੬. ਸੁਰਾਪਾਨਵਗ੍ਗੋ
੧. ਸੁਰਾਪਾਨਸਿਕ੍ਖਾਪਦਵਣ੍ਣਨਾ
੩੨੬. ਸੁਰਾਪਾਨਵਗ੍ਗਸ੍ਸ ਪਠਮਸਿਕ੍ਖਾਪਦੇ – ਭਦ੍ਦਵਤਿਕਾਤਿ ਏਕੋ ਗਾਮੋ, ਸੋ ਭਦ੍ਦਿਕਾਯ ਵਤਿਯਾ ਸਮਨ੍ਨਾਗਤਤ੍ਤਾ ਏਤਂ ਨਾਮ ਲਭਿ. ਪਥਾਵਿਨੋਤਿ ਅਦ੍ਧਿਕਾ. ਤੇਜਸਾ ਤੇਜਨ੍ਤਿ ਅਤ੍ਤਨੋ ਤੇਜਸਾ ਆਨੁਭਾਵੇਨ ਨਾਗਸ੍ਸ ਤੇਜਂ. ਕਾਪੋਤਿਕਾਤਿ ਕਪੋਤਪਾਦਸਮਵਣ੍ਣਰਤ੍ਤੋਭਾਸਾ. ਪਸਨ੍ਨਾਤਿ ਸੁਰਾਮਣ੍ਡਸ੍ਸੇਤਂ ਅਧਿਵਚਨਂ. ਅਨਨੁਚ੍ਛਵਿਯਂ ਭਿਕ੍ਖਵੇ ਸਾਗਤਸ੍ਸਾਤਿ ਪਞ੍ਚਾਭਿਞ੍ਞਸ੍ਸ ਸਤੋ ਮਜ੍ਜਪਾਨਂ ਨਾਮ ਨ ਅਨੁਚ੍ਛਵਿਯਨ੍ਤਿ ਵੁਤ੍ਤਂ ਹੋਤਿ.
੩੨੮. ਪੁਪ੍ਫਾਸਵੋ ਨਾਮ ਮਧੁਕਪੁਪ੍ਫਾਦੀਨਂ ਰਸੇਨ ਕਤੋ. ਫਲਾਸਵੋ ਨਾਮ ਮੁਦ੍ਦਿਕਫਲਾਦੀਨਿ ਮਦ੍ਦਿਤ੍ਵਾ ਤੇਸਂ ਰਸੇਨ ਕਤੋ. ਮਧ੍ਵਾਸਵੋ ਨਾਮ ਮੁਦ੍ਦਿਕਾਨਂ ਜਾਤਿਰਸੇਨ ਕਤੋ; ਮਕ੍ਖਿਕਮਧੁਨਾਪਿ ਕਰਿਯਤੀਤਿ ਵਦਨ੍ਤਿ. ਗੁਲ਼ਾਸਵੋ ਨਾਮ ਉਚ੍ਛੁਰਸਾਦੀਹਿ ਕਰਿਯਤਿ. ਸੁਰਾ ਨਾਮ ਪਿਟ੍ਠਕਿਣ੍ਣਪਕ੍ਖਿਤ੍ਤਾ; ਨਾਲ਼ਿਕੇਰਾਦੀਨਮ੍ਪਿ ਰਸੇਨ ਕਤਾ ਸੁਰਾਤ੍ਵੇਵ ਸਙ੍ਖ੍ਯਂ ਗਚ੍ਛਤਿ, ਤਸ੍ਸਾਯੇਵ ਕਿਣ੍ਣਪਕ੍ਖਿਤ੍ਤਾਯ ਮਣ੍ਡੇ ਗਹਿਤੇ ਮੇਰਯੋਤ੍ਵੇਵ ਸਙ੍ਖ੍ਯਂ ਗਚ੍ਛਤੀਤਿ ਵਦਨ੍ਤਿ. ਅਨ੍ਤਮਸੋ ਕੁਸਗ੍ਗੇਨਪਿ ਪਿਵਤੀਤਿ ਏਤਂ ਸੁਰਂ ਵਾ ਮੇਰਯਂ ਵਾ ਬੀਜਤੋ ਪਟ੍ਠਾਯ ਕੁਸਗ੍ਗੇਨ ਪਿਵਤੋਪਿ ਪਾਚਿਤ੍ਤਿਯਨ੍ਤਿ ਅਤ੍ਥੋ. ਏਕੇਨ ਪਨ ਪਯੋਗੇਨ ਬਹੁਮ੍ਪਿ ਪਿਵਨ੍ਤਸ੍ਸ ਏਕਾ ਆਪਤ੍ਤਿ. ਵਿਚ੍ਛਿਨ੍ਦਿਤ੍ਵਾ ਵਿਚ੍ਛਿਨ੍ਦਿਤ੍ਵਾ ਪਿਵਤੋ ਪਯੋਗਗਣਨਾਯ ਆਪਤ੍ਤਿਯੋ.
