੩-੨. ਮਹਾਮੋਗ੍ਗਲ੍ਲਾਨਤ੍ਥੇਰਅਪਦਾਨਂ

੩੭੫. ‘‘ਅਨੋਮਦਸ੍ਸੀ ਭਗਵਾ, ਲੋਕਜੇਟ੍ਠੋ ਨਰਾਸਭੋ;

ਵਿਹਾਸਿ ਹਿਮਵਨ੍ਤਮ੍ਹਿ, ਦੇਵਸਙ੍ਘਪੁਰਕ੍ਖਤੋ.

੩੭੬. ‘‘ਵਰੁਣੋ ਨਾਮ ਨਾਮੇਨ, ਨਾਗਰਾਜਾ ਅਹਂ ਤਦਾ;

ਕਾਮਰੂਪੀ ਵਿਕੁਬ੍ਬਾਮਿ, ਮਹੋਦਧਿਨਿਵਾਸਹਂ.

੩੭੭. ‘‘ਸਙ੍ਗਣਿਯਂ ਗਣਂ ਹਿਤ੍ਵਾ, ਤੂਰਿਯਂ ਪਟ੍ਠਪੇਸਹਂ;

ਸਮ੍ਬੁਦ੍ਧਂ ਪਰਿਵਾਰੇਤ੍ਵਾ, ਵਾਦੇਸੁਂ ਅਚ੍ਛਰਾ ਤਦਾ.

੩੭੮. ‘‘ਵਜ੍ਜਮਾਨੇਸੁ ਤੂਰੇਸੁ, ਦੇਵਾ ਤੂਰਾਨਿ [ਤੁਰਿਯੇਸੁ, ਦੇਵਾ ਤੁਰਿਯਾਨਿ (ਸੀ. ਸ੍ਯਾ.)] ਵਜ੍ਜਯੁਂ;

ਉਭਿਨ੍ਨਂ ਸਦ੍ਦਂ ਸੁਤ੍ਵਾਨ, ਬੁਦ੍ਧੋਪਿ ਸਮ੍ਪਬੁਜ੍ਝਥ.

੩੭੯. ‘‘ਨਿਮਨ੍ਤੇਤ੍ਵਾਨ ਸਮ੍ਬੁਦ੍ਧਂ, ਸਕਂ ਭਵਨੁਪਾਗਮਿਂ;

ਆਸਨਂ ਪਞ੍ਞਪੇਤ੍ਵਾਨ, ਕਾਲਮਾਰੋਚਯਿਂ ਅਹਂ.

੩੮੦. ‘‘ਖੀਣਾਸਵਸਹਸ੍ਸੇਹਿ, ਪਰਿਵੁਤੋ ਲੋਕਨਾਯਕੋ;

ਓਭਾਸੇਨ੍ਤੋ ਦਿਸਾ ਸਬ੍ਬਾ, ਭਵਨਂ ਮੇ ਉਪਾਗਮਿ.

੩੮੧. ‘‘ਉਪਵਿਟ੍ਠਂ ਮਹਾਵੀਰਂ, ਦੇਵਦੇਵਂ ਨਰਾਸਭਂ;

ਸਭਿਕ੍ਖੁਸਙ੍ਘਂ ਤਪ੍ਪੇਸਿਂ [ਸਨ੍ਤਪ੍ਪੇਸਿਂ (ਸ੍ਯਾ.), ਤਪ੍ਪੇਮਿ (ਕ.)], ਅਨ੍ਨਪਾਨੇਨਹਂ ਤਦਾ.

੩੮੨. ‘‘ਅਨੁਮੋਦਿ ਮਹਾਵੀਰੋ, ਸਯਮ੍ਭੂ ਅਗ੍ਗਪੁਗ੍ਗਲੋ;

ਭਿਕ੍ਖੁਸਙ੍ਘੇ ਨਿਸੀਦਿਤ੍ਵਾ, ਇਮਾ ਗਾਥਾ ਅਭਾਸਥ.

੩੮੩. ‘‘‘ਯੋ ਸੋ [ਯਂ ਸੋ (ਕ.)] ਸਙ੍ਘਂ ਅਪੂਜੇਸਿ, ਬੁਦ੍ਧਞ੍ਚ ਲੋਕਨਾਯਕਂ;

ਤੇਨ ਚਿਤ੍ਤਪ੍ਪਸਾਦੇਨ, ਦੇਵਲੋਕਂ ਗਮਿਸ੍ਸਤਿ.

੩੮੪. ‘‘‘ਸਤ੍ਤਸਤ੍ਤਤਿਕ੍ਖਤ੍ਤੁਞ੍ਚ, ਦੇਵਰਜ੍ਜਂ ਕਰਿਸ੍ਸਤਿ;

ਪਥਬ੍ਯਾ ਰਜ੍ਜਂ ਅਟ੍ਠਸਤਂ, ਵਸੁਧਂ ਆਵਸਿਸ੍ਸਤਿ.

੩੮੫. ‘‘‘ਪਞ੍ਚਪਞ੍ਞਾਸਕ੍ਖਤ੍ਤੁਞ੍ਚ, ਚਕ੍ਕਵਤ੍ਤੀ ਭਵਿਸ੍ਸਤਿ;

ਭੋਗਾ ਅਸਙ੍ਖਿਯਾ ਤਸ੍ਸ, ਉਪ੍ਪਜ੍ਜਿਸ੍ਸਨ੍ਤਿ ਤਾਵਦੇ.

