੯. ਏਕਚਾਰਿਯਤ੍ਥੇਰਅਪਦਾਨਂ

੫੧. ‘‘ਤਾਵਤਿਂਸੇਸੁ ਦੇਵੇਸੁ, ਮਹਾਘੋਸੋ ਤਦਾ ਅਹੁ;

ਬੁਦ੍ਧੋ ਚ ਲੋਕੇ ਨਿਬ੍ਬਾਤਿ, ਮਯਞ੍ਚਮ੍ਹ ਸਰਾਗਿਨੋ.

੫੨. ‘‘ਤੇਸਂ ਸਂਵੇਗਜਾਤਾਨਂ, ਸੋਕਸਲ੍ਲਸਮਙ੍ਗਿਨਂ;

ਸਬਲੇਨ ਉਪਤ੍ਥਦ੍ਧੋ, ਅਗਮਂ ਬੁਦ੍ਧਸਨ੍ਤਿਕਂ.

੫੩. ‘‘ਮਨ੍ਦਾਰਵਂ ਗਹੇਤ੍ਵਾਨ, ਸਙ੍ਗੀਤਿ [ਸਣ੍ਹਿਤਂ (ਸੀ.), ਸਙ੍ਗਿਤਂ (ਸ੍ਯਾ.)] ਅਭਿਨਿਮ੍ਮਿਤਂ;

ਪਰਿਨਿਬ੍ਬੁਤਕਾਲਮ੍ਹਿ, ਬੁਦ੍ਧਸ੍ਸ ਅਭਿਰੋਪਯਿਂ.

੫੪. ‘‘ਸਬ੍ਬੇ ਦੇਵਾਨੁਮੋਦਿਂਸੁ, ਅਚ੍ਛਰਾਯੋ ਚ ਮੇ ਤਦਾ;

ਕਪ੍ਪਾਨਂ ਸਤਸਹਸ੍ਸਂ, ਦੁਗ੍ਗਤਿਂ ਨੁਪਪਜ੍ਜਹਂ.

੫੫. ‘‘ਸਟ੍ਠਿਕਪ੍ਪਸਹਸ੍ਸਮ੍ਹਿ, ਇਤੋ ਸੋਲ਼ਸ ਤੇ ਜਨਾ;

ਮਹਾਮਲ੍ਲਜਨਾ ਨਾਮ, ਚਕ੍ਕਵਤ੍ਤੀ ਮਹਬ੍ਬਲਾ.

੫੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਏਕਚਾਰਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਏਕਚਾਰਿਯਤ੍ਥੇਰਸ੍ਸਾਪਦਾਨਂ ਨਵਮਂ.