੧੭. ਸੁਪਾਰਿਚਰਿਯਵਗ੍ਗੋ

੧. ਸੁਪਾਰਿਚਰਿਯਤ੍ਥੇਰਅਪਦਾਨਂ

੧. ‘‘ਪਦੁਮੋ ਨਾਮ ਨਾਮੇਨ, ਦ੍ਵਿਪਦਿਨ੍ਦੋ ਨਰਾਸਭੋ;

ਪਵਨਾ ਅਭਿਨਿਕ੍ਖਮ੍ਮ, ਧਮ੍ਮਂ ਦੇਸੇਤਿ ਚਕ੍ਖੁਮਾ.

੨. ‘‘ਯਕ੍ਖਾਨਂ ਸਮਯੋ ਆਸਿ, ਅਵਿਦੂਰੇ ਮਹੇਸਿਨੋ;

ਯੇਨ ਕਿਚ੍ਚੇਨ ਸਮ੍ਪਤ੍ਤਾ, ਅਜ੍ਝਾਪੇਕ੍ਖਿਂਸੁ ਤਾਵਦੇ.

੩. ‘‘ਬੁਦ੍ਧਸ੍ਸ ਗਿਰਮਞ੍ਞਾਯ, ਅਮਤਸ੍ਸ ਚ ਦੇਸਨਂ;

ਪਸਨ੍ਨਚਿਤ੍ਤੋ ਸੁਮਨੋ, ਅਪ੍ਫੋਟੇਤ੍ਵਾ ਉਪਟ੍ਠਹਿਂ.

੪. ‘‘ਸੁਚਿਣ੍ਣਸ੍ਸ ਫਲਂ ਪਸ੍ਸ, ਉਪਟ੍ਠਾਨਸ੍ਸ ਸਤ੍ਥੁਨੋ;

ਤਿਂਸਕਪ੍ਪਸਹਸ੍ਸੇਸੁ, ਦੁਗ੍ਗਤਿਂ ਨੁਪਪਜ੍ਜਹਂ.

੫. ‘‘ਊਨਤਿਂਸੇ ਕਪ੍ਪਸਤੇ, ਸਮਲਙ੍ਕਤਨਾਮਕੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੬. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੁਪਾਰਿਚਰਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸੁਪਾਰਿਚਰਿਯਤ੍ਥੇਰਸ੍ਸਾਪਦਾਨਂ ਪਠਮਂ.

੨. ਕਣਵੇਰਪੁਪ੍ਫਿਯਤ੍ਥੇਰਅਪਦਾਨਂ

੭. ‘‘ਸਿਦ੍ਧਤ੍ਥੋ ਨਾਮ ਭਗਵਾ, ਲੋਕਜੇਟ੍ਠੋ ਨਰਾਸਭੋ;

ਪੁਰਕ੍ਖਤੋ ਸਾਵਕੇਹਿ, ਨਗਰਂ ਪਟਿਪਜ੍ਜਥ.

੮. ‘‘ਰਞ੍ਞੋ ਅਨ੍ਤੇਪੁਰੇ ਆਸਿਂ, ਗੋਪਕੋ ਅਭਿਸਮ੍ਮਤੋ;

ਪਾਸਾਦੇ ਉਪਵਿਟ੍ਠੋਹਂ, ਅਦ੍ਦਸਂ ਲੋਕਨਾਯਕਂ.

੯. ‘‘ਕਣਵੇਰਂ [ਕਰਵੀਰਂ (ਸਕ੍ਕਤਾਨੁਲੋਮਂ), ਕਣਵੀਰਂ (ਪਾਕਤ)] ਗਹੇਤ੍ਵਾਨ, ਭਿਕ੍ਖੁਸਙ੍ਘੇ ਸਮੋਕਿਰਿਂ;

ਬੁਦ੍ਧਸ੍ਸ ਵਿਸੁਂ ਕਤ੍ਵਾਨ, ਤਤੋ ਭਿਯ੍ਯੋ ਸਮੋਕਿਰਿਂ.

