੧੦. ਕੁਮੁਦਦਾਯਕਤ੍ਥੇਰਅਪਦਾਨਂ

੫੧. ‘‘ਹਿਮਵਨ੍ਤਸ੍ਸਾਵਿਦੂਰੇ, ਮਹਾਜਾਤਸ੍ਸਰੋ ਅਹੁ;

ਪਦੁਮੁਪ੍ਪਲਸਞ੍ਛਨ੍ਨੋ, ਪੁਣ੍ਡਰੀਕਸਮੋਤ੍ਥਟੋ.

੫੨. ‘‘ਕੁਕੁਤ੍ਥੋ ਨਾਮ ਨਾਮੇਨ, ਤਤ੍ਥਾਸਿਂ ਸਕੁਣੋ ਤਦਾ;

ਸੀਲਵਾ ਬੁਦ੍ਧਿਸਮ੍ਪਨ੍ਨੋ, ਪੁਞ੍ਞਾਪੁਞ੍ਞੇਸੁ ਕੋਵਿਦੋ.

੫੩. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਜਾਤਸ੍ਸਰਸ੍ਸਾਵਿਦੂਰੇ, ਸਞ੍ਚਰਿਤ੍ਥ ਮਹਾਮੁਨਿ.

੫੪. ‘‘ਜਲਜਂ ਕੁਮੁਦਂ ਛੇਤ੍ਵਾ, ਉਪਨੇਸਿਂ ਮਹੇਸਿਨੋ;

ਮਮ ਸਙ੍ਕਪ੍ਪਮਞ੍ਞਾਯ, ਪਟਿਗ੍ਗਹਿ ਮਹਾਮੁਨਿ.

੫੫. ‘‘ਤਞ੍ਚ ਦਾਨਂ ਦਦਿਤ੍ਵਾਨ, ਸੁਕ੍ਕਮੂਲੇਨ ਚੋਦਿਤੋ;

ਕਪ੍ਪਾਨਂ ਸਤਸਹਸ੍ਸਂ, ਦੁਗ੍ਗਤਿਂ ਨੁਪਪਜ੍ਜਹਂ.

੫੬. ‘‘ਸੋਲ਼ਸੇਤੋ ਕਪ੍ਪਸਤੇ, ਆਸੁਂ ਵਰੁਣਨਾਮਕਾ;

ਅਟ੍ਠ ਏਤੇ ਜਨਾਧਿਪਾ, ਚਕ੍ਕਵਤ੍ਤੀ ਮਹਬ੍ਬਲਾ.

੫੭. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਕੁਮੁਦਦਾਯਕੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਕੁਮੁਦਦਾਯਕਤ੍ਥੇਰਸ੍ਸਾਪਦਾਨਂ ਦਸਮਂ.

ਬਨ੍ਧੁਜੀਵਕਵਗ੍ਗੋ ਸੋਲ਼ਸਮੋ.