੩-੬. ਉਪਾਲਿਤ੍ਥੇਰਅਪਦਾਨਂ

੪੪੧. ‘‘ਨਗਰੇ ਹਂਸਵਤਿਯਾ, ਸੁਜਾਤੋ ਨਾਮ ਬ੍ਰਾਹ੍ਮਣੋ;

ਅਸੀਤਿਕੋਟਿਨਿਚਯੋ, ਪਹੂਤਧਨਧਞ੍ਞਵਾ.

੪੪੨. ‘‘ਅਜ੍ਝਾਯਕੋ ਮਨ੍ਤਧਰੋ, ਤਿਣ੍ਣਂ ਵੇਦਾਨ ਪਾਰਗੂ;

ਲਕ੍ਖਣੇ ਇਤਿਹਾਸੇ ਚ, ਸਧਮ੍ਮੇ ਪਾਰਮਿਂ ਗਤੋ.

੪੪੩. ‘‘ਪਰਿਬ੍ਬਾਜਾ ਏਕਸਿਖਾ [ਏਕਭਿਕ੍ਖਾ (ਕ.)], ਗੋਤਮਾ

ਬੁਦ੍ਧਸਾਵਕਾ [ਸਬ੍ਬਤ੍ਥਪਿ ਏਵਮੇਵ ਦਿਸ੍ਸਤਿ].

ਚਰਕਾ ਤਾਪਸਾ ਚੇਵ, ਚਰਨ੍ਤਿ ਮਹਿਯਾ ਤਦਾ.

੪੪੪. ‘‘ਤੇਪਿ ਮਂ ਪਰਿਵਾਰੇਨ੍ਤਿ, ਬ੍ਰਾਹ੍ਮਣੋ ਵਿਸ੍ਸੁਤੋ ਇਤਿ;

ਬਹੁਜ੍ਜਨੋ ਮਂ ਪੂਜੇਤਿ, ਨਾਹਂ ਪੂਜੇਮਿ ਕਿਞ੍ਚਨਂ.

੪੪੫. ‘‘ਪੂਜਾਰਹਂ ਨ ਪਸ੍ਸਾਮਿ, ਮਾਨਤ੍ਥਦ੍ਧੋ ਅਹਂ ਤਦਾ;

ਬੁਦ੍ਧੋਤਿ ਵਚਨਂ ਨਤ੍ਥਿ, ਤਾਵ ਨੁਪ੍ਪਜ੍ਜਤੇ ਜਿਨੋ.

੪੪੬. ‘‘ਅਚ੍ਚਯੇਨ ਅਹੋਰਤ੍ਤਂ, ਪਦੁਮੁਤ੍ਤਰਨਾਮਕੋ [ਨਾਯਕੋ (ਸੀ. ਸ੍ਯਾ.)];

ਸਬ੍ਬਂ ਤਮਂ ਵਿਨੋਦੇਤ੍ਵਾ, ਲੋਕੇ ਉਪ੍ਪਜ੍ਜਿ ਚਕ੍ਖੁਮਾ.

੪੪੭. ‘‘ਵਿਤ੍ਥਾਰਿਕੇ ਬਾਹੁਜਞ੍ਞੇ, ਪੁਥੁਭੂਤੇ ਚ ਸਾਸਨੇ;

ਉਪਾਗਮਿ ਤਦਾ ਬੁਦ੍ਧੋ, ਨਗਰਂ ਹਂਸਸਵ੍ਹਯਂ.

੪੪੮. ‘‘ਪਿਤੁ ਅਤ੍ਥਾਯ ਸੋ ਬੁਦ੍ਧੋ, ਧਮ੍ਮਂ ਦੇਸੇਸਿ ਚਕ੍ਖੁਮਾ;

ਤੇਨ ਕਾਲੇਨ ਪਰਿਸਾ, ਸਮਨ੍ਤਾ ਯੋਜਨਂ ਤਦਾ.

੪੪੯. ‘‘ਸਮ੍ਮਤੋ ਮਨੁਜਾਨਂ ਸੋ, ਸੁਨਨ੍ਦੋ ਨਾਮ ਤਾਪਸੋ;

ਯਾਵਤਾ ਬੁਦ੍ਧਪਰਿਸਾ, ਪੁਪ੍ਫੇਹਚ੍ਛਾਦਯੀ ਤਦਾ.

੪੫੦. ‘‘ਚਤੁਸਚ੍ਚਂ ਪਕਾਸੇਨ੍ਤੇ, ਸੇਟ੍ਠੇ ਚ [ਹੇਟ੍ਠਾ ਚ (ਕ.)] ਪੁਪ੍ਫਮਣ੍ਡਪੇ;

ਕੋਟਿਸਤਸਹਸ੍ਸਾਨਂ, ਧਮ੍ਮਾਭਿਸਮਯੋ ਅਹੁ.

੪੫੧. ‘‘ਸਤ੍ਤਰਤ੍ਤਿਨ੍ਦਿਵਂ ਬੁਦ੍ਧੋ, ਵਸ੍ਸੇਤ੍ਵਾ ਧਮ੍ਮਵੁਟ੍ਠਿਯੋ;

ਅਟ੍ਠਮੇ ਦਿਵਸੇ ਪਤ੍ਤੇ, ਸੁਨਨ੍ਦਂ ਕਿਤ੍ਤਯੀ ਜਿਨੋ.

੪੫੨. ‘‘ਦੇਵਲੋਕੇ ਮਨੁਸ੍ਸੇ ਵਾ, ਸਂਸਰਨ੍ਤੋ ਅਯਂ ਭਵੇ;

ਸਬ੍ਬੇਸਂ ਪਵਰੋ ਹੁਤ੍ਵਾ, ਭਵੇਸੁ ਸਂਸਰਿਸ੍ਸਤਿ.

੪੫੩. ‘‘ਕਪ੍ਪਸਤਸਹਸ੍ਸਮ੍ਹਿ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੪੫੪. ‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਮਨ੍ਤਾਣਿਪੁਤ੍ਤੋ ਪੁਣ੍ਣੋਤਿ, ਹੇਸ੍ਸਤਿ ਸਤ੍ਥੁ ਸਾਵਕੋ.

੪੫੫. ‘‘ਏਵਂ ਕਿਤ੍ਤਯਿ ਸਮ੍ਬੁਦ੍ਧੋ, ਸੁਨਨ੍ਦਂ ਤਾਪਸਂ ਤਦਾ;

ਹਾਸਯਨ੍ਤੋ ਜਨਂ ਸਬ੍ਬਂ, ਦਸ੍ਸਯਨ੍ਤੋ ਸਕਂ ਬਲਂ.

੪੫੬. ‘‘ਕਤਞ੍ਜਲੀ ਨਮਸ੍ਸਨ੍ਤਿ, ਸੁਨਨ੍ਦਂ ਤਾਪਸਂ ਜਨਾ;

ਬੁਦ੍ਧੇ ਕਾਰਂ ਕਰਿਤ੍ਵਾਨ, ਸੋਧੇਸਿ ਗਤਿਮਤ੍ਤਨੋ.

੪੫੭. ‘‘ਤਤ੍ਥ ਮੇ ਅਹੁ ਸਙ੍ਕਪ੍ਪੋ, ਸੁਤ੍ਵਾਨ ਮੁਨਿਨੋ ਵਚਂ;

ਅਹਮ੍ਪਿ ਕਾਰਂ ਕਸ੍ਸਾਮਿ, ਯਥਾ ਪਸ੍ਸਾਮਿ ਗੋਤਮਂ.

੪੫੮. ‘‘ਏਵਾਹਂ ਚਿਨ੍ਤਯਿਤ੍ਵਾਨ, ਕਿਰਿਯਂ ਚਿਨ੍ਤਯਿਂ ਮਮ;

ਕ੍ਯਾਹਂ ਕਮ੍ਮਂ ਆਚਰਾਮਿ, ਪੁਞ੍ਞਕ੍ਖੇਤ੍ਤੇ ਅਨੁਤ੍ਤਰੇ.