੧੦. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਪੂਜਯਿਂ [ਰੋਪਯਿਂ (ਸ੍ਯਾ.)];

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੧੧. ‘‘ਸਤ੍ਤਾਸੀਤਿਮ੍ਹਿਤੋ ਕਪ੍ਪੇ, ਚਤੁਰਾਸੁਂ ਮਹਿਦ੍ਧਿਕਾ;

ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.

੧੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਕਣਵੇਰਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਕਣਵੇਰਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਦੁਤਿਯਂ.

੩. ਖਜ੍ਜਕਦਾਯਕਤ੍ਥੇਰਅਪਦਾਨਂ

੧੩. ‘‘ਤਿਸ੍ਸਸ੍ਸ ਖੋ ਭਗਵਤੋ, ਪੁਬ੍ਬੇ ਫਲਮਦਾਸਹਂ;

ਨਾਲ਼ਿਕੇਰਞ੍ਚ ਪਾਦਾਸਿਂ, ਖਜ੍ਜਕਂ ਅਭਿਸਮ੍ਮਤਂ.

੧੪. ‘‘ਬੁਦ੍ਧਸ੍ਸ ਤਮਹਂ ਦਤ੍ਵਾ, ਤਿਸ੍ਸਸ੍ਸ ਤੁ ਮਹੇਸਿਨੋ;

ਮੋਦਾਮਹਂ ਕਾਮਕਾਮੀ, ਉਪਪਜ੍ਜਿਂ [ਕਾਮਕਾਰੀ, ਉਪਪਜ੍ਜਂ (ਸੀ.)] ਯਮਿਚ੍ਛਕਂ [ਸਬ੍ਬਤ੍ਥਪਿ ਏਵਮੇਵ ਦਿਸ੍ਸਤਿ].

੧੫. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਫਲਦਾਨਸ੍ਸਿਦਂ ਫਲਂ.

੧੬. ‘‘ਇਤੋ ਤੇਰਸਕਪ੍ਪਮ੍ਹਿ, ਰਾਜਾ ਇਨ੍ਦਸਮੋ ਅਹੁ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੧੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਖਜ੍ਜਕਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਖਜ੍ਜਕਦਾਯਕਤ੍ਥੇਰਸ੍ਸਾਪਦਾਨਂ ਤਤਿਯਂ.

੪. ਦੇਸਪੂਜਕਤ੍ਥੇਰਅਪਦਾਨਂ

੧੮. ‘‘ਅਤ੍ਥਦਸ੍ਸੀ ਤੁ ਭਗਵਾ, ਲੋਕਜੇਟ੍ਠੋ ਨਰਾਸਭੋ;

ਅਬ੍ਭੁਗ੍ਗਨ੍ਤ੍ਵਾਨ ਵੇਹਾਸਂ, ਗਚ੍ਛਤੇ ਅਨਿਲਞ੍ਜਸੇ.

੧੯. ‘‘ਯਮ੍ਹਿ ਦੇਸੇ ਠਿਤੋ ਸਤ੍ਥਾ, ਅਬ੍ਭੁਗ੍ਗਚ੍ਛਿ ਮਹਾਮੁਨਿ;

ਤਾਹਂ ਦੇਸਂ ਅਪੂਜੇਸਿਂ, ਪਸਨ੍ਨੋ ਸੇਹਿ ਪਾਣਿਭਿ.

੨੦. ‘‘ਅਟ੍ਠਾਰਸੇ ਕਪ੍ਪਸਤੇ, ਅਦ੍ਦਸਂ ਯਂ ਮਹਾਮੁਨਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਦੇਸਪੂਜਾਯਿਦਂ ਫਲਂ.

੨੧. ‘‘ਏਕਾਦਸੇ ਕਪ੍ਪਸਤੇ, ਗੋਸੁਜਾਤਸਨਾਮਕੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੨੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਦੇਸਪੂਜਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਦੇਸਪੂਜਕਤ੍ਥੇਰਸ੍ਸਾਪਦਾਨਂ ਚਤੁਤ੍ਥਂ.

੫. ਕਣਿਕਾਰਛਤ੍ਤਿਯਤ੍ਥੇਰਅਪਦਾਨਂ

੨੩. ‘‘ਵੇਸ੍ਸਭੂ ਨਾਮ ਸਮ੍ਬੁਦ੍ਧੋ, ਲੋਕਜੇਟ੍ਠੋ ਨਰਾਸਭੋ;

ਦਿਵਾਵਿਹਾਰਾਯ ਮੁਨਿ, ਓਗਾਹਯਿ ਮਹਾਵਨਂ.

੨੪. ‘‘ਕਣਿਕਾਰਂ ਓਚਿਨਿਤ੍ਵਾ, ਛਤ੍ਤਂ ਕਤ੍ਵਾਨਹਂ ਤਦਾ;

ਪੁਪ੍ਫਚ੍ਛਦਨਂ ਕਤ੍ਵਾਨ, ਬੁਦ੍ਧਸ੍ਸ ਅਭਿਰੋਪਯਿਂ.

੨੫. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੨੬. ‘‘ਇਤੋ ਵੀਸਤਿਕਪ੍ਪਮ੍ਹਿ, ਸੋਣ੍ਣਾਭਾ ਅਟ੍ਠ ਖਤ੍ਤਿਯਾ;

ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.

੨੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਕਣਿਕਾਰਛਤ੍ਤਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਕਣਿਕਾਰਛਤ੍ਤਿਯਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.

੬. ਸਪ੍ਪਿਦਾਯਕਤ੍ਥੇਰਅਪਦਾਨਂ

੨੮. ‘‘ਫੁਸ੍ਸੋ ਨਾਮਾਸਿ [ਨਾਮਾਥ (ਸੀ.)] ਭਗਵਾ, ਆਹੁਤੀਨਂ ਪਟਿਗ੍ਗਹੋ;

ਗਚ੍ਛਤੇ ਵੀਥਿਯਂ ਵੀਰੋ, ਨਿਬ੍ਬਾਪੇਨ੍ਤੋ ਮਹਾਜਨਂ.

੨੯. ‘‘ਅਨੁਪੁਬ੍ਬੇਨ ਭਗਵਾ, ਆਗਚ੍ਛਿ ਮਮ ਸਨ੍ਤਿਕਂ;

ਤਤੋ ਤਂ [ਤਤੋਹਂ (ਸੀ. ਸ੍ਯਾ.)] ਪਤ੍ਤਂ ਪਗ੍ਗਯ੍ਹ, ਸਪ੍ਪਿਤੇਲਮਦਾਸਹਂ.

੩੦. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਸਪ੍ਪਿਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਸਪ੍ਪਿਦਾਨਸ੍ਸਿਦਂ ਫਲਂ.

੩੧. ‘‘ਛਪ੍ਪਞ੍ਞਾਸੇ ਇਤੋ ਕਪ੍ਪੇ, ਏਕੋ ਆਸਿ ਸਮੋਦਕੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੩੨. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਪ੍ਪਿਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਪ੍ਪਿਦਾਯਕਤ੍ਥੇਰਸ੍ਸਾਪਦਾਨਂ ਛਟ੍ਠਂ.

੭. ਯੂਥਿਕਪੁਪ੍ਫਿਯਤ੍ਥੇਰਅਪਦਾਨਂ

੩੩. ‘‘ਚਨ੍ਦਭਾਗਾਨਦੀਤੀਰੇ, ਅਨੁਸੋਤਂ ਵਜਾਮਹਂ;

ਸਯਮ੍ਭੁਂ ਅਦ੍ਦਸਂ ਤਤ੍ਥ, ਸਾਲਰਾਜਂਵ ਫੁਲ੍ਲਿਤਂ.

