੩-੧. ਸਾਰਿਪੁਤ੍ਤਤ੍ਥੇਰਅਪਦਾਨਂ

ਅਥ ਥੇਰਾਪਦਾਨਂ ਸੁਣਾਥ –

੧੪੧. ‘‘ਹਿਮਵਨ੍ਤਸ੍ਸ ਅਵਿਦੂਰੇ, ਲਮ੍ਬਕੋ ਨਾਮ ਪਬ੍ਬਤੋ;

ਅਸ੍ਸਮੋ ਸੁਕਤੋ ਮਯ੍ਹਂ, ਪਣ੍ਣਸਾਲਾ ਸੁਮਾਪਿਤਾ.

੧੪੨. ‘‘ਉਤ੍ਤਾਨਕੂਲਾ ਨਦਿਕਾ, ਸੁਪਤਿਤ੍ਥਾ ਮਨੋਰਮਾ;

ਸੁਸੁਦ੍ਧਪੁਲ਼ਿਨਾਕਿਣ੍ਣਾ, ਅਵਿਦੂਰੇ ਮਮਸ੍ਸਮਂ.

੧੪੩. ‘‘ਅਸਕ੍ਖਰਾ ਅਪਬ੍ਭਾਰਾ, ਸਾਦੁ ਅਪ੍ਪਟਿਗਨ੍ਧਿਕਾ;

ਸਨ੍ਦਤੀ ਨਦਿਕਾ ਤਤ੍ਥ, ਸੋਭਯਨ੍ਤਾ ਮਮਸ੍ਸਮਂ.

੧੪੪. ‘‘ਕੁਮ੍ਭੀਲਾ ਮਕਰਾ ਚੇਤ੍ਥ, ਸੁਸੁਮਾਰਾ [ਸੁਂਸੁਮਾਰਾ (ਸੀ. ਸ੍ਯਾ. )] ਚ ਕਚ੍ਛਪਾ;

ਚਰਨ੍ਤਿ ਨਦਿਯਾ ਤਤ੍ਥ, ਸੋਭਯਨ੍ਤਾ ਮਮਸ੍ਸਮਂ.

੧੪੫. ‘‘ਪਾਠੀਨਾ ਪਾਵੁਸਾ ਮਚ੍ਛਾ, ਬਲਜਾ [ਵਜਲਾ (ਸੀ. ਸ੍ਯਾ.) ਜਲਜਾ (ਪੀ.)] ਮੁਞ੍ਜਰੋਹਿਤਾ;

ਵਗ੍ਗਲ਼ਾ [ਵਗ੍ਗੁਲਾ (ਸੀ.) ਵਗ੍ਗੁਲ਼ਾ (ਸ੍ਯਾ.) ਮਗ੍ਗੁਰਾ (ਥੇਰਗਾਥਾ)] ਪਪਤਾਯਨ੍ਤਾ, ਸੋਭਯਨ੍ਤਿ [ਪਪਤਾਯਨ੍ਤਿ, ਸੋਭਯਨ੍ਤਾ (ਕ.)] ਮਮਸ੍ਸਮਂ.

੧੪੬. ‘‘ਉਭੋ ਕੂਲੇਸੁ ਨਦਿਯਾ, ਪੁਪ੍ਫਿਨੋ ਫਲਿਨੋ ਦੁਮਾ;

ਉਭਤੋ ਅਭਿਲਮ੍ਬਨ੍ਤਾ, ਸੋਭਯਨ੍ਤਿ [ਅਭਿਲਮ੍ਬਨ੍ਤਿ ਸੋਭਯਨ੍ਤਾ (ਕ.)] ਮਮਸ੍ਸਮਂ.

੧੪੭. ‘‘ਅਮ੍ਬਾ ਸਾਲਾ ਚ ਤਿਲਕਾ, ਪਾਟਲੀ ਸਿਨ੍ਦੁਵਾਰਕਾ [ਸਿਨ੍ਦੁਵਾਰਿਕਾ (ਬਹੂਸੁ)];

ਦਿਬ੍ਬਗਨ੍ਧਾ ਸਮ੍ਪਵਨ੍ਤਿ, ਪੁਪ੍ਫਿਤਾ ਮਮ ਅਸ੍ਸਮੇ.

੧੪੮. ‘‘ਚਮ੍ਪਕਾ ਸਲ਼ਲਾ ਨੀਪਾ [ਨਿਮ੍ਬਾ (ਕ.)], ਨਾਗਪੁਨ੍ਨਾਗਕੇਤਕਾ;

ਦਿਬ੍ਬਗਨ੍ਧਾ ਸਮ੍ਪਵਨ੍ਤਿ, ਪੁਪ੍ਫਿਤਾ ਮਮ ਅਸ੍ਸਮੇ.

੧੪੯. ‘‘ਅਤਿਮੁਤ੍ਤਾ ਅਸੋਕਾ ਚ, ਭਗਿਨੀਮਾਲਾ ਚ ਪੁਪ੍ਫਿਤਾ;

ਅਙ੍ਕੋਲਾ ਬਿਮ੍ਬਿਜਾਲਾ [ਬਿਮ੍ਬਜਾਲਾ (ਕ.)] ਚ, ਪੁਪ੍ਫਿਤਾ ਮਮ ਅਸ੍ਸਮੇ.

੧੫੦. ‘‘ਕੇਤਕਾ ਕਨ੍ਦਲਿ [ਕਦਲੀ (ਸ੍ਯਾ.)] ਚੇਵ, ਗੋਧੁਕਾ ਤਿਣਸੂਲਿਕਾ;

ਦਿਬ੍ਬਗਨ੍ਧਂ ਸਮ੍ਪਵਨ੍ਤਾ, ਸੋਭਯਨ੍ਤਿ ਮਮਸ੍ਸਮਂ.

੧੫੧. ‘‘ਕਣਿਕਾਰਾ ਕਣ੍ਣਿਕਾ ਚ, ਅਸਨਾ ਅਜ੍ਜੁਨਾ ਬਹੂ;

ਦਿਬ੍ਬਗਨ੍ਧਂ ਸਮ੍ਪਵਨ੍ਤਾ, ਸੋਭਯਨ੍ਤਿ ਮਮਸ੍ਸਮਂ.

੧੫੨. ‘‘ਪੁਨ੍ਨਾਗਾ ਗਿਰਿਪੁਨ੍ਨਾਗਾ, ਕੋਵਿਲ਼ਾਰਾ ਚ ਪੁਪ੍ਫਿਤਾ;

ਦਿਬ੍ਬਗਨ੍ਧਂ ਸਮ੍ਪਵਨ੍ਤਾ, ਸੋਭਯਨ੍ਤਿ ਮਮਸ੍ਸਮਂ.

੧੫੩. ‘‘ਉਦ੍ਧਾਲਕਾ ਚ ਕੁਟਜਾ, ਕਦਮ੍ਬਾ ਵਕੁਲਾ ਬਹੂ;

ਦਿਬ੍ਬਗਨ੍ਧਂ ਸਮ੍ਪਵਨ੍ਤਾ, ਸੋਭਯਨ੍ਤਿ ਮਮਸ੍ਸਮਂ.

੧੫੪. ‘‘ਆਲ਼ਕਾ ਇਸਿਮੁਗ੍ਗਾ ਚ, ਕਦਲਿਮਾਤੁਲੁਙ੍ਗਿਯੋ;

ਗਨ੍ਧੋਦਕੇਨ ਸਂਵਡ੍ਢਾ, ਫਲਾਨਿ ਧਾਰਯਨ੍ਤਿ ਤੇ.

੧੫੫. ‘‘ਅਞ੍ਞੇ ਪੁਪ੍ਫਨ੍ਤਿ ਪਦੁਮਾ, ਅਞ੍ਞੇ ਜਾਯਨ੍ਤਿ ਕੇਸਰੀ;

ਅਞ੍ਞੇ ਓਪੁਪ੍ਫਾ ਪਦੁਮਾ, ਪੁਪ੍ਫਿਤਾ ਤਲ਼ਾਕੇ ਤਦਾ.

੧੫੬. ‘‘ਗਬ੍ਭਂ ਗਣ੍ਹਨ੍ਤਿ ਪਦੁਮਾ, ਨਿਦ੍ਧਾਵਨ੍ਤਿ ਮੁਲਾਲ਼ਿਯੋ;

ਸਿਂਘਾਟਿਪਤ੍ਤਮਾਕਿਣ੍ਣਾ, ਸੋਭਨ੍ਤਿ ਤਲ਼ਾਕੇ ਤਦਾ.

੧੫੭. ‘‘ਨਯਿਤਾ ਅਮ੍ਬਗਨ੍ਧੀ ਚ, ਉਤ੍ਤਲੀ ਬਨ੍ਧੁਜੀਵਕਾ;

ਦਿਬ੍ਬਗਨ੍ਧਾ ਸਮ੍ਪਵਨ੍ਤਿ, ਪੁਪ੍ਫਿਤਾ ਤਲ਼ਾਕੇ ਤਦਾ.

੧੫੮. ‘‘ਪਾਠੀਨਾ ਪਾਵੁਸਾ ਮਚ੍ਛਾ, ਬਲਜਾ ਮੁਞ੍ਜਰੋਹਿਤਾ;

ਸਂਗੁਲਾ ਮਗ੍ਗੁਰਾ [ਮਙ੍ਗੁਰਾ (ਸੀ. ਕ.)] ਚੇਵ, ਵਸਨ੍ਤਿ ਤਲ਼ਾਕੇ ਤਦਾ.

੧੫੯. ‘‘ਕੁਮ੍ਭੀਲਾ ਸੁਸੁਮਾਰਾ ਚ, ਤਨ੍ਤਿਗਾਹਾ ਚ ਰਕ੍ਖਸਾ;

ਓਗੁਹਾ [ਓਗਾਹਾ (ਸ੍ਯਾ.)] ਅਜਗਰਾ ਚ, ਵਸਨ੍ਤਿ ਤਲ਼ਾਕੇ ਤਦਾ.

੧੬੦. ‘‘ਪਾਰੇਵਤਾ ਰਵਿਹਂਸਾ, ਚਕ੍ਕਵਾਕਾ ਨਦੀਚਰਾ;

ਕੋਕਿਲਾ ਸੁਕਸਾਲ਼ਿਕਾ, ਉਪਜੀਵਨ੍ਤਿ ਤਂ ਸਰਂ.

੧੬੧. ‘‘ਕੁਕ੍ਕੁਤ੍ਥਕਾ ਕੁਲ਼ੀਰਕਾ, ਵਨੇ ਪੋਕ੍ਖਰਸਾਤਕਾ;

ਦਿਨ੍ਦਿਭਾ ਸੁਵਪੋਤਾ ਚ, ਉਪਜੀਵਨ੍ਤਿ ਤਂ ਸਰਂ.

੧੬੨. ‘‘ਹਂਸਾ ਕੋਞ੍ਚਾ ਮਯੂਰਾ ਚ, ਕੋਕਿਲਾ ਤਮ੍ਬਚੂਲ਼ਕਾ [ਤਮ੍ਬਚੂਲ਼ਿਕਾ (ਸੀ.)];

ਪਮ੍ਪਕਾ ਜੀਵਂਜੀਵਾ ਚ, ਉਪਜੀਵਨ੍ਤਿ ਤਂ ਸਰਂ.

੧੬੩. ‘‘ਕੋਸਿਕਾ ਪੋਟ੍ਠਸੀਸਾ ਚ, ਕੁਰਰਾ ਸੇਨਕਾ ਬਹੂ;

ਮਹਾਕਾਲ਼ਾ ਚ ਸਕੁਣਾ, ਉਪਜੀਵਨ੍ਤਿ ਤਂ ਸਰਂ.

੧੬੪. ‘‘ਪਸਦਾ ਚ ਵਰਾਹਾ ਚ, ਚਮਰਾ ਗਣ੍ਡਕਾ ਬਹੂ [ਵਕਾ ਭੇਰਣ੍ਡਕਾ ਬਹੂ (ਸੀ. ਸ੍ਯਾ.)];

ਰੋਹਿਚ੍ਚਾ ਸੁਕਪੋਤਾ [ਸੁਤ੍ਤਪੋਤਾ (ਸ੍ਯਾ.)] ਚ, ਉਪਜੀਵਨ੍ਤਿ ਤਂ ਸਰਂ.

੧੬੫. ‘‘ਸੀਹਬ੍ਯਗ੍ਘਾ ਚ ਦੀਪੀ ਚ, ਅਚ੍ਛਕੋਕਤਰਚ੍ਛਕਾ;

ਤਿਧਾ ਪਭਿਨ੍ਨਮਾਤਙ੍ਗਾ, ਉਪਜੀਵਨ੍ਤਿ ਤਂ ਸਰਂ.

੧੬੬. ‘‘ਕਿਨ੍ਨਰਾ ਵਾਨਰਾ ਚੇਵ, ਅਥੋਪਿ ਵਨਕਮ੍ਮਿਕਾ;

ਚੇਤਾ ਚ ਲੁਦ੍ਦਕਾ ਚੇਵ, ਉਪਜੀਵਨ੍ਤਿ ਤਂ ਸਰਂ.

੧੬੭. ‘‘ਤਿਨ੍ਦੁਕਾਨਿ ਪਿਯਾਲਾਨਿ, ਮਧੁਕਾ ਕਾਸੁਮਾਰਯੋ [ਕਾਸਮਾਰਿਯੋ (ਸ੍ਯਾ.)];

ਧੁਵਂ ਫਲਾਨਿ ਧਾਰੇਨ੍ਤਿ, ਅਵਿਦੂਰੇ ਮਮਸ੍ਸਮਂ.

੧੬੮. ‘‘ਕੋਸਮ੍ਬਾ [ਕੋਸੁਮ੍ਭਾ (ਸੀ. ਸ੍ਯਾ.)] ਸਲ਼ਲਾ ਨਿਮ੍ਬਾ [ਸਲ਼ਲਾ ਨੀਪਾ (ਸੀ. ਸ੍ਯਾ.) ਪਨਸਾ ਅਮ੍ਬਾ (?)], ਸਾਦੁਫਲਸਮਾਯੁਤਾ;

ਧੁਵਂ ਫਲਾਨਿ ਧਾਰੇਨ੍ਤਿ, ਅਵਿਦੂਰੇ ਮਮਸ੍ਸਮਂ.

੧੬੯. ‘‘ਹਰੀਤਕਾ ਆਮਲਕਾ, ਅਮ੍ਬਜਮ੍ਬੁਵਿਭੀਤਕਾ;

ਕੋਲਾ ਭਲ੍ਲਾਤਕਾ ਬਿਲ੍ਲਾ, ਫਲਾਨਿ ਧਾਰਯਨ੍ਤਿ ਤੇ.

੧੭੦. ‘‘ਆਲੁਵਾ ਚ ਕਲ਼ਮ੍ਬਾ ਚ, ਬਿਲ਼ਾਲੀਤਕ੍ਕਲ਼ਾਨਿ ਚ;

ਜੀਵਕਾ ਸੁਤਕਾ ਚੇਵ, ਬਹੁਕਾ ਮਮ ਅਸ੍ਸਮੇ.

੧੭੧. ‘‘ਅਸ੍ਸਮਸ੍ਸਾਵਿਦੂਰਮ੍ਹਿ, ਤਲ਼ਾਕਾਸੁਂ ਸੁਨਿਮ੍ਮਿਤਾ;

ਅਚ੍ਛੋਦਕਾ ਸੀਤਜਲਾ, ਸੁਪਤਿਤ੍ਥਾ ਮਨੋਰਮਾ.

੧੭੨. ‘‘ਪਦੁਮੁਪ੍ਪਲਸਞ੍ਛਨ੍ਨਾ, ਪੁਣ੍ਡਰੀਕਸਮਾਯੁਤਾ;

ਮਨ੍ਦਾਲਕੇਹਿ ਸਞ੍ਛਨ੍ਨਾ, ਦਿਬ੍ਬਗਨ੍ਧੋ ਪਵਾਯਤਿ.

੧੭੩. ‘‘ਏਵਂ ਸਬ੍ਬਙ੍ਗਸਮ੍ਪਨ੍ਨੇ, ਪੁਪ੍ਫਿਤੇ ਫਲਿਤੇ ਵਨੇ;

ਸੁਕਤੇ ਅਸ੍ਸਮੇ ਰਮ੍ਮੇ, ਵਿਹਰਾਮਿ ਅਹਂ ਤਦਾ.

੧੭੪. ‘‘ਸੀਲਵਾ ਵਤਸਮ੍ਪਨ੍ਨੋ [ਵਤ੍ਤਸਮ੍ਪਨ੍ਨੋ (ਸ੍ਯਾ.)], ਝਾਯੀ ਝਾਨਰਤੋ ਸਦਾ;

ਪਞ੍ਚਾਭਿਞ੍ਞਾਬਲਪ੍ਪਤ੍ਤੋ, ਸੁਰੁਚਿ ਨਾਮ ਤਾਪਸੋ.

੧੭੫. ‘‘ਚਤੁਵੀਸਸਹਸ੍ਸਾਨਿ, ਸਿਸ੍ਸਾ ਮਯ੍ਹਂ ਉਪਟ੍ਠਹੁ;

ਸਬ੍ਬੇਵ ਬ੍ਰਾਹ੍ਮਣਾ ਏਤੇ, ਜਾਤਿਮਨ੍ਤੋ ਯਸਸ੍ਸਿਨੋ.

