੯. ਸੋਪਾਕਤ੍ਥੇਰਅਪਦਾਨਂ

੧੧੨. ‘‘ਪਬ੍ਭਾਰਂ ਸੋਧਯਨ੍ਤਸ੍ਸ [ਸੇਵਯਨ੍ਤਸ੍ਸ (ਸੀ. ਕ.)], ਵਿਪਿਨੇ ਪਬ੍ਬਤੁਤ੍ਤਮੇ;

ਸਿਦ੍ਧਤ੍ਥੋ ਨਾਮ ਭਗਵਾ, ਆਗਚ੍ਛਿ ਮਮ ਸਨ੍ਤਿਕਂ.

੧੧੩. ‘‘ਬੁਦ੍ਧਂ ਉਪਗਤਂ ਦਿਸ੍ਵਾ, ਲੋਕਜੇਟ੍ਠਸ੍ਸ ਤਾਦਿਨੋ;

ਸਨ੍ਥਰਂ ਸਨ੍ਥਰਿਤ੍ਵਾਨ [ਪਞ੍ਞਪੇਤ੍ਵਾਨ (ਸ੍ਯਾ. ਅਟ੍ਠ)], ਪੁਪ੍ਫਾਸਨਮਦਾਸਹਂ.

੧੧੪. ‘‘ਪੁਪ੍ਫਾਸਨੇ ਨਿਸੀਦਿਤ੍ਵਾ, ਸਿਦ੍ਧਤ੍ਥੋ ਲੋਕਨਾਯਕੋ;

ਮਮਞ੍ਚ ਗਤਿਮਞ੍ਞਾਯ, ਅਨਿਚ੍ਚਤਮੁਦਾਹਰਿ.

੧੧੫. ‘‘‘ਅਨਿਚ੍ਚਾ ਵਤ ਸਙ੍ਖਾਰਾ, ਉਪ੍ਪਾਦਵਯਧਮ੍ਮਿਨੋ;

ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਨ੍ਤਿ, ਤੇਸਂ ਵੂਪਸਮੋ ਸੁਖੋ’.

੧੧੬. ‘‘ਇਦਂ ਵਤ੍ਵਾਨ ਸਬ੍ਬਞ੍ਞੂ, ਲੋਕਜੇਟ੍ਠੋ ਨਰਾਸਭੋ;

ਨਭਂ ਅਬ੍ਭੁਗ੍ਗਮਿ ਵੀਰੋ, ਹਂਸਰਾਜਾਵ ਅਮ੍ਬਰੇ.

੧੧੭. ‘‘ਸਕਂ ਦਿਟ੍ਠਿਂ ਜਹਿਤ੍ਵਾਨ, ਭਾਵਯਾਨਿਚ੍ਚਸਞ੍ਞਹਂ;

ਏਕਾਹਂ ਭਾਵਯਿਤ੍ਵਾਨ, ਤਤ੍ਥ ਕਾਲਂ ਕਤੋ ਅਹਂ.

੧੧੮. ‘‘ਦ੍ਵੇ ਸਮ੍ਪਤ੍ਤੀ ਅਨੁਭੋਤ੍ਵਾ, ਸੁਕ੍ਕਮੂਲੇਨ ਚੋਦਿਤੋ;

ਪਚ੍ਛਿਮੇ ਭਵੇ ਸਮ੍ਪਤ੍ਤੇ, ਸਪਾਕਯੋਨੁਪਾਗਮਿਂ.

੧੧੯. ‘‘ਅਗਾਰਾ ਅਭਿਨਿਕ੍ਖਮ੍ਮ, ਪਬ੍ਬਜਿਂ ਅਨਗਾਰਿਯਂ;

ਜਾਤਿਯਾ ਸਤ੍ਤਵਸ੍ਸੋਹਂ, ਅਰਹਤ੍ਤਮਪਾਪੁਣਿਂ.

੧੨੦. ‘‘ਆਰਦ੍ਧਵੀਰਿਯੋ ਪਹਿਤਤ੍ਤੋ, ਸੀਲੇਸੁ ਸੁਸਮਾਹਿਤੋ;

ਤੋਸੇਤ੍ਵਾਨ ਮਹਾਨਾਗਂ, ਅਲਤ੍ਥਂ ਉਪਸਮ੍ਪਦਂ.

੧੨੧. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਕਮ੍ਮਮਕਰਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਪੁਪ੍ਫਦਾਨਸ੍ਸਿਦਂ ਫਲਂ.

੧੨੨. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਸਞ੍ਞਂ ਭਾਵਯਿਂ ਤਦਾ;

ਤਂ ਸਞ੍ਞਂ ਭਾਵਯਨ੍ਤਸ੍ਸ, ਪਤ੍ਤੋ ਮੇ ਆਸਵਕ੍ਖਯੋ.

੧੨੩. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੋਪਾਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸੋਪਾਕਤ੍ਥੇਰਸ੍ਸਾਪਦਾਨਂ ਨਵਮਂ.