੩੮੬. ‘‘‘ਅਪਰਿਮੇਯ੍ਯੇ ਇਤੋ ਕਪ੍ਪੇ, ਓਕ੍ਕਾਕਕੁਲਸਮ੍ਭਵੋ;

ਗੋਤਮੋ ਨਾਮ ਗੋਤ੍ਤੇਨ [ਨਾਮੇਨ (ਸੀ.)], ਸਤ੍ਥਾ ਲੋਕੇ ਭਵਿਸ੍ਸਤਿ.

੩੮੭. ‘‘‘ਨਿਰਯਾ ਸੋ ਚਵਿਤ੍ਵਾਨ, ਮਨੁਸ੍ਸਤਂ ਗਮਿਸ੍ਸਤਿ;

ਕੋਲਿਤੋ ਨਾਮ ਨਾਮੇਨ, ਬ੍ਰਹ੍ਮਬਨ੍ਧੁ ਭਵਿਸ੍ਸਤਿ.

੩੮੮. ‘‘‘ਸੋ ਪਚ੍ਛਾ ਪਬ੍ਬਜਿਤ੍ਵਾਨ, ਕੁਸਲਮੂਲੇਨ ਚੋਦਿਤੋ;

ਗੋਤਮਸ੍ਸ ਭਗਵਤੋ, ਦੁਤਿਯੋ ਹੇਸ੍ਸਤਿ ਸਾਵਕੋ.

੩੮੯. ‘‘‘ਆਰਦ੍ਧਵੀਰਿਯੋ ਪਹਿਤਤ੍ਤੋ, ਇਦ੍ਧਿਯਾ ਪਾਰਮਿਂ ਗਤੋ;

ਸਬ੍ਬਾਸਵੇ ਪਰਿਞ੍ਞਾਯ, ਨਿਬ੍ਬਾਯਿਸ੍ਸਤਿਨਾਸਵੋ’.

੩੯੦. ‘‘ਪਾਪਮਿਤ੍ਤੋਪਨਿਸ੍ਸਾਯ, ਕਾਮਰਾਗਵਸਂ ਗਤੋ;

ਮਾਤਰਂ ਪਿਤਰਞ੍ਚਾਪਿ, ਘਾਤਯਿਂ ਦੁਟ੍ਠਮਾਨਸੋ.

੩੯੧. ‘‘ਯਂ ਯਂ ਯੋਨੁਪਪਜ੍ਜਾਮਿ, ਨਿਰਯਂ ਅਥ ਮਾਨੁਸਂ;

ਪਾਪਕਮ੍ਮਸਮਙ੍ਗਿਤਾ, ਭਿਨ੍ਨਸੀਸੋ ਮਰਾਮਹਂ.

੩੯੨. ‘‘ਇਦਂ ਪਚ੍ਛਿਮਕਂ ਮਯ੍ਹਂ, ਚਰਿਮੋ ਵਤ੍ਤਤੇ ਭਵੋ;

ਇਧਾਪਿ ਏਦਿਸੋ ਮਯ੍ਹਂ, ਮਰਣਕਾਲੇ ਭਵਿਸ੍ਸਤਿ.

੩੯੩. ‘‘ਪਵਿਵੇਕਮਨੁਯੁਤ੍ਤੋ, ਸਮਾਧਿਭਾਵਨਾਰਤੋ;

ਸਬ੍ਬਾਸਵੇ ਪਰਿਞ੍ਞਾਯ, ਵਿਹਰਾਮਿ ਅਨਾਸਵੋ.

੩੯੪. ‘‘ਧਰਣਿਮ੍ਪਿ ਸੁਗਮ੍ਭੀਰਂ, ਬਹਲਂ ਦੁਪ੍ਪਧਂਸਿਯਂ;

ਵਾਮਙ੍ਗੁਟ੍ਠੇਨ ਖੋਭੇਯ੍ਯਂ, ਇਦ੍ਧਿਯਾ ਪਾਰਮਿਂ ਗਤੋ.

੩੯੫. ‘‘ਅਸ੍ਮਿਮਾਨਂ ਨ ਪਸ੍ਸਾਮਿ, ਮਾਨੋ ਮਯ੍ਹਂ ਨ ਵਿਜ੍ਜਤਿ;

ਸਾਮਣੇਰੇ ਉਪਾਦਾਯ, ਗਰੁਚਿਤ੍ਤਂ ਕਰੋਮਹਂ.

੩੯੬. ‘‘ਅਪਰਿਮੇਯ੍ਯੇ ਇਤੋ ਕਪ੍ਪੇ, ਯਂ ਕਮ੍ਮਮਭਿਨੀਹਰਿਂ;

ਤਾਹਂ ਭੂਮਿਮਨੁਪ੍ਪਤ੍ਤੋ, ਪਤ੍ਤੋਮ੍ਹਿ ਆਸਵਕ੍ਖਯਂ.

੩੯੭. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸਾਪਦਾਨਂ ਦੁਤਿਯਂ.