੧੭੬. ‘‘ਲਕ੍ਖਣੇ ਇਤਿਹਾਸੇ ਚ, ਸਨਿਘਣ੍ਟੁਸਕੇਟੁਭੇ;

ਪਦਕਾ ਵੇਯ੍ਯਾਕਰਣਾ, ਸਧਮ੍ਮੇ ਪਾਰਮਿਂ ਗਤਾ.

੧੭੭. ‘‘ਉਪ੍ਪਾਤੇਸੁ ਨਿਮਿਤ੍ਤੇਸੁ, ਲਕ੍ਖਣੇਸੁ ਚ ਕੋਵਿਦਾ;

ਪਥਬ੍ਯਾ ਭੂਮਨ੍ਤਲਿਕ੍ਖੇ, ਮਮ ਸਿਸ੍ਸਾ ਸੁਸਿਕ੍ਖਿਤਾ.

੧੭੮. ‘‘ਅਪ੍ਪਿਚ੍ਛਾ ਨਿਪਕਾ ਏਤੇ, ਅਪ੍ਪਾਹਾਰਾ ਅਲੋਲੁਪਾ;

ਲਾਭਾਲਾਭੇਨ ਸਨ੍ਤੁਟ੍ਠਾ, ਪਰਿਵਾਰੇਨ੍ਤਿ ਮਂ ਸਦਾ.

੧੭੯. ‘‘ਝਾਯੀ ਝਾਨਰਤਾ ਧੀਰਾ, ਸਨ੍ਤਚਿਤ੍ਤਾ ਸਮਾਹਿਤਾ;

ਆਕਿਞ੍ਚਞ੍ਞਂ ਪਤ੍ਥਯਨ੍ਤਾ, ਪਰਿਵਾਰੇਨ੍ਤਿ ਮਂ ਸਦਾ.

੧੮੦. ‘‘ਅਭਿਞ੍ਞਾਪਾਰਮਿਪ੍ਪਤ੍ਤਾ, ਪੇਤ੍ਤਿਕੇ ਗੋਚਰੇ ਰਤਾ;

ਅਨ੍ਤਲਿਕ੍ਖਚਰਾ ਧੀਰਾ, ਪਰਿਵਾਰੇਨ੍ਤਿ ਮਂ ਸਦਾ.

੧੮੧. ‘‘ਸਂਵੁਤਾ ਛਸੁ ਦ੍ਵਾਰੇਸੁ, ਅਨੇਜਾ ਰਕ੍ਖਿਤਿਨ੍ਦ੍ਰਿਯਾ;

ਅਸਂਸਟ੍ਠਾ ਚ ਤੇ ਧੀਰਾ, ਮਮ ਸਿਸ੍ਸਾ ਦੁਰਾਸਦਾ.

੧੮੨. ‘‘ਪਲ੍ਲਙ੍ਕੇਨ ਨਿਸਜ੍ਜਾਯ, ਠਾਨਚਙ੍ਕਮਨੇਨ ਚ;

ਵੀਤਿਨਾਮੇਨ੍ਤਿ ਤੇ ਰਤ੍ਤਿਂ, ਮਮ ਸਿਸ੍ਸਾ ਦੁਰਾਸਦਾ.

੧੮੩. ‘‘ਰਜਨੀਯੇ ਨ ਰਜ੍ਜਨ੍ਤਿ, ਦੁਸ੍ਸਨੀਯੇ ਨ ਦੁਸ੍ਸਰੇ;

ਮੋਹਨੀਯੇ ਨ ਮੁਯ੍ਹਨ੍ਤਿ, ਮਮ ਸਿਸ੍ਸਾ ਦੁਰਾਸਦਾ.

੧੮੪. ‘‘ਇਦ੍ਧਿਂ ਵੀਮਂਸਮਾਨਾ ਤੇ, ਵਤ੍ਤਨ੍ਤਿ ਨਿਚ੍ਚਕਾਲਿਕਂ;

ਪਥਵਿਂ [ਪਠਵਿਂ (ਸੀ. ਸ੍ਯਾ.)] ਤੇ ਪਕਮ੍ਪੇਨ੍ਤਿ, ਸਾਰਮ੍ਭੇਨ ਦੁਰਾਸਦਾ.

੧੮੫. ‘‘ਕੀਲ਼ਮਾਨਾ ਚ ਤੇ ਸਿਸ੍ਸਾ, ਕੀਲ਼ਨ੍ਤਿ ਝਾਨਕੀਲ਼ਿਤਂ;

ਜਮ੍ਬੁਤੋ ਫਲਮਾਨੇਨ੍ਤਿ, ਮਮ ਸਿਸ੍ਸਾ ਦੁਰਾਸਦਾ.

੧੮੬. ‘‘ਅਞ੍ਞੇ ਗਚ੍ਛਨ੍ਤਿ ਗੋਯਾਨਂ, ਅਞ੍ਞੇ ਪੁਬ੍ਬਵਿਦੇਹਕਂ [ਪੁਬ੍ਬਵਿਦੇਹਨਂ (ਸ੍ਯਾ. ਕ.)];

ਅਞ੍ਞੇ ਚ ਉਤ੍ਤਰਕੁਰੁਂ, ਏਸਨਾਯ ਦੁਰਾਸਦਾ.

੧੮੭. ‘‘ਪੁਰਤੋ ਪੇਸੇਨ੍ਤਿ ਖਾਰਿਂ, ਪਚ੍ਛਤੋ ਚ ਵਜਨ੍ਤਿ ਤੇ;

ਚਤੁਵੀਸਸਹਸ੍ਸੇਹਿ, ਛਾਦਿਤਂ ਹੋਤਿ ਅਮ੍ਬਰਂ.

੧੮੮. ‘‘ਅਗ੍ਗਿਪਾਕੀ ਅਨਗ੍ਗੀ ਚ, ਦਨ੍ਤੋਦੁਕ੍ਖਲਿਕਾਪਿ ਚ;

ਅਸ੍ਮੇਨ ਕੋਟ੍ਟਿਤਾ ਕੇਚਿ, ਪਵਤ੍ਤਫਲਭੋਜਨਾ.

੧੮੯. ‘‘ਉਦਕੋਰੋਹਣਾ ਕੇਚਿ, ਸਾਯਂ ਪਾਤੋ ਸੁਚੀਰਤਾ;

ਤੋਯਾਭਿਸੇਚਨਕਰਾ, ਮਮ ਸਿਸ੍ਸਾ ਦੁਰਾਸਦਾ.

੧੯੦. ‘‘ਪਰੂਲ਼੍ਹਕਚ੍ਛਨਖਲੋਮਾ, ਪਙ੍ਕਦਨ੍ਤਾ ਰਜਸ੍ਸਿਰਾ;

ਗਨ੍ਧਿਤਾ ਸੀਲਗਨ੍ਧੇਨ, ਮਮ ਸਿਸ੍ਸਾ ਦੁਰਾਸਦਾ.

੧੯੧. ‘‘ਪਾਤੋਵ ਸਨ੍ਨਿਪਤਿਤ੍ਵਾ, ਜਟਿਲਾ ਉਗ੍ਗਤਾਪਨਾ;

ਲਾਭਾਲਾਭਂ ਪਕਿਤ੍ਤੇਤ੍ਵਾ, ਗਚ੍ਛਨ੍ਤਿ ਅਮ੍ਬਰੇ ਤਦਾ.

੧੯੨. ‘‘ਏਤੇਸਂ ਪਕ੍ਕਮਨ੍ਤਾਨਂ, ਮਹਾਸਦ੍ਦੋ ਪਵਤ੍ਤਤਿ;

ਅਜਿਨਚਮ੍ਮਸਦ੍ਦੇਨ, ਮੁਦਿਤਾ ਹੋਨ੍ਤਿ ਦੇਵਤਾ.

੧੯੩. ‘‘ਦਿਸੋਦਿਸਂ ਪਕ੍ਕਮਨ੍ਤਿ, ਅਨ੍ਤਲਿਕ੍ਖਚਰਾ ਇਸੀ;

ਸਕੇ ਬਲੇਨੁਪਤ੍ਥਦ੍ਧਾ, ਤੇ ਗਚ੍ਛਨ੍ਤਿ ਯਦਿਚ੍ਛਕਂ.

੧੯੪. ‘‘ਪਥਵੀਕਮ੍ਪਕਾ ਏਤੇ, ਸਬ੍ਬੇਵ ਨਭਚਾਰਿਨੋ;

ਉਗ੍ਗਤੇਜਾ ਦੁਪ੍ਪਸਹਾ, ਸਾਗਰੋਵ ਅਖੋਭਿਯਾ.

੧੯੫. ‘‘ਠਾਨਚਙ੍ਕਮਿਨੋ ਕੇਚਿ, ਕੇਚਿ ਨੇਸਜ੍ਜਿਕਾ ਇਸੀ;

ਪਵਤ੍ਤਭੋਜਨਾ ਕੇਚਿ, ਮਮ ਸਿਸ੍ਸਾ ਦੁਰਾਸਦਾ.