੩੨੯. ਅਮਜ੍ਜਞ੍ਚ ਹੋਤਿ ਮਜ੍ਜਵਣ੍ਣਂ ਮਜ੍ਜਗਨ੍ਧਂ ਮਜ੍ਜਰਸਨ੍ਤਿ ਲੋਣਸੋਵੀਰਕਂ ਵਾ ਸੁਤ੍ਤਂ ਵਾ ਹੋਤਿ. ਸੂਪਸਮ੍ਪਾਕੇਤਿ ਵਾਸਗਾਹਾਪਨਤ੍ਥਂ ਈਸਕਂ ਮਜ੍ਜਂ ਪਕ੍ਖਿਪਿਤ੍ਵਾ ਸੂਪਂ ਪਚਨ੍ਤਿ, ਤਸ੍ਮਿਂ ਅਨਾਪਤ੍ਤਿ. ਮਂਸਸਮ੍ਪਾਕੇਪਿ ਏਸੇਵ ਨਯੋ. ਤੇਲਂ ਪਨ ਵਾਤਭੇਸਜ੍ਜਤ੍ਥਂ ਮਜ੍ਜੇਨ ਸਦ੍ਧਿਂ ਪਚਨ੍ਤਿ, ਤਸ੍ਮਿਮ੍ਪਿ ਅਨਤਿਕ੍ਖਿਤ੍ਤਮਜ੍ਜੇਯੇਵ ਅਨਾਪਤ੍ਤਿ, ਯਂ ਪਨ ਅਤਿਕ੍ਖਿਤ੍ਤਮਜ੍ਜਂ ਹੋਤਿ, ਏਤ੍ਥ ਮਜ੍ਜਸ੍ਸ ਵਣ੍ਣਗਨ੍ਧਰਸਾ ਪਞ੍ਞਾਯਨ੍ਤਿ, ਤਸ੍ਮਿਂ ਆਪਤ੍ਤਿਯੇਵ. ਅਮਜ੍ਜਂ ਅਰਿਟ੍ਠਨ੍ਤਿ ਯੋ ਅਰਿਟ੍ਠੋ ਮਜ੍ਜਂ ਨ ਹੋਤਿ, ਤਸ੍ਮਿਂ ਅਨਾਪਤ੍ਤਿ. ਆਮਲਕਾਦੀਨਂਯੇਵ ਕਿਰ ਰਸੇਨ ਅਰਿਟ੍ਠਂ ਕਰੋਨ੍ਤਿ, ਸੋ ਮਜ੍ਜਵਣ੍ਣਗਨ੍ਧਰਸੋਯੇਵ ਹੋਤਿ, ਨ ਚ ਮਜ੍ਜਂ; ਤਂ ਸਨ੍ਧਾਯੇਤਂ ਵੁਤ੍ਤਂ. ਯੋ ਪਨ ਸਮ੍ਭਾਰਪਕ੍ਖਿਤ੍ਤੋ, ਸੋ ਮਜ੍ਜਂ ਹੋਤਿ, ਬੀਜਤੋ ਪਟ੍ਠਾਯ ਨ ਵਟ੍ਟਤਿ. ਸੇਸਮੇਤ੍ਥ ਉਤ੍ਤਾਨਮੇਵ. ਏਲ਼ਕਲੋਮਸਮੁਟ੍ਠਾਨਂ – ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ ਅਕੁਸਲਚਿਤ੍ਤਂ, ਤਿਵੇਦਨਨ੍ਤਿ. ਵਤ੍ਥੁਅਜਾਨਨਤਾਯ ਚੇਤ੍ਥ ਅਚਿਤ੍ਤਕਤਾ ਵੇਦਿਤਬ੍ਬਾ, ਅਕੁਸਲੇਨੇਵ ਪਾਤਬ੍ਬਤਾਯ ਲੋਕਵਜ੍ਜਤਾਤਿ.
ਸੁਰਾਪਾਨਸਿਕ੍ਖਾਪਦਂ ਪਠਮਂ.
੨. ਅਙ੍ਗੁਲਿਪਤੋਦਕਸਿਕ੍ਖਾਪਦਵਣ੍ਣਨਾ
੩੩੦. ਦੁਤਿਯੇ – ਅਙ੍ਗੁਲਿਪਤੋਦਕੇਨਾਤਿ ਅਙ੍ਗੁਲੀਹਿ ਉਪਕਚ੍ਛਕਾਦਿਘਟ੍ਟਨਂ ਵੁਚ੍ਚਤਿ. ਉਤ੍ਤਸਨ੍ਤੋਤਿ ਅਤਿਹਾਸੇਨ ਕਿਲਮਨ੍ਤੋ. ਅਨਸ੍ਸਾਸਕੋਤਿ ਉਪਚ੍ਛਿਨ੍ਨਅਸ੍ਸਾਸਪਸ੍ਸਾਸਸਞ੍ਚਾਰੋ ਹੁਤ੍ਵਾ. ਅਨੁਪਸਮ੍ਪਨ੍ਨਂ ਕਾਯੇਨ ਕਾਯਨ੍ਤਿ ਏਤ੍ਥ ਭਿਕ੍ਖੁਨੀਪਿ ਅਨੁਪਸਮ੍ਪਨ੍ਨਟ੍ਠਾਨੇ ਠਿਤਾ, ਤਮ੍ਪਿ ਖਿਡ੍ਡਾਧਿਪ੍ਪਾਯੇਨ ਫੁਸਨ੍ਤਸ੍ਸ ਦੁਕ੍ਕਟਂ. ਸੇਸਮੇਤ੍ਥ ਉਤ੍ਤਾਨਮੇਵ.
