੩-੫. ਪੁਣ੍ਣਮਨ੍ਤਾਣਿਪੁਤ੍ਤਤ੍ਥੇਰਅਪਦਾਨਂ

੪੩੪. ‘‘ਅਜ੍ਝਾਯਕੋ ਮਨ੍ਤਧਰੋ, ਤਿਣ੍ਣਂ ਵੇਦਾਨ ਪਾਰਗੂ;

ਪੁਰਕ੍ਖਤੋਮ੍ਹਿ ਸਿਸ੍ਸੇਹਿ, ਉਪਗਚ੍ਛਿਂ ਨਰੁਤ੍ਤਮਂ.

੪੩੫. ‘‘ਪਦੁਮੁਤ੍ਤਰੋ ਲੋਕਵਿਦੂ, ਆਹੁਤੀਨਂ ਪਟਿਗ੍ਗਹੋ;

ਮਮ ਕਮ੍ਮਂ ਪਕਿਤ੍ਤੇਸਿ, ਸਙ੍ਖਿਤ੍ਤੇਨ ਮਹਾਮੁਨਿ.

੪੩੬. ‘‘ਤਾਹਂ ਧਮ੍ਮਂ ਸੁਣਿਤ੍ਵਾਨ, ਅਭਿਵਾਦੇਤ੍ਵਾਨ ਸਤ੍ਥੁਨੋ;

ਅਞ੍ਜਲਿਂ ਪਗ੍ਗਹੇਤ੍ਵਾਨ, ਪਕ੍ਕਮਿਂ [ਪਕ੍ਕਾਮਿਂ (ਸੀ. ਸ੍ਯਾ.)] ਦਕ੍ਖਿਣਾਮੁਖੋ.

੪੩੭. ‘‘ਸਙ੍ਖਿਤ੍ਤੇਨ ਸੁਣਿਤ੍ਵਾਨ, ਵਿਤ੍ਥਾਰੇਨ ਅਭਾਸਯਿਂ [ਅਦੇਸਯਿਂ (ਸੀ. ਸ੍ਯਾ.)];

ਸਬ੍ਬੇ ਸਿਸ੍ਸਾ ਅਤ੍ਤਮਨਾ, ਸੁਤ੍ਵਾਨ ਮਮ ਭਾਸਤੋ;

ਸਕਂ ਦਿਟ੍ਠਿਂ ਵਿਨੋਦੇਤ੍ਵਾ, ਬੁਦ੍ਧੇ ਚਿਤ੍ਤਂ ਪਸਾਦਯੁਂ.

੪੩੮. ‘‘ਸਙ੍ਖਿਤ੍ਤੇਨਪਿ ਦੇਸੇਮਿ, ਵਿਤ੍ਥਾਰੇਨ ਤਥੇਵਹਂ [ਦੇਸੇਸਿਂ ਵਿਤ੍ਥਾਰੇਨਪਿ ਭਾਸਯਿਂ (ਕ.)];

ਅਭਿਧਮ੍ਮਨਯਞ੍ਞੂਹਂ, ਕਥਾਵਤ੍ਥੁਵਿਸੁਦ੍ਧਿਯਾ;

ਸਬ੍ਬੇਸਂ ਵਿਞ੍ਞਾਪੇਤ੍ਵਾਨ, ਵਿਹਰਾਮਿ ਅਨਾਸਵੋ.

੪੩੯. ‘‘ਇਤੋ ਪਞ੍ਚਸਤੇ ਕਪ੍ਪੇ, ਚਤੁਰੋ ਸੁਪ੍ਪਕਾਸਕਾ;

ਸਤ੍ਤਰਤਨਸਮ੍ਪਨ੍ਨਾ, ਚਤੁਦੀਪਮ੍ਹਿ ਇਸ੍ਸਰਾ.

੪੪੦. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਪੁਣ੍ਣੋ ਮਨ੍ਤਾਣਿਪੁਤ੍ਤੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਪੁਣ੍ਣਮਨ੍ਤਾਣਿਪੁਤ੍ਤਤ੍ਥੇਰਸ੍ਸਾਪਦਾਨਂ ਪਞ੍ਚਮਂ.