੩-੩. ਮਹਾਕਸ੍ਸਪਤ੍ਥੇਰਅਪਦਾਨਂ

੩੯੮. ‘‘ਪਦੁਮੁਤ੍ਤਰਸ੍ਸ ਭਗਵਤੋ, ਲੋਕਜੇਟ੍ਠਸ੍ਸ ਤਾਦਿਨੋ;

ਨਿਬ੍ਬੁਤੇ ਲੋਕਨਾਥਮ੍ਹਿ, ਪੂਜਂ ਕੁਬ੍ਬਨ੍ਤਿ ਸਤ੍ਥੁਨੋ.

੩੯੯. ‘‘ਉਦਗ੍ਗਚਿਤ੍ਤਾ ਜਨਤਾ, ਆਮੋਦਿਤਪਮੋਦਿਤਾ;

ਤੇਸੁ ਸਂਵੇਗਜਾਤੇਸੁ, ਪੀਤਿ ਮੇ ਉਦਪਜ੍ਜਥ.

੪੦੦. ‘‘ਞਾਤਿਮਿਤ੍ਤੇ ਸਮਾਨੇਤ੍ਵਾ, ਇਦਂ ਵਚਨਮਬ੍ਰਵਿਂ;

ਪਰਿਨਿਬ੍ਬੁਤੋ ਮਹਾਵੀਰੋ, ਹਨ੍ਦ ਪੂਜਂ ਕਰੋਮਸੇ.

੪੦੧. ‘‘ਸਾਧੂਤਿ ਤੇ ਪਟਿਸ੍ਸੁਤ੍ਵਾ, ਭਿਯ੍ਯੋ ਹਾਸਂ ਜਨਿਂਸੁ ਮੇ;

ਬੁਦ੍ਧਸ੍ਮਿਂ ਲੋਕਨਾਥਮ੍ਹਿ, ਕਾਹਾਮ ਪੁਞ੍ਞਸਞ੍ਚਯਂ.

੪੦੨. ‘‘ਅਗ੍ਘਿਯਂ ਸੁਕਤਂ ਕਤ੍ਵਾ, ਸਤਹਤ੍ਥਸਮੁਗ੍ਗਤਂ;

ਦਿਯਡ੍ਢਹਤ੍ਥਪਤ੍ਥਟਂ, ਵਿਮਾਨਂ ਨਭਮੁਗ੍ਗਤਂ.

੪੦੩. ‘‘ਕਤ੍ਵਾਨ ਹਮ੍ਮਿਯਂ ਤਤ੍ਥ, ਤਾਲਪਨ੍ਤੀਹਿ ਚਿਤ੍ਤਿਤਂ;

ਸਕਂ ਚਿਤ੍ਤਂ ਪਸਾਦੇਤ੍ਵਾ, ਚੇਤਿਯਂ ਪੂਜਯੁਤ੍ਤਮਂ.

੪੦੪. ‘‘ਅਗ੍ਗਿਕ੍ਖਨ੍ਧੋਵ ਜਲਿਤੋ, ਕਿਂਸੁਕੋ ਇਵ [ਸਾਲਰਾਜਾਵ (ਸੀ.)] ਫੁਲ੍ਲਿਤੋ;

ਇਨ੍ਦਲਟ੍ਠੀਵ ਆਕਾਸੇ, ਓਭਾਸੇਤਿ ਚਤੁਦ੍ਦਿਸਾ.

੪੦੫. ‘‘ਤਤ੍ਥ ਚਿਤ੍ਤਂ ਪਸਾਦੇਤ੍ਵਾ, ਕਤ੍ਵਾਨ ਕੁਸਲਂ ਬਹੁਂ;

ਪੁਬ੍ਬਕਮ੍ਮਂ ਸਰਿਤ੍ਵਾਨ, ਤਿਦਸਂ ਉਪਪਜ੍ਜਹਂ.

੪੦੬. ‘‘ਸਹਸ੍ਸਯੁਤ੍ਤਂ ਹਯਵਾਹਿਂ, ਦਿਬ੍ਬਯਾਨਮਧਿਟ੍ਠਿਤੋ;

ਉਬ੍ਬਿਦ੍ਧਂ ਭਵਨਂ ਮਯ੍ਹਂ, ਸਤ੍ਤਭੂਮਂ ਸਮੁਗ੍ਗਤਂ.

੪੦੭. ‘‘ਕੂਟਾਗਾਰਸਹਸ੍ਸਾਨਿ, ਸਬ੍ਬਸੋਣ੍ਣਮਯਾ ਅਹੁਂ;

ਜਲਨ੍ਤਿ ਸਕਤੇਜੇਨ, ਦਿਸਾ ਸਬ੍ਬਾ ਪਭਾਸਯਂ.

੪੦੮. ‘‘ਸਨ੍ਤਿ ਅਞ੍ਞੇਪਿ ਨਿਯ੍ਯੂਹਾ, ਲੋਹਿਤਙ੍ਗਮਯਾ ਤਦਾ;

ਤੇਪਿ ਜੋਤਨ੍ਤਿ ਆਭਾਯ, ਸਮਨ੍ਤਾ ਚਤੁਰੋ ਦਿਸਾ.

੪੦੯. ‘‘ਪੁਞ੍ਞਕਮ੍ਮਾਭਿਨਿਬ੍ਬਤ੍ਤਾ, ਕੂਟਾਗਾਰਾ ਸੁਨਿਮ੍ਮਿਤਾ;

ਮਣਿਮਯਾਪਿ ਜੋਤਨ੍ਤਿ, ਦਿਸਾ ਦਸ [ਦਿਸੋਦਿਸਂ (ਸ੍ਯਾ.)] ਸਮਨ੍ਤਤੋ.

