੫. ਪਿਲਿਨ੍ਦਵਚ੍ਛਤ੍ਥੇਰਅਪਦਾਨਂ

੫੫. ‘‘ਨਿਬ੍ਬੁਤੇ ਲੋਕਨਾਥਮ੍ਹਿ, ਸੁਮੇਧੇ ਅਗ੍ਗਪੁਗ੍ਗਲੇ;

ਪਸਨ੍ਨਚਿਤ੍ਤੋ ਸੁਮਨੋ, ਥੂਪਪੂਜਂ ਅਕਾਸਹਂ.

੫੬. ‘‘ਯੇ ਚ ਖੀਣਾਸਵਾ ਤਤ੍ਥ, ਛਲ਼ਭਿਞ੍ਞਾ ਮਹਿਦ੍ਧਿਕਾ;

ਤੇਹਂ ਤਤ੍ਥ ਸਮਾਨੇਤ੍ਵਾ, ਸਙ੍ਘਭਤ੍ਤਂ ਅਕਾਸਹਂ.

੫੭. ‘‘ਸੁਮੇਧਸ੍ਸ ਭਗਵਤੋ, ਉਪਟ੍ਠਾਕੋ ਤਦਾ ਅਹੁ;

ਸੁਮੇਧੋ ਨਾਮ ਨਾਮੇਨ, ਅਨੁਮੋਦਿਤ੍ਥ ਸੋ ਤਦਾ.

੫੮. ‘‘ਤੇਨ ਚਿਤ੍ਤਪ੍ਪਸਾਦੇਨ, ਵਿਮਾਨਂ ਉਪਪਜ੍ਜਹਂ;

ਛਲ਼ਾਸੀਤਿਸਹਸ੍ਸਾਨਿ, ਅਚ੍ਛਰਾਯੋ ਰਮਿਂਸੁ ਮੇ.

੫੯. ‘‘ਮਮੇਵ ਅਨੁਵਤ੍ਤਨ੍ਤਿ, ਸਬ੍ਬਕਾਮੇਹਿ ਤਾ ਸਦਾ;

ਅਞ੍ਞੇ ਦੇਵੇ ਅਭਿਭੋਮਿ, ਪੁਞ੍ਞਕਮ੍ਮਸ੍ਸਿਦਂ ਫਲਂ.

੬੦. ‘‘ਪਞ੍ਚਵੀਸਤਿਕਪ੍ਪਮ੍ਹਿ, ਵਰੁਣੋ ਨਾਮ ਖਤ੍ਤਿਯੋ;

ਵਿਸੁਦ੍ਧਭੋਜਨੋ [ਸੁਸੁਦ੍ਧਭੋਜਨੋ (ਸੀ.)] ਆਸਿਂ, ਚਕ੍ਕਵਤ੍ਤੀ ਅਹਂ ਤਦਾ.

੬੧. ‘‘ਨ ਤੇ ਬੀਜਂ ਪਵਪਨ੍ਤਿ, ਨਪਿ ਨੀਯਨ੍ਤਿ ਨਙ੍ਗਲਾ;

ਅਕਟ੍ਠਪਾਕਿਮਂ ਸਾਲਿਂ, ਪਰਿਭੁਞ੍ਜਨ੍ਤਿ ਮਾਨੁਸਾ.

੬੨. ‘‘ਤਤ੍ਥ ਰਜ੍ਜਂ ਕਰਿਤ੍ਵਾਨ, ਦੇਵਤ੍ਤਂ ਪੁਨ ਗਚ੍ਛਹਂ;

ਤਦਾਪਿ ਏਦਿਸਾ ਮਯ੍ਹਂ, ਨਿਬ੍ਬਤ੍ਤਾ ਭੋਗਸਮ੍ਪਦਾ.

੬੩. ‘‘ਨ ਮਂ ਮਿਤ੍ਤਾ ਅਮਿਤ੍ਤਾ ਵਾ, ਹਿਂਸਨ੍ਤਿ ਸਬ੍ਬਪਾਣਿਨੋ;

ਸਬ੍ਬੇਸਮ੍ਪਿ ਪਿਯੋ ਹੋਮਿ, ਪੁਞ੍ਞਕਮ੍ਮਸ੍ਸਿਦਂ ਫਲਂ.

੬੪. ‘‘ਤਿਂਸਕਪ੍ਪਸਹਸ੍ਸਮ੍ਹਿ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਗਨ੍ਧਾਲੇਪਸ੍ਸਿਦਂ ਫਲਂ.

੬੫. ‘‘ਇਮਸ੍ਮਿਂ ਭਦ੍ਦਕੇ ਕਪ੍ਪੇ, ਏਕੋ ਆਸਿਂ ਜਨਾਧਿਪੋ;

ਮਹਾਨੁਭਾਵੋ ਰਾਜਾਹਂ [ਰਾਜੀਸਿ (ਸ੍ਯਾ. ਕ.)], ਚਕ੍ਕਵਤ੍ਤੀ ਮਹਬ੍ਬਲੋ.

੬੬. ‘‘ਸੋਹਂ ਪਞ੍ਚਸੁ ਸੀਲੇਸੁ, ਠਪੇਤ੍ਵਾ ਜਨਤਂ ਬਹੁਂ;

ਪਾਪੇਤ੍ਵਾ ਸੁਗਤਿਂਯੇਵ, ਦੇਵਤਾਨਂ ਪਿਯੋ ਅਹੁਂ.

੬੭. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਿਲਿਨ੍ਦਵਚ੍ਛੋ [ਪਿਲਿਨ੍ਦਿਵਚ੍ਛੋ (ਸੀ.)] ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਿਲਿਨ੍ਦਵਚ੍ਛਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.