਕ੍ਖਿਣਾਵਟ੍ਟਾ [ਪਦਕ੍ਖਿਣਾਵਤ੍ਤਾ (ਸੀ. ਸ੍ਯਾ.)], ਪਥਬ੍ਯਾ [ਪੁਥਵ੍ਯਾ (ਸੀ.)] ਨਿਪਤਿਂਸੁ ਤੇ.

੭. ‘‘ਤਮਹਂ ਤਿਣਮਾਦਾਯ, ਸਨ੍ਥਰਿਂ ਧਰਣੁਤ੍ਤਮੇ;

ਤੀਣੇਵ ਤਾਲਪਤ੍ਤਾਨਿ, ਆਹਰਿਤ੍ਵਾਨਹਂ ਤਦਾ.

੮. ‘‘ਤਿਣੇਨ ਛਦਨਂ ਕਤ੍ਵਾ, ਸਿਦ੍ਧਤ੍ਥਸ੍ਸ ਅਦਾਸਹਂ;

ਸਤ੍ਤਾਹਂ ਧਾਰਯੁਂ ਤਸ੍ਸ [ਤਤ੍ਥ (ਸ੍ਯਾ.)], ਦੇਵਮਾਨੁਸਸਤ੍ਥੁਨੋ.

੯. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਤਿਣਂ ਅਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਤਿਣਦਾਨਸ੍ਸਿਦਂ ਫਲਂ.

੧੦. ‘‘ਪਞ੍ਚਸਟ੍ਠਿਮ੍ਹਿਤੋ ਕਪ੍ਪੇ, ਚਤ੍ਤਾਰੋਸੁਂ ਮਹਦ੍ਧਨਾ;

ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.

੧੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਤਿਣਸਨ੍ਥਾਰਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਤਿਣਸਨ੍ਥਾਰਕਤ੍ਥੇਰਸ੍ਸਾਪਦਾਨਂ ਦੁਤਿਯਂ.

੩. ਖਣ੍ਡਪੁਲ੍ਲਿਯਤ੍ਥੇਰਅਪਦਾਨਂ

੧੨. ‘‘ਫੁਸ੍ਸਸ੍ਸ ਖੋ ਭਗਵਤੋ, ਥੂਪੋ ਆਸਿ ਮਹਾਵਨੇ;

ਕੁਞ੍ਜਰੇਹਿ ਤਦਾ ਭਿਨ੍ਨੋ, ਪਰੂਲ਼੍ਹੋ ਪਾਦਪੋ [ਪਰੂਲ਼੍ਹਪਾਦਪੋ (ਸੀ.), ਸਂਰੂਲ਼੍ਹੋ ਪਾਦਪੋ (ਸ੍ਯਾ.)] ਤਹਿਂ.

੧੩. ‘‘ਵਿਸਮਞ੍ਚ ਸਮਂ ਕਤ੍ਵਾ, ਸੁਧਾਪਿਣ੍ਡਂ ਅਦਾਸਹਂ;

ਤਿਲੋਕਗਰੁਨੋ ਤਸ੍ਸ, ਗੁਣੇਹਿ ਪਰਿਤੋਸਿਤੋ [ਪਰਿਤੋ ਸੁਤੋ (ਕ.)].

੧੪. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਸੁਧਾਪਿਣ੍ਡਸ੍ਸਿਦਂ ਫਲਂ.

੧੫. ‘‘ਸਤ੍ਤਸਤ੍ਤਤਿਕਪ੍ਪਮ੍ਹਿ, ਜਿਤਸੇਨਾਸੁਂ ਸੋਲ਼ਸ;

ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.

੧੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਖਣ੍ਡਫੁਲ੍ਲਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਖਣ੍ਡਪੁਲ੍ਲਿਯਤ੍ਥੇਰਸ੍ਸਾਪਦਾਨਂ ਤਤਿਯਂ.

੪. ਅਸੋਕਪੂਜਕਤ੍ਥੇਰਅਪਦਾਨਂ

੧੭. ‘‘ਤਿਵਰਾਯਂ [ਤਿਪੁਰਾਯਂ (ਸ੍ਯਾ.)] ਪੁਰੇ ਰਮ੍ਮੇ, ਰਾਜੁਯ੍ਯਾਨਂ ਅਹੁ ਤਦਾ;

ਉਯ੍ਯਾਨਪਾਲੋ ਤਤ੍ਥਾਸਿਂ, ਰਞ੍ਞੋ ਬਦ੍ਧਚਰੋ ਅਹਂ.

੧੮. ‘‘ਪਦੁਮੋ ਨਾਮ ਨਾਮੇਨ, ਸਯਮ੍ਭੂ ਸਪ੍ਪਭੋ ਅਹੁ;

ਨਿਸਿਨ੍ਨਂ [ਨਿਸਿਨ੍ਨੋ (ਕ.)] ਪੁਣ੍ਡਰੀਕਮ੍ਹਿ, ਛਾਯਾ ਨ ਜਹਿ ਤਂ ਮੁਨਿਂ.

੧੯. ‘‘ਅਸੋਕਂ ਪੁਪ੍ਫਿਤਂ ਦਿਸ੍ਵਾ, ਪਿਣ੍ਡਿਭਾਰਂ ਸੁਦਸ੍ਸਨਂ;

ਬੁਦ੍ਧਸ੍ਸ ਅਭਿਰੋਪੇਸਿਂ, ਜਲਜੁਤ੍ਤਮਨਾਮਿਨੋ.

੨੦. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੨੧. ‘‘ਸਤ੍ਤਤਿਂਸਮ੍ਹਿਤੋ ਕਪ੍ਪੇ, ਸੋਲ਼ਸ ਅਰਣਞ੍ਜਹਾ [ਅਰੁਣਞ੍ਜਹਾ (ਸੀ.)];

ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.

੨੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਅਸੋਕਪੂਜਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਅਸੋਕਪੂਜਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.

੫. ਅਙ੍ਕੋਲਕਤ੍ਥੇਰਅਪਦਾਨਂ

੨੩. ‘‘ਅਙ੍ਕੋਲਂ ਪੁਪ੍ਫਿਤਂ ਦਿਸ੍ਵਾ, ਮਾਲਾਵਰਂ ਸਕੋਸਕਂ [ਸਮੋਗਧਂ (ਸ੍ਯਾ.)];

ਓਚਿਨਿਤ੍ਵਾਨ ਤਂ ਪੁਪ੍ਫਂ, ਅਗਮਂ ਬੁਦ੍ਧਸਨ੍ਤਿਕਂ.

੨੪. ‘‘ਸਿਦ੍ਧਤ੍ਥੋ ਤਮ੍ਹਿ ਸਮਯੇ, ਪਤਿਲੀਨੋ ਮਹਾਮੁਨਿ;

ਮੁਹੁਤ੍ਤਂ ਪਟਿਮਾਨੇਤ੍ਵਾ, ਗੁਹਾਯਂ ਪੁਪ੍ਫਮੋਕਿਰਿਂ.

੨੫. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਪੁਪ੍ਫਦਾਨਸ੍ਸਿਦਂ [ਬੁਦ੍ਧਪੂਜਾਯਿਦਂ (ਸੀ. ਸ੍ਯਾ.)] ਫਲਂ.

੨੬. ‘‘ਛਤ੍ਤਿਂਸਮ੍ਹਿ ਇਤੋ ਕਪ੍ਪੇ, ਆਸੇਕੋ ਦੇਵਗਜ੍ਜਿਤੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੨੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਅਙ੍ਕੋਲਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਅਙ੍ਕੋਲਕਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.

੬. ਕਿਸਲਯਪੂਜਕਤ੍ਥੇਰਅਪਦਾਨਂ

੨੮. ‘‘ਨਗਰੇ ਦ੍ਵਾਰਵਤਿਯਾ, ਮਾਲਾਵਚ੍ਛੋ ਮਮਂ ਅਹੁ;

ਉਦਪਾਨੋ ਚ ਤਤ੍ਥੇਵ, ਪਾਦਪਾਨਂ ਵਿਰੋਹਨੋ.

