੪. ਪਞ੍ਚਹਤ੍ਥਿਯਤ੍ਥੇਰਅਪਦਾਨਂ

੧੮. ‘‘ਤਿਸ੍ਸੋ ਨਾਮਾਸਿ ਭਗਵਾ, ਲੋਕਜੇਟ੍ਠੋ ਨਰਾਸਭੋ;

ਪੁਰਕ੍ਖਤੋ ਸਾਵਕੇਹਿ, ਰਥਿਯਂ ਪਟਿਪਜ੍ਜਥ.

੧੯. ‘‘ਪਞ੍ਚ ਉਪ੍ਪਲਹਤ੍ਥਾ ਚ, ਚਾਤੁਰਾ ਠਪਿਤਾ ਮਯਾ;

ਆਹੁਤਿਂ ਦਾਤੁਕਾਮੋਹਂ, ਪਗ੍ਗਣ੍ਹਿਂ ਵਤਸਿਦ੍ਧਿਯਾ [ਪੁਤ੍ਤੋਮ੍ਹਿ ਹਿਤਸਿਦ੍ਧਿਯਾ (ਸ੍ਯਾ.)].

੨੦. ‘‘ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਂ, ਗਚ੍ਛਨ੍ਤਂ ਅਨ੍ਤਰਾਪਣੇ;

ਬੁਦ੍ਧਰਂਸੀਹਿ ਫੁਟ੍ਠੋਸ੍ਮਿ [ਬੁਦ੍ਧਰਂਸ੍ਯਾਭਿਫੁਟ੍ਠੋਮ੍ਹਿ (ਸੀ.), ਬੁਦ੍ਧਰਂਸਾਭਿਘੁਟ੍ਠੋਸ੍ਮਿ (ਕ.)], ਪੂਜੇਸਿਂ ਦ੍ਵਿਪਦੁਤ੍ਤਮਂ.

੨੧. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੨੨. ‘‘ਇਤੋ ਤੇਰਸਕਪ੍ਪਮ੍ਹਿ, ਪਞ੍ਚ ਸੁਸਭਸਮ੍ਮਤਾ;

ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.

੨੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਞ੍ਚਹਤ੍ਥਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਞ੍ਚਹਤ੍ਥਿਯਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.