(੧੭-੧੯) ਸੀਹਪੁਬ੍ਬਦ੍ਧਕਾਯਾਦਿਤਿਲਕ੍ਖਣਂ

੨੨੪. ‘‘ਯਮ੍ਪਿ, ਭਿਕ੍ਖਵੇ, ਤਥਾਗਤੋ ਪੁਰਿਮਂ ਜਾਤਿਂ ਪੁਰਿਮਂ ਭਵਂ ਪੁਰਿਮਂ ਨਿਕੇਤਂ ਪੁਬ੍ਬੇ ਮਨੁਸ੍ਸਭੂਤੋ ਸਮਾਨੋ ਬਹੁਜਨਸ੍ਸ ਅਤ੍ਥਕਾਮੋ ਅਹੋਸਿ ਹਿਤਕਾਮੋ ਫਾਸੁਕਾਮੋ ਯੋਗਕ੍ਖੇਮਕਾਮੋ – ‘ਕਿਨ੍ਤਿਮੇ ਸਦ੍ਧਾਯ ਵਡ੍ਢੇਯ੍ਯੁਂ, ਸੀਲੇਨ ਵਡ੍ਢੇਯ੍ਯੁਂ, ਸੁਤੇਨ ਵਡ੍ਢੇਯ੍ਯੁਂ [ਸੁਤੇਨ ਵਡ੍ਢੇਯ੍ਯੁਂ, ਬੁਦ੍ਧਿਯਾ ਵਡ੍ਢੇਯ੍ਯੁਂ (ਸ੍ਯਾ.)], ਚਾਗੇਨ ਵਡ੍ਢੇਯ੍ਯੁਂ, ਧਮ੍ਮੇਨ ਵਡ੍ਢੇਯ੍ਯੁਂ, ਪਞ੍ਞਾਯ ਵਡ੍ਢੇਯ੍ਯੁਂ, ਧਨਧਞ੍ਞੇਨ ਵਡ੍ਢੇਯ੍ਯੁਂ, ਖੇਤ੍ਤਵਤ੍ਥੁਨਾ ਵਡ੍ਢੇਯ੍ਯੁਂ, ਦ੍ਵਿਪਦਚਤੁਪ੍ਪਦੇਹਿ ਵਡ੍ਢੇਯ੍ਯੁਂ, ਪੁਤ੍ਤਦਾਰੇਹਿ ਵਡ੍ਢੇਯ੍ਯੁਂ, ਦਾਸਕਮ੍ਮਕਰਪੋਰਿਸੇਹਿ ਵਡ੍ਢੇਯ੍ਯੁਂ, ਞਾਤੀਹਿ ਵਡ੍ਢੇਯ੍ਯੁਂ, ਮਿਤ੍ਤੇਹਿ ਵਡ੍ਢੇਯ੍ਯੁਂ, ਬਨ੍ਧਵੇਹਿ ਵਡ੍ਢੇਯ੍ਯੁ’ਨ੍ਤਿ. ਸੋ ਤਸ੍ਸ ਕਮ੍ਮਸ੍ਸ ਕਟਤ੍ਤਾ…ਪੇ… ਸੋ ਤਤੋ ਚੁਤੋ ਇਤ੍ਥਤ੍ਤਂ ਆਗਤੋ ਸਮਾਨੋ ਇਮਾਨਿ ਤੀਣਿ ਮਹਾਪੁਰਿਸਲਕ੍ਖਣਾਨਿ ਪਟਿਲਭਤਿ. ਸੀਹਪੁਬ੍ਬਦ੍ਧਕਾਯੋ ਚ ਹੋਤਿ ਚਿਤਨ੍ਤਰਂਸੋ ਚ ਸਮਵਟ੍ਟਕ੍ਖਨ੍ਧੋ ਚ.

‘‘ਸੋ ਤੇਹਿ ਲਕ੍ਖਣੇਹਿ ਸਮਨ੍ਨਾਗਤੋ ਸਚੇ ਅਗਾਰਂ ਅਜ੍ਝਾਵਸਤਿ, ਰਾਜਾ ਹੋਤਿ ਚਕ੍ਕਵਤ੍ਤੀ…ਪੇ… ਰਾਜਾ ਸਮਾਨੋ ਕਿਂ ਲਭਤਿ? ਅਪਰਿਹਾਨਧਮ੍ਮੋ ਹੋਤਿ, ਨ ਪਰਿਹਾਯਤਿ ਧਨਧਞ੍ਞੇਨ ਖੇਤ੍ਤਵਤ੍ਥੁਨਾ ਦ੍ਵਿਪਦਚਤੁਪ੍ਪਦੇਹਿ ਪੁਤ੍ਤਦਾਰੇਹਿ ਦਾਸਕਮ੍ਮਕਰਪੋਰਿਸੇਹਿ ਞਾਤੀਹਿ ਮਿਤ੍ਤੇਹਿ ਬਨ੍ਧਵੇਹਿ, ਨ ਪਰਿਹਾਯਤਿ ਸਬ੍ਬਸਮ੍ਪਤ੍ਤਿਯਾ. ਰਾਜਾ ਸਮਾਨੋ ਇਦਂ ਲਭਤਿ… ਬੁਦ੍ਧੋ ਸਮਾਨੋ ਕਿਂ ਲਭਤਿ? ਅਪਰਿਹਾਨਧਮ੍ਮੋ ਹੋਤਿ, ਨ ਪਰਿਹਾਯਤਿ ਸਦ੍ਧਾਯ ਸੀਲੇਨ ਸੁਤੇਨ ਚਾਗੇਨ ਪਞ੍ਞਾਯ, ਨ ਪਰਿਹਾਯਤਿ ਸਬ੍ਬਸਮ੍ਪਤ੍ਤਿਯਾ. ਬੁਦ੍ਧੋ ਸਮਾਨੋ ਇਦਂ ਲਭਤਿ’’. ਏਤਮਤ੍ਥਂ ਭਗਵਾ ਅਵੋਚ.

੨੨੫. ਤਤ੍ਥੇਤਂ ਵੁਚ੍ਚਤਿ –

‘‘ਸਦ੍ਧਾਯ ਸੀਲੇਨ ਸੁਤੇਨ ਬੁਦ੍ਧਿਯਾ,

ਚਾਗੇਨ ਧਮ੍ਮੇਨ ਬਹੂਹਿ ਸਾਧੁਹਿ;

ਧਨੇਨ ਧਞ੍ਞੇਨ ਚ ਖੇਤ੍ਤਵਤ੍ਥੁਨਾ,

ਪੁਤ੍ਤੇਹਿ ਦਾਰੇਹਿ ਚਤੁਪ੍ਪਦੇਹਿ ਚ.

‘‘ਞਾਤੀਹਿ ਮਿਤ੍ਤੇਹਿ ਚ ਬਨ੍ਧਵੇਹਿ ਚ,

ਬਲੇਨ ਵਣ੍ਣੇਨ ਸੁਖੇਨ ਚੂਭਯਂ;

ਕਥਂ ਨ ਹਾਯੇਯ੍ਯੁਂ ਪਰੇਤਿ ਇਚ੍ਛਤਿ,

ਅਤ੍ਥਸ੍ਸ ਮਿਦ੍ਧੀ ਚ [ਇਦਂ ਸਮਿਦ੍ਧਞ੍ਚ (ਕ.), ਅਦ੍ਧਂ ਸਮਿਦ੍ਧਞ੍ਚ (ਸ੍ਯਾ.)] ਪਨਾਭਿਕਙ੍ਖਤਿ.

‘‘ਸ ਸੀਹਪੁਬ੍ਬਦ੍ਧਸੁਸਣ੍ਠਿਤੋ ਅਹੁ,

ਸਮਵਟ੍ਟਕ੍ਖਨ੍ਧੋ ਚ ਚਿਤਨ੍ਤਰਂਸੋ;

ਪੁਬ੍ਬੇ ਸੁਚਿਣ੍ਣੇਨ ਕਤੇਨ ਕਮ੍ਮੁਨਾ,

ਅਹਾਨਿਯਂ ਪੁਬ੍ਬਨਿਮਿਤ੍ਤਮਸ੍ਸ ਤਂ.

‘‘ਗਿਹੀਪਿ ਧਞ੍ਞੇਨ ਧਨੇਨ ਵਡ੍ਢਤਿ,

ਪੁਤ੍ਤੇਹਿ ਦਾਰੇਹਿ ਚਤੁਪ੍ਪਦੇਹਿ ਚ;

ਅਕਿਞ੍ਚਨੋ ਪਬ੍ਬਜਿਤੋ ਅਨੁਤ੍ਤਰਂ,

ਪਪ੍ਪੋਤਿ ਬੋਧਿਂ ਅਸਹਾਨਧਮ੍ਮਤ’’ਨ੍ਤਿ [ਸਮ੍ਬੋਧਿਮਹਾਨਧਮ੍ਮਤਨ੍ਤਿ (ਸ੍ਯਾ. ਕ.) ਟੀਕਾ ਓਲੋਕੇਤਬ੍ਬਾ].