੨੯. ‘‘ਸਬਲੇਨ ਉਪਤ੍ਥਦ੍ਧੋ, ਸਿਦ੍ਧਤ੍ਥੋ ਅਪਰਾਜਿਤੋ;

ਮਮਾਨੁਕਮ੍ਪਮਾਨੋ ਸੋ, ਗਚ੍ਛਤੇ ਅਨਿਲਞ੍ਜਸੇ.

੩੦. ‘‘ਅਞ੍ਞਂ ਕਿਞ੍ਚਿ ਨ ਪਸ੍ਸਾਮਿ, ਪੂਜਾਯੋਗ੍ਗਂ ਮਹੇਸਿਨੋ;

ਅਸੋਕਂ ਪਲ੍ਲਵਂ ਦਿਸ੍ਵਾ, ਆਕਾਸੇ ਉਕ੍ਖਿਪਿਂ ਅਹਂ.

੩੧. ‘‘ਬੁਦ੍ਧਸ੍ਸ ਤੇ ਕਿਸਲਯਾ, ਗਚ੍ਛਤੋ ਯਨ੍ਤਿ ਪਚ੍ਛਤੋ;

ਤਾਹਂ ਦਿਸ੍ਵਾਨ ਸਂਵਿਜਿਂ [ਸੋਹਂ ਦਿਸ੍ਵਾਨ ਤਂ ਇਦ੍ਧਿਂ (ਸੀ. ਸ੍ਯਾ.)], ਅਹੋ ਬੁਦ੍ਧਸ੍ਸੁਲ਼ਾਰਤਾ.

੩੨. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਪਲ੍ਲਵਂ ਅਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੩੩. ‘‘ਸਤ੍ਤਤਿਂਸੇ [ਸਤ੍ਤਵੀਸੇ (ਸੀ. ਸ੍ਯਾ.)] ਇਤੋ ਕਪ੍ਪੇ, ਏਕੋ ਏਕਿਸ੍ਸਰੋ ਅਹੁ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੩੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਕਿਸਲਯਪੂਜਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਕਿਸਲਯਪੂਜਕਤ੍ਥੇਰਸ੍ਸਾਪਦਾਨਂ ਛਟ੍ਠਂ.

੭. ਤਿਨ੍ਦੁਕਦਾਯਕਤ੍ਥੇਰਅਪਦਾਨਂ

੩੫. ‘‘ਗਿਰਿਦੁਗ੍ਗਚਰੋ ਆਸਿਂ, ਮਕ੍ਕਟੋ ਥਾਮਵੇਗਿਕੋ;

ਫਲਿਨਂ ਤਿਨ੍ਦੁਕਂ ਦਿਸ੍ਵਾ, ਬੁਦ੍ਧਸੇਟ੍ਠਂ ਅਨੁਸ੍ਸਰਿਂ.

੩੬. ‘‘ਨਿਕ੍ਖਮਿਤ੍ਵਾ ਕਤਿਪਾਹਂ, ਵਿਚਿਨਿਂ ਲੋਕਨਾਯਕਂ;

ਪਸਨ੍ਨਚਿਤ੍ਤੋ ਸੁਮਨੋ, ਸਿਦ੍ਧਤ੍ਥਂ ਤਿਭਵਨ੍ਤਗੁਂ.

੩੭. ‘‘ਮਮ ਸਙ੍ਕਪ੍ਪਮਞ੍ਞਾਯ, ਸਤ੍ਥਾ ਲੋਕੇ ਅਨੁਤ੍ਤਰੋ;

ਖੀਣਾਸਵਸਹਸ੍ਸੇਹਿ, ਆਗਚ੍ਛਿ ਮਮ ਸਨ੍ਤਿਕਂ.

੩੮. ‘‘ਪਾਮੋਜ੍ਜਂ ਜਨਯਿਤ੍ਵਾਨ, ਫਲਹਤ੍ਥੋ ਉਪਾਗਮਿਂ;

ਪਟਿਗ੍ਗਹੇਸਿ ਭਗਵਾ, ਸਬ੍ਬਞ੍ਞੂ ਵਦਤਂ ਵਰੋ.

