੨. ਪਚ੍ਚੇਕਬੁਦ੍ਧਅਪਦਾਨਂ

ਅਥ ਪਚ੍ਚੇਕਬੁਦ੍ਧਾਪਦਾਨਂ ਸੁਣਾਥ –

੮੩. ‘‘ਤਥਾਗਤਂ ਜੇਤਵਨੇ ਵਸਨ੍ਤਂ, ਅਪੁਚ੍ਛਿ ਵੇਦੇਹਮੁਨੀ ਨਤਙ੍ਗੋ;

‘ਪਚ੍ਚੇਕਬੁਦ੍ਧਾ ਕਿਰ ਨਾਮ ਹੋਨ੍ਤਿ, ਭਵਨ੍ਤਿ ਤੇ ਹੇਤੁਭਿ ਕੇਹਿ ਵੀਰ’ [ਧੀਰ (ਸੀ.) ਧੀਰਾ (ਸ੍ਯਾ.)].

੮੪. ‘‘ਤਦਾਹ ਸਬ੍ਬਞ੍ਞੁਵਰੋ ਮਹੇਸੀ, ਆਨਨ੍ਦਭਦ੍ਦਂ ਮਧੁਰਸ੍ਸਰੇਨ;

‘ਯੇ ਪੁਬ੍ਬਬੁਦ੍ਧੇਸੁ [ਸਬ੍ਬਬੁਦ੍ਧੇਸੁ (ਸ੍ਯਾ. ਕ.)] ਕਤਾਧਿਕਾਰਾ, ਅਲਦ੍ਧਮੋਕ੍ਖਾ ਜਿਨਸਾਸਨੇਸੁ.

੮੫. ‘‘‘ਤੇਨੇਵ ਸਂਵੇਗਮੁਖੇਨ ਧੀਰਾ, ਵਿਨਾਪਿ ਬੁਦ੍ਧੇਹਿ ਸੁਤਿਕ੍ਖਪਞ੍ਞਾ;

ਆਰਮ੍ਮਣੇਨਾਪਿ ਪਰਿਤ੍ਤਕੇਨ, ਪਚ੍ਚੇਕਬੋਧਿਂ ਅਨੁਪਾਪੁਣਨ੍ਤਿ.

੮੬. ‘‘‘ਸਬ੍ਬਮ੍ਹਿ ਲੋਕਮ੍ਹਿ ਮਮਂ ਠਪੇਤ੍ਵਾ, ਪਚ੍ਚੇਕਬੁਦ੍ਧੇਹਿ ਸਮੋਵ ਨਤ੍ਥਿ;

ਤੇਸਂ ਇਮਂ ਵਣ੍ਣਪਦੇਸਮਤ੍ਤਂ, ਵਕ੍ਖਾਮਹਂ ਸਾਧੁ ਮਹਾਮੁਨੀਨਂ.

੮੭. ‘‘‘ਸਯਮੇਵ ਬੁਦ੍ਧਾਨਂ ਮਹਾਇਸੀਨਂ, ਸਾਧੂਨਿ ਵਾਕ੍ਯਾਨਿ ਮਧੂਵ [ਮਧੁਂਵ (ਸੀ.)] ਖੁਦ੍ਦਂ;

ਅਨੁਤ੍ਤਰਂ ਭੇਸਜਂ ਪਤ੍ਥਯਨ੍ਤਾ, ਸੁਣਾਥ ਸਬ੍ਬੇਸੁ ਪਸਨ੍ਨਚਿਤ੍ਤਾ.

੮੮. ‘‘‘ਪਚ੍ਚੇਕਬੁਦ੍ਧਾਨਂ ਸਮਾਗਤਾਨਂ, ਪਰਮ੍ਪਰਂ ਬ੍ਯਾਕਰਣਾਨਿ ਯਾਨਿ;

ਆਦੀਨਵੋ ਯਞ੍ਚ ਵਿਰਾਗਵਤ੍ਥੁਂ, ਯਥਾ ਚ ਬੋਧਿਂ ਅਨੁਪਾਪੁਣਿਂਸੁ.