੪੧੦. ‘‘ਤੇਸਂ ਉਜ੍ਜੋਤਮਾਨਾਨਂ, ਓਭਾਸੋ ਵਿਪੁਲੋ ਅਹੁ;

ਸਬ੍ਬੇ ਦੇਵੇ ਅਭਿਭੋਮਿ, ਪੁਞ੍ਞਕਮ੍ਮਸ੍ਸਿਦਂ ਫਲਂ.

੪੧੧. ‘‘ਸਟ੍ਠਿਕਪ੍ਪਸਹਸ੍ਸਮ੍ਹਿ, ਉਬ੍ਬਿਦ੍ਧੋ ਨਾਮ ਖਤ੍ਤਿਯੋ;

ਚਾਤੁਰਨ੍ਤੋ ਵਿਜਿਤਾਵੀ, ਪਥਵਿਂ ਆਵਸਿਂ ਅਹਂ.

੪੧੨. ‘‘ਤਥੇਵ ਭਦ੍ਦਕੇ ਕਪ੍ਪੇ, ਤਿਂਸਕ੍ਖਤ੍ਤੁਂ ਅਹੋਸਹਂ;

ਸਕਕਮ੍ਮਾਭਿਰਦ੍ਧੋਮ੍ਹਿ, ਚਕ੍ਕਵਤ੍ਤੀ ਮਹਬ੍ਬਲੋ.

੪੧੩. ‘‘ਸਤ੍ਤਰਤਨਸਮ੍ਪਨ੍ਨੋ, ਚਤੁਦੀਪਮ੍ਹਿ ਇਸ੍ਸਰੋ;

ਤਤ੍ਥਾਪਿ ਭਵਨਂ ਮਯ੍ਹਂ, ਇਨ੍ਦਲਟ੍ਠੀਵ ਉਗ੍ਗਤਂ.

੪੧੪. ‘‘ਆਯਾਮਤੋ ਚਤੁਬ੍ਬੀਸਂ, ਵਿਤ੍ਥਾਰੇਨ ਚ ਦ੍ਵਾਦਸ;

ਰਮ੍ਮਣਂ [ਰਮ੍ਮਕਂ (ਸੀ. ਸ੍ਯਾ.)] ਨਾਮ ਨਗਰਂ, ਦਲ਼੍ਹਪਾਕਾਰਤੋਰਣਂ.

੪੧੫. ‘‘ਆਯਾਮਤੋ ਪਞ੍ਚਸਤਂ, ਵਿਤ੍ਥਾਰੇਨ ਤਦਡ੍ਢਕਂ;

ਆਕਿਣ੍ਣਂ ਜਨਕਾਯੇਹਿ, ਤਿਦਸਾਨਂ ਪੁਰਂ ਵਿਯ.

੪੧੬. ‘‘ਯਥਾ ਸੂਚਿਘਰੇ ਸੂਚੀ, ਪਕ੍ਖਿਤ੍ਤਾ ਪਣ੍ਣਵੀਸਤਿ;

ਅਞ੍ਞਮਞ੍ਞਂ ਪਘਟ੍ਟੇਨ੍ਤਿ, ਆਕਿਣ੍ਣਂ ਹੋਤਿ ਲਙ੍ਕਤਂ [ਤਂ ਤਦਾ (ਸੀ.), ਸਤਤਾ (ਸ੍ਯਾ.), ਸਙ੍ਕਰਂ (?)].

੪੧੭. ‘‘ਏਵਮ੍ਪਿ ਨਗਰਂ ਮਯ੍ਹਂ, ਹਤ੍ਥਿਸ੍ਸਰਥਸਂਕੁਲਂ;

ਮਨੁਸ੍ਸੇਹਿ ਸਦਾਕਿਣ੍ਣਂ, ਰਮ੍ਮਣਂ ਨਗਰੁਤ੍ਤਮਂ.

੪੧੮. ‘‘ਤਤ੍ਥ ਭੁਤ੍ਵਾ ਪਿਵਿਤ੍ਵਾ ਚ, ਪੁਨ ਦੇਵਤ੍ਤਨਂ ਗਤੋ [ਪੁਨਪਿ ਦੇਵਤਙ੍ਗਤੋ (ਕ.)].

ਭਵੇ ਪਚ੍ਛਿਮਕੇ ਮਯ੍ਹਂ, ਅਹੋਸਿ ਕੁਲਸਮ੍ਪਦਾ.

੪੧੯. ‘‘ਬ੍ਰਾਹ੍ਮਞ੍ਞਕੁਲਸਮ੍ਭੂਤੋ, ਮਹਾਰਤਨਸਞ੍ਚਯੋ;

ਅਸੀਤਿਕੋਟਿਯੋ ਹਿਤ੍ਵਾ, ਹਿਰਞ੍ਞਸ੍ਸਾਪਿ ਪਬ੍ਬਜਿਂ.

੪੨੦. ‘‘ਪਟਿਸਮ੍ਭਿਦਾ ਚਤਸ੍ਸੋ, ਵਿਮੋਕ੍ਖਾਪਿ ਚ ਅਟ੍ਠਿਮੇ;

ਛਲ਼ਭਿਞ੍ਞਾ ਸਚ੍ਛਿਕਤਾ, ਕਤਂ ਬੁਦ੍ਧਸ੍ਸ ਸਾਸਨਂ’’.

ਇਤ੍ਥਂ ਸੁਦਂ ਆਯਸ੍ਮਾ ਮਹਾਕਸ੍ਸਪੋ ਥੇਰੋ ਇਮਾ ਗਾਥਾਯੋ ਅਭਾਸਿਤ੍ਥਾਤਿ.

ਮਹਾਕਸ੍ਸਪਤ੍ਥੇਰਸ੍ਸਾਪਦਾਨਂ ਤਤਿਯਂ.