੩੯. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਫਲਂ ਅਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

੪੦. ‘‘ਸਤ੍ਤਪਞ੍ਞਾਸਕਪ੍ਪਮ੍ਹਿ, ਉਪਨਨ੍ਦਸਨਾਮਕੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੪੧. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਤਿਨ੍ਦੁਕਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਤਿਨ੍ਦੁਕਦਾਯਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.

੮. ਮੁਟ੍ਠਿਪੂਜਕਤ੍ਥੇਰਅਪਦਾਨਂ

੪੨. ‘‘ਸੁਮੇਧੋ ਨਾਮ ਭਗਵਾ, ਲੋਕਜੇਟ੍ਠੋ ਨਰਾਸਭੋ;

ਪਚ੍ਛਿਮੇ ਅਨੁਕਮ੍ਪਾਯ, ਪਧਾਨਂ ਪਦਹੀ ਜਿਨੋ.

੪੩. ‘‘ਤਸ੍ਸ ਚਙ੍ਕਮਮਾਨਸ੍ਸ, ਦ੍ਵਿਪਦਿਨ੍ਦਸ੍ਸ ਤਾਦਿਨੋ;

ਗਿਰਿਨੇਲਸ੍ਸ ਪੁਪ੍ਫਾਨਂ, ਮੁਟ੍ਠਿਂ ਬੁਦ੍ਧਸ੍ਸ ਰੋਪਯਿਂ.

੪੪. ‘‘ਤੇਨ ਚਿਤ੍ਤਪ੍ਪਸਾਦੇਨ, ਸੁਕ੍ਕਮੂਲੇਨ ਚੋਦਿਤੋ;

ਤਿਂਸਕਪ੍ਪਸਹਸ੍ਸਾਨਿ, ਦੁਗ੍ਗਤਿਂ ਨੁਪਪਜ੍ਜਹਂ.

੪੫. ‘‘ਤੇਵੀਸਤਿਕਪ੍ਪਸਤੇ, ਸੁਨੇਲੋ ਨਾਮ ਖਤ੍ਤਿਯੋ;

ਸਤ੍ਤਰਤਨਸਮ੍ਪਨ੍ਨੋ, ਏਕੋ ਆਸਿਂ ਮਹਬ੍ਬਲੋ.

੪੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਮੁਟ੍ਠਿਪੂਜਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਮੁਟ੍ਠਿਪੂਜਕਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.

੯. ਕਿਂਕਣਿਕਪੁਪ੍ਫਿਯਤ੍ਥੇਰਅਪਦਾਨਂ

੪੭. ‘‘ਸੁਮਙ੍ਗਲੋਤਿ ਨਾਮੇਨ, ਸਯਮ੍ਭੂ ਅਪਰਾਜਿਤੋ;

ਪਵਨਾ ਨਿਕ੍ਖਮਿਤ੍ਵਾਨ, ਨਗਰਂ ਪਾਵਿਸੀ ਜਿਨੋ.

੪੮. ‘‘ਪਿਣ੍ਡਚਾਰਂ ਚਰਿਤ੍ਵਾਨ, ਨਿਕ੍ਖਮ੍ਮ ਨਗਰਾ ਮੁਨਿ;

ਕਤਕਿਚ੍ਚੋਵ ਸਮ੍ਬੁਦ੍ਧੋ, ਸੋ ਵਸੀ ਵਨਮਨ੍ਤਰੇ.

੪੯. ‘‘ਕਿਂਕਣਿਪੁਪ੍ਫਂ ਪਗ੍ਗਯ੍ਹ, ਬੁਦ੍ਧਸ੍ਸ ਅਭਿਰੋਪਯਿਂ;

ਪਸਨ੍ਨਚਿਤ੍ਤੋ ਸੁਮਨੋ, ਸਯਮ੍ਭੁਸ੍ਸ ਮਹੇਸਿਨੋ.