੮੯. ‘‘‘ਸਰਾਗਵਤ੍ਥੂਸੁ ਵਿਰਾਗਸਞ੍ਞੀ, ਰਤ੍ਤਮ੍ਹਿ ਲੋਕਮ੍ਹਿ ਵਿਰਤ੍ਤਚਿਤ੍ਤਾ;

ਹਿਤ੍ਵਾ ਪਪਞ੍ਚੇ ਜਿਤਫਨ੍ਦਿਤਾਨਿ [ਵਿਦਿਯ ਫਨ੍ਦਿਤਾਨਿ (ਸੀ.) ਜਿਤਬਨ੍ਧਿਤਾਨਿ (ਕ.)], ਤਥੇਵ ਬੋਧਿਂ ਅਨੁਪਾਪੁਣਿਂਸੁ.

੯੦. ‘‘‘ਸਬ੍ਬੇਸੁ ਭੂਤੇਸੁ ਨਿਧਾਯ ਦਣ੍ਡਂ, ਅਵਿਹੇਠਯਂ ਅਞ੍ਞਤਰਮ੍ਪਿ ਤੇਸਂ;

ਮੇਤ੍ਤੇਨ ਚਿਤ੍ਤੇਨ ਹਿਤਾਨੁਕਮ੍ਪੀ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੯੧. ‘‘‘ਸਬ੍ਬੇਸੁ ਭੂਤੇਸੁ ਨਿਧਾਯ ਦਣ੍ਡਂ, ਅਵਿਹੇਠਯਂ ਅਞ੍ਞਤਰਮ੍ਪਿ ਤੇਸਂ;

ਨ ਪੁਤ੍ਤਮਿਚ੍ਛੇਯ੍ਯ ਕੁਤੋ ਸਹਾਯਂ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੯੨. ‘‘‘ਸਂਸਗ੍ਗਜਾਤਸ੍ਸ ਭਵਨ੍ਤਿ ਸ੍ਨੇਹਾ, ਸ੍ਨੇਹਨ੍ਵਯਂ ਦੁਕ੍ਖਮਿਦਂ ਪਹੋਤਿ;

ਆਦੀਨਵਂ ਸ੍ਨੇਹਜਂ ਪੇਕ੍ਖਮਾਨੋ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੯੩. ‘‘‘ਮਿਤ੍ਤੇ ਸੁਹਜ੍ਜੇ ਅਨੁਕਮ੍ਪਮਾਨੋ, ਹਾਪੇਤਿ ਅਤ੍ਥਂ ਪਟਿਬਦ੍ਧਚਿਤ੍ਤੋ;

ਏਤਂ ਭਯਂ ਸਨ੍ਥਵੇ ਪੇਕ੍ਖਮਾਨੋ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੯੪. ‘‘‘ਵਂਸੋ ਵਿਸਾਲੋਵ ਯਥਾ ਵਿਸਤ੍ਤੋ, ਪੁਤ੍ਤੇਸੁ ਦਾਰੇਸੁ ਚ ਯਾ ਅਪੇਕ੍ਖਾ;

ਵਂਸੇ ਕਲ਼ੀਰੋਵ ਅਸਜ੍ਜਮਾਨੋ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੯੫. ‘‘‘ਮਿਗੋ ਅਰਞ੍ਞਮ੍ਹਿ ਯਥਾ ਅਬਦ੍ਧੋ, ਯੇਨਿਚ੍ਛਕਂ ਗਚ੍ਛਤਿ ਗੋਚਰਾਯ;

ਵਿਞ੍ਞੂ ਨਰੋ ਸੇਰਿਤਂ ਪੇਕ੍ਖਮਾਨੋ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੯੬. ‘‘‘ਆਮਨ੍ਤਨਾ ਹੋਤਿ ਸਹਾਯਮਜ੍ਝੇ, ਵਾਸੇ ਚ [ਵਾਸੇ (ਸੀ. ਸ੍ਯਾ.) ਸੁਤ੍ਤਨਿਪਾਤੇਪਿ ‘‘ਚ‘‘ਕਾਰੋ ਨਤ੍ਥਿ] ਠਾਨੇ ਗਮਨੇ ਚਾਰਿਕਾਯ;

ਅਨਭਿਜ੍ਝਿਤਂ ਸੇਰਿਤਂ ਪੇਕ੍ਖਮਾਨੋ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੯੭. ‘‘‘ਖਿਡ੍ਡਾ ਰਤੀ ਹੋਤਿ ਸਹਾਯਮਜ੍ਝੇ, ਪੁਤ੍ਤੇਸੁ ਪੇਮਂ ਵਿਪੁਲਞ੍ਚ ਹੋਤਿ;

ਪਿਯਵਿਪ੍ਪਯੋਗਂ ਵਿਜਿਗੁਚ੍ਛਮਾਨੋ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੯੮. ‘‘‘ਚਾਤੁਦ੍ਦਿਸੋ ਅਪ੍ਪਟਿਘੋ ਚ ਹੋਤਿ, ਸਨ੍ਤੁਸ੍ਸਮਾਨੋ ਇਤਰੀਤਰੇਨ;

ਪਰਿਸ੍ਸਯਾਨਂ ਸਹਿਤਾ ਅਛਮ੍ਭੀ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੯੯. ‘‘‘ਦੁਸ੍ਸਙ੍ਗਹਾ ਪਬ੍ਬਜਿਤਾਪਿ ਏਕੇ, ਅਥੋ ਗਹਟ੍ਠਾ ਘਰਮਾਵਸਨ੍ਤਾ;

ਅਪ੍ਪੋਸ੍ਸੁਕ੍ਕੋ ਪਰਪੁਤ੍ਤੇਸੁ ਹੁਤ੍ਵਾ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੦੦. ‘‘‘ਓਰੋਪਯਿਤ੍ਵਾ ਗਿਹਿਬ੍ਯਞ੍ਜਨਾਨਿ, ਸਞ੍ਛਿਨ੍ਨਪਤ੍ਤੋ ਯਥਾ ਕੋਵਿਲ਼ਾਰੋ;

ਛੇਤ੍ਵਾਨ ਵੀਰੋ ਗਿਹਿਬਨ੍ਧਨਾਨਿ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੦੧. ‘‘‘ਸਚੇ ਲਭੇਥ ਨਿਪਕਂ ਸਹਾਯਂ, ਸਦ੍ਧਿਂ ਚਰਂ ਸਾਧੁਵਿਹਾਰਿਧੀਰਂ;

ਅਭਿਭੁਯ੍ਯ ਸਬ੍ਬਾਨਿ ਪਰਿਸ੍ਸਯਾਨਿ, ਚਰੇਯ੍ਯ ਤੇਨਤ੍ਤਮਨੋ ਸਤੀਮਾ.

੧੦੨. ‘‘‘ਨੋ ਚੇ ਲਭੇਥ ਨਿਪਕਂ ਸਹਾਯਂ, ਸਦ੍ਧਿਂ ਚਰਂ ਸਾਧੁਵਿਹਾਰਿਧੀਰਂ;

ਰਾਜਾਵ ਰਟ੍ਠਂ ਵਿਜਿਤਂ ਪਹਾਯ, ਏਕੋ ਚਰੇ ਮਾਤਙ੍ਗਰਞ੍ਞੇਵ ਨਾਗੋ.

