(੧੪) ਕੋਸੋਹਿਤਵਤ੍ਥਗੁਯ੍ਹਲਕ੍ਖਣਂ

੨੨੦. ਯਮ੍ਪਿ, ਭਿਕ੍ਖਵੇ, ਤਥਾਗਤੋ ਪੁਰਿਮਂ ਜਾਤਿਂ ਪੁਰਿਮਂ ਭਵਂ ਪੁਰਿਮਂ ਨਿਕੇਤਂ ਪੁਬ੍ਬੇ ਮਨੁਸ੍ਸਭੂਤੋ ਸਮਾਨੋ ਚਿਰਪ੍ਪਨਟ੍ਠੇ ਸੁਚਿਰਪ੍ਪਵਾਸਿਨੋ ਞਾਤਿਮਿਤ੍ਤੇ ਸੁਹਜ੍ਜੇ ਸਖਿਨੋ ਸਮਾਨੇਤਾ ਅਹੋਸਿ. ਮਾਤਰਮ੍ਪਿ ਪੁਤ੍ਤੇਨ ਸਮਾਨੇਤਾ ਅਹੋਸਿ, ਪੁਤ੍ਤਮ੍ਪਿ ਮਾਤਰਾ ਸਮਾਨੇਤਾ ਅਹੋਸਿ, ਪਿਤਰਮ੍ਪਿ ਪੁਤ੍ਤੇਨ ਸਮਾਨੇਤਾ ਅਹੋਸਿ, ਪੁਤ੍ਤਮ੍ਪਿ ਪਿਤਰਾ ਸਮਾਨੇਤਾ ਅਹੋਸਿ, ਭਾਤਰਮ੍ਪਿ ਭਾਤਰਾ ਸਮਾਨੇਤਾ ਅਹੋਸਿ, ਭਾਤਰਮ੍ਪਿ ਭਗਿਨਿਯਾ ਸਮਾਨੇਤਾ ਅਹੋਸਿ, ਭਗਿਨਿਮ੍ਪਿ ਭਾਤਰਾ ਸਮਾਨੇਤਾ ਅਹੋਸਿ, ਭਗਿਨਿਮ੍ਪਿ ਭਗਿਨਿਯਾ ਸਮਾਨੇਤਾ ਅਹੋਸਿ, ਸਮਙ੍ਗੀਕਤ੍ਵਾ [ਸਮਗ੍ਗਿਂ ਕਤ੍ਵਾ (ਸੀ. ਸ੍ਯਾ. ਪੀ.)] ਚ ਅਬ੍ਭਨੁਮੋਦਿਤਾ ਅਹੋਸਿ. ਸੋ ਤਸ੍ਸ ਕਮ੍ਮਸ੍ਸ ਕਟਤ੍ਤਾ…ਪੇ… ਸੋ ਤਤੋ ਚੁਤੋ ਇਤ੍ਥਤ੍ਤਂ ਆਗਤੋ ਸਮਾਨੋ ਇਮਂ ਮਹਾਪੁਰਿਸਲਕ੍ਖਣਂ ਪਟਿਲਭਤਿ – ਕੋਸੋਹਿਤਵਤ੍ਥਗੁਯ੍ਹੋ ਹੋਤਿ.

‘‘ਸੋ ਤੇਨ ਲਕ੍ਖਣੇਨ ਸਮਨ੍ਨਾਗਤੋ ਸਚੇ ਅਗਾਰਂ ਅਜ੍ਝਾਵਸਤਿ, ਰਾਜਾ ਹੋਤਿ ਚਕ੍ਕਵਤ੍ਤੀ…ਪੇ… ਰਾਜਾ ਸਮਾਨੋ ਕਿਂ ਲਭਤਿ? ਪਹੂਤਪੁਤ੍ਤੋ ਹੋਤਿ, ਪਰੋਸਹਸ੍ਸਂ ਖੋ ਪਨਸ੍ਸ ਪੁਤ੍ਤਾ ਭਵਨ੍ਤਿ ਸੂਰਾ ਵੀਰਙ੍ਗਰੂਪਾ ਪਰਸੇਨਪ੍ਪਮਦ੍ਦਨਾ. ਰਾਜਾ ਸਮਾਨੋ ਇਦਂ ਲਭਤਿ… ਬੁਦ੍ਧੋ ਸਮਾਨੋ ਕਿਂ ਲਭਤਿ? ਪਹੂਤਪੁਤ੍ਤੋ ਹੋਤਿ, ਅਨੇਕਸਹਸ੍ਸਂ ਖੋ ਪਨਸ੍ਸ ਪੁਤ੍ਤਾ ਭਵਨ੍ਤਿ ਸੂਰਾ ਵੀਰਙ੍ਗਰੂਪਾ ਪਰਸੇਨਪ੍ਪਮਦ੍ਦਨਾ. ਬੁਦ੍ਧੋ ਸਮਾਨੋ ਇਦਂ ਲਭਤਿ’’. ਏਤਮਤ੍ਥਂ ਭਗਵਾ ਅਵੋਚ.

੨੨੧. ਤਤ੍ਥੇਤਂ ਵੁਚ੍ਚਤਿ –

‘‘ਪੁਰੇ ਪੁਰਤ੍ਥਾ ਪੁਰਿਮਾਸੁ ਜਾਤਿਸੁ,

ਚਿਰਪ੍ਪਨਟ੍ਠੇ ਸੁਚਿਰਪ੍ਪਵਾਸਿਨੋ;

ਞਾਤੀ ਸੁਹਜ੍ਜੇ ਸਖਿਨੋ ਸਮਾਨਯਿ,

ਸਮਙ੍ਗਿਕਤ੍ਵਾ ਅਨੁਮੋਦਿਤਾ ਅਹੁ.

‘‘ਸੋ ਤੇਨ [ਸ ਤੇਨ (ਕ.)] ਕਮ੍ਮੇਨ ਦਿਵਂ ਸਮਕ੍ਕਮਿ,

ਸੁਖਞ੍ਚ ਖਿਡ੍ਡਾਰਤਿਯੋ ਚ ਅਨ੍ਵਭਿ;

ਤਤੋ ਚਵਿਤ੍ਵਾ ਪੁਨਰਾਗਤੋ ਇਧ,

ਕੋਸੋਹਿਤਂ ਵਿਨ੍ਦਤਿ ਵਤ੍ਥਛਾਦਿਯਂ.

‘‘ਪਹੂਤਪੁਤ੍ਤੋ ਭਵਤੀ ਤਥਾਵਿਧੋ,

ਪਰੋਸਹਸ੍ਸਞ੍ਚ [ਪਰੋਸਹਸ੍ਸਸ੍ਸ (ਸੀ. ਪੀ.)] ਭਵਨ੍ਤਿ ਅਤ੍ਰਜਾ;

ਸੂਰਾ ਚ ਵੀਰਾ ਚ [ਸੂਰਾ ਚ ਵੀਰਙ੍ਗਰੂਪਾ (ਕ.)] ਅਮਿਤ੍ਤਤਾਪਨਾ,

ਗਿਹਿਸ੍ਸ ਪੀਤਿਂਜਨਨਾ ਪਿਯਂਵਦਾ.

‘‘ਬਹੂਤਰਾ ਪਬ੍ਬਜਿਤਸ੍ਸ ਇਰਿਯਤੋ,

ਭਵਨ੍ਤਿ ਪੁਤ੍ਤਾ ਵਚਨਾਨੁਸਾਰਿਨੋ;

ਗਿਹਿਸ੍ਸ ਵਾ ਪਬ੍ਬਜਿਤਸ੍ਸ ਵਾ ਪੁਨ,

ਤਂ ਲਕ੍ਖਣਂ ਜਾਯਤਿ ਤਦਤ੍ਥਜੋਤਕ’’ਨ੍ਤਿ.

ਪਠਮਭਾਣਵਾਰੋ ਨਿਟ੍ਠਿਤੋ.