ਪਠਮਪਾਰਾਜਿਕਸਮੁਟ੍ਠਾਨਂ – ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਅਕੁਸਲਚਿਤ੍ਤਂ, ਦ੍ਵਿਵੇਦਨਨ੍ਤਿ.
ਅਙ੍ਗੁਲਿਪਤੋਦਕਸਿਕ੍ਖਾਪਦਂ ਦੁਤਿਯਂ.
੩. ਹਸਧਮ੍ਮਸਿਕ੍ਖਾਪਦਵਣ੍ਣਨਾ
੩੩੫. ਤਤਿਯੇ – ਅਪ੍ਪਕਤਞ੍ਞੁਨੋਤਿ ਯਂ ਭਗਵਤਾ ਪਕਤਂ ਪਞ੍ਞਤ੍ਤਂ, ਤਂ ਨ ਜਾਨਨ੍ਤੀਤਿ ਅਤ੍ਥੋ.
੩੩੬. ਉਦਕੇ ਹਸਧਮ੍ਮੇਤਿ ਉਦਕਕੀਲ਼ਿਕਾ ਵੁਚ੍ਚਤਿ. ਉਪਰਿਗੋਪ੍ਫਕੇਤਿ ਗੋਪ੍ਫਕਾਨਂ ਉਪਰਿਭਾਗਪ੍ਪਮਾਣੇ. ਹਸਾਧਿਪ੍ਪਾਯੋਤਿ ਕੀਲ਼ਾਧਿਪ੍ਪਾਯੋ. ਨਿਮੁਜ੍ਜਤਿ ਵਾਤਿਆਦੀਸੁ ਨਿਮੁਜ੍ਜਨਤ੍ਥਾਯ ਓਰੋਹਨ੍ਤਸ੍ਸ ਪਦਵਾਰੇ ਪਦਵਾਰੇ ਦੁਕ੍ਕਟਂ. ਨਿਮੁਜ੍ਜਨੁਮ੍ਮੁਜ੍ਜਨੇਸੁ ਪਯੋਗੇ ਪਯੋਗੇ ਪਾਚਿਤ੍ਤਿਯਂ. ਨਿਮੁਜ੍ਜਿਤ੍ਵਾ ਅਨ੍ਤੋਉਦਕੇਯੇਵ ਗਚ੍ਛਨ੍ਤਸ੍ਸ ਹਤ੍ਥਵਾਰਪਦਵਾਰੇਸੁ ਸਬ੍ਬਤ੍ਥ ਪਾਚਿਤ੍ਤਿਯਂ. ਪਲਵਤੀਤਿ ਤਰਤਿ. ਹਤ੍ਥੇਹਿ ਤਰਨ੍ਤਸ੍ਸ ਹਤ੍ਥਵਾਰੇ ਹਤ੍ਥਵਾਰੇ ਪਾਚਿਤ੍ਤਿਯਂ. ਪਾਦੇਸੁਪਿ ਏਸੇਵ ਨਯੋ. ਯੇਨ ਯੇਨ ਅਙ੍ਗੇਨ ਤਰਤਿ, ਤਸ੍ਸ ਤਸ੍ਸ ਪਯੋਗੇ ਪਯੋਗੇ ਪਾਚਿਤ੍ਤਿਯਂ. ਤੀਰਤੋ ਵਾ ਰੁਕ੍ਖਤੋ ਵਾ ਉਦਕੇ ਪਤਤਿ, ਪਾਚਿਤ੍ਤਿਯਮੇਵ. ਨਾਵਾਯ ਕੀਲ਼ਤੀਤਿ ਫਿਯਾਰਿਤ੍ਤਾਦੀਹਿ ਨਾਵਂ ਪਾਜੇਨ੍ਤੋ ਵਾ ਤੀਰੇ ਉਸ੍ਸਾਰੇਨ੍ਤੋ ਵਾ ਨਾਵਾਯ ਕੀਲ਼ਤਿ, ਦੁਕ੍ਕਟਂ.
