੬. ਰਾਹੁਲਤ੍ਥੇਰਅਪਦਾਨਂ

੬੮. ‘‘ਪਦੁਮੁਤ੍ਤਰਸ੍ਸ ਭਗਵਤੋ, ਲੋਕਜੇਟ੍ਠਸ੍ਸ ਤਾਦਿਨੋ;

ਸਤ੍ਤਭੂਮਮ੍ਹਿ ਪਾਸਾਦੇ, ਆਦਾਸਂ ਸਨ੍ਥਰਿਂ ਅਹਂ.

੬੯. ‘‘ਖੀਣਾਸਵਸਹਸ੍ਸੇਹਿ, ਪਰਿਕਿਣ੍ਣੋ ਮਹਾਮੁਨਿ;

ਉਪਾਗਮਿ ਗਨ੍ਧਕੁਟਿਂ, ਦ੍ਵਿਪਦਿਨ੍ਦੋ [ਦਿਪਦਿਨ੍ਦੋ (ਸੀ. ਸ੍ਯਾ.)] ਨਰਾਸਭੋ.

੭੦. ‘‘ਵਿਰੋਚੇਨ੍ਤੋ [ਵਿਰੋਚਯਂ (ਸ੍ਯਾ.)] ਗਨ੍ਧਕੁਟਿਂ, ਦੇਵਦੇਵੋ ਨਰਾਸਭੋ;

ਭਿਕ੍ਖੁਸਙ੍ਘੇ ਠਿਤੋ ਸਤ੍ਥਾ, ਇਮਾ ਗਾਥਾ ਅਭਾਸਥ.

੭੧. ‘‘‘ਯੇਨਾਯਂ ਜੋਤਿਤਾ ਸੇਯ੍ਯਾ, ਆਦਾਸੋਵ ਸੁਸਨ੍ਥਤੋ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੭੨. ‘‘‘ਸੋਣ੍ਣਮਯਾ ਰੂਪਿਮਯਾ, ਅਥੋ ਵੇਲ਼ੁਰਿਯਾਮਯਾ;

ਨਿਬ੍ਬਤ੍ਤਿਸ੍ਸਨ੍ਤਿ ਪਾਸਾਦਾ, ਯੇ ਕੇਚਿ ਮਨਸੋ ਪਿਯਾ.

੭੩. ‘‘‘ਚਤੁਸਟ੍ਠਿਕ੍ਖਤ੍ਤੁਂ ਦੇਵਿਨ੍ਦੋ, ਦੇਵਰਜ੍ਜਂ ਕਰਿਸ੍ਸਤਿ;

ਸਹਸ੍ਸਕ੍ਖਤ੍ਤੁਂ ਚਕ੍ਕਵਤ੍ਤੀ, ਭਵਿਸ੍ਸਤਿ ਅਨਨ੍ਤਰਾ.

੭੪. ‘‘‘ਏਕਵੀਸਤਿਕਪ੍ਪਮ੍ਹਿ, ਵਿਮਲੋ ਨਾਮ ਖਤ੍ਤਿਯੋ;

ਚਾਤੁਰਨ੍ਤੋ ਵਿਜਿਤਾਵੀ, ਚਕ੍ਕਵਤ੍ਤੀ ਭਵਿਸ੍ਸਤਿ.

੭੫. ‘‘‘ਨਗਰਂ ਰੇਣੁਵਤੀ ਨਾਮ, ਇਟ੍ਠਕਾਹਿ ਸੁਮਾਪਿਤਂ;

ਆਯਾਮਤੋ ਤੀਣਿ ਸਤਂ, ਚਤੁਰਸ੍ਸਸਮਾਯੁਤਂ.

੭੬. ‘‘‘ਸੁਦਸ੍ਸਨੋ ਨਾਮ ਪਾਸਾਦੋ, ਵਿਸ੍ਸਕਮ੍ਮੇਨ ਮਾਪਿਤੋ [ਵਿਸੁਕਮ੍ਮੇਨ§ਮਾਪਿਤੋ (ਕ.), ਵਿਸ੍ਸਕਮ੍ਮੇਨ ਨਿਮ੍ਮਿਤੋ (ਸੀ.)];

ਕੂਟਾਗਾਰਵਰੂਪੇਤੋ, ਸਤ੍ਤਰਤਨਭੂਸਿਤੋ.

