੩-੭. ਅਞ੍ਞਾਸਿਕੋਣ੍ਡਞ੍ਞਤ੍ਥੇਰਅਪਦਾਨਂ

੫੯੬. ‘‘ਪਦੁਮੁਤ੍ਤਰਸਮ੍ਬੁਦ੍ਧਂ, ਲੋਕਜੇਟ੍ਠਂ ਵਿਨਾਯਕਂ;

ਬੁਦ੍ਧਭੂਮਿਮਨੁਪ੍ਪਤ੍ਤਂ, ਪਠਮਂ ਅਦ੍ਦਸਂ ਅਹਂ.

੫੯੭. ‘‘ਯਾਵਤਾ ਬੋਧਿਯਾ ਮੂਲੇ, ਯਕ੍ਖਾ ਸਬ੍ਬੇ ਸਮਾਗਤਾ;

ਸਮ੍ਬੁਦ੍ਧਂ ਪਰਿਵਾਰੇਤ੍ਵਾ, ਵਨ੍ਦਨ੍ਤਿ ਪਞ੍ਜਲੀਕਤਾ.

੫੯੮. ‘‘ਸਬ੍ਬੇ ਦੇਵਾ ਤੁਟ੍ਠਮਨਾ, ਆਕਾਸੇ ਸਞ੍ਚਰਨ੍ਤਿ ਤੇ;

ਬੁਦ੍ਧੋ ਅਯਂ ਅਨੁਪ੍ਪਤ੍ਤੋ, ਅਨ੍ਧਕਾਰਤਮੋਨੁਦੋ.

੫੯੯. ‘‘ਤੇਸਂ ਹਾਸਪਰੇਤਾਨਂ, ਮਹਾਨਾਦੋ ਅਵਤ੍ਤਥ;

ਕਿਲੇਸੇ ਝਾਪਯਿਸ੍ਸਾਮ, ਸਮ੍ਮਾਸਮ੍ਬੁਦ੍ਧਸਾਸਨੇ.

੬੦੦. ‘‘ਦੇਵਾਨਂ ਗਿਰਮਞ੍ਞਾਯ, ਵਾਚਾਸਭਿਮੁਦੀਰਿਹਂ;

ਹਟ੍ਠੋ ਹਟ੍ਠੇਨ ਚਿਤ੍ਤੇਨ, ਆਦਿਭਿਕ੍ਖਮਦਾਸਹਂ.

੬੦੧. ‘‘ਮਮ ਸਙ੍ਕਪ੍ਪਮਞ੍ਞਾਯ, ਸਤ੍ਥਾ ਲੋਕੇ ਅਨੁਤ੍ਤਰੋ;

ਦੇਵਸਙ੍ਘੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੬੦੨. ‘‘‘ਸਤ੍ਤਾਹਂ ਅਭਿਨਿਕ੍ਖਮ੍ਮ, ਬੋਧਿਂ ਅਜ੍ਝਗਮਂ ਅਹਂ;

ਇਦਂ ਮੇ ਪਠਮਂ ਭਤ੍ਤਂ, ਬ੍ਰਹ੍ਮਚਾਰਿਸ੍ਸ ਯਾਪਨਂ.

੬੦੩. ‘‘‘ਤੁਸਿਤਾ ਹਿ ਇਧਾਗਨ੍ਤ੍ਵਾ, ਯੋ ਮੇ ਭਿਕ੍ਖਂ ਉਪਾਨਯਿ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣੋਥ ਮਮ ਭਾਸਤੋ.

੬੦੪. ‘‘‘ਤਿਂਸਕਪ੍ਪਸਹਸ੍ਸਾਨਿ [ਤਿਂਸਮਤ੍ਤੇ ਕਪ੍ਪਸਗਸ੍ਸੇ (ਸ੍ਯਾ. ਕ.)], ਦੇਵਰਜ੍ਜਂ ਕਰਿਸ੍ਸਤਿ;

ਸਬ੍ਬੇ ਦੇਵੇ ਅਭਿਭੋਤ੍ਵਾ, ਤਿਦਿਵਂ ਆਵਸਿਸ੍ਸਤਿ.

੬੦੫. ‘‘‘ਦੇਵਲੋਕਾ ਚਵਿਤ੍ਵਾਨ, ਮਨੁਸ੍ਸਤ੍ਤਂ ਗਮਿਸ੍ਸਤਿ;

ਸਹਸ੍ਸਧਾ ਚਕ੍ਕਵਤ੍ਤੀ, ਤਤ੍ਥ ਰਜ੍ਜਂ ਕਰਿਸ੍ਸਤਿ.

੬੦੬. ‘‘‘ਕਪ੍ਪਸਤਸਹਸ੍ਸਮ੍ਹਿ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੬੦੭. ‘‘‘ਤਿਦਸਾ ਸੋ ਚਵਿਤ੍ਵਾਨ, ਮਨੁਸ੍ਸਤ੍ਤਂ ਗਮਿਸ੍ਸਤਿ;

ਅਗਾਰਾ ਪਬ੍ਬਜਿਤ੍ਵਾਨ, ਛਬ੍ਬਸ੍ਸਾਨਿ ਵਸਿਸ੍ਸਤਿ.

੬੦੮. ‘‘‘ਤਤੋ ਸਤ੍ਤਮਕੇ ਵਸ੍ਸੇ, ਬੁਦ੍ਧੋ ਸਚ੍ਚਂ ਕਥੇਸ੍ਸਤਿ;

ਕੋਣ੍ਡਞ੍ਞੋ ਨਾਮ ਨਾਮੇਨ, ਪਠਮਂ ਸਚ੍ਛਿਕਾਹਿਤਿ’.

੬੦੯. ‘‘ਨਿਕ੍ਖਨ੍ਤੇਨਾਨੁਪਬ੍ਬਜਿਂ, ਪਧਾਨਂ ਸੁਕਤਂ ਮਯਾ;

ਕਿਲੇਸੇ ਝਾਪਨਤ੍ਥਾਯ, ਪਬ੍ਬਜਿਂ ਅਨਗਾਰਿਯਂ.

੬੧੦. ‘‘ਅਭਿਗਨ੍ਤ੍ਵਾਨ ਸਬ੍ਬਞ੍ਞੂ, ਬੁਦ੍ਧੋ ਲੋਕੇ ਸਦੇਵਕੇ;

ਇਸਿਨਾਮੇ ਮਿਗਾਰਞ੍ਞੇ [ਇਮਿਨਾ ਮੇ ਮਹਾਰਞ੍ਞਂ (ਸ੍ਯਾ.), ਇਮਿਨਾ ਮੇ ਮਿਗਾਰਞ੍ਞਂ (ਕ.)], ਅਮਤਭੇਰਿਮਾਹਨਿ.

੬੧੧. ‘‘ਸੋ ਦਾਨਿ ਪਤ੍ਤੋ ਅਮਤਂ, ਸਨ੍ਤਿਪਦਮਨੁਤ੍ਤਰਂ;

ਸਬ੍ਬਾਸਵੇ ਪਰਿਞ੍ਞਾਯ, ਵਿਹਰਾਮਿ ਅਨਾਸਵੋ.

੬੧੨. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਅਞ੍ਞਾਸਿਕੋਣ੍ਡਞ੍ਞੋ [ਅਞ੍ਞਾਤਕੋਣ੍ਡਞ੍ਞੋ (ਸੀ.), ਅਞ੍ਞਾ ਕੋਣ੍ਡਞ੍ਞੋ (ਸ੍ਯਾ.)] ਥੇਰੋ ਇਮਾ

ਗਾਥਾਯੋ ਅਭਾਸਿਤ੍ਥਾਤਿ.

ਅਞ੍ਞਾਸਿਕੋਣ੍ਡਞ੍ਞਤ੍ਥੇਰਸ੍ਸਾਪਦਾਨਂ ਸਤ੍ਤਮਂ.