੧੦. ਚੀਵਰਾਪਨਿਧਾਨਸਿਕ੍ਖਾਪਦਵਣ੍ਣਨਾ

੩੭੭-੮੧. ਦਸਮੇ – ਅਪਨਿਧੇਨ੍ਤੀਤਿ ਅਪਨੇਤ੍ਵਾ ਨਿਧੇਨ੍ਤਿ. ਹਸਾਪੇਕ੍ਖੋਤਿ ਹਸਾਧਿਪ੍ਪਾਯੋ. ਅਞ੍ਞਂ ਪਰਿਕ੍ਖਾਰਨ੍ਤਿ ਪਾਲ਼ਿਯਾ ਅਨਾਗਤਂ ਪਤ੍ਤਤ੍ਥਵਿਕਾਦਿਂ. ਧਮ੍ਮਿਂ ਕਥਂ ਕਤ੍ਵਾਤਿ ‘‘ਸਮਣੇਨ ਨਾਮ ਅਨਿਹਿਤਪਰਿਕ੍ਖਾਰੇਨ ਭਵਿਤੁਂ ਨ ਵਟ੍ਟਤੀ’’ਤਿ ਏਵਂ ਧਮ੍ਮਕਥਂ ਕਥੇਤ੍ਵਾ ਦਸ੍ਸਾਮੀਤਿ ਨਿਕ੍ਖਿਪਤੋ ਅਨਾਪਤ੍ਤਿ. ਸੇਸਮੇਤ੍ਥ ਉਤ੍ਤਾਨਮੇਵ. ਤਿਸਮੁਟ੍ਠਾਨਂ – ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਤਿਵੇਦਨਨ੍ਤਿ.

ਚੀਵਰਾਪਨਿਧਾਨਸਿਕ੍ਖਾਪਦਂ ਦਸਮਂ.

ਸਮਤ੍ਤੋ ਵਣ੍ਣਨਾਕ੍ਕਮੇਨ ਸੁਰਾਪਾਨਵਗ੍ਗੋ ਛਟ੍ਠੋ.