੧. ਕੁਟਜਪੁਪ੍ਫਿਯਤ੍ਥੇਰਅਪਦਾਨਂ

੧. ‘‘ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਂ, ਸਤਰਂਸਿਂਵ ਉਗ੍ਗਤਂ;

ਦਿਸਂ ਅਨੁਵਿਲੋਕੇਨ੍ਤਂ, ਗਚ੍ਛਨ੍ਤਂ ਅਨਿਲਞ੍ਜਸੇ.

੨. ‘‘ਕੁਟਜਂ ਪੁਪ੍ਫਿਤਂ ਦਿਸ੍ਵਾ, ਸਂਵਿਤ੍ਥਤਸਮੋਤ੍ਥਤਂ;

ਰੁਕ੍ਖਤੋ ਓਚਿਨਿਤ੍ਵਾਨ, ਫੁਸ੍ਸਸ੍ਸ ਅਭਿਰੋਪਯਿਂ.

੩. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੪. ‘‘ਇਤੋ ਸਤ੍ਤਰਸੇ ਕਪ੍ਪੇ, ਤਯੋ ਆਸੁਂ ਸੁਪੁਪ੍ਫਿਤਾ;

ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.

੫. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਕੁਟਜਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਕੁਟਜਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਪਠਮਂ.