੧੦. ਸੁਮਙ੍ਗਲਤ੍ਥੇਰਅਪਦਾਨਂ

੧੨੪. ‘‘ਆਹੁਤਿਂ ਯਿਟ੍ਠੁਕਾਮੋਹਂ, ਪਟਿਯਾਦੇਤ੍ਵਾਨ ਭੋਜਨਂ;

ਬ੍ਰਾਹ੍ਮਣੇ ਪਟਿਮਾਨੇਨ੍ਤੋ, ਵਿਸਾਲੇ ਮਾਲ਼ਕੇ ਠਿਤੋ.

੧੨੫. ‘‘ਅਥਦ੍ਦਸਾਸਿਂ ਸਮ੍ਬੁਦ੍ਧਂ, ਪਿਯਦਸ੍ਸਿਂ ਮਹਾਯਸਂ;

ਸਬ੍ਬਲੋਕਵਿਨੇਤਾਰਂ, ਸਯਮ੍ਭੁਂ ਅਗ੍ਗਪੁਗ੍ਗਲਂ.

੧੨੬. ‘‘ਭਗਵਨ੍ਤਂ ਜੁਤਿਮਨ੍ਤਂ, ਸਾਵਕੇਹਿ ਪੁਰਕ੍ਖਤਂ;

ਆਦਿਚ੍ਚਮਿਵ ਰੋਚਨ੍ਤਂ, ਰਥਿਯਂ ਪਟਿਪਨ੍ਨਕਂ.

੧੨੭. ‘‘ਅਞ੍ਜਲਿਂ ਪਗ੍ਗਹੇਤ੍ਵਾਨ, ਸਕਂ ਚਿਤ੍ਤਂ ਪਸਾਦਯਿਂ;

ਮਨਸਾਵ ਨਿਮਨ੍ਤੇਸਿਂ, ‘ਆਗਚ੍ਛਤੁ ਮਹਾਮੁਨਿ’.

੧੨੮. ‘‘ਮਮ ਸਙ੍ਕਪ੍ਪਮਞ੍ਞਾਯ, ਸਤ੍ਥਾ ਲੋਕੇ ਅਨੁਤ੍ਤਰੋ;

ਖੀਣਾਸਵਸਹਸ੍ਸੇਹਿ, ਮਮ ਦ੍ਵਾਰਂ ਉਪਾਗਮਿ.

੧੨੯. ‘‘ਨਮੋ ਤੇ ਪੁਰਿਸਾਜਞ੍ਞ, ਨਮੋ ਤੇ ਪੁਰਿਸੁਤ੍ਤਮ;

ਪਾਸਾਦਂ ਅਭਿਰੂਹਿਤ੍ਵਾ, ਸੀਹਾਸਨੇ ਨਿਸੀਦਤਂ [ਨਿਸੀਦ ਤ੍ਵਂ (ਸੀ.)].

੧੩੦. ‘‘ਦਨ੍ਤੋ ਦਨ੍ਤਪਰਿਵਾਰੋ, ਤਿਣ੍ਣੋ ਤਾਰਯਤਂ ਵਰੋ;

ਪਾਸਾਦਂ ਅਭਿਰੂਹਿਤ੍ਵਾ, ਨਿਸੀਦਿ ਪਵਰਾਸਨੇ.

੧੩੧. ‘‘ਯਂ ਮੇ ਅਤ੍ਥਿ ਸਕੇ ਗੇਹੇ, ਆਮਿਸਂ ਪਚ੍ਚੁਪਟ੍ਠਿਤਂ;

ਤਾਹਂ ਬੁਦ੍ਧਸ੍ਸ ਪਾਦਾਸਿਂ, ਪਸਨ੍ਨੋ ਸੇਹਿ ਪਾਣਿਭਿ.

੧੩੨. ‘‘ਪਸਨ੍ਨਚਿਤ੍ਤੋ ਸੁਮਨੋ, ਵੇਦਜਾਤੋ ਕਤਞ੍ਜਲੀ;

ਬੁਦ੍ਧਸੇਟ੍ਠਂ ਨਮਸ੍ਸਾਮਿ, ਅਹੋ ਬੁਦ੍ਧਸ੍ਸੁਲ਼ਾਰਤਾ.