੧੯੬. ‘‘ਮੇਤ੍ਤਾਵਿਹਾਰਿਨੋ ਏਤੇ, ਹਿਤੇਸੀ ਸਬ੍ਬਪਾਣਿਨਂ;

ਅਨਤ੍ਤੁਕ੍ਕਂਸਕਾ ਸਬ੍ਬੇ, ਨ ਤੇ ਵਮ੍ਭੇਨ੍ਤਿ ਕਸ੍ਸਚਿ.

੧੯੭. ‘‘ਸੀਹਰਾਜਾਵਸਮ੍ਭੀਤਾ, ਗਜਰਾਜਾਵ ਥਾਮਵਾ;

ਦੁਰਾਸਦਾ ਬ੍ਯਗ੍ਘਾਰਿਵ, ਆਗਚ੍ਛਨ੍ਤਿ ਮਮਨ੍ਤਿਕੇ.

੧੯੮. ‘‘ਵਿਜ੍ਜਾਧਰਾ ਦੇਵਤਾ ਚ, ਨਾਗਗਨ੍ਧਬ੍ਬਰਕ੍ਖਸਾ;

ਕੁਮ੍ਭਣ੍ਡਾ ਦਾਨਵਾ ਗਰੁਲ਼ਾ, ਉਪਜੀਵਨ੍ਤਿ ਤਂ ਸਰਂ.

੧੯੯. ‘‘ਤੇ ਜਟਾਖਾਰਿਭਰਿਤਾ, ਅਜਿਨੁਤ੍ਤਰਵਾਸਨਾ;

ਅਨ੍ਤਲਿਕ੍ਖਚਰਾ ਸਬ੍ਬੇ, ਉਪਜੀਵਨ੍ਤਿ ਤਂ ਸਰਂ.

੨੦੦. ‘‘ਸਦਾਨੁਚ੍ਛਵਿਕਾ [ਤਦਾਨੁਚ੍ਛਵਿਕਾ (ਸ੍ਯਾ. ਕ.)] ਏਤੇ, ਅਞ੍ਞਮਞ੍ਞਂ ਸਗਾਰਵਾ;

ਚਤੁਬ੍ਬੀਸਸਹਸ੍ਸਾਨਂ, ਖਿਪਿਤਸਦ੍ਦੋ ਨ ਵਿਜ੍ਜਤਿ.

੨੦੧. ‘‘ਪਾਦੇ ਪਾਦਂ ਨਿਕ੍ਖਿਪਨ੍ਤਾ, ਅਪ੍ਪਸਦ੍ਦਾ ਸੁਸਂਵੁਤਾ;

ਉਪਸਙ੍ਕਮ੍ਮ ਸਬ੍ਬੇਵ [ਸਬ੍ਬੇ ਤੇ (ਸ੍ਯਾ.)], ਸਿਰਸਾ ਵਨ੍ਦਰੇ ਮਮਂ.

੨੦੨. ‘‘ਤੇਹਿ ਸਿਸ੍ਸੇਹਿ ਪਰਿਵੁਤੋ, ਸਨ੍ਤੇਹਿ ਚ ਤਪਸ੍ਸਿਭਿ;

ਵਸਾਮਿ ਅਸ੍ਸਮੇ ਤਤ੍ਥ, ਝਾਯੀ ਝਾਨਰਤੋ ਅਹਂ.

੨੦੩. ‘‘ਇਸੀਨਂ ਸੀਲਗਨ੍ਧੇਨ, ਪੁਪ੍ਫਗਨ੍ਧੇਨ ਚੂਭਯਂ;

ਫਲੀਨਂ ਫਲਗਨ੍ਧੇਨ, ਗਨ੍ਧਿਤੋ ਹੋਤਿ ਅਸ੍ਸਮੋ.

੨੦੪. ‘‘ਰਤ੍ਤਿਨ੍ਦਿਵਂ ਨ ਜਾਨਾਮਿ, ਅਰਤਿ ਮੇ ਨ ਵਿਜ੍ਜਤਿ;

ਸਕੇ ਸਿਸ੍ਸੇ ਓਵਦਨ੍ਤੋ, ਭਿਯ੍ਯੋ ਹਾਸਂ ਲਭਾਮਹਂ.

