੭. ਏਕਚਿਨ੍ਤਿਕਤ੍ਥੇਰਅਪਦਾਨਂ

੩੪. ‘‘ਯਦਾ ਦੇਵੋ [ਦੇਵਾ (ਕ.)] ਦੇਵਕਾਯਾ, ਚਵਤੇ [ਚਵਨ੍ਤਿ (ਕ.)] ਆਯੁਸਙ੍ਖਯਾ;

ਤਯੋ ਸਦ੍ਦਾ ਨਿਚ੍ਛਰਨ੍ਤਿ, ਦੇਵਾਨਂ ਅਨੁਮੋਦਤਂ.

੩੫. ‘ਇਤੋ ਭੋ ਸੁਗਤਿਂ ਗਚ੍ਛ, ਮਨੁਸ੍ਸਾਨਂ ਸਹਬ੍ਯਤਂ;

ਮਨੁਸ੍ਸਭੂਤੋ ਸਦ੍ਧਮ੍ਮੇ, ਲਭ ਸਦ੍ਧਂ ਅਨੁਤ੍ਤਰਂ.

੩੬. ‘‘‘ਸਾ ਤੇ ਸਦ੍ਧਾ ਨਿਵਿਟ੍ਠਾਸ੍ਸ, ਮੂਲਜਾਤਾ ਪਤਿਟ੍ਠਿਤਾ;

ਯਾਵਜੀਵਂ ਅਸਂਹੀਰਾ, ਸਦ੍ਧਮ੍ਮੇ ਸੁਪ੍ਪਵੇਦਿਤੇ.

੩੭. ‘‘‘ਕਾਯੇਨ ਕੁਸਲਂ ਕਤ੍ਵਾ, ਵਾਚਾਯ ਕੁਸਲਂ ਬਹੁਂ;

ਮਨਸਾ ਕੁਸਲਂ ਕਤ੍ਵਾ, ਅਬ੍ਯਾਪਜ੍ਜਂ [ਅਬ੍ਯਾਪਜ੍ਝਂ (ਸ੍ਯਾ.), ਅਪ੍ਪਮਾਣਂ (ਇਤਿਵੁਤ੍ਤਕੇ ੮੩)] ਨਿਰੂਪਧਿਂ.

੩੮. ‘‘‘ਤਤੋ ਓਪਧਿਕਂ ਪੁਞ੍ਞਂ, ਕਤ੍ਵਾ ਦਾਨੇਨ ਤਂ ਬਹੁਂ;

ਅਞ੍ਞੇਪਿ ਮਚ੍ਚੇ ਸਦ੍ਧਮ੍ਮੇ, ਬ੍ਰਹ੍ਮਚਰਿਯੇ ਨਿਵੇਸਯ’.

੩੯. ‘‘ਇਮਾਯ ਅਨੁਕਮ੍ਪਾਯ, ਦੇਵਾ ਦੇਵਂ ਯਦਾ ਵਿਦੂ;

ਚਵਨ੍ਤਂ ਅਨੁਮੋਦਨ੍ਤਿ, ਏਹਿ ਦੇਵ ਪੁਨਪ੍ਪੁਨਂ [ਦੇਵਪੁਰਂ ਪੁਨ (ਸ੍ਯਾ.)].

੪੦. ‘‘ਸਂਵੇਗੋ ਮੇ [ਸਂਵਿਗ੍ਗੋਹਂ (ਸ੍ਯਾ.)] ਤਦਾ ਆਸਿ, ਦੇਵਸਙ੍ਘੇ ਸਮਾਗਤੇ;

ਕਂਸੁ ਨਾਮ ਅਹਂ ਯੋਨਿਂ, ਗਮਿਸ੍ਸਾਮਿ ਇਤੋ ਚੁਤੋ.

੪੧. ‘‘ਮਮ ਸਂਵੇਗਮਞ੍ਞਾਯ, ਸਮਣੋ ਭਾਵਿਤਿਨ੍ਦ੍ਰਿਯੋ;

ਮਮੁਦ੍ਧਰਿਤੁਕਾਮੋ ਸੋ, ਆਗਚ੍ਛਿ ਮਮ ਸਨ੍ਤਿਕਂ.

੪੨. ‘‘ਸੁਮਨੋ ਨਾਮ ਨਾਮੇਨ, ਪਦੁਮੁਤ੍ਤਰਸਾਵਕੋ;

ਅਤ੍ਥਧਮ੍ਮਾਨੁਸਾਸਿਤ੍ਵਾ, ਸਂਵੇਜੇਸਿ ਮਮਂ ਤਦਾ.

੪੩. ‘‘ਤਸ੍ਸਾਹਂ ਵਚਨਂ ਸੁਤ੍ਵਾ, ਬੁਦ੍ਧੇ ਚਿਤ੍ਤਂ ਪਸਾਦਯਿਂ;

ਤਂ ਧੀਰਂ ਅਭਿਵਾਦੇਤ੍ਵਾ, ਤਤ੍ਥ ਕਾਲਂਕਤੋ ਅਹਂ.

੪੪. ‘‘ਉਪਪਜ੍ਜਿਂ ਸ [ਉਪਪਜ੍ਜਿਸ੍ਸਂ (ਸੀ.)] ਤਤ੍ਥੇਵ, ਸੁਕ੍ਕਮੂਲੇਨ ਚੋਦਿਤੋ;

ਕਪ੍ਪਾਨਂ ਸਤਸਹਸ੍ਸਂ, ਦੁਗ੍ਗਤਿਂ ਨੁਪਪਜ੍ਜਹਂ.

੪੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਏਕਚਿਨ੍ਤਿਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਏਕਚਿਨ੍ਤਿਕਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.