੩. ਦ੍ਵੇਰਤਨਿਯਤ੍ਥੇਰਅਪਦਾਨਂ

੧੨. ‘‘ਮਿਗਲੁਦ੍ਦੋ ਪੁਰੇ ਆਸਿਂ, ਅਰਞ੍ਞੇ ਕਾਨਨੇ ਅਹਂ;

ਅਦ੍ਦਸਂ ਵਿਰਜਂ ਬੁਦ੍ਧਂ, ਆਹੁਤੀਨਂ ਪਟਿਗ੍ਗਹਂ.

੧੩. ‘‘ਮਂਸਪੇਸਿ ਮਯਾ ਦਿਨ੍ਨਾ, ਵਿਪਸ੍ਸਿਸ੍ਸ ਮਹੇਸਿਨੋ;

ਸਦੇਵਕਸ੍ਮਿਂ ਲੋਕਸ੍ਮਿਂ, ਇਸ੍ਸਰਂ ਕਾਰਯਾਮਹਂ.

੧੪. ‘‘ਇਮਿਨਾ ਮਂਸਦਾਨੇਨ, ਰਤਨਂ ਨਿਬ੍ਬਤ੍ਤਤੇ ਮਮ;

ਦੁਵੇਮੇ ਰਤਨਾ ਲੋਕੇ, ਦਿਟ੍ਠਧਮ੍ਮਸ੍ਸ ਪਤ੍ਤਿਯਾ.

੧੫. ‘‘ਤੇਹਂ ਸਬ੍ਬੇ ਅਨੁਭੋਮਿ, ਮਂਸਦਾਨਸ੍ਸ ਸਤ੍ਤਿਯਾ;

ਗਤ੍ਤਞ੍ਚ ਮੁਦੁਕਂ ਮਯ੍ਹਂ, ਪਞ੍ਞਾ ਨਿਪੁਣਵੇਦਨੀ.

੧੬. ‘‘ਏਕਨਵੁਤਿਤੋ ਕਪ੍ਪੇ, ਯਂ ਮਂਸਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਮਂਸਦਾਨਸ੍ਸਿਦਂ ਫਲਂ.

੧੭. ‘‘ਇਤੋ ਚਤੁਤ੍ਥਕੇ ਕਪ੍ਪੇ, ਏਕੋ ਆਸਿਂ ਜਨਾਧਿਪੋ;

ਮਹਾਰੋਹਿਤਨਾਮੋ ਸੋ, ਚਕ੍ਕਵਤ੍ਤੀ ਮਹਬ੍ਬਲੋ.

੧੮. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਦ੍ਵੇਰਤਨਿਯੋ [ਦ੍ਵਿਰਤਨਿਯੋ (ਸੀ.)] ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਦ੍ਵੇਰਤਨਿਯਤ੍ਥੇਰਸ੍ਸਾਪਦਾਨਂ ਤਤਿਯਂ.

ਦਸਮਂ ਭਾਣਵਾਰਂ.