ਹਤ੍ਥੇਨ ਵਾਤਿਆਦੀਸੁਪਿ ਪਯੋਗੇ ਪਯੋਗੇ ਦੁਕ੍ਕਟਂ. ਕੇਚਿ ਹਤ੍ਥੇਨ ਉਦਕੇ ਖਿਤ੍ਤਾਯ ਕਥਲਾਯ ਪਤਨੁਪ੍ਪਤਨਵਾਰੇਸੁ ਦੁਕ੍ਕਟਂ ਵਦਨ੍ਤਿ, ਤਂ ਨ ਗਹੇਤਬ੍ਬਂ. ਤਤ੍ਥ ਹਿ ਏਕਪਯੋਗਤ੍ਤਾ ਏਕਮੇਵ ਦੁਕ੍ਕਟਂ, ਅਪਿਚ ਉਪਰਿਗੋਪ੍ਫਕੇ ਵੁਤ੍ਤਾਨਿ ਉਮ੍ਮੁਜ੍ਜਨਾਦੀਨਿ ਠਪੇਤ੍ਵਾ ਅਞ੍ਞੇਨ ਯੇਨ ਕੇਨਚਿ ਆਕਾਰੇਨ ਉਦਕਂ ਓਤਰਿਤ੍ਵਾ ਵਾ ਅਨੋਤਰਿਤ੍ਵਾ ਵਾ ਯਤ੍ਥ ਕਤ੍ਥਚਿ ਠਿਤਂ ਉਦਕਂ ਅਨ੍ਤਮਸੋ ਬਿਨ੍ਦੁਂ ਗਹੇਤ੍ਵਾ ਖਿਪਨਕੀਲ਼ਾਯਪਿ ਕੀਲ਼ਨ੍ਤਸ੍ਸ ਦੁਕ੍ਕਟਮੇਵ, ਅਤ੍ਥਜੋਤਕਂ ਪਨ ਅਕ੍ਖਰਂ ਲਿਖਿਤੁਂ ਵਟ੍ਟਤਿ, ਅਯਮੇਤ੍ਥ ਵਿਨਿਚ੍ਛਯੋ. ਸੇਸਮੇਤ੍ਥ ਉਤ੍ਤਾਨਮੇਵ.
ਪਠਮਪਾਰਾਜਿਕਸਮੁਟ੍ਠਾਨਂ – ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਅਕੁਸਲਚਿਤ੍ਤਂ, ਤਿਵੇਦਨਨ੍ਤਿ.
ਹਸਧਮ੍ਮਸਿਕ੍ਖਾਪਦਂ ਤਤਿਯਂ.
੪. ਅਨਾਦਰਿਯਸਿਕ੍ਖਾਪਦਵਣ੍ਣਨਾ
੩੪੨. ਚਤੁਤ੍ਥੇ – ਕਥਾਯਂ ਨਸ੍ਸੇਯ੍ਯਾਤਿ ਕਥਂ ਅਯਂ ਧਮ੍ਮੋ ਤਨ੍ਤਿ ਪਵੇਣੀ ਨਸ੍ਸੇਯ੍ਯ. ਤਂ ਵਾ ਨ ਸਿਕ੍ਖਿਤੁਕਾਮੋਤਿ ਯੇਨ ਪਞ੍ਞਤ੍ਤੇਨ ਵੁਚ੍ਚਤਿ, ਤਂ ਪਞ੍ਞਤ੍ਤਂ ਨ ਸਿਕ੍ਖਿਤੁਕਾਮੋ. ਅਪਞ੍ਞਤ੍ਤੇਨਾਤਿ ਸੁਤ੍ਤੇ ਵਾ ਅਭਿਧਮ੍ਮੇ ਵਾ ਆਗਤੇਨ.
੩੪੪. ਏਵਂ ਅਮ੍ਹਾਕਂ ਆਚਰਿਯਾਨਂ ਉਗ੍ਗਹੋਤਿ ਏਤ੍ਥ ਗਾਰਯ੍ਹੋ ਆਚਰਿਯੁਗ੍ਗਹੋ ਨ ਗਹੇਤਬ੍ਬੋ; ਪਵੇਣਿਯਾ ਆਗਤੋ ਆਚਰਿਯੁਗ੍ਗਹੋਵ ਗਹੇਤਬ੍ਬੋ. ਕੁਰੁਨ੍ਦਿਯਂ ਪਨ ‘‘ਲੋਕਵਜ੍ਜੇ ਆਚਰਿਯੁਗ੍ਗਹੋ ਨ ਵਟ੍ਟਤਿ, ਪਣ੍ਣਤ੍ਤਿਵਜ੍ਜੇ ਪਨ ਵਟ੍ਟਤੀ’’ਤਿ ਵੁਤ੍ਤਂ. ਮਹਾਪਚ੍ਚਰਿਯਂ ‘‘ਸੁਤ੍ਤਂ ਸੁਤ੍ਤਾਨੁਲੋਮਞ੍ਚ ਉਗ੍ਗਹਿਤਕਾਨਂਯੇਵ ਆਚਰਿਯਾਨਂ ਉਗ੍ਗਹੋ ਪਮਾਣਂ, ਅਜਾਨਨ੍ਤਾਨਂ ਕਥਾ ਅਪ੍ਪਮਾਣਨ੍ਤਿ ਵੁਤ੍ਤਂ. ਤਂ ਸਬ੍ਬਂ ਪਵੇਣਿਯਾ ਆਗਤੇਸਮੋਧਾਨਂ ਗਚ੍ਛਤਿ. ਸੇਸਂ ਉਤ੍ਤਾਨਮੇਵਾਤਿ.