੩੪. ‘‘ਪੁਪ੍ਫਂ ਯੂਥਿਕਮਾਦਾਯ, ਉਪਗਚ੍ਛਿਂ ਮਹਾਮੁਨਿਂ;

ਪਸਨ੍ਨਚਿਤ੍ਤੋ ਸੁਮਨੋ, ਬੁਦ੍ਧਸ੍ਸ ਅਭਿਰੋਪਯਿਂ.

੩੫. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਬੁਦ੍ਧਪੂਜਾਯਿਦਂ ਫਲਂ.

੩੬. ‘‘ਸਤ੍ਤਸਟ੍ਠਿਮ੍ਹਿਤੋ ਕਪ੍ਪੇ, ਏਕੋ ਸਾਮੁਦ੍ਧਰੋ ਅਹੁ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੩੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਯੂਥਿਕਪੁਪ੍ਫਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਯੂਥਿਕਪੁਪ੍ਫਿਯਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.

੮. ਦੁਸ੍ਸਦਾਯਕਤ੍ਥੇਰਅਪਦਾਨਂ

੩੮. ‘‘ਤਿਵਰਾਯਂ ਪੁਰੇ ਰਮ੍ਮੇ, ਰਾਜਪੁਤ੍ਤੋਸਹਂ [ਰਾਜਪੁਤ੍ਤੋ ਅਹਂ (ਸੀ. ਸ੍ਯਾ.)] ਤਦਾ;

ਪਣ੍ਣਾਕਾਰਂ ਲਭਿਤ੍ਵਾਨ, ਉਪਸਨ੍ਤਸ੍ਸਦਾਸਹਂ.

੩੯. ‘‘ਅਧਿਵਾਸੇਸਿ ਭਗਵਾ, ਵਤ੍ਥਂ [ਨਵਂ (ਕ.)] ਹਤ੍ਥੇਨ ਆਮਸਿ;

ਸਿਦ੍ਧਤ੍ਥੋ ਅਧਿਵਾਸੇਤ੍ਵਾ, ਵੇਹਾਸਂ ਨਭਮੁਗ੍ਗਮਿ.

੪੦. ‘‘ਬੁਦ੍ਧਸ੍ਸ ਗਚ੍ਛਮਾਨਸ੍ਸ, ਦੁਸ੍ਸਾ ਧਾਵਨ੍ਤਿ ਪਚ੍ਛਤੋ;

ਤਤ੍ਥ ਚਿਤ੍ਤਂ ਪਸਾਦੇਸਿਂ, ਬੁਦ੍ਧੋ ਨੋ ਅਗ੍ਗਪੁਗ੍ਗਲੋ.

੪੧. ‘‘ਚਤੁਨ੍ਨਵੁਤਿਤੋ ਕਪ੍ਪੇ, ਯਂ ਦੁਸ੍ਸਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਦੁਸ੍ਸਦਾਨਸ੍ਸਿਦਂ ਫਲਂ.

੪੨. ‘‘ਸਤ੍ਤਸਟ੍ਠਿਮ੍ਹਿਤੋ ਕਪ੍ਪੇ, ਚਕ੍ਕਵਤ੍ਤੀ ਤਦਾ ਅਹੁ;

ਪਰਿਸੁਦ੍ਧੋਤਿ ਨਾਮੇਨ, ਮਨੁਜਿਨ੍ਦੋ ਮਹਬ੍ਬਲੋ.

੪੩. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਦੁਸ੍ਸਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਦੁਸ੍ਸਦਾਯਕਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.

੯. ਸਮਾਦਪਕਤ੍ਥੇਰਅਪਦਾਨਂ

੪੪. ‘‘ਨਗਰੇ ਬਨ੍ਧੁਮਤਿਯਾ, ਮਹਾਪੂਗਗਣੋ ਅਹੁ;

ਤੇਸਾਹਂ ਪਵਰੋ ਆਸਿਂ, ਮਮ ਬਦ੍ਧਚਰਾ [ਪਟ੍ਠਚਰਾ (ਸ੍ਯਾ.)] ਚ ਤੇ.