੭੭. ‘‘‘ਦਸਸਦ੍ਦਾਵਿਵਿਤ੍ਤਂ ਤਂ [ਅਵਿਵਿਤ੍ਤਂ (ਸੀ.)], ਵਿਜ੍ਜਾਧਰਸਮਾਕੁਲਂ;

ਸੁਦਸ੍ਸਨਂਵ ਨਗਰਂ, ਦੇਵਤਾਨਂ ਭਵਿਸ੍ਸਤਿ.

੭੮. ‘‘‘ਪਭਾ ਨਿਗ੍ਗਚ੍ਛਤੇ ਤਸ੍ਸ, ਉਗ੍ਗਚ੍ਛਨ੍ਤੇਵ ਸੂਰਿਯੇ;

ਵਿਰੋਚੇਸ੍ਸਤਿ ਤਂ ਨਿਚ੍ਚਂ, ਸਮਨ੍ਤਾ ਅਟ੍ਠਯੋਜਨਂ.

੭੯. ‘‘‘ਕਪ੍ਪਸਤਸਹਸ੍ਸਮ੍ਹਿ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੮੦. ‘‘‘ਤੁਸਿਤਾ ਸੋ ਚਵਿਤ੍ਵਾਨ, ਸੁਕ੍ਕਮੂਲੇਨ ਚੋਦਿਤੋ;

ਗੋਤਮਸ੍ਸ ਭਗਵਤੋ, ਅਤ੍ਰਜੋ ਸੋ ਭਵਿਸ੍ਸਤਿ.

੮੧. ‘‘‘ਸਚੇ ਵਸੇਯ੍ਯ [ਸਚਾ’ਵਸੇਯ੍ਯ (?)] ਅਗਾਰਂ, ਚਕ੍ਕਵਤ੍ਤੀ ਭਵੇਯ੍ਯ ਸੋ;

ਅਟ੍ਠਾਨਮੇਤਂ ਯਂ ਤਾਦੀ, ਅਗਾਰੇ ਰਤਿਮਜ੍ਝਗਾ.

੮੨. ‘‘‘ਨਿਕ੍ਖਮਿਤ੍ਵਾ ਅਗਾਰਮ੍ਹਾ, ਪਬ੍ਬਜਿਸ੍ਸਤਿ ਸੁਬ੍ਬਤੋ;

ਰਾਹੁਲੋ ਨਾਮ ਨਾਮੇਨ, ਅਰਹਾ ਸੋ ਭਵਿਸ੍ਸਤਿ’.

੮੩. ‘‘ਕਿਕੀਵ ਅਣ੍ਡਂ ਰਕ੍ਖੇਯ੍ਯ, ਚਾਮਰੀ ਵਿਯ ਵਾਲਧਿਂ;

ਨਿਪਕੋ ਸੀਲਸਮ੍ਪਨ੍ਨੋ, ਮਮਂ ਰਕ੍ਖਿ ਮਹਾਮੁਨਿ [ਏਵਂ ਰਕ੍ਖਿਂ ਮਹਾਮੁਨਿ (ਸੀ. ਕ.), ਮਮਂ ਦਕ੍ਖਿ ਮਹਾਮੁਨਿ (ਸ੍ਯਾ.)].

੮੪. ‘‘ਤਸ੍ਸਾਹਂ ਧਮ੍ਮਮਞ੍ਞਾਯ, ਵਿਹਾਸਿਂ ਸਾਸਨੇ ਰਤੋ;

ਸਬ੍ਬਾਸਵੇ ਪਰਿਞ੍ਞਾਯ, ਵਿਹਰਾਮਿ ਅਨਾਸਵੋ.

੮੫. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਰਾਹੁਲੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਰਾਹੁਲਤ੍ਥੇਰਸ੍ਸਾਪਦਾਨਂ ਛਟ੍ਠਂ.