੩. ਪਾਯਸਦਾਯਕਤ੍ਥੇਰਅਪਦਾਨਂ

੨੬. ‘‘ਸੁਵਣ੍ਣਵਣ੍ਣੋ ਸਮ੍ਬੁਦ੍ਧੋ, ਬਾਤ੍ਤਿਂਸਵਰਲਕ੍ਖਣੋ;

ਪਵਨਾ [ਪਧਾਨੋ (ਕ.)] ਅਭਿਨਿਕ੍ਖਨ੍ਤੋ, ਭਿਕ੍ਖੁਸਙ੍ਘਪੁਰਕ੍ਖਤੋ [ਸੁਵਣ੍ਣਵਣ੍ਣਂ …ਪੇ… ਪੁਰਕ੍ਖਤਂ-ਏਵਂ ਦੁਤਿਯਨ੍ਤਵਸੇਨ ਸੀ. ਸ੍ਯਾ. ਪੋਤ੍ਥਕੇਸੁ ਦਿਸ੍ਸਤਿ].

੨੭. ‘‘ਮਹਚ੍ਚਾ [ਸਹਤ੍ਥਾ (ਸ੍ਯਾ. ਕ.)] ਕਂਸਪਾਤਿਯਾ, ਵਡ੍ਢੇਤ੍ਵਾ ਪਾਯਸਂ [ਪਾਯਾਸਂ (ਸ੍ਯਾ. ਕ.)] ਅਹਂ;

ਆਹੁਤਿਂ ਯਿਟ੍ਠੁਕਾਮੋ ਸੋ, ਉਪਨੇਸਿਂ ਬਲਿਂ ਅਹਂ.

੨੮. ‘‘ਭਗਵਾ ਤਮ੍ਹਿ ਸਮਯੇ, ਲੋਕਜੇਟ੍ਠੋ ਨਰਾਸਭੋ;

ਚਙ੍ਕਮਂ ਸੁਸਮਾਰੂਲ਼੍ਹੋ, ਅਮ੍ਬਰੇ ਅਨਿਲਾਯਨੇ.

੨੯. ‘‘ਤਞ੍ਚ ਅਚ੍ਛਰਿਯਂ ਦਿਸ੍ਵਾ, ਅਬ੍ਭੁਤਂ ਲੋਮਹਂਸਨਂ;

ਠਪਯਿਤ੍ਵਾ ਕਂਸਪਾਤਿਂ, ਵਿਪਸ੍ਸਿਂ ਅਭਿਵਾਦਯਿਂ.

੩੦. ‘‘ਤੁਵਂ ਦੇਵੋਸਿ [ਬੁਦ੍ਧੋਸਿ (ਸ੍ਯਾ.)] ਸਬ੍ਬਞ੍ਞੂ, ਸਦੇਵੇ ਸਹਮਾਨੁਸੇ;

ਅਨੁਕਮ੍ਪਂ ਉਪਾਦਾਯ, ਪਟਿਗਣ੍ਹ ਮਹਾਮੁਨਿ.

੩੧. ‘‘ਪਟਿਗ੍ਗਹੇਸਿ ਭਗਵਾ, ਸਬ੍ਬਞ੍ਞੂ ਲੋਕਨਾਯਕੋ;

ਮਮ ਸਙ੍ਕਪ੍ਪਮਞ੍ਞਾਯ, ਸਤ੍ਥਾ ਲੋਕੇ ਮਹਾਮੁਨਿ [ਅਨੁਤ੍ਤਰੋ (ਸ੍ਯਾ.)].

੩੨. ‘‘ਏਕਨਵੁਤਿਤੋ ਕਪ੍ਪੇ, ਯਂ ਦਾਨਮਦਦਿਂ ਤਦਾ;

ਦੁਗ੍ਗਤਿਂ ਨਾਭਿਜਾਨਾਮਿ, ਪਾਯਸਸ੍ਸ [ਪਾਯਾਸਸ੍ਸ (ਸ੍ਯਾ. ਕ.)] ਇਦਂ ਫਲਂ.

੩੩. ‘‘ਏਕਤਾਲੀਸਿਤੋ ਕਪ੍ਪੇ, ਬੁਦ੍ਧੋ ਨਾਮਾਸਿ ਖਤ੍ਤਿਯੋ;

ਸਤ੍ਤਰਤਨਸਮ੍ਪਨ੍ਨੋ, ਚਕ੍ਕਵਤ੍ਤੀ ਮਹਬ੍ਬਲੋ.

੩੪. ‘‘ਪਟਿਸਮ੍ਭਿਦਾ ਚਤਸ੍ਸੋ…ਪੇ… ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਾਯਸਦਾਯਕੋ [ਪਾਯਾਸਦਾਯਕੋ (ਸ੍ਯਾ. ਕ.)] ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਾਯਸਦਾਯਕਤ੍ਥੇਰਸ੍ਸਾਪਦਾਨਂ ਤਤਿਯਂ.