੨. ਪੁਪ੍ਫਥੂਪਿਯਤ੍ਥੇਰਅਪਦਾਨਂ

੧੦. ‘‘ਹਿਮਵਨ੍ਤਸ੍ਸਾਵਿਦੂਰੇ, ਕੁਕ੍ਕੁਰੋ ਨਾਮ [ਕੁਕ੍ਕੁਟੋ ਨਾਮ (ਸੀ.)] ਪਬ੍ਬਤੋ;

ਵੇਮਜ੍ਝੇ ਤਸ੍ਸ ਵਸਤਿ, ਬ੍ਰਾਹ੍ਮਣੋ ਮਨ੍ਤਪਾਰਗੂ.

੧੧. ‘‘ਪਞ੍ਚ ਸਿਸ੍ਸਸਹਸ੍ਸਾਨਿ, ਪਰਿਵਾਰੇਨ੍ਤਿ ਮਂ ਸਦਾ;

ਪੁਬ੍ਬੁਟ੍ਠਾਯੀ ਚ ਤੇ ਆਸੁਂ, ਮਨ੍ਤੇਸੁ ਚ ਵਿਸਾਰਦਾ.

੧੨. ‘‘ਬੁਦ੍ਧੋ ਲੋਕੇ ਸਮੁਪ੍ਪਨ੍ਨੋ, ਤਂ ਵਿਜਾਨਾਥ ਨੋ ਭਵਂ;

ਅਸੀਤਿਬ੍ਯਞ੍ਜਨਾਨਸ੍ਸ, ਬਾਤ੍ਤਿਂਸਵਰਲਕ੍ਖਣਾ.

੧੩. ‘‘ਬ੍ਯਾਮਪ੍ਪਭੋ ਜਿਨਵਰੋ, ਆਦਿਚ੍ਚੋਵ ਵਿਰੋਚਤਿ;

ਸਿਸ੍ਸਾਨਂ ਵਚਨਂ ਸੁਤ੍ਵਾ, ਬ੍ਰਾਹ੍ਮਣੋ ਮਨ੍ਤਪਾਰਗੂ.

੧੪. ‘‘ਅਸ੍ਸਮਾ ਅਭਿਨਿਕ੍ਖਮ੍ਮ, ਦਿਸਂ ਪੁਚ੍ਛਤਿ ਸਿਸ੍ਸਕੇ [ਬ੍ਰਾਹ੍ਮਣੋ (ਸ੍ਯਾ.)];

ਯਮ੍ਹਿ ਦੇਸੇ ਮਹਾਵੀਰੋ, ਵਸਤਿ ਲੋਕਨਾਯਕੋ.

੧੫. ‘‘ਤਾਹਂ ਦਿਸਂ ਨਮਸ੍ਸਿਸ੍ਸਂ, ਜਿਨਂ ਅਪ੍ਪਟਿਪੁਗ੍ਗਲਂ;

ਉਦਗ੍ਗਚਿਤ੍ਤੋ ਸੁਮਨੋ, ਪੂਜੇਸਿਂ ਤਂ ਤਥਾਗਤਂ.

੧੬. ‘‘ਏਥ ਸਿਸ੍ਸਾ ਗਮਿਸ੍ਸਾਮ, ਦਕ੍ਖਿਸ੍ਸਾਮ ਤਥਾਗਤਂ;

ਵਨ੍ਦਿਤ੍ਵਾ ਸਤ੍ਥੁਨੋ ਪਾਦੇ, ਸੋਸ੍ਸਾਮ ਜਿਨਸਾਸਨਂ.

੧੭. ‘‘ਏਕਾਹਂ ਅਭਿਨਿਕ੍ਖਮ੍ਮ, ਬ੍ਯਾਧਿਂ ਪਟਿਲਭਿਂ ਅਹਂ;

ਬ੍ਯਾਧਿਨਾ ਪੀਲ਼ਿਤੋ ਸਨ੍ਤੋ, ਸਾਲਂ ਵਾਸਯਿਤੁਂ ਗਮਿਂ.

੧੮. ‘‘ਸਬ੍ਬੇ ਸਿਸ੍ਸੇ ਸਮਾਨੇਤ੍ਵਾ, ਅਪੁਚ੍ਛਿਂ ਤੇ ਤਥਾਗਤਂ;

ਕੀਦਿਸਂ ਲੋਕਨਾਥਸ੍ਸ, ਗੁਣਂ ਪਰਮਬੁਦ੍ਧਿਨੋ.

੧੯. ‘‘ਤੇ ਮੇ ਪੁਟ੍ਠਾ ਵਿਯਾਕਂਸੁ, ਯਥਾ ਦਸ੍ਸਾਵਿਨੋ ਤਥਾ;

ਸਕ੍ਕਚ੍ਚਂ ਬੁਦ੍ਧਸੇਟ੍ਠਂ ਤਂ, ਦੇਸੇਸੁਂ [ਦਸ੍ਸੇਸੁਂ (ਸੀ. ਸ੍ਯਾ.)] ਮਮ ਸਮ੍ਮੁਖਾ.

੨੦. ‘‘ਤੇਸਾਹਂ ਵਚਨਂ ਸੁਤ੍ਵਾ, ਸਕਂ ਚਿਤ੍ਤਂ ਪਸਾਦਯਿਂ;

ਪੁਪ੍ਫੇਹਿ ਥੂਪਂ ਕਤ੍ਵਾਨ, ਤਤ੍ਥ ਕਾਲਙ੍ਕਤੋ ਅਹਂ.

੨੧. ‘‘ਤੇ ਮੇ ਸਰੀਰਂ ਝਾਪੇਤ੍ਵਾ, ਅਗਮੁਂ ਬੁਦ੍ਧਸਨ੍ਤਿਕਂ;

ਅਞ੍ਜਲਿਂ ਪਗ੍ਗਹੇਤ੍ਵਾਨ, ਸਤ੍ਥਾਰਮਭਿਵਾਦਯੁਂ.

੨੨. ‘‘ਪੁਪ੍ਫੇਹਿ ਥੂਪਂ ਕਤ੍ਵਾਨ, ਸੁਗਤਸ੍ਸ ਮਹੇਸਿਨੋ;

ਕਪ੍ਪਾਨਂ ਸਤਸਹਸ੍ਸਂ, ਦੁਗ੍ਗਤਿਂ ਨੁਪਪਜ੍ਜਹਂ.

੨੩. ‘‘ਚਤ੍ਤਾਲੀਸਸਹਸ੍ਸਮ੍ਹਿ, ਕਪ੍ਪੇ ਸੋਲ਼ਸ ਖਤ੍ਤਿਯਾ;

ਨਾਮੇਨਗ੍ਗਿਸਮਾ ਨਾਮ, ਚਕ੍ਕਵਤ੍ਤੀ ਮਹਬ੍ਬਲਾ.

੨੪. ‘‘ਵੀਸਕਪ੍ਪਸਹਸ੍ਸਮ੍ਹਿ, ਰਾਜਾਨੋ ਚਕ੍ਕਵਤ੍ਤਿਨੋ;

ਘਤਾਸਨਸਨਾਮਾਵ, ਅਟ੍ਠਤ੍ਤਿਂਸ ਮਹੀਪਤੀ.

੨੫. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪੁਪ੍ਫਥੂਪਿਯੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪੁਪ੍ਫਥੂਪਿਯਤ੍ਥੇਰਸ੍ਸਾਪਦਾਨਂ ਦੁਤਿਯਂ.