੧੦੩. ‘‘‘ਅਦ੍ਧਾ ਪਸਂਸਾਮ ਸਹਾਯਸਮ੍ਪਦਂ, ਸੇਟ੍ਠਾ ਸਮਾ ਸੇਵਿਤਬ੍ਬਾ ਸਹਾਯਾ;

ਏਤੇ ਅਲਦ੍ਧਾ ਅਨਵਜ੍ਜਭੋਜੀ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੦੪. ‘‘‘ਦਿਸ੍ਵਾ ਸੁਵਣ੍ਣਸ੍ਸ ਪਭਸ੍ਸਰਾਨਿ, ਕਮ੍ਮਾਰਪੁਤ੍ਤੇਨ ਸੁਨਿਟ੍ਠਿਤਾਨਿ;

ਸਙ੍ਘਟ੍ਟਮਾਨਾਨਿ ਦੁਵੇ ਭੁਜਸ੍ਮਿਂ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੦੫. ‘‘‘ਏਵਂ ਦੁਤੀਯੇਨ ਸਹਾ ਮਮਸ੍ਸ, ਵਾਚਾਭਿਲਾਪੋ ਅਭਿਸਜ੍ਜਨਾ ਵਾ;

ਏਤਂ ਭਯਂ ਆਯਤਿਂ ਪੇਕ੍ਖਮਾਨੋ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੦੬. ‘‘‘ਕਾਮਾ ਹਿ ਚਿਤ੍ਰਾ ਮਧੁਰਾ ਮਨੋਰਮਾ, ਵਿਰੂਪਰੂਪੇਨ ਮਥੇਨ੍ਤਿ ਚਿਤ੍ਤਂ;

ਆਦੀਨਵਂ ਕਾਮਗੁਣੇਸੁ ਦਿਸ੍ਵਾ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੦੭. ‘‘‘ਈਤੀ ਚ ਗਣ੍ਡੋ ਚ ਉਪਦ੍ਦਵੋ ਚ, ਰੋਗੋ ਚ ਸਲ੍ਲਞ੍ਚ ਭਯਞ੍ਚ ਮੇਤਂ;

ਏਤਂ ਭਯਂ ਕਾਮਗੁਣੇਸੁ ਦਿਸ੍ਵਾ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੦੮. ‘‘‘ਸੀਤਞ੍ਚ ਉਣ੍ਹਞ੍ਚ ਖੁਦਂ ਪਿਪਾਸਂ, ਵਾਤਾਤਪੇ ਡਂਸਸਰੀਸਪੇ [ਡਂਸਸਿਰਿਂਸਪੇ (ਸੀ. ਸ੍ਯਾ.)] ਚ;

ਸਬ੍ਬਾਨਿਪੇਤਾਨਿ ਅਭਿਬ੍ਭਵਿਤ੍ਵਾ [ਅਭਿਸਂਭਵਿਤ੍ਵਾ (ਸੁਤ੍ਤਨਿਪਾਤੇ)], ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੦੯. ‘‘‘ਨਾਗੋਵ ਯੂਥਾਨਿ ਵਿਵਜ੍ਜਯਿਤ੍ਵਾ, ਸਞ੍ਜਾਤਖਨ੍ਧੋ ਪਦੁਮੀ ਉਲ਼ਾਰੋ;

ਯਥਾਭਿਰਨ੍ਤਂ ਵਿਹਰਂ ਅਰਞ੍ਞੇ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੧੦. ‘‘‘ਅਟ੍ਠਾਨਤਂ ਸਙ੍ਗਣਿਕਾਰਤਸ੍ਸ, ਯਂ ਫਸ੍ਸਯੇ [ਫੁਸ੍ਸਯੇ (ਸ੍ਯਾ.)] ਸਾਮਯਿਕਂ ਵਿਮੁਤ੍ਤਿਂ;

ਆਦਿਚ੍ਚਬਨ੍ਧੁਸ੍ਸ ਵਚੋ ਨਿਸਮ੍ਮ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੧੧. ‘‘‘ਦਿਟ੍ਠੀਵਿਸੂਕਾਨਿ ਉਪਾਤਿਵਤ੍ਤੋ, ਪਤ੍ਤੋ ਨਿਯਾਮਂ ਪਟਿਲਦ੍ਧਮਗ੍ਗੋ;

ਉਪ੍ਪਨ੍ਨਞਾਣੋਮ੍ਹਿ ਅਨਞ੍ਞਨੇਯ੍ਯੋ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੧੨. ‘‘‘ਨਿਲ੍ਲੋਲੁਪੋ ਨਿਕ੍ਕੁਹੋ ਨਿਪ੍ਪਿਪਾਸੋ, ਨਿਮ੍ਮਕ੍ਖ [ਨਿਮ੍ਮਕ੍ਖੋ (ਸ੍ਯਾ.)] ਨਿਦ੍ਧਨ੍ਤਕਸਾਵਮੋਹੋ;

ਨਿਰਾਸਯੋ [ਨਿਰਾਸਾਸੋ (ਕ.)] ਸਬ੍ਬਲੋਕੇ ਭਵਿਤ੍ਵਾ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੧੩. ‘‘‘ਪਾਪਂ ਸਹਾਯਂ ਪਰਿਵਜ੍ਜਯੇਥ, ਅਨਤ੍ਥਦਸ੍ਸਿਂ ਵਿਸਮੇ ਨਿਵਿਟ੍ਠਂ;

ਸਯਂ ਨ ਸੇਵੇ ਪਸੁਤਂ ਪਮਤ੍ਤਂ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੧੪. ‘‘‘ਬਹੁਸ੍ਸੁਤਂ ਧਮ੍ਮਧਰਂ ਭਜੇਥ, ਮਿਤ੍ਤਂ ਉਲ਼ਾਰਂ ਪਟਿਭਾਨਵਨ੍ਤਂ;

ਅਞ੍ਞਾਯ ਅਤ੍ਥਾਨਿ ਵਿਨੇਯ੍ਯ ਕਙ੍ਖਂ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੧੫. ‘‘‘ਖਿਡ੍ਡਂ ਰਤਿਂ ਕਾਮਸੁਖਞ੍ਚ ਲੋਕੇ, ਅਨਲਙ੍ਕਰਿਤ੍ਵਾ ਅਨਪੇਕ੍ਖਮਾਨੋ;

ਵਿਭੂਸਟ੍ਠਾਨਾ ਵਿਰਤੋ ਸਚ੍ਚਵਾਦੀ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੧੬. ‘‘‘ਪੁਤ੍ਤਞ੍ਚ ਦਾਰਂ ਪਿਤਰਞ੍ਚ ਮਾਤਰਂ, ਧਨਾਨਿ ਧਞ੍ਞਾਨਿ ਚ ਬਨ੍ਧਵਾਨਿ;

ਹਿਤ੍ਵਾਨ ਕਾਮਾਨਿ ਯਥੋਧਿਕਾਨਿ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੧੭. ‘‘‘ਸਙ੍ਗੋ ਏਸੋ ਪਰਿਤ੍ਤਮੇਤ੍ਥ ਸੋਖ੍ਯਂ, ਅਪ੍ਪਸ੍ਸਾਦੋ ਦੁਕ੍ਖਮੇਵੇਤ੍ਥ ਭਿਯ੍ਯੋ;

ਗਲ਼ੋ [ਗਾਹੋ (ਸੀ.) ਕਣ੍ਡੋ (ਸ੍ਯਾ.) ਗਾਲ਼੍ਹੋ (ਕ.)] ਏਸੋ ਇਤਿ ਞਤ੍ਵਾ ਮਤਿਮਾ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੧੮. ‘‘‘ਸਨ੍ਦਾਲਯਿਤ੍ਵਾਨ ਸਂਯੋਜਨਾਨਿ, ਜਾਲਂਵ ਭੇਤ੍ਵਾ ਸਲਿਲਮ੍ਬੁਚਾਰੀ;

ਅਗ੍ਗੀਵ ਦਡ੍ਢਂ ਅਨਿਵਤ੍ਤਮਾਨੋ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੧੯. ‘‘‘ਓਕ੍ਖਿਤ੍ਤਚਕ੍ਖੂ ਨ ਚ ਪਾਦਲੋਲੋ, ਗੁਤ੍ਤਿਨ੍ਦ੍ਰਿਯੋ ਰਕ੍ਖਿਤਮਾਨਸਾਨੋ;

ਅਨਵਸ੍ਸੁਤੋ ਅਪਰਿਡਯ੍ਹਮਾਨੋ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੨੦. ‘‘‘ਓਹਾਰਯਿਤ੍ਵਾ ਗਿਹਿਬ੍ਯਞ੍ਜਨਾਨਿ, ਸਞ੍ਛਨ੍ਨਪਤ੍ਤੋ ਯਥਾ ਪਾਰਿਛਤ੍ਤੋ;

ਕਾਸਾਯਵਤ੍ਥੋ ਅਭਿਨਿਕ੍ਖਮਿਤ੍ਵਾ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੨੧. ‘‘‘ਰਸੇਸੁ ਗੇਧਂ ਅਕਰਂ ਅਲੋਲੋ, ਅਨਞ੍ਞਪੋਸੀ ਸਪਦਾਨਚਾਰੀ;

ਕੁਲੇ ਕੁਲੇ ਅਪ੍ਪਟਿਬਦ੍ਧਚਿਤ੍ਤੋ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੨੨. ‘‘‘ਪਹਾਯ ਪਞ੍ਚਾਵਰਣਾਨਿ ਚੇਤਸੋ, ਉਪਕ੍ਕਿਲੇਸੇ ਬ੍ਯਪਨੁਜ੍ਜ ਸਬ੍ਬੇ;

ਅਨਿਸ੍ਸਿਤੋ ਛੇਜ੍ਜ ਸਿਨੇਹਦੋਸਂ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੨੩. ‘‘‘ਵਿਪਿਟ੍ਠਿਕਤ੍ਵਾਨ ਸੁਖਞ੍ਚ ਦੁਕ੍ਖਂ, ਪੁਬ੍ਬੇਵ ਸੋਮਨਸ੍ਸਦੋਮਨਸ੍ਸਂ;

ਲਦ੍ਧਾਨੁਪੇਕ੍ਖਂ ਸਮਥਂ ਵਿਸੁਦ੍ਧਂ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੨੪. ‘‘‘ਆਰਦ੍ਧਵੀਰਿਯੋ ਪਰਮਤ੍ਥਪਤ੍ਤਿਯਾ, ਅਲੀਨਚਿਤ੍ਤੋ ਅਕੁਸੀਤਵੁਤ੍ਤਿ;

ਦਲ਼੍ਹਨਿਕ੍ਕਮੋ ਥਾਮਬਲੂਪਪਨ੍ਨੋ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੨੫. ‘‘‘ਪਟਿਸਲ੍ਲਾਨਂ ਝਾਨਮਰਿਞ੍ਚਮਾਨੋ, ਧਮ੍ਮੇਸੁ ਨਿਚ੍ਚਂ ਅਨੁਧਮ੍ਮਚਾਰੀ;

ਆਦੀਨਵਂ ਸਮ੍ਮਸਿਤਾ ਭਵੇਸੁ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੨੬. ‘‘‘ਤਣ੍ਹਕ੍ਖਯਂ ਪਤ੍ਥਯਮਪ੍ਪਮਤ੍ਤੋ, ਅਨੇਲ਼ਮੂਗੋ ਸੁਤਵਾ ਸਤੀਮਾ;

ਸਙ੍ਖਾਤਧਮ੍ਮੋ ਨਿਯਤੋ ਪਧਾਨਵਾ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੨੭. ‘‘‘ਸੀਹੋਵ ਸਦ੍ਦੇਸੁ ਅਸਨ੍ਤਸਨ੍ਤੋ, ਵਾਤੋਵ ਜਾਲਮ੍ਹਿ ਅਸਜ੍ਜਮਾਨੋ;

ਪਦੁਮਂਵ ਤੋਯੇਨ ਅਲਿਮ੍ਪਮਾਨੋ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੨੮. ‘‘‘ਸੀਹੋ ਯਥਾ ਦਾਠਬਲੀ ਪਸਯ੍ਹ, ਰਾਜਾ ਮਿਗਾਨਂ ਅਭਿਭੁਯ੍ਯ ਚਾਰੀ;

ਸੇਵੇਥ ਪਨ੍ਤਾਨਿ ਸੇਨਾਸਨਾਨਿ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੨੯. ‘‘‘ਮੇਤ੍ਤਂ ਉਪੇਕ੍ਖਂ ਕਰੁਣਂ ਵਿਮੁਤ੍ਤਿਂ, ਆਸੇਵਮਾਨੋ ਮੁਦਿਤਞ੍ਚ ਕਾਲੇ;

ਸਬ੍ਬੇਨ ਲੋਕੇਨ ਅਵਿਰੁਜ੍ਝਮਾਨੋ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੩੦. ‘‘‘ਰਾਗਞ੍ਚ ਦੋਸਞ੍ਚ ਪਹਾਯ ਮੋਹਂ, ਸਨ੍ਦਾਲਯਿਤ੍ਵਾਨ ਸਂਯੋਜਨਾਨਿ;

ਅਸਨ੍ਤਸਂ ਜੀਵਿਤਸਙ੍ਖਯਮ੍ਹਿ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੩੧. ‘‘‘ਭਜਨ੍ਤਿ ਸੇਵਨ੍ਤਿ ਚ ਕਾਰਣਤ੍ਥਾ, ਨਿਕ੍ਕਾਰਣਾ ਦੁਲ੍ਲਭਾ ਅਜ੍ਜ ਮਿਤ੍ਤਾ;

ਅਤ੍ਤਤ੍ਥਪਞ੍ਞਾ ਅਸੁਚੀਮਨੁਸ੍ਸਾ, ਏਕੋ ਚਰੇ ਖਗ੍ਗਵਿਸਾਣਕਪ੍ਪੋ.

੧੩੨. ‘‘‘ਵਿਸੁਦ੍ਧਸੀਲਾ ਸੁਵਿਸੁਦ੍ਧਪਞ੍ਞਾ, ਸਮਾਹਿਤਾ ਜਾਗਰਿਯਾਨੁਯੁਤ੍ਤਾ;

ਵਿਪਸ੍ਸਕਾ ਧਮ੍ਮਵਿਸੇਸਦਸ੍ਸੀ, ਮਗ੍ਗਙ੍ਗਬੋਜ੍ਝਙ੍ਗਗਤੇ ਵਿਜਞ੍ਞਾ.

੧੩੩. ‘‘‘ਸੁਞ੍ਞਪ੍ਪਣਿਧਿਞ੍ਚ ਤਥਾਨਿਮਿਤ੍ਤਂ [ਸੁਞ੍ਞਤਪ੍ਪਣੀਹਿਤਞ੍ਚਾਨਿਮਿਤ੍ਤਂ (ਸੀ.)], ਆਸੇਵਯਿਤ੍ਵਾ ਜਿਨਸਾਸਨਮ੍ਹਿ;

ਯੇ ਸਾਵਕਤ੍ਤਂ ਨ ਵਜਨ੍ਤਿ ਧੀਰਾ, ਭਵਨ੍ਤਿ ਪਚ੍ਚੇਕਜਿਨਾ ਸਯਮ੍ਭੂ.

੧੩੪. ‘‘‘ਮਹਨ੍ਤਧਮ੍ਮਾ ਬਹੁਧਮ੍ਮਕਾਯਾ, ਚਿਤ੍ਤਿਸ੍ਸਰਾ ਸਬ੍ਬਦੁਕ੍ਖੋਘਤਿਣ੍ਣਾ;

ਉਦਗ੍ਗਚਿਤ੍ਤਾ ਪਰਮਤ੍ਥਦਸ੍ਸੀ, ਸੀਹੋਪਮਾ ਖਗ੍ਗਵਿਸਾਣਕਪ੍ਪਾ.

੧੩੫. ‘‘‘ਸਨ੍ਤਿਨ੍ਦ੍ਰਿਯਾ ਸਨ੍ਤਮਨਾ ਸਮਾਧੀ, ਪਚ੍ਚਨ੍ਤਸਤ੍ਤੇਸੁ ਪਤਿਪ੍ਪਚਾਰਾ [ਪਚ੍ਚਤ੍ਤਗਮ੍ਭੀਰਮਤਪ੍ਪਚਾਰਾ (ਸੀ.)];

ਦੀਪਾ ਪਰਤ੍ਥ ਇਧ ਵਿਜ੍ਜਲਨ੍ਤਾ, ਪਚ੍ਚੇਕਬੁਦ੍ਧਾ ਸਤਤਂ ਹਿਤਾਮੇ.

੧੩੬. ‘‘‘ਪਹੀਨਸਬ੍ਬਾਵਰਣਾ ਜਨਿਨ੍ਦਾ, ਲੋਕਪ੍ਪਦੀਪਾ ਘਨਕਞ੍ਚਨਾਭਾ;

ਨਿਸ੍ਸਂਸਯਂ ਲੋਕਸੁਦਕ੍ਖਿਣੇਯ੍ਯਾ, ਪਚ੍ਚੇਕਬੁਦ੍ਧਾ ਸਤਤਪ੍ਪਿਤਾਮੇ.

੧੩੭. ‘‘‘ਪਚ੍ਚੇਕਬੁਦ੍ਧਾਨਂ ਸੁਭਾਸਿਤਾਨਿ, ਚਰਨ੍ਤਿ ਲੋਕਮ੍ਹਿ ਸਦੇਵਕਮ੍ਹਿ;

ਸੁਤ੍ਵਾ ਤਥਾ ਯੇ ਨ ਕਰੋਨ੍ਤਿ ਬਾਲਾ, ਚਰਨ੍ਤਿ ਦੁਕ੍ਖੇਸੁ ਪੁਨਪ੍ਪੁਨਂ ਤੇ.

੧੩੮. ‘‘‘ਪਚ੍ਚੇਕਬੁਦ੍ਧਾਨਂ ਸੁਭਾਸਿਤਾਨਿ, ਮਧੁਂ ਯਥਾ ਖੁਦ੍ਦਮਵਸ੍ਸਵਨ੍ਤਂ;

ਸੁਤ੍ਵਾ ਤਥਾ ਯੇ ਪਟਿਪਤ੍ਤਿਯੁਤ੍ਤਾ, ਭਵਨ੍ਤਿ ਤੇ ਸਚ੍ਚਦਸਾ ਸਪਞ੍ਞਾ’.

੧੩੯. ‘‘ਪਚ੍ਚੇਕਬੁਦ੍ਧੇਹਿ ਜਿਨੇਹਿ ਭਾਸਿਤਾ, ਕਥਾ [ਗਾਥਾ (ਸੀ. ਸ੍ਯਾ.)] ਉਲ਼ਾਰਾ ਅਭਿਨਿਕ੍ਖਮਿਤ੍ਵਾ;

ਤਾ ਸਕ੍ਯਸੀਹੇਨ ਨਰੁਤ੍ਤਮੇਨ, ਪਕਾਸਿਤਾ ਧਮ੍ਮਵਿਜਾਨਨਤ੍ਥਂ.

੧੪੦. ‘‘ਲੋਕਾਨੁਕਮ੍ਪਾਯ ਇਮਾਨਿ ਤੇਸਂ, ਪਚ੍ਚੇਕਬੁਦ੍ਧਾਨ ਵਿਕੁਬ੍ਬਿਤਾਨਿ;

ਸਂਵੇਗਸਙ੍ਗਮਤਿਵਡ੍ਢਨਤ੍ਥਂ, ਸਯਮ੍ਭੁਸੀਹੇਨ ਪਕਾਸਿਤਾਨੀ’’ਤਿ.

ਪਚ੍ਚੇਕਬੁਦ੍ਧਾਪਦਾਨਂ ਸਮਤ੍ਤਂ.