੪੫. ‘‘ਸਬ੍ਬੇ ਤੇ ਸਨ੍ਨਿਪਾਤੇਤ੍ਵਾ, ਪੁਞ੍ਞਕਮ੍ਮੇ ਸਮਾਦਯਿਂ;

ਮਾਲ਼ਂ ਕਸ੍ਸਾਮ ਸਙ੍ਘਸ੍ਸ, ਪੁਞ੍ਞਕ੍ਖੇਤ੍ਤਂ ਅਨੁਤ੍ਤਰਂ.

੪੬. ‘‘ਸਾਧੂਤਿ ਤੇ ਪਟਿਸ੍ਸੁਤ੍ਵਾ, ਮਮ ਛਨ੍ਦਵਸਾਨੁਗਾ;

ਨਿਟ੍ਠਾਪੇਤ੍ਵਾ ਚ ਤਂ ਮਾਲ਼ਂ, ਵਿਪਸ੍ਸਿਸ੍ਸ ਅਦਮ੍ਹਸੇ.

੪੭. ‘‘ਏਕਨਵੁਤਿਤੋ ਕਪ੍ਪੇ, ਯਂ ਮਾਲ਼ਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਮਾਲ਼ਦਾਨਸ੍ਸਿਦਂ ਫਲਂ.

੪੮. ‘‘ਏਕੂਨਸਤ੍ਤਤਿਕਪ੍ਪੇ [ਏਕੂਨਸਟ੍ਠਿਕਪ੍ਪਮ੍ਹਿ (ਸੀ. ਸ੍ਯਾ.)],

ਏਕੋ ਆਸਿ ਜਨਾਧਿਪੋ.

ਆਦੇਯ੍ਯੋ ਨਾਮ ਨਾਮੇਨ, ਚਕ੍ਕਵਤ੍ਤੀ ਮਹਬ੍ਬਲੋ.

੪੯. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸਮਾਦਪਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸਮਾਦਪਕਤ੍ਥੇਰਸ੍ਸਾਪਦਾਨਂ ਨਵਮਂ.

੧੦. ਪਞ੍ਚਙ੍ਗੁਲਿਯਤ੍ਥੇਰਅਪਦਾਨਂ

੫੦. ‘‘ਤਿਸ੍ਸੋ ਨਾਮਾਸਿ ਭਗਵਾ, ਲੋਕਜੇਟ੍ਠੋ ਨਰਾਸਭੋ;

ਪਵਿਸਤਿ ਗਨ੍ਧਕੁਟਿਂ, ਵਿਹਾਰਕੁਸਲੋ ਮੁਨਿ.

੫੧. ‘‘ਸੁਗਨ੍ਧਮਾਲਮਾਦਾਯ, ਅਗਮਾਸਿਂ ਜਿਨਨ੍ਤਿਕਂ;

ਅਪਸਦ੍ਦੋ ਚ ਸਮ੍ਬੁਦ੍ਧੇ, ਪਞ੍ਚਙ੍ਗੁਲਿਮਦਾਸਹਂ.

੫੨. ‘‘ਦ੍ਵੇਨਵੁਤੇ ਇਤੋ ਕਪ੍ਪੇ, ਯਂ ਗਨ੍ਧਮਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਪਞ੍ਚਙ੍ਗੁਲਿਸ੍ਸਿਦਂ [ਪਞ੍ਚਙ੍ਗੁਲਿਯਿਦਂ (ਸੀ.)] ਫਲਂ.

੫੩. ‘‘ਦ੍ਵੇਸਤ੍ਤਤਿਮ੍ਹਿਤੋ ਕਪ੍ਪੇ, ਰਾਜਾ ਆਸਿਂ ਸਯਮ੍ਪਭੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੫੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਞ੍ਚਙ੍ਗੁਲਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ;

ਪਞ੍ਚਙ੍ਗੁਲਿਯਤ੍ਥੇਰਸ੍ਸਾਪਦਾਨਂ ਦਸਮਂ.

ਸੁਪਾਰਿਚਰਿਯਵਗ੍ਗੋ ਸਤ੍ਤਰਸਮੋ.