੫੦. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੫੧. ‘‘ਛਲ਼ਾਸੀਤਿਮ੍ਹਿਤੋ ਕਪ੍ਪੇ, ਅਪਿਲਾਸਿਸਨਾਮਕੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੫੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਕਿਂਕਣਿਕਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਕਿਂਕਣਿਕਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਨਵਮਂ.

੧੦. ਯੂਥਿਕਪੁਪ੍ਫਿਯਤ੍ਥੇਰਅਪਦਾਨਂ

੫੩. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਆਹੁਤੀਨਂ ਪਟਿਗ੍ਗਹੋ;

ਪਵਨਾ ਨਿਕ੍ਖਮਿਤ੍ਵਾਨ, ਵਿਹਾਰਂ ਯਾਤਿ ਚਕ੍ਖੁਮਾ.

੫੪. ‘‘ਉਭੋ ਹਤ੍ਥੇਹਿ ਪਗ੍ਗਯ੍ਹ, ਯੂਥਿਕਂ ਪੁਪ੍ਫਮੁਤ੍ਤਮਂ;

ਬੁਦ੍ਧਸ੍ਸ ਅਭਿਰੋਪਯਿਂ, ਮੇਤ੍ਤਚਿਤ੍ਤਸ੍ਸ ਤਾਦਿਨੋ.

੫੫. ‘‘ਤੇਨ ਚਿਤ੍ਤਪ੍ਪਸਾਦੇਨ, ਅਨੁਭੋਤ੍ਵਾਨ ਸਮ੍ਪਦਾ;

ਕਪ੍ਪਾਨਂ ਸਤਸਹਸ੍ਸਂ, ਦੁਗ੍ਗਤਿਂ ਨੁਪਪਜ੍ਜਹਂ.

੫੬. ‘‘ਇਤੋ ਪਞ੍ਞਾਸਕਪ੍ਪੇਸੁ, ਏਕੋ ਆਸਿਂ ਜਨਾਧਿਪੋ;

ਸਮਿਤ੍ਤਨਨ੍ਦਨੋ ਨਾਮ, ਚਕ੍ਕਵਤ੍ਤੀ ਮਹਬ੍ਬਲੋ.

੫੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਯੂਥਿਕਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ;

ਯੂਥਿਕਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਦਸਮਂ.

ਤਮਾਲਪੁਪ੍ਫਿਯਵਗ੍ਗੋ ਵੀਸਤਿਮੋ.

ਤਸ੍ਸੁਦ੍ਦਾਨਂ –

ਤਮਾਲਤਿਣਸਨ੍ਥਾਰੋ, ਖਣ੍ਡਫੁਲ੍ਲਿ ਅਸੋਕਿਯੋ;

ਅਙ੍ਕੋਲਕੀ ਕਿਸਲਯੋ, ਤਿਨ੍ਦੁਕੋ ਨੇਲਪੁਪ੍ਫਿਯੋ;

ਕਿਂਕਣਿਕੋ ਯੂਥਿਕੋ ਚ, ਗਾਥਾ ਪਞ੍ਞਾਸ ਅਟ੍ਠ ਚਾਤਿ.

ਅਥ ਵਗ੍ਗੁਦ੍ਦਾਨਂ –

ਭਿਕ੍ਖਾਦਾਯੀ ਪਰਿਵਾਰੋ, ਸੇਰੇਯ੍ਯੋ ਸੋਭਿਤੋ ਤਥਾ;

ਛਤ੍ਤਞ੍ਚ ਬਨ੍ਧੁਜੀਵੀ ਚ, ਸੁਪਾਰਿਚਰਿਯੋਪਿ ਚ.

ਕੁਮੁਦੋ ਕੁਟਜੋ ਚੇਵ, ਤਮਾਲਿ ਦਸਮੋ ਕਤੋ;

ਛਸਤਾਨਿ ਚ ਗਾਥਾਨਿ, ਛਸਟ੍ਠਿ ਚ ਤਤੁਤ੍ਤਰਿ.

ਭਿਕ੍ਖਾਵਗ੍ਗਦਸਕਂ.