੧. ਆਲਮ੍ਬਣਦਾਯਕਤ੍ਥੇਰਅਪਦਾਨਂ
੧. ‘‘ਅਤ੍ਥਦਸ੍ਸਿਸ੍ਸ ਭਗਵਤੋ, ਲੋਕਜੇਟ੍ਠਸ੍ਸ ਤਾਦਿਨੋ;
ਆਲਮ੍ਬਣਂ ਮਯਾ ਦਿਨ੍ਨਂ, ਦ੍ਵਿਪਦਿਨ੍ਦਸ੍ਸ ਤਾਦਿਨੋ.
੨. ‘‘ਧਰਣਿਂ ਪਟਿਪਜ੍ਜਾਮਿ, ਵਿਪੁਲਂ ਸਾਗਰਪ੍ਪਰਂ;
ਪਾਣੇਸੁ ਚ ਇਸ੍ਸਰਿਯਂ, ਵਤ੍ਤੇਮਿ ਵਸੁਧਾਯ ਚ.
੩. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;
ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.
੪. ‘‘ਇਤੋ ਦ੍ਵੇਸਟ੍ਠਿਕਪ੍ਪਮ੍ਹਿ, ਤਯੋ ਆਸਿਂਸੁ ਖਤ੍ਤਿਯਾ;
ਏਕਾਪਸ੍ਸਿਤਨਾਮਾ ਤੇ, ਚਕ੍ਕਵਤ੍ਤੀ ਮਹਬ੍ਬਲਾ.
੫. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;
ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.
ਇਤ੍ਥਂ ਸੁਦਂ ਆਯਸ੍ਮਾ ਆਲਮ੍ਬਣਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.
ਆਲਮ੍ਬਣਦਾਯਕਤ੍ਥੇਰਸ੍ਸਾਪਦਾਨਂ ਪਠਮਂ.