੧. ਸੋਭਿਤਤ੍ਥੇਰਅਪਦਾਨਂ

੧. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਲੋਕਜੇਟ੍ਠੋ ਨਰਾਸਭੋ;

ਮਹਤੋ ਜਨਕਾਯਸ੍ਸ, ਦੇਸੇਤਿ ਅਮਤਂ ਪਦਂ.

੨. ‘‘ਤਸ੍ਸਾਹਂ ਵਚਨਂ ਸੁਤ੍ਵਾ, ਵਾਚਾਸਭਿਮੁਦੀਰਿਤਂ [ਵਾਚਾਸਭਿਮੁਦੀਰਯਿਂ (?)];

ਅਞ੍ਜਲਿਂ ਪਗ੍ਗਹੇਤ੍ਵਾਨ, ਏਕਗ੍ਗੋ ਆਸਹਂ ਤਦਾ.

੩. ‘‘ਯਥਾ ਸਮੁਦ੍ਦੋ ਉਦਧੀਨਮਗ੍ਗੋ, ਨੇਰੂ ਨਗਾਨਂ ਪਵਰੋ ਸਿਲੁਚ੍ਚਯੋ;

ਤਥੇਵ ਯੇ ਚਿਤ੍ਤਵਸੇਨ ਵਤ੍ਤਰੇ, ਨ ਬੁਦ੍ਧਞਾਣਸ੍ਸ ਕਲਂ ਉਪੇਨ੍ਤਿ ਤੇ.

੪. ‘‘ਧਮ੍ਮਵਿਧਿਂ [ਧਮ੍ਮੇ ਵਿਧਿਂ (ਸੀ.)] ਠਪੇਤ੍ਵਾਨ, ਬੁਦ੍ਧੋ ਕਾਰੁਣਿਕੋ ਇਸਿ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੫. ‘‘‘ਯੋ ਸੋ ਞਾਣਂ ਪਕਿਤ੍ਤੇਸਿ, ਬੁਦ੍ਧਮ੍ਹਿ ਲੋਕਨਾਯਕੇ;

ਕਪ੍ਪਾਨਂ ਸਤਸਹਸ੍ਸਂ, ਦੁਗ੍ਗਤਿਂ ਨ ਗਮਿਸ੍ਸਤਿ.

੬. ‘‘‘ਕਿਲੇਸੇ ਝਾਪਯਿਤ੍ਵਾਨ, ਏਕਗ੍ਗੋ ਸੁਸਮਾਹਿਤੋ;

ਸੋਭਿਤੋ ਨਾਮ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ’.

੭. ‘‘ਪਞ੍ਞਾਸੇ ਕਪ੍ਪਸਹਸ੍ਸੇ, ਸਤ੍ਤੇਵਾਸੁਂ ਯਸੁਗ੍ਗਤਾ [ਸਮੁਗ੍ਗਤਾ (ਸ੍ਯਾ.)];

ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਬ੍ਬਲਾ.

੮. ‘‘ਕਿਲੇਸਾ ਝਾਪਿਤਾ ਮਯ੍ਹਂ, ਭਵਾ ਸਬ੍ਬੇ ਸਮੂਹਤਾ;

ਤਿਸ੍ਸੋ ਵਿਜ੍ਜਾ ਅਨੁਪ੍ਪਤ੍ਤਾ, ਕਤਂ ਬੁਦ੍ਧਸ੍ਸ ਸਾਸਨਂ.

੯. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੋਭਿਤੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸੋਭਿਤਤ੍ਥੇਰਸ੍ਸਾਪਦਾਨਂ ਪਠਮਂ.