੭. ਕਥਿਨਕ੍ਖਨ੍ਧਕਂ

ਕਥਿਨਾਨੁਜਾਨਨਕਥਾ

੩੦੬. ਕਥਿਨਕ੍ਖਨ੍ਧਕੇ – ਪਾਵੇਯ੍ਯਕਾਤਿ ਪਾਵੇਯ੍ਯਰਟ੍ਠਵਾਸਿਨੋ. ਪਾਵੇਯ੍ਯਂ ਨਾਮ ਕੋਸਲੇਸੁ ਪਚ੍ਛਿਮਦਿਸਾਭਾਗੇ ਰਟ੍ਠਂ; ਤਤ੍ਥ ਵਾਸਿਨੋਤਿ ਵੁਤ੍ਤਂ ਹੋਤਿ. ਕੋਸਲਰਞ੍ਞੋ ਏਕਪਿਤੁਕਭਾਤੂਨਂ ਭਦ੍ਦਵਗ੍ਗਿਯਤ੍ਥੇਰਾਨਂ ਏਤਂ ਅਧਿਵਚਨਂ. ਤੇਸੁ ਸਬ੍ਬਜੇਟ੍ਠਕੋ ਅਨਾਗਾਮੀ, ਸਬ੍ਬਪਚ੍ਛਿਮਕੋ ਸੋਤਾਪਨ੍ਨੋ, ਏਕੋਪਿ ਅਰਹਾ ਵਾ ਪੁਥੁਜ੍ਜਨੋ ਵਾ ਨਤ੍ਥਿ. ਆਰਞ੍ਞਿਕਾਤਿ ਧੁਤਙ੍ਗਸਮਾਦਾਨਵਸੇਨ ਆਰਞ੍ਞਿਕਾ; ਨ ਅਰਞ੍ਞਵਾਸਮਤ੍ਤੇਨ. ਪਿਣ੍ਡਪਾਤਿਕਾਦਿਭਾਵੇਪਿ ਤੇਸਂ ਏਸੇਵ ਨਯੋ. ਸੀਸਵਸੇਨ ਚੇਤਂ ਵੁਤ੍ਤਂ. ਇਮੇ ਪਨ ਤੇਰਸਾਪਿ ਧੁਤਙ੍ਗਾਨਿ ਸਮਾਦਾਯੇਵ ਵਤ੍ਤਨ੍ਤਿ. ਉਦਕਸਙ੍ਗਹੇਤਿ ਉਦਕੇਨ ਸਙ੍ਗਹਿਤੇ ਘਟਿਤੇ ਸਂਸਟ੍ਠੇ; ਥਲੇ ਚ ਨਿਨ੍ਨੇ ਚ ਏਕੋਦਕੀਭੂਤੇਤਿ ਅਤ੍ਥੋ.

ਉਦਕਚਿਕ੍ਖਲ੍ਲੇਤਿ ਅਕ੍ਕਨ੍ਤਅਕ੍ਕਨ੍ਤਟ੍ਠਾਨੇ ਉਦਕਚਿਕ੍ਖਲ੍ਲੋ ਉਟ੍ਠਹਿਤ੍ਵਾ ਯਾਵ ਆਨਿਸਦਾ ਪਹਰਤਿ, ਈਦਿਸੇ ਚਿਕ੍ਖਲ੍ਲੇਤਿ ਅਤ੍ਥੋ. ਓਕਪੁਣ੍ਣੇਹੀਤਿ ਉਦਕਪੁਣ੍ਣੇਹਿ. ਤੇਸਂ ਕਿਰ ਚੀਵਰਾਨਿ ਘਨਾਨਿ, ਤੇਸੁ ਪਤਿਤਂ ਉਦਕਂ ਨ ਪਗ੍ਘਰਤਿ ਘਨਤ੍ਤਾ ਪੁਟਬਦ੍ਧਂ ਵਿਯ ਤਿਟ੍ਠਤਿ. ਤੇਨ ਵੁਤ੍ਤਂ – ‘‘ਓਕਪੁਣ੍ਣੇਹਿ ਚੀਵਰੇਹੀ’’ਤਿ. ‘‘ਓਘਪੁਣ੍ਣੇਹੀ’’ਤਿਪਿ ਪਾਠੋ.

