੨. ਸੁਦਸ੍ਸਨਤ੍ਥੇਰਅਪਦਾਨਂ

੧੦. ‘‘ਵਿਨਤਾ ਨਦਿਯਾ [ਵਿਤ੍ਥਤਾਯ ਨਦਿਯਾ (ਸ੍ਯਾ.)] ਤੀਰੇ, ਪਿਲਕ੍ਖੁ [ਪਿਲਕ੍ਖੋ (ਸੀ. ਥੇਰਗਾਥਾ ਅਟ੍ਠ.)] ਫਲਿਤੋ ਅਹੁ;

ਤਾਹਂ ਰੁਕ੍ਖਂ ਗਵੇਸਨ੍ਤੋ, ਅਦ੍ਦਸਂ ਲੋਕਨਾਯਕਂ.

੧੧. ‘‘ਕੇਤਕਂ ਪੁਪ੍ਫਿਤਂ ਦਿਸ੍ਵਾ, ਵਣ੍ਟੇ ਛੇਤ੍ਵਾਨਹਂ ਤਦਾ;

ਬੁਦ੍ਧਸ੍ਸ ਅਭਿਰੋਪੇਸਿਂ, ਸਿਖਿਨੋ ਲੋਕਬਨ੍ਧੁਨੋ.

੧੨. ‘‘ਯੇਨ ਞਾਣੇਨ ਪਤ੍ਤੋਸਿ, ਅਚ੍ਚੁਤਂ ਅਮਤਂ ਪਦਂ;

ਤਂ ਞਾਣਂ ਅਭਿਪੂਜੇਮਿ, ਬੁਦ੍ਧਸੇਟ੍ਠ ਮਹਾਮੁਨਿ.

੧੩. ‘‘ਞਾਣਮ੍ਹਿ ਪੂਜਂ ਕਤ੍ਵਾਨ, ਪਿਲਕ੍ਖੁਮਦ੍ਦਸਂ ਅਹਂ;

ਪਟਿਲਦ੍ਧੋਮ੍ਹਿ ਤਂ ਪਞ੍ਞਂ [ਤਂ ਸਞ੍ਞਂ (ਸ੍ਯਾ.), ਤਂ ਪੁਞ੍ਞਂ (ਕ.)], ਞਾਣਪੂਜਾਯਿਦਂ ਫਲਂ.

੧੪. ‘‘ਏਕਤ੍ਤਿਂਸੇ ਇਤੋ ਕਪ੍ਪੇ, ਯਂ ਪੁਪ੍ਫਮਭਿਰੋਪਯਿਂ;

ਦੁਗ੍ਗਤਿਂ ਨਾਭਿਜਾਨਾਮਿ, ਞਾਣਪੂਜਾਯਿਦਂ ਫਲਂ.

੧੫. ‘‘ਇਤੋ ਤੇਰਸਕਪ੍ਪਮ੍ਹਿ, ਦ੍ਵਾਦਸਾਸੁਂ ਫਲੁਗ੍ਗਤਾ;

ਸਤ੍ਤਰਤਨਸਮ੍ਪਨ੍ਨਾ, ਚਕ੍ਕਵਤ੍ਤੀ ਮਹਪ੍ਫਲਾ.

੧੬. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਸੁਦਸ੍ਸਨੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਸੁਦਸ੍ਸਨਤ੍ਥੇਰਸ੍ਸਾਪਦਾਨਂ ਦੁਤਿਯਂ.