ਤਿਸਮੁਟ੍ਠਾਨਂ – ਕਾਯਚਿਤ੍ਤਤੋ ਵਾਚਾਚਿਤ੍ਤਤੋ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ, ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਦੁਕ੍ਖਵੇਦਨਨ੍ਤਿ.
ਅਨਾਦਰਿਯਸਿਕ੍ਖਾਪਦਂ ਚਤੁਤ੍ਥਂ.
੫. ਭਿਂਸਾਪਨਸਿਕ੍ਖਾਪਦਵਣ੍ਣਨਾ
੩੪੫. ਪਞ੍ਚਮੇ – ਰੂਪੂਪਹਾਰਾਦਯੋ ਮਨੁਸ੍ਸਵਿਗ੍ਗਹੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਸੇਸਂ ਉਤ੍ਤਾਨਮੇਵ. ਸਮੁਟ੍ਠਾਨਾਦੀਨਿ ਅਨਾਦਰਿਯਸਦਿਸਾਨੇਵਾਤਿ.
ਭਿਂਸਾਪਨਸਿਕ੍ਖਾਪਦਂ ਪਞ੍ਚਮਂ.
੬. ਜੋਤਿਸਿਕ੍ਖਾਪਦਵਣ੍ਣਨਾ
੩੫੦. ਛਟ੍ਠੇ – ਭਗ੍ਗਾਤਿ ਜਨਪਦਸ੍ਸ ਨਾਮਂ. ਸਂਸੁਮਾਰਗਿਰਨ੍ਤਿ ਨਗਰਸ੍ਸ. ਭੇਸਕਲ਼ਾਵਨਨ੍ਤਿ ਤਨ੍ਨਿਸ੍ਸਿਤਵਨਸ੍ਸ. ਤਂ ਪਨ ਮਿਗਾਨਂ ਫਾਸੁਵਿਹਾਰਤ੍ਥਾਯ ਦਿਨ੍ਨਤ੍ਤਾ ਮਿਗਦਾਯੋਤਿ ਵੁਚ੍ਚਤਿ. ਸਮਾਦਹਿਤ੍ਵਾਤਿ ਜਾਲੇਤ੍ਵਾ. ਪਰਿਪਾਤੇਸੀਤਿ ਅਨੁਬਨ੍ਧਿ.
੩੫੨. ਪਦੀਪੇਪੀਤਿ ਪਦੀਪੁਜ੍ਜਲਨੇਪਿ. ਜੋਤਿਕੇਪੀਤਿ ਪਤ੍ਤਪਚਨਸੇਦਕਮ੍ਮਾਦੀਸੁ ਜੋਤਿਕਰਣੇ. ਤਥਾਰੂਪਪਚ੍ਚਯਾਤਿ ਪਦੀਪਾਦਿਪਚ੍ਚਯਾ.
੩੫੪-੫. ਸਯਂ ਸਮਾਦਹਤੀਤਿ ਏਤ੍ਥ ਜੋਤਿਂ ਸਮਾਦਹਿਤੁਕਾਮਤਾਯ ਅਰਣਿਸਣ੍ਠਪਨਤੋ ਪਟ੍ਠਾਯ ਯਾਵ ਜਾਲਾ ਨ ਉਟ੍ਠਹਤਿ, ਤਾਵ ਸਬ੍ਬਪਯੋਗੇਸੁ ਦੁਕ੍ਕਟਂ. ਪਟਿਲਾਤਂ ਉਕ੍ਖਿਪਤੀਤਿ ਦਯ੍ਹਮਾਨਂ ਅਲਾਤਂ ਪਤਿਤਂ ਉਕ੍ਖਿਪਤਿ, ਪੁਨ ਯਥਾਠਾਨੇ ਠਪੇਤੀਤਿ ਅਤ੍ਥੋ. ਏਵਂ ਅਵਿਜ੍ਝਾਤਂ ਉਕ੍ਖਿਪਿਤ੍ਵਾ ਪਕ੍ਖਿਪਨ੍ਤਸ੍ਸੇਵ ਦੁਕ੍ਕਟਂ, ਵਿਜ੍ਝਾਤਂ ਪੁਨ ਜਾਲਾਪੇਨ੍ਤਸ੍ਸ ਪਾਚਿਤ੍ਤਿਯਮੇਵ.