੧੩੩. ‘‘ਅਟ੍ਠਨ੍ਨਂ ਪਯਿਰੂਪਾਸਤਂ, ਭੁਞ੍ਜਂ ਖੀਣਾਸਵਾ ਬਹੂ;

ਤੁਯ੍ਹੇਵੇਸੋ ਆਨੁਭਾਵੋ, ਸਰਣਂ ਤਂ ਉਪੇਮਹਂ.

੧੩੪. ‘‘ਪਿਯਦਸ੍ਸੀ ਚ ਭਗਵਾ, ਲੋਕਜੇਟ੍ਠੋ ਨਰਾਸਭੋ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੧੩੫. ‘‘‘ਯੋ ਸੋ ਸਙ੍ਘਂ ਅਭੋਜੇਸਿ, ਉਜੁਭੂਤਂ ਸਮਾਹਿਤਂ;

ਤਥਾਗਤਞ੍ਚ ਸਮ੍ਬੁਦ੍ਧਂ, ਸੁਣਾਥ ਮਮ ਭਾਸਤੋ.

੧੩੬. ‘‘‘ਸਤ੍ਤਵੀਸਤਿਕ੍ਖਤ੍ਤੁਂ ਸੋ, ਦੇਵਰਜ੍ਜਂ ਕਰਿਸ੍ਸਤਿ;

ਸਕਕਮ੍ਮਾਭਿਰਦ੍ਧੋ ਸੋ, ਦੇਵਲੋਕੇ ਰਮਿਸ੍ਸਤਿ.

੧੩੭. ‘‘‘ਦਸ ਅਟ੍ਠ ਚਕ੍ਖਤ੍ਤੁਂ [ਦਸਞ੍ਚਟ੍ਠਕ੍ਖਤ੍ਥੁਂ (ਸੀ.), ਦਸ ਚਟ੍ਠਕ੍ਖਤ੍ਤੁਂ (ਸ੍ਯਾ.)] ਸੋ, ਚਕ੍ਕਵਤ੍ਤੀ ਭਵਿਸ੍ਸਤਿ;

ਪਥਬ੍ਯਾ ਰਜ੍ਜਂ ਪਞ੍ਚਸਤਂ, ਵਸੁਧਂ ਆਵਸਿਸ੍ਸਤਿ’.

੧੩੮. ‘‘ਅਰਞ੍ਞਵਨਮੋਗ੍ਗਯ੍ਹ, ਕਾਨਨਂ ਬ੍ਯਗ੍ਘਸੇਵਿਤਂ;

ਪਧਾਨਂ ਪਦਹਿਤ੍ਵਾਨ, ਕਿਲੇਸਾ ਝਾਪਿਤਾ ਮਯਾ.

੧੩੯. ‘‘ਅਟ੍ਠਾਰਸੇ ਕਪ੍ਪਸਤੇ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਭਤ੍ਤਦਾਨਸ੍ਸਿਦਂ ਫਲਂ.

੧੪੦. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੁਮਙ੍ਗਲੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸੁਮਙ੍ਗਲਤ੍ਥੇਰਸ੍ਸਾਪਦਾਨਂ ਦਸਮਂ.

ਤਸ੍ਸੁਦ੍ਦਾਨਂ –

ਸੀਹਾਸਨੀ ਏਕਥਮ੍ਭੀ, ਨਨ੍ਦੋ ਚ ਚੂਲ਼ਪਨ੍ਥਕੋ;

ਪਿਲਿਨ੍ਦਰਾਹੁਲੋ ਚੇਵ, ਵਙ੍ਗਨ੍ਤੋ ਰਟ੍ਠਪਾਲਕੋ.

ਸੋਪਾਕੋ ਮਙ੍ਗਲੋ ਚੇਵ, ਦਸੇਵ ਦੁਤਿਯੇ ਵਗ੍ਗੇ;

ਸਤਞ੍ਚ ਅਟ੍ਠਤਿਂਸ ਚ, ਗਾਥਾ ਚੇਤ੍ਥ ਪਕਾਸਿਤਾ.

ਸੀਹਾਸਨਿਯਵਗ੍ਗੋ ਦੁਤਿਯੋ.