੨੦੫. ‘‘ਪੁਪ੍ਫਾਨਂ ਪੁਪ੍ਫਮਾਨਾਨਂ, ਫਲਾਨਞ੍ਚ ਵਿਪਚ੍ਚਤਂ;

ਦਿਬ੍ਬਗਨ੍ਧਾ ਪਵਾਯਨ੍ਤਿ, ਸੋਭਯਨ੍ਤਾ ਮਮਸ੍ਸਮਂ.

੨੦੬. ‘‘ਸਮਾਧਿਮ੍ਹਾ ਵੁਟ੍ਠਹਿਤ੍ਵਾ, ਆਤਾਪੀ ਨਿਪਕੋ ਅਹਂ;

ਖਾਰਿਭਾਰਂ ਗਹੇਤ੍ਵਾਨ, ਵਨਂ ਅਜ੍ਝੋਗਹਿਂ ਅਹਂ.

੨੦੭. ‘‘ਉਪ੍ਪਾਤੇ ਸੁਪਿਨੇ ਚਾਪਿ, ਲਕ੍ਖਣੇਸੁ ਸੁਸਿਕ੍ਖਿਤੋ;

ਪਵਤ੍ਤਮਾਨਂ [ਵਤ੍ਤਮਾਨਂ (ਕ.)] ਮਨ੍ਤਪਦਂ, ਧਾਰਯਾਮਿ ਅਹਂ ਤਦਾ.

੨੦੮. ‘‘ਅਨੋਮਦਸ੍ਸੀ ਭਗਵਾ, ਲੋਕਜੇਟ੍ਠੋ ਨਰਾਸਭੋ;

ਵਿਵੇਕਕਾਮੋ ਸਮ੍ਬੁਦ੍ਧੋ, ਹਿਮਵਨ੍ਤਮੁਪਾਗਮਿ.

੨੦੯. ‘‘ਅਜ੍ਝੋਗਾਹੇਤ੍ਵਾ ਹਿਮਵਨ੍ਤਂ, ਅਗ੍ਗੋ ਕਾਰੁਣਿਕੋ ਮੁਨਿ;

ਪਲ੍ਲਙ੍ਕਂ ਆਭੁਜਿਤ੍ਵਾਨ, ਨਿਸੀਦਿ ਪੁਰਿਸੁਤ੍ਤਮੋ.

੨੧੦. ‘‘ਤਮਦ੍ਦਸਾਹਂ ਸਮ੍ਬੁਦ੍ਧਂ, ਸਪ੍ਪਭਾਸਂ ਮਨੋਰਮਂ;

ਇਨ੍ਦੀਵਰਂਵ ਜਲਿਤਂ, ਆਦਿਤ੍ਤਂਵ ਹੁਤਾਸਨਂ.

੨੧੧. ‘‘ਜਲਨ੍ਤਂ ਦੀਪਰੁਕ੍ਖਂਵ, ਵਿਜ੍ਜੁਤਂ ਗਗਣੇ ਯਥਾ;

ਸੁਫੁਲ੍ਲਂ ਸਾਲਰਾਜਂਵ, ਅਦ੍ਦਸਂ ਲੋਕਨਾਯਕਂ.

੨੧੨. ‘‘ਅਯਂ ਨਾਗੋ ਮਹਾਵੀਰੋ, ਦੁਕ੍ਖਸ੍ਸਨ੍ਤਕਰੋ ਮੁਨਿ;

ਇਮਂ ਦਸ੍ਸਨਮਾਗਮ੍ਮ, ਸਬ੍ਬਦੁਕ੍ਖਾ ਪਮੁਚ੍ਚਰੇ.

੨੧੩. ‘‘ਦਿਸ੍ਵਾਨਾਹਂ ਦੇਵਦੇਵਂ, ਲਕ੍ਖਣਂ ਉਪਧਾਰਯਿਂ;

ਬੁਦ੍ਧੋ ਨੁ ਖੋ ਨ ਵਾ ਬੁਦ੍ਧੋ, ਹਨ੍ਦ ਪਸ੍ਸਾਮਿ ਚਕ੍ਖੁਮਂ.

੨੧੪. ‘‘ਸਹਸ੍ਸਾਰਾਨਿ ਚਕ੍ਕਾਨਿ, ਦਿਸ੍ਸਨ੍ਤਿ ਚਰਣੁਤ੍ਤਮੇ;

ਲਕ੍ਖਣਾਨਿਸ੍ਸ ਦਿਸ੍ਵਾਨ, ਨਿਟ੍ਠਂ ਗਚ੍ਛਿਂ ਤਥਾਗਤੇ.