੩-੮. ਪਿਣ੍ਡੋਲਭਾਰਦ੍ਵਾਜਤ੍ਥੇਰਅਪਦਾਨਂ

੬੧੩. ‘‘ਪਦੁਮੁਤ੍ਤਰੋ ਨਾਮ ਜਿਨੋ, ਸਯਮ੍ਭੂ ਅਗ੍ਗਪੁਗ੍ਗਲੋ;

ਪੁਰਤੋ ਹਿਮਵਨ੍ਤਸ੍ਸ, ਚਿਤ੍ਤਕੂਟੇ ਵਸੀ ਤਦਾ.

੬੧੪. ‘‘ਅਭੀਤਰੂਪੋ ਤਤ੍ਥਾਸਿਂ, ਮਿਗਰਾਜਾ ਚਤੁਕ੍ਕਮੋ;

ਤਸ੍ਸ ਸਦ੍ਦਂ ਸੁਣਿਤ੍ਵਾਨ, ਵਿਕ੍ਖਮ੍ਭਨ੍ਤਿ ਬਹੁਜ੍ਜਨਾ.

੬੧੫. ‘‘ਸੁਫੁਲ੍ਲਂ ਪਦੁਮਂ ਗਯ੍ਹ, ਉਪਗਚ੍ਛਿਂ ਨਰਾਸਭਂ;

ਵੁਟ੍ਠਿਤਸ੍ਸ ਸਮਾਧਿਮ੍ਹਾ, ਬੁਦ੍ਧਸ੍ਸ ਅਭਿਰੋਪਯਿਂ.

੬੧੬. ‘‘ਚਾਤੁਦ੍ਦਿਸਂ ਨਮਸ੍ਸਿਤ੍ਵਾ, ਬੁਦ੍ਧਸੇਟ੍ਠਂ ਨਰੁਤ੍ਤਮਂ;

ਸਕਂ ਚਿਤ੍ਤਂ ਪਸਾਦੇਤ੍ਵਾ, ਸੀਹਨਾਦਂ ਨਦਿਂ ਅਹਂ [ਤਦਾ (ਸ੍ਯਾ.)].

੬੧੭. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਸਕਾਸਨੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੬੧੮. ‘‘‘ਬੁਦ੍ਧਸ੍ਸ ਗਿਰਮਞ੍ਞਾਯ, ਸਬ੍ਬੇ ਦੇਵਾ ਸਮਾਗਤਾ;

ਆਗਤੋ ਵਦਤਂ ਸੇਟ੍ਠੋ, ਧਮ੍ਮਂ ਸੋਸ੍ਸਾਮ ਤਂ ਮਯਂ.

੬੧੯. ‘‘‘ਤੇਸਂ ਹਾਸਪਰੇਤਾਨਂ, ਪੁਰਤੋ ਲੋਕਨਾਯਕੋ;

ਮਮ ਸਦ੍ਦਂ [ਕਮ੍ਮਂ (?)] ਪਕਿਤ੍ਤੇਸਿ, ਦੀਘਦਸ੍ਸੀ ਮਹਾਮੁਨਿ’.

੬੨੦. ‘‘ਯੇਨਿਦਂ ਪਦੁਮਂ ਦਿਨ੍ਨਂ, ਸੀਹਨਾਦੋ ਚ ਨਾਦਿਤੋ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੬੨੧. ‘‘‘ਇਤੋ ਅਟ੍ਠਮਕੇ ਕਪ੍ਪੇ, ਚਕ੍ਕਵਤ੍ਤੀ ਭਵਿਸ੍ਸਤਿ;

ਸਤ੍ਤਰਤਨਸਮ੍ਪਨ੍ਨੋ ਚਤੁਦੀਪਮ੍ਹਿ ਇਸ੍ਸਰੋ.

੬੨੨. ‘‘‘ਕਾਰਯਿਸ੍ਸਤਿ ਇਸ੍ਸਰਿਯਂ [ਇਸ੍ਸਰਂ (ਸ੍ਯਾ. ਕ.)], ਮਹਿਯਾ ਚਤੁਸਟ੍ਠਿਯਾ;

ਪਦੁਮੋ ਨਾਮ ਨਾਮੇਨ, ਚਕ੍ਕਵਤ੍ਤੀ ਮਹਬ੍ਬਲੋ.

੬੨੩. ‘‘ਕਪ੍ਪਸਤਸਹਸ੍ਸਮ੍ਹਿ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੬੨੪. ‘ਪਕਾਸਿਤੇ ਪਾਵਚਨੇ, ਬ੍ਰਹ੍ਮਬਨ੍ਧੁ ਭਵਿਸ੍ਸਤਿ;

ਬ੍ਰਹ੍ਮਞ੍ਞਾ ਅਭਿਨਿਕ੍ਖਮ੍ਮ, ਪਬ੍ਬਜਿਸ੍ਸਤਿ ਤਾਵਦੇ’.

੬੨੫. ‘‘ਪਧਾਨਪਹਿਤਤ੍ਤੋ ਸੋ, ਉਪਸਨ੍ਤੋ ਨਿਰੂਪਧਿ;

ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਤਿਨਾਸਵੋ.

੬੨੬. ‘‘ਵਿਜਨੇ ਪਨ੍ਤਸੇਯ੍ਯਮ੍ਹਿ, ਵਾਲ਼ਮਿਗਸਮਾਕੁਲੇ;

ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਤਿਨਾਸਵੋ.

੬੨੭. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪਿਣ੍ਡੋਲਭਾਰਦ੍ਵਾਜੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪਿਣ੍ਡੋਲਭਾਰਦ੍ਵਾਜਤ੍ਥੇਰਸ੍ਸਾਪਦਾਨਂ ਅਟ੍ਠਮਂ.