ਅਵਿਵਦਮਾਨਾ ਵਸ੍ਸਂ ਵਸਿਮ੍ਹਾਤਿ ਏਤ੍ਥ ਆਗਨ੍ਤੁਕਟ੍ਠਾਨੇ ਸੇਨਾਸਨਫਾਸੁਤਾਯ ਅਭਾਵੇਨ ਚ ਭਗਵਤੋ ਦਸ੍ਸਨਾਲਾਭੇਨ ਉਕ੍ਕਣ੍ਠਿਤਤਾਯ ਚ ਤੇ ਭਿਕ੍ਖੂ ਫਾਸੁਂ ਨ ਵਸਿਂਸੁ, ਤਸ੍ਮਾ ‘‘ਅਵਿਵਦਮਾਨਾ ਫਾਸੁਕਂ ਵਸ੍ਸਂ ਵਸਿਮ੍ਹਾ’’ਤਿ ਨਾਵੋਚੁਂ. ਧਮ੍ਮਿਂ ਕਥਂ ਕਤ੍ਵਾਤਿ ਭਗਵਾ ਤੇਸਂ ਭਿਕ੍ਖੂਨਂ ਅਨਮਤਗ੍ਗਿਯਕਥਂ ਕਥੇਸਿ. ਤੇ ਸਬ੍ਬੇਪਿ ਕਥਾਪਰਿਯੋਸਾਨੇ ਅਰਹਤ੍ਤਂ ਪਾਪੁਣਿਤ੍ਵਾ ਨਿਸਿਨ੍ਨਟ੍ਠਾਨਤੋਯੇਵ ਆਕਾਸੇ ਉਪ੍ਪਤਿਤ੍ਵਾ ਅਗਮਂਸੁ, ਤਂ ਸਨ੍ਧਾਯ ਵੁਤ੍ਤਂ – ‘‘ਧਮ੍ਮਿਂ ਕਥਂ ਕਤ੍ਵਾ’’ਤਿ. ਤਤੋ ਭਗਵਾ ‘‘ਸਚੇ ਕਥਿਨਤ੍ਥਾਰੋ ਪਞ੍ਞਤ੍ਤੋ ਅਭਵਿਸ੍ਸ, ਏਤੇ ਭਿਕ੍ਖੂ ਏਕਂ ਚੀਵਰਂ ਠਪੇਤ੍ਵਾ ਸਨ੍ਤਰੁਤ੍ਤਰੇਨ ਆਗਚ੍ਛਨ੍ਤਾ ਨ ਏਵਂ ਕਿਲਨ੍ਤਾ ਅਸ੍ਸੁ, ਕਥਿਨਤ੍ਥਾਰੋ ਚ ਨਾਮੇਸ ਸਬ੍ਬਬੁਦ੍ਧੇਹਿ ਅਨੁਞ੍ਞਾਤੋ’’ਤਿ ਚਿਨ੍ਤੇਤ੍ਵਾ ਕਥਿਨਤ੍ਥਾਰਂ ਅਨੁਜਾਨਿਤੁਕਾਮੋ ਭਿਕ੍ਖੂ ਆਮਨ੍ਤੇਸਿ, ਆਮਨ੍ਤੇਤ੍ਵਾ ਚ ਪਨ ‘‘ਅਨੁਜਾਨਾਮਿ ਭਿਕ੍ਖਵੇ’’ਤਿਆਦਿਮਾਹ.

ਤਤ੍ਥ ਅਤ੍ਥਤਕਥਿਨਾਨਂ ਵੋਤਿ ਨਿਪਾਤਮਤ੍ਤਂ ਵੋਕਾਰੋ; ਅਤ੍ਥਤਕਥਿਨਾਨਨ੍ਤਿ ਅਤ੍ਥੋ. ਏਵਞ੍ਹਿ ਸਤਿ ਪਰਤੋ ‘‘ਸੋ ਨੇਸਂ ਭਵਿਸ੍ਸਤੀ’’ਤਿ ਯੁਜ੍ਜਤਿ. ਅਥ ਵਾ ਵੋਤਿ ਸਾਮਿਵਚਨਮੇਵੇਤਂ. ਸੋ ਨੇਸਨ੍ਤਿ ਏਤ੍ਥ ਪਨ ਸੋ ਚੀਵਰੁਪ੍ਪਾਦੋ ਯੇ ਅਤ੍ਥਤਕਥਿਨਾ, ਤੇਸਂ ਭਵਿਸ੍ਸਤੀਤਿ ਅਤ੍ਥੋ.

ਤਤ੍ਥ ਅਨਾਮਨ੍ਤਚਾਰੋਤਿ ਯਾਵ ਕਥਿਨਂ ਨ ਉਦ੍ਧਰਿਯਤਿ, ਤਾਵ ਅਨਾਮਨ੍ਤੇਤ੍ਵਾ ਚਰਣਂ ਕਪ੍ਪਿਸ੍ਸਤਿ, ਚਾਰਿਤ੍ਤਸਿਕ੍ਖਾਪਦੇਨ ਅਨਾਪਤ੍ਤਿ ਭਵਿਸ੍ਸਤੀਤਿ ਅਤ੍ਥੋ. ਅਸਮਾਦਾਨਚਾਰੋਤਿ ਤਿਚੀਵਰਂ ਅਸਮਾਦਾਯ ਚਰਣਂ; ਚੀਵਰਵਿਪ੍ਪਵਾਸੋ ਕਪ੍ਪਿਸ੍ਸਤੀਤਿ ਅਤ੍ਥੋ. ਗਣਭੋਜਨਨ੍ਤਿ ਗਣਭੋਜਨਮ੍ਪਿ ਕਪ੍ਪਿਸ੍ਸਤਿ. ਯਾਵਦਤ੍ਥਚੀਵਰਨ੍ਤਿ ਯਾਵਤ੍ਤਕੇਨ ਚੀਵਰੇਨ ਅਤ੍ਥੋ, ਤਾਵਤ੍ਤਕਂ ਅਨਧਿਟ੍ਠਿਤਂ ਅਵਿਕਪ੍ਪਿਤਂ ਕਪ੍ਪਿਸ੍ਸਤੀਤਿ ਅਤ੍ਥੋ. ਯੋ ਚ ਤਤ੍ਥ ਚੀਵਰੁਪ੍ਪਾਦੋਤਿ ਤਤ੍ਥ ਕਥਿਨਤ੍ਥਤਸੀਮਾਯਂ ਮਤਕਚੀਵਰਂ ਵਾ ਹੋਤੁ ਸਙ੍ਘਂ ਉਦ੍ਦਿਸ੍ਸ ਦਿਨ੍ਨਂ ਵਾ ਸਙ੍ਘਿਕੇਨ ਤਤ੍ਰੁਪ੍ਪਾਦੇਨ ਆਭਤਂ ਵਾ, ਯੇਨ ਕੇਨਚਿ ਆਕਾਰੇਨ ਯਂ ਸਙ੍ਘਿਕਚੀਵਰਂ ਉਪ੍ਪਜ੍ਜਤਿ, ਤਂ ਤੇਸਂ ਭਵਿਸ੍ਸਤੀਤਿ ਅਤ੍ਥੋ.