੩੫੬. ਤਥਾਰੂਪਪਚ੍ਚਯਾਤਿ ਠਪੇਤ੍ਵਾ ਪਦੀਪਾਦੀਨਿ ਅਞ੍ਞੇਨਪਿ ਤਥਾਰੂਪੇਨ ਪਚ੍ਚਯੇਨ ਸਮਾਦਹਨ੍ਤਸ੍ਸ ਅਨਾਪਤ੍ਤਿ. ਆਪਦਾਸੂਤਿ ਦੁਟ੍ਠਵਾਲ਼ਮਿਗਅਮਨੁਸ੍ਸੇਹਿ ਉਪਦ੍ਦਵੋ ਹੋਤਿ, ਤਤ੍ਥ ਸਮਾਦਹਨ੍ਤਸ੍ਸਾਪਿ ਅਨਾਪਤ੍ਤਿ. ਸੇਸਂ ਉਤ੍ਤਾਨਮੇਵਾਤਿ. ਛਸਮੁਟ੍ਠਾਨਂ – ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.
ਜੋਤਿਸਿਕ੍ਖਾਪਦਂ ਛਟ੍ਠਂ.
੭. ਨਹਾਨਸਿਕ੍ਖਾਪਦਵਣ੍ਣਨਾ
੩੬੪. ਸਤ੍ਤਮੇ – ਚੁਣ੍ਣੇਨ ਵਾ ਮਤ੍ਤਿਕਾਯ ਵਾਤਿ ਏਤ੍ਥ ਚੁਣ੍ਣਮਤ੍ਤਿਕਾਨਂ ਅਭਿਸਙ੍ਖਰਣਕਾਲਤੋ ਪਟ੍ਠਾਯ ਸਬ੍ਬਪਯੋਗੇਸੁ ਦੁਕ੍ਕਟਂ.
੩੬੬. ਪਾਰਂ ਗਚ੍ਛਨ੍ਤੋ ਨ੍ਹਾਯਤੀਤਿ ਏਤ੍ਥ ਸੁਕ੍ਖਾਯ ਨਦਿਯਾ ਵਾਲਿਕਂ ਉਕ੍ਕਿਰਿਤ੍ਵਾ ਕਤਆਵਾਟਕੇਸੁਪਿ ਨ੍ਹਾਯਿਤੁਂ ਵਟ੍ਟਤਿ. ਆਪਦਾਸੂਤਿ ਭਮਰਾਦੀਹਿ ਅਨੁਬਦ੍ਧਸ੍ਸ ਉਦਕੇ ਨਿਮੁਜ੍ਜਿਤੁਂ ਵਟ੍ਟਤੀਤਿ. ਸੇਸਮੇਤ੍ਥ ਉਤ੍ਤਾਨਮੇਵ. ਏਲ਼ਕਲੋਮਸਮੁਟ੍ਠਾਨਂ – ਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.
ਨਹਾਨਸਿਕ੍ਖਾਪਦਂ ਸਤ੍ਤਮਂ.
੮. ਦੁਬ੍ਬਣ੍ਣਕਰਣਸਿਕ੍ਖਾਪਦਵਣ੍ਣਨਾ
੩੬੮-੯. ਅਟ੍ਠਮੇ – ਨਵਂ ਪਨ ਭਿਕ੍ਖੁਨਾ ਚੀਵਰਲਾਭੇਨਾਤਿ ਏਤ੍ਥ ਅਲਭੀਤਿ ਲਭੋ; ਲਭੋਯੇਵ ਲਾਭੋ. ਕਿਂ ਅਲਭਿ? ਚੀਵਰਂ. ਕੀਦਿਸਂ? ਨਵਂ. ਇਤਿ ‘‘ਨਵਚੀਵਰਲਾਭੇਨਾ’’ਤਿ ਵਤ੍ਤਬ੍ਬੇ ਅਨੁਨਾਸਿਕਲੋਪਂ ਅਕਤ੍ਵਾ ‘‘ਨਵਚੀਵਰਲਾਭੇਨਾ’’ਤਿ ਵੁਤ੍ਤਂ; ਪਟਿਲਦ੍ਧਨਵਚੀਵਰੇਨਾਤਿ ਅਤ੍ਥੋ. ਮਜ੍ਝੇ ਠਿਤਪਦਦ੍ਵਯੇ ਪਨਾਤਿ ਨਿਪਾਤੋ. ਭਿਕ੍ਖੁਨਾਤਿ ਯੇਨ ਲਦ੍ਧਂ ਤਸ੍ਸ ਨਿਦਸ੍ਸਨਂ. ਪਦਭਾਜਨੇ ਪਨ ਬ੍ਯਞ੍ਜਨਂ ਅਨਾਦਿਯਿਤ੍ਵਾ ਯਂ ਲਦ੍ਧਂ ਤਂ ਦਸ੍ਸੇਤੁਂ ‘‘ਚੀਵਰਂ ਨਾਮ ਛਨ੍ਨਂ ਚੀਵਰਾਨ’’ਨ੍ਤਿਆਦਿ ਵੁਤ੍ਤਂ. ਚੀਵਰਨ੍ਤਿ ਏਤ੍ਥ ਯਂ ਨਿਵਾਸੇਤੁਂ ਵਾ ਪਾਰੁਪਿਤੁਂ ਵਾ ਸਕ੍ਕਾ ਹੋਤਿ, ਤਦੇਵ ਵੇਦਿਤਬ੍ਬਂ. ਤੇਨੇਵ ‘‘ਵਿਕਪ੍ਪਨੁਪਗਪਚ੍ਛਿਮ’’ਨ੍ਤਿ ਨ ਵੁਤ੍ਤਂ. ਕਂਸਨੀਲਨ੍ਤਿ ਚਮ੍ਮਕਾਰਨੀਲਂ. ਮਹਾਪਚ੍ਚਰਿਯਂ ਪਨ ‘‘ਅਯੋਮਲਂ ਲੋਹਮਲਂ ਏਤਂ ਕਂਸਨੀਲਂ ਨਾਮਾ’’ਤਿ ਵੁਤ੍ਤਂ. ਪਲਾਸਨੀਲਨ੍ਤਿ ਯੋ ਕੋਚਿ ਨੀਲਵਣ੍ਣੋ ਪਣ੍ਣਰਸੋ. ਦੁਬ੍ਬਣ੍ਣਕਰਣਂ ਆਦਾਤਬ੍ਬਨ੍ਤਿ ਏਤਂ ਕਪ੍ਪਬਿਨ੍ਦੁਂ ਸਨ੍ਧਾਯ ਵੁਤ੍ਤਂ; ਨ ਨੀਲਾਦੀਹਿ ਸਕਲਚੀਵਰਸ੍ਸ ਦੁਬ੍ਬਣ੍ਣਕਰਣਂ. ਤਞ੍ਚ ਪਨ ਕਪ੍ਪਂ ਆਦਿਯਨ੍ਤੇਨ ਚੀਵਰਂ ਰਜਿਤ੍ਵਾ ਚਤੂਸੁ ਵਾ ਕੋਣੇਸੁ ਤੀਸੁ ਵਾ ਦ੍ਵੀਸੁ ਵਾ ਏਕਸ੍ਮਿਂ ਵਾ ਕੋਣੇ ਮੋਰਸ੍ਸ ਅਕ੍ਖਿਮਣ੍ਡਲਮਤ੍ਤਂ ਵਾ ਮਙ੍ਕੁਲਪਿਟ੍ਠਿਮਤ੍ਤਂ ਵਾ ਆਦਾਤਬ੍ਬਂ. ਮਹਾਪਚ੍ਚਰਿਯਂ ‘‘ਪਤ੍ਤੇ ਵਾ ਗਣ੍ਠਿਯਂ ਵਾ ਨ ਵਟ੍ਟਤੀ’’ਤਿ ਵੁਤ੍ਤਂ. ਮਹਾਅਟ੍ਠਕਥਾਯਂ ਪਨ ‘‘ਵਟ੍ਟਤਿਯੇਵਾ’’ਤਿ ਵੁਤ੍ਤਂ. ਪਾਲ਼ਿਕਪ੍ਪਕਣ੍ਣਿਕਕਪ੍ਪਾਦਯੋ ਪਨ ਸਬ੍ਬਤ੍ਥ ਪਟਿਸਿਦ੍ਧਾ, ਤਸ੍ਮਾ ਠਪੇਤ੍ਵਾ ਏਕਂ ਵਟ੍ਟਬਿਨ੍ਦੁਂ ਅਞ੍ਞੇਨ ਕੇਨਚਿਪਿ ਵਿਕਾਰੇਨ ਕਪ੍ਪੋ ਨ ਕਾਤਬ੍ਬੋ.
੩੭੧. ਅਗ੍ਗਲ਼ੇਤਿਆਦੀਸੁ ਏਤਾਨਿ ਅਗ੍ਗਲ਼ਾਦੀਨਿ ਕਪ੍ਪਕਤਚੀਵਰੇ ਪਚ੍ਛਾ ਆਰੋਪੇਤ੍ਵਾ ਕਪ੍ਪਕਰਣਕਿਚ੍ਚਂ ਨਤ੍ਥਿ. ਸੇਸਂ ਉਤ੍ਤਾਨਮੇਵ. ਏਲ਼ਕਲੋਮਸਮੁਟ੍ਠਾਨਂ – ਕਿਰਿਯਾਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ; ਕਾਯਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.
ਦੁਬ੍ਬਣ੍ਣਕਰਣਸਿਕ੍ਖਾਪਦਂ ਅਟ੍ਠਮਂ.
੯. ਵਿਕਪ੍ਪਨਸਿਕ੍ਖਾਪਦਵਣ੍ਣਨਾ
੩੭੪. ਨਵਮੇ – ਤਸ੍ਸ ਵਾ ਅਦਿਨ੍ਨਨ੍ਤਿ ਚੀਵਰਸਾਮਿਕਸ੍ਸ ‘‘ਪਰਿਭੁਞ੍ਜ ਵਾ ਵਿਸ੍ਸਜ੍ਜੇਹਿ ਵਾ ਯਥਾਪਚ੍ਚਯਂ ਵਾ ਕਰੋਹੀ’’ਤਿ ਏਵਂ ਵਤ੍ਵਾ ਅਦਿਨ੍ਨਂ. ਤਸ੍ਸ ਵਾ ਅਵਿਸ੍ਸਸਨ੍ਤੋਤਿ ਯੇਨ ਵਿਨਯਕਮ੍ਮਂ ਕਤਂ, ਤਸ੍ਸ ਅਵਿਸ੍ਸਾਸੇਨ ਵਾ. ਤੇਨ ਪਨ ਦਿਨ੍ਨਂ ਵਾ ਤਸ੍ਸ ਵਿਸ੍ਸਾਸੇਨ ਵਾ ਪਰਿਭੁਞ੍ਜਨ੍ਤਸ੍ਸ ਅਨਾਪਤ੍ਤਿ. ਸੇਸਮੇਤ੍ਥ ਤਿਂਸਕਵਣ੍ਣਨਾਯਂ ਵੁਤ੍ਤਨਯਤ੍ਤਾ ਉਤ੍ਤਾਨਮੇਵਾਤਿ. ਕਥਿਨਸਮੁਟ੍ਠਾਨਂ – ਕਾਯਵਾਚਤੋ ਕਾਯਵਾਚਾਚਿਤ੍ਤਤੋ ਚ ਸਮੁਟ੍ਠਾਤਿ, ਕਿਰਿਯਾਕਿਰਿਯਂ, ਨੋਸਞ੍ਞਾਵਿਮੋਕ੍ਖਂ, ਅਚਿਤ੍ਤਕਂ, ਪਣ੍ਣਤ੍ਤਿਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਤਿਚਿਤ੍ਤਂ, ਤਿਵੇਦਨਨ੍ਤਿ.
ਵਿਕਪ੍ਪਨਸਿਕ੍ਖਾਪਦਂ ਨਵਮਂ.
੧੦. ਚੀਵਰਾਪਨਿਧਾਨਸਿਕ੍ਖਾਪਦਵਣ੍ਣਨਾ
੩੭੭-੮੧. ਦਸਮੇ – ਅਪਨਿਧੇਨ੍ਤੀਤਿ ਅਪਨੇਤ੍ਵਾ ਨਿਧੇਨ੍ਤਿ. ਹਸਾਪੇਕ੍ਖੋਤਿ ਹਸਾਧਿਪ੍ਪਾਯੋ. ਅਞ੍ਞਂ ਪਰਿਕ੍ਖਾਰਨ੍ਤਿ ਪਾਲ਼ਿਯਾ ਅਨਾਗਤਂ ਪਤ੍ਤਤ੍ਥਵਿਕਾਦਿਂ. ਧਮ੍ਮਿਂ ਕਥਂ ਕਤ੍ਵਾਤਿ ‘‘ਸਮਣੇਨ ਨਾਮ ਅਨਿਹਿਤਪਰਿਕ੍ਖਾਰੇਨ ਭਵਿਤੁਂ ਨ ਵਟ੍ਟਤੀ’’ਤਿ ਏਵਂ ਧਮ੍ਮਕਥਂ ਕਥੇਤ੍ਵਾ ਦਸ੍ਸਾਮੀਤਿ ਨਿਕ੍ਖਿਪਤੋ ਅਨਾਪਤ੍ਤਿ. ਸੇਸਮੇਤ੍ਥ ਉਤ੍ਤਾਨਮੇਵ. ਤਿਸਮੁਟ੍ਠਾਨਂ – ਕਿਰਿਯਂ, ਸਞ੍ਞਾਵਿਮੋਕ੍ਖਂ, ਸਚਿਤ੍ਤਕਂ, ਲੋਕਵਜ੍ਜਂ, ਕਾਯਕਮ੍ਮਂ, ਵਚੀਕਮ੍ਮਂ, ਅਕੁਸਲਚਿਤ੍ਤਂ, ਤਿਵੇਦਨਨ੍ਤਿ.
ਚੀਵਰਾਪਨਿਧਾਨਸਿਕ੍ਖਾਪਦਂ ਦਸਮਂ.
ਸਮਤ੍ਤੋ ਵਣ੍ਣਨਾਕ੍ਕਮੇਨ ਸੁਰਾਪਾਨਵਗ੍ਗੋ ਛਟ੍ਠੋ.