੪੫੯. ‘‘ਅਯਞ੍ਚ ਪਾਠਿਕੋ ਭਿਕ੍ਖੁ, ਸਬ੍ਬਪਾਠਿਸ੍ਸ ਸਾਸਨੇ;

ਵਿਨਯੇ ਅਗ੍ਗਨਿਕ੍ਖਿਤ੍ਤੋ, ਤਂ ਠਾਨਂ ਪਤ੍ਥਯੇ ਅਹਂ.

੪੬੦. ‘‘ਇਦਂ ਮੇ ਅਮਿਤਂ ਭੋਗਂ, ਅਕ੍ਖੋਭਂ ਸਾਗਰੂਪਮਂ;

ਤੇਨ ਭੋਗੇਨ ਬੁਦ੍ਧਸ੍ਸ, ਆਰਾਮਂ ਮਾਪਯੇ ਅਹਂ.

੪੬੧. ‘‘ਸੋਭਨਂ ਨਾਮ ਆਰਾਮਂ, ਨਗਰਸ੍ਸ ਪੁਰਤ੍ਥਤੋ;

ਕਿਣਿਤ੍ਵਾ [ਕੀਤ੍ਵਾ (ਸੀ.), ਕਿਤ੍ਵਾ (ਕ.)] ਸਤਸਹਸ੍ਸੇਨ, ਸਙ੍ਘਾਰਾਮਂ ਅਮਾਪਯਿਂ.

੪੬੨. ‘‘ਕੂਟਾਗਾਰੇ ਚ ਪਾਸਾਦੇ, ਮਣ੍ਡਪੇ ਹਮ੍ਮਿਯੇ ਗੁਹਾ;

ਚਙ੍ਕਮੇ ਸੁਕਤੇ ਕਤ੍ਵਾ, ਸਙ੍ਘਾਰਾਮਂ ਅਮਾਪਯਿਂ.

੪੬੩. ‘‘ਜਨ੍ਤਾਘਰਂ ਅਗ੍ਗਿਸਾਲਂ, ਅਥੋ ਉਦਕਮਾਲ਼ਕਂ;

ਨ੍ਹਾਨਘਰਂ ਮਾਪਯਿਤ੍ਵਾ, ਭਿਕ੍ਖੁਸਙ੍ਘਸ੍ਸਦਾਸਹਂ.

੪੬੪. ‘‘ਆਸਨ੍ਦਿਯੋ ਪੀਠਕੇ ਚ, ਪਰਿਭੋਗੇ ਚ ਭਾਜਨੇ;

ਆਰਾਮਿਕਞ੍ਚ ਭੇਸਜ੍ਜਂ, ਸਬ੍ਬਮੇਤਂ ਅਦਾਸਹਂ.

੪੬੫. ‘‘ਆਰਕ੍ਖਂ ਪਟ੍ਠਪੇਤ੍ਵਾਨ, ਪਾਕਾਰਂ ਕਾਰਯਿਂ ਦਲ਼੍ਹਂ;

ਮਾ ਨਂ ਕੋਚਿ ਵਿਹੇਠੇਸਿ, ਸਨ੍ਤਚਿਤ੍ਤਾਨ ਤਾਦਿਨਂ.

੪੬੬. ‘‘ਸਤਸਹਸ੍ਸੇਨਾਵਾਸਂ [ਆਵਾਸਂ ਸਤਸਹਸ੍ਸੇਨ (ਸੀ.), ਆਵਾਸੇ ਸਤਸਹਸ੍ਸੇ (ਸ੍ਯਾ.)], ਸਙ੍ਘਾਰਾਮੇ ਅਮਾਪਯਿਂ;

ਵੇਪੁਲ੍ਲਂ ਤਂ ਮਾਪਯਿਤ੍ਵਾ [ਵੇਪੁਲ੍ਲਤਂ ਪਾਪਯਿਤ੍ਵਾ (ਸੀ.)], ਸਮ੍ਬੁਦ੍ਧਂ ਉਪਨਾਮਯਿਂ.

੪੬੭. ‘‘ਨਿਟ੍ਠਾਪਿਤੋ ਮਯਾਰਾਮੋ, ਸਮ੍ਪਟਿਚ੍ਛ ਤੁਵਂ ਮੁਨਿ;

ਨਿਯ੍ਯਾਦੇਸ੍ਸਾਮਿ ਤਂ ਵੀਰ [ਤੇ ਵੀਰ (ਸੀ.), ਤਂ ਧੀਰ (ਸ੍ਯਾ.)], ਅਧਿਵਾਸੇਹਿ ਚਕ੍ਖੁਮ.

੪੬੮. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਮਮ ਸਙ੍ਕਪ੍ਪਮਞ੍ਞਾਯ, ਅਧਿਵਾਸੇਸਿ ਨਾਯਕੋ.

੪੬੯. ‘‘ਅਧਿਵਾਸਨਮਞ੍ਞਾਯ, ਸਬ੍ਬਞ੍ਞੁਸ੍ਸ ਮਹੇਸਿਨੋ;

ਭੋਜਨਂ ਪਟਿਯਾਦੇਤ੍ਵਾ, ਕਾਲਮਾਰੋਚਯਿਂ ਅਹਂ.

੪੭੦. ‘‘ਆਰੋਚਿਤਮ੍ਹਿ ਕਾਲਮ੍ਹਿ, ਪਦੁਮੁਤ੍ਤਰਨਾਯਕੋ;

ਖੀਣਾਸਵਸਹਸ੍ਸੇਹਿ, ਆਰਾਮਂ ਮੇ ਉਪਾਗਮਿ.

੪੭੧. ‘‘ਨਿਸਿਨ੍ਨਂ ਕਾਲਮਞ੍ਞਾਯ, ਅਨ੍ਨਪਾਨੇਨ ਤਪ੍ਪਯਿਂ;

ਭੁਤ੍ਤਾਵਿਂ ਕਾਲਮਞ੍ਞਾਯ, ਇਦਂ ਵਚਨਮਬ੍ਰਵਿਂ.

੪੭੨. ‘‘ਕੀਤੋ ਸਤਸਹਸ੍ਸੇਨ, ਤਤ੍ਤਕੇਨੇਵ ਕਾਰਿਤੋ;

ਸੋਭਨੋ ਨਾਮ ਆਰਾਮੋ, ਸਮ੍ਪਟਿਚ੍ਛ ਤੁਵਂ ਮੁਨਿ.

੪੭੩. ‘‘ਇਮਿਨਾਰਾਮਦਾਨੇਨ, ਚੇਤਨਾਪਣਿਧੀਹਿ ਚ;

ਭਵੇ ਨਿਬ੍ਬਤ੍ਤਮਾਨੋਹਂ, ਲਭਾਮਿ ਮਮ ਪਤ੍ਥਿਤਂ.

੪੭੪. ‘‘ਪਟਿਗ੍ਗਹੇਤ੍ਵਾ ਸਮ੍ਬੁਦ੍ਧੋ, ਸਙ੍ਘਾਰਾਮਂ ਸੁਮਾਪਿਤਂ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਇਦਂ ਵਚਨਮਬ੍ਰਵਿ.

੪੭੫. ‘‘ਯੋ ਸੋ ਬੁਦ੍ਧਸ੍ਸ ਪਾਦਾਸਿ, ਸਙ੍ਘਾਰਾਮਂ ਸੁਮਾਪਿਤਂ;

ਤਮਹਂ ਕਿਤ੍ਤਯਿਸ੍ਸਾਮਿ, ਸੁਣਾਥ ਮਮ ਭਾਸਤੋ.

੪੭੬. ‘‘ਹਤ੍ਥੀ ਅਸ੍ਸਾ ਰਥਾ ਪਤ੍ਤੀ, ਸੇਨਾ ਚ ਚਤੁਰਙ੍ਗਿਨੀ;

ਪਰਿਵਾਰੇਸ੍ਸਨ੍ਤਿਮਂ ਨਿਚ੍ਚਂ, ਸਙ੍ਘਾਰਾਮਸ੍ਸਿਦਂ ਫਲਂ.

੪੭੭. ‘‘ਸਟ੍ਠਿ ਤੂਰਸਹਸ੍ਸਾਨਿ [ਤੁਰਿਯਸਹਸ੍ਸਾਨਿ (ਸੀ. ਸ੍ਯਾ.)], ਭੇਰਿਯੋ ਸਮਲਙ੍ਕਤਾ;

ਪਰਿਵਾਰੇਸ੍ਸਨ੍ਤਿਮਂ ਨਿਚ੍ਚਂ, ਸਙ੍ਘਾਰਾਮਸ੍ਸਿਦਂ ਫਲਂ.

੪੭੮. ‘‘ਛਲ਼ਸੀਤਿਸਹਸ੍ਸਾਨਿ, ਨਾਰਿਯੋ ਸਮਲਙ੍ਕਤਾ;

ਵਿਚਿਤ੍ਤਵਤ੍ਥਾਭਰਣਾ, ਆਮੁਤ੍ਤਮਣਿਕੁਣ੍ਡਲਾ.

੪੭੯. ‘‘ਅਲ਼ਾਰਪਮ੍ਹਾ ਹਸੁਲਾ, ਸੁਸਞ੍ਞਾ ਤਨੁਮਜ੍ਝਿਮਾ;

ਪਰਿਵਾਰੇਸ੍ਸਨ੍ਤਿਮਂ ਨਿਚ੍ਚਂ, ਸਙ੍ਘਾਰਾਮਸ੍ਸਿਦਂ ਫਲਂ.

੪੮੦. ‘‘ਤਿਂਸਕਪ੍ਪਸਹਸ੍ਸਾਨਿ, ਦੇਵਲੋਕੇ ਰਮਿਸ੍ਸਤਿ;

ਸਹਸ੍ਸਕ੍ਖਤ੍ਤੁਂ ਦੇਵਿਨ੍ਦੋ, ਦੇਵਰਜ੍ਜਂ ਕਰਿਸ੍ਸਤਿ.

੪੮੧. ‘‘ਦੇਵਰਾਜੇਨ ਪਤ੍ਤਬ੍ਬਂ, ਸਬ੍ਬਂ ਪਟਿਲਭਿਸ੍ਸਤਿ;

ਅਨੂਨਭੋਗੋ ਹੁਤ੍ਵਾਨ, ਦੇਵਰਜ੍ਜਂ ਕਰਿਸ੍ਸਤਿ.

੪੮੨. ‘‘ਸਹਸ੍ਸਕ੍ਖਤ੍ਤੁਂ ਚਕ੍ਕਵਤ੍ਤੀ, ਰਾਜਾ ਰਟ੍ਠੇ ਭਵਿਸ੍ਸਤਿ;

ਪਥਬ੍ਯਾ ਰਜ੍ਜਂ ਵਿਪੁਲਂ, ਗਣਨਾਤੋ ਅਸਙ੍ਖਿਯਂ.

੪੮੩. ‘‘ਕਪ੍ਪਸਤਸਹਸ੍ਸਮ੍ਹਿ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ, ਸਤ੍ਥਾ ਲੋਕੇ ਭਵਿਸ੍ਸਤਿ.

੪੮੪. ‘‘ਤਸ੍ਸ ਧਮ੍ਮੇਸੁ ਦਾਯਾਦੋ, ਓਰਸੋ ਧਮ੍ਮਨਿਮ੍ਮਿਤੋ;

ਉਪਾਲਿ ਨਾਮ ਨਾਮੇਨ, ਹੇਸ੍ਸਤਿ ਸਤ੍ਥੁ ਸਾਵਕੋ.

੪੮੫. ‘‘ਵਿਨਯੇ ਪਾਰਮਿਂ ਪਤ੍ਵਾ, ਠਾਨਾਠਾਨੇ ਚ ਕੋਵਿਦੋ;

ਜਿਨਸਾਸਨਂ ਧਾਰੇਨ੍ਤੋ, ਵਿਹਰਿਸ੍ਸਤਿਨਾਸਵੋ.

੪੮੬. ‘‘ਸਬ੍ਬਮੇਤਂ ਅਭਿਞ੍ਞਾਯ, ਗੋਤਮੋ ਸਕ੍ਯਪੁਙ੍ਗਵੋ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਏਤਦਗ੍ਗੇ ਠਪੇਸ੍ਸਤਿ.

੪੮੭. ‘‘ਅਪਰਿਮੇਯ੍ਯੁਪਾਦਾਯ, ਪਤ੍ਥੇਮਿ ਤਵ ਸਾਸਨਂ;

ਸੋ ਮੇ ਅਤ੍ਥੋ ਅਨੁਪ੍ਪਤ੍ਤੋ, ਸਬ੍ਬਸਂਯੋਜਨਕ੍ਖਯੋ.

੪੮੮. ‘‘ਯਥਾ ਸੂਲਾਵੁਤੋ ਪੋਸੋ, ਰਾਜਦਣ੍ਡੇਨ ਤਜ੍ਜਿਤੋ;

ਸੂਲੇ ਸਾਤਂ ਅਵਿਨ੍ਦਨ੍ਤੋ, ਪਰਿਮੁਤ੍ਤਿਂਵ ਇਚ੍ਛਤਿ.

੪੮੯. ‘‘ਤਥੇਵਾਹਂ ਮਹਾਵੀਰ, ਭਵਦਣ੍ਡੇਨ ਤਜ੍ਜਿਤੋ;

ਕਮ੍ਮਸੂਲਾਵੁਤੋ ਸਨ੍ਤੋ, ਪਿਪਾਸਾਵੇਦਨਟ੍ਟਿਤੋ.

੪੯੦. ‘‘ਭਵੇ ਸਾਤਂ ਨ ਵਿਨ੍ਦਾਮਿ, ਡਯ੍ਹਨ੍ਤੋ ਤੀਹਿ ਅਗ੍ਗਿਭਿ;

ਪਰਿਮੁਤ੍ਤਿਂ ਗਵੇਸਾਮਿ, ਯਥਾਪਿ ਰਾਜਦਣ੍ਡਿਤੋ.

੪੯੧. ‘‘ਯਥਾ ਵਿਸਾਦੋ ਪੁਰਿਸੋ, ਵਿਸੇਨ ਪਰਿਪੀਲ਼ਿਤੋ;

ਅਗਦਂ ਸੋ ਗਵੇਸੇਯ੍ਯ, ਵਿਸਘਾਤਾਯੁਪਾਲਨਂ [ਵਿਸਘਾਤਾਯੁਪਾਯਨਂ (ਸ੍ਯਾ. ਕ.)].

੪੯੨. ‘‘ਗਵੇਸਮਾਨੋ ਪਸ੍ਸੇਯ੍ਯ, ਅਗਦਂ ਵਿਸਘਾਤਕਂ;

ਤਂ ਪਿਵਿਤ੍ਵਾ ਸੁਖੀ ਅਸ੍ਸ, ਵਿਸਮ੍ਹਾ ਪਰਿਮੁਤ੍ਤਿਯਾ.

੪੯੩. ‘‘ਤਥੇਵਾਹਂ ਮਹਾਵੀਰ, ਯਥਾ ਵਿਸਹਤੋ ਨਰੋ;

ਸਮ੍ਪੀਲ਼ਿਤੋ ਅਵਿਜ੍ਜਾਯ, ਸਦ੍ਧਮ੍ਮਾਗਦਮੇਸਹਂ.

੪੯੪. ‘‘ਧਮ੍ਮਾਗਦਂ ਗਵੇਸਨ੍ਤੋ, ਅਦ੍ਦਕ੍ਖਿਂ ਸਕ੍ਯਸਾਸਨਂ;

ਅਗ੍ਗਂ ਸਬ੍ਬੋਸਧਾਨਂ ਤਂ, ਸਬ੍ਬਸਲ੍ਲਵਿਨੋਦਨਂ.

੪੯੫. ‘‘ਧਮ੍ਮੋਸਧਂ ਪਿਵਿਤ੍ਵਾਨ, ਵਿਸਂ ਸਬ੍ਬਂ ਸਮੂਹਨਿਂ;

ਅਜਰਾਮਰਂ ਸੀਤਿਭਾਵਂ, ਨਿਬ੍ਬਾਨਂ ਫਸ੍ਸਯਿਂ ਅਹਂ.

੪੯੬. ‘‘ਯਥਾ ਭੂਤਟ੍ਟਿਤੋ ਪੋਸੋ, ਭੂਤਗ੍ਗਾਹੇਨ ਪੀਲ਼ਿਤੋ;

ਭੂਤਵੇਜ੍ਜਂ ਗਵੇਸੇਯ੍ਯ, ਭੂਤਸ੍ਮਾ ਪਰਿਮੁਤ੍ਤਿਯਾ.

੪੯੭. ‘‘ਗਵੇਸਮਾਨੋ ਪਸ੍ਸੇਯ੍ਯ, ਭੂਤਵਿਜ੍ਜਾਸੁ ਕੋਵਿਦਂ;

ਤਸ੍ਸ ਸੋ ਵਿਹਨੇ ਭੂਤਂ, ਸਮੂਲਞ੍ਚ ਵਿਨਾਸਯੇ.

੪੯੮. ‘‘ਤਥੇਵਾਹਂ ਮਹਾਵੀਰ, ਤਮਗ੍ਗਾਹੇਨ ਪੀਲ਼ਿਤੋ;

ਞਾਣਾਲੋਕਂ ਗਵੇਸਾਮਿ, ਤਮਤੋ ਪਰਿਮੁਤ੍ਤਿਯਾ.

੪੯੯. ‘‘ਅਥਦ੍ਦਸਂ ਸਕ੍ਯਮੁਨਿਂ, ਕਿਲੇਸਤਮਸੋਧਨਂ;

ਸੋ ਮੇ ਤਮਂ ਵਿਨੋਦੇਸਿ, ਭੂਤਵੇਜ੍ਜੋਵ ਭੂਤਕਂ.

੫੦੦. ‘‘ਸਂਸਾਰਸੋਤਂ ਸਞ੍ਛਿਨ੍ਦਿਂ, ਤਣ੍ਹਾਸੋਤਂ ਨਿਵਾਰਯਿਂ;

ਭਵਂ ਉਗ੍ਘਾਟਯਿਂ ਸਬ੍ਬਂ, ਭੂਤਵੇਜ੍ਜੋਵ ਮੂਲਤੋ.

੫੦੧. ‘‘ਗਰੁਲ਼ੋ ਯਥਾ ਓਪਤਤਿ, ਪਨ੍ਨਗਂ ਭਕ੍ਖਮਤ੍ਤਨੋ;

ਸਮਨ੍ਤਾ ਯੋਜਨਸਤਂ, ਵਿਕ੍ਖੋਭੇਤਿ ਮਹਾਸਰਂ.

੫੦੨. ‘‘ਪਨ੍ਨਗਂ ਸੋ ਗਹੇਤ੍ਵਾਨ, ਅਧੋਸੀਸਂ ਵਿਹੇਠਯਂ;

ਆਦਾਯ ਸੋ ਪਕ੍ਕਮਤਿ, ਯੇਨਕਾਮਂ ਵਿਹਙ੍ਗਮੋ.

੫੦੩. ‘‘ਤਥੇਵਾਹਂ ਮਹਾਵੀਰ, ਯਥਾਪਿ ਗਰੁਲ਼ੋ ਬਲੀ;

ਅਸਙ੍ਖਤਂ ਗਵੇਸਨ੍ਤੋ, ਦੋਸੇ ਵਿਕ੍ਖਾਲਯਿਂ ਅਹਂ.

੫੦੪. ‘‘ਦਿਟ੍ਠੋ ਅਹਂ ਧਮ੍ਮਵਰਂ, ਸਨ੍ਤਿਪਦਮਨੁਤ੍ਤਰਂ;

ਆਦਾਯ ਵਿਹਰਾਮੇਤਂ, ਗਰੁਲ਼ੋ ਪਨ੍ਨਗਂ ਯਥਾ.

੫੦੫. ‘‘ਆਸਾਵਤੀ ਨਾਮ ਲਤਾ, ਜਾਤਾ ਚਿਤ੍ਤਲਤਾਵਨੇ;

ਤਸ੍ਸਾ ਵਸ੍ਸਸਹਸ੍ਸੇਨ, ਏਕਂ ਨਿਬ੍ਬਤ੍ਤਤੇ ਫਲਂ.

੫੦੬. ‘‘ਤਂ ਦੇਵਾ ਪਯਿਰੁਪਾਸਨ੍ਤਿ, ਤਾਵਦੂਰਫਲੇ ਸਤਿ;

ਦੇਵਾਨਂ ਸਾ ਪਿਯਾ ਏਵਂ, ਆਸਾਵਤੀ ਲਤੁਤ੍ਤਮਾ.

੫੦੭. ‘‘ਸਤਸਹਸ੍ਸੁਪਾਦਾਯ, ਤਾਹਂ ਪਰਿਚਰੇ ਮੁਨਿ;

ਸਾਯਂ ਪਾਤਂ ਨਮਸ੍ਸਾਮਿ, ਦੇਵਾ ਆਸਾਵਤਿਂ ਯਥਾ.

੫੦੮. ‘‘ਅਵਞ੍ਝਾ ਪਾਰਿਚਰਿਯਾ, ਅਮੋਘਾ ਚ ਨਮਸ੍ਸਨਾ;

ਦੂਰਾਗਤਮ੍ਪਿ ਮਂ ਸਨ੍ਤਂ, ਖਣੋਯਂ ਨ ਵਿਰਾਧਯਿ.

੫੦੯. ‘‘ਪਟਿਸਨ੍ਧਿਂ ਨ ਪਸ੍ਸਾਮਿ, ਵਿਚਿਨਨ੍ਤੋ ਭਵੇ ਅਹਂ;

ਨਿਰੂਪਧਿ ਵਿਪ੍ਪਮੁਤ੍ਤੋ [ਵਿਪ੍ਪਯੁਤ੍ਤੋ (ਕ.)], ਉਪਸਨ੍ਤੋ ਚਰਾਮਹਂ.

੫੧੦. ‘‘ਯਥਾਪਿ ਪਦੁਮਂ ਨਾਮ, ਸੂਰਿਯਰਂਸੇਨ ਪੁਪ੍ਫਤਿ;

ਤਥੇਵਾਹਂ ਮਹਾਵੀਰ, ਬੁਦ੍ਧਰਂਸੇਨ ਪੁਪ੍ਫਿਤੋ.

੫੧੧. ‘‘ਯਥਾ ਬਲਾਕਯੋਨਿਮ੍ਹਿ, ਨ ਵਿਜ੍ਜਤਿ ਪੁਮੋ [ਪੁਮਾ (ਸੀ. ਸ੍ਯਾ.)] ਸਦਾ;

ਮੇਘੇਸੁ ਗਜ੍ਜਮਾਨੇਸੁ, ਗਬ੍ਭਂ ਗਣ੍ਹਨ੍ਤਿ ਤਾ ਸਦਾ.

੫੧੨. ‘‘ਚਿਰਮ੍ਪਿ ਗਬ੍ਭਂ ਧਾਰੇਨ੍ਤਿ, ਯਾਵ ਮੇਘੋ ਨ ਗਜ੍ਜਤਿ;

ਭਾਰਤੋ ਪਰਿਮੁਚ੍ਚਨ੍ਤਿ, ਯਦਾ ਮੇਘੋ ਪਵਸ੍ਸਤਿ.

੫੧੩. ‘‘ਪਦੁਮੁਤ੍ਤਰਬੁਦ੍ਧਸ੍ਸ, ਧਮ੍ਮਮੇਘੇਨ ਗਜ੍ਜਤੋ;

ਸਦ੍ਦੇਨ ਧਮ੍ਮਮੇਘਸ੍ਸ, ਧਮ੍ਮਗਬ੍ਭਂ ਅਗਣ੍ਹਹਂ.

੫੧੪. ਸਤਸਹਸ੍ਸੁਪਾਦਾਯ, ਪੁਞ੍ਞਗਬ੍ਭਂ ਧਰੇਮਹਂ;

ਨਪ੍ਪਮੁਚ੍ਚਾਮਿ ਭਾਰਤੋ, ਧਮ੍ਮਮੇਘੋ ਨ ਗਜ੍ਜਤਿ.