ਏਵਞ੍ਚ ਪਨ ਭਿਕ੍ਖਵੇ ਕਥਿਨਂ ਅਤ੍ਥਰਿਤਬ੍ਬਨ੍ਤਿ ਏਤ੍ਥ ਕਥਿਨਤ੍ਥਾਰਂ ਕੇ ਲਭਨ੍ਤਿ, ਕੇ ਨ ਲਭਨ੍ਤੀਤਿ? ਗਣਨਵਸੇਨ ਤਾਵ ਪਚ੍ਛਿਮਕੋਟਿਯਾ ਪਞ੍ਚ ਜਨਾ ਲਭਨ੍ਤਿ, ਉਦ੍ਧਂ ਸਤਸਹਸ੍ਸਮ੍ਪਿ, ਪਞ੍ਚਨ੍ਨਂ ਹੇਟ੍ਠਾ ਨ ਲਭਨ੍ਤਿ. ਵੁਤ੍ਥਵਸ੍ਸਵਸੇਨ ਪੁਰਿਮਿਕਾਯ ਵਸ੍ਸਂ ਉਪਗਨ੍ਤ੍ਵਾ ਪਠਮਪਵਾਰਣਾਯ ਪਵਾਰਿਤਾ ਲਭਨ੍ਤਿ, ਛਿਨ੍ਨਵਸ੍ਸਾ ਵਾ ਪਚ੍ਛਿਮਿਕਾਯ ਉਪਗਤਾ ਵਾ ਨ ਲਭਨ੍ਤਿ, ਅਞ੍ਞਸ੍ਮਿਂ ਵਿਹਾਰੇ ਵੁਤ੍ਥਵਸ੍ਸਾਪਿ ਨ ਲਭਨ੍ਤੀਤਿ ਮਹਾਪਚ੍ਚਰਿਯਂ ਵੁਤ੍ਤਂ. ਪੁਰਿਮਿਕਾਯ ਉਪਗਤਾਨਂ ਪਨ ਸਬ੍ਬੇ ਗਣਪੂਰਕਾ ਹੋਨ੍ਤਿ, ਆਨਿਸਂਸਂ ਨ ਲਭਨ੍ਤਿ, ਆਨਿਸਂਸੋ ਇਤਰੇਸਂਯੇਵ ਹੋਤਿ. ਸਚੇ ਪੁਰਿਮਿਕਾਯ ਉਪਗਤਾ ਚਤ੍ਤਾਰੋ ਵਾ ਹੋਨ੍ਤਿ ਤਯੋ ਵਾ ਦ੍ਵੇ ਵਾ ਏਕੋ ਵਾ, ਇਤਰੇ ਗਣਪੂਰਕੇ ਕਤ੍ਵਾ ਕਥਿਨਂ ਅਤ੍ਥਰਿਤਬ੍ਬਂ. ਅਥ ਚਤ੍ਤਾਰੋ ਭਿਕ੍ਖੂ ਉਪਗਤਾ, ਏਕੋ ਪਰਿਪੁਣ੍ਣਵਸ੍ਸੋ ਸਾਮਣੇਰੋ, ਸੋ ਚੇ ਪਚ੍ਛਿਮਿਕਾਯ ਉਪਸਮ੍ਪਜ੍ਜਤਿ, ਗਣਪੂਰਕੋ ਚੇਵ ਹੋਤਿ, ਆਨਿਸਂਸਞ੍ਚ ਲਭਤਿ. ਤਯੋ ਭਿਕ੍ਖੂ ਦ੍ਵੇ ਸਾਮਣੇਰਾ, ਦ੍ਵੇ ਭਿਕ੍ਖੂ ਤਯੋ ਸਾਮਣੇਰਾ, ਏਕੋ ਭਿਕ੍ਖੁ ਚਤ੍ਤਾਰੋ ਸਾਮਣੇਰਾਤਿ ਏਤ੍ਥਾਪਿ ਏਸੇਵ ਨਯੋ. ਸਚੇ ਪੁਰਿਮਿਕਾਯ ਉਪਗਤਾ ਕਥਿਨਤ੍ਥਾਰਕੁਸਲਾ ਨ ਹੋਨ੍ਤਿ, ਅਤ੍ਥਾਰਕੁਸਲਾ ਖਨ੍ਧਕਭਾਣਕਥੇਰਾ ਪਰਿਯੇਸਿਤ੍ਵਾ ਆਨੇਤਬ੍ਬਾ. ਕਮ੍ਮਵਾਚਂ ਸਾਵੇਤ੍ਵਾ ਕਥਿਨਂ ਅਤ੍ਥਰਾਪੇਤ੍ਵਾ ਦਾਨਞ੍ਚ ਭੁਞ੍ਜਿਤ੍ਵਾ ਗਮਿਸ੍ਸਨ੍ਤਿ. ਆਨਿਸਂਸੋ ਪਨ ਇਤਰੇਸਂਯੇਵ ਹੋਤਿ.

ਕਥਿਨਂ ਕੇਨ ਦਿਨ੍ਨਂ ਵਟ੍ਟਤਿ? ਯੇਨ ਕੇਨਚਿ ਦੇਵੇਨ ਵਾ ਮਨੁਸ੍ਸੇਨ ਵਾ ਪਞ੍ਚਨ੍ਨਂ ਵਾ ਸਹਧਮ੍ਮਿਕਾਨਂ ਅਞ੍ਞਤਰੇਨ ਦਿਨ੍ਨਂ ਵਟ੍ਟਤਿ. ਕਥਿਨਦਾਯਕਸ੍ਸ ਵਤ੍ਤਂ ਅਤ੍ਥਿ, ਸਚੇ ਸੋ ਤਂ ਅਜਾਨਨ੍ਤੋ ਪੁਚ੍ਛਤਿ – ‘‘ਭਨ੍ਤੇ ਕਥਂ ਕਥਿਨਂ ਦਾਤਬ੍ਬ’’ਨ੍ਤਿ ਤਸ੍ਸ ਏਵਂ ਆਚਿਕ੍ਖਿਤਬ੍ਬਂ – ‘‘ਤਿਣ੍ਣਂ ਚੀਵਰਾਨਂ ਅਞ੍ਞਤਰਪ੍ਪਹੋਨਕਂ ਸੂਰਿਯੁਗ੍ਗਮਨਸਮਯੇ ਵਤ੍ਥਂ ‘ਕਥਿਨਚੀਵਰਂ ਦੇਮਾ’ਤਿ ਦਾਤੁਂ ਵਟ੍ਟਤਿ, ਤਸ੍ਸ ਪਰਿਕਮ੍ਮਤ੍ਥਂ ਏਤ੍ਤਕਾ ਨਾਮ ਸੂਚਿਯੋ, ਏਤ੍ਤਕਂ ਸੁਤ੍ਤਂ, ਏਤ੍ਤਕਂ ਰਜਨਂ, ਪਰਿਕਮ੍ਮਂ ਕਰੋਨ੍ਤਾਨਂ ਏਤ੍ਤਕਾਨਂ ਭਿਕ੍ਖੂਨਂ ਯਾਗੁਭਤ੍ਤਞ੍ਚ ਦਾਤੁਂ ਵਟ੍ਟਤੀ’’ਤਿ.

ਕਥਿਨਤ੍ਥਾਰਕੇਨਾਪਿ ਧਮ੍ਮੇਨ ਸਮੇਨ ਉਪ੍ਪਨ੍ਨਂ ਕਥਿਨਂ ਅਤ੍ਥਰਨ੍ਤੇਨ ਵਤ੍ਤਂ ਜਾਨਿਤਬ੍ਬਂ. ਤਨ੍ਤਵਾਯਗੇਹਤੋ ਹਿ ਆਭਤਸਨ੍ਤਾਨੇਨੇਵ ਖਲਿਮਕ੍ਖਿਤਸਾਟਕੋ ਨ ਵਟ੍ਟਤਿ, ਮਲੀਨਸਾਟਕੋਪਿ ਨ ਵਟ੍ਟਤਿ, ਤਸ੍ਮਾ ਕਥਿਨਤ੍ਥਾਰਸਾਟਕਂ ਲਭਿਤ੍ਵਾ ਸੁਟ੍ਠੁ ਧੋਵਿਤ੍ਵਾ ਸੂਚਿਆਦੀਨਿ ਚੀਵਰਕਮ੍ਮੂਪਕਰਣਾਨਿ ਸਜ੍ਜੇਤ੍ਵਾ ਬਹੂਹਿ ਭਿਕ੍ਖੂਹਿ ਸਦ੍ਧਿਂ ਤਦਹੇਵ ਸਿਬ੍ਬਿਤ੍ਵਾ ਨਿਟ੍ਠਿਤਸੂਚਿਕਮ੍ਮਂ ਰਜਿਤ੍ਵਾ ਕਪ੍ਪਬਿਨ੍ਦੁਂ ਦਤ੍ਵਾ ਕਥਿਨਂ ਅਤ੍ਥਰਿਤਬ੍ਬਂ. ਸਚੇ ਤਸ੍ਮਿਂ ਅਨਤ੍ਥਤੇਯੇਵ ਅਞ੍ਞਂ ਕਥਿਨਸਾਟਕਂ ਆਹਰਤਿ, ਅਞ੍ਞਾਨਿ ਚ ਬਹੂਨਿ ਕਥਿਨਾਨਿਸਂਸਵਤ੍ਥਾਨਿ ਦੇਤਿ, ਯੋ ਆਨਿਸਂਸਂ ਬਹੁਂ ਦੇਤਿ, ਤਸ੍ਸ ਸਨ੍ਤਕੇਨੇਵ ਅਤ੍ਥਰਿਤਬ੍ਬਂ. ਇਤਰੋ ਯਥਾ ਤਥਾ ਓਵਦਿਤ੍ਵਾ ਸਞ੍ਞਾਪੇਤਬ੍ਬੋ.

ਕਥਿਨਂ ਪਨ ਕੇਨ ਅਤ੍ਥਰਿਤਬ੍ਬਂ? ਯਸ੍ਸ ਸਙ੍ਘੋ ਕਥਿਨਚੀਵਰਂ ਦੇਤਿ. ਸਙ੍ਘੇਨ ਪਨ ਕਸ੍ਸ ਦਾਤਬ੍ਬਂ? ਯੋ ਜਿਣ੍ਣਚੀਵਰੋ ਹੋਤਿ. ਸਚੇ ਬਹੂ ਜਿਣ੍ਣਚੀਵਰਾ ਹੋਨ੍ਤਿ, ਵੁਡ੍ਢਸ੍ਸ ਦਾਤਬ੍ਬਂ. ਵੁਡ੍ਢੇਸੁਪਿ ਯੋ ਮਹਾਪਰਿਸੋ ਤਦਹੇਵ ਚੀਵਰਂ ਕਤ੍ਵਾ ਅਤ੍ਥਰਿਤੁਂ ਸਕ੍ਕੋਤਿ, ਤਸ੍ਸ ਦਾਤਬ੍ਬਂ. ਸਚੇ ਵੁਡ੍ਢੋ ਨ ਸਕ੍ਕੋਤਿ ਨਵਕਤਰੋ ਸਕ੍ਕੋਤਿ, ਤਸ੍ਸ ਦਾਤਬ੍ਬਂ. ਅਪਿਚ ਸਙ੍ਘੇਨ ਮਹਾਥੇਰਸ੍ਸ ਸਙ੍ਗਹਂ ਕਾਤੁਂ ਵਟ੍ਟਤਿ, ਤਸ੍ਮਾ ‘‘ਤੁਮ੍ਹੇ ਭਨ੍ਤੇ ਗਣ੍ਹਥ, ਮਯਂ ਕਤ੍ਵਾ ਦਸ੍ਸਾਮਾ’’ਤਿ ਵਤ੍ਤਬ੍ਬਂ. ਤੀਸੁ ਚੀਵਰੇਸੁ ਯਂ ਜਿਣ੍ਣਂ ਹੋਤਿ, ਤਦਤ੍ਥਾਯ ਦਾਤਬ੍ਬਂ. ਪਕਤਿਯਾ ਦੁਪਟ੍ਟਚੀਵਰਸ੍ਸ ਦੁਪਟ੍ਟਤ੍ਥਾਯੇਵ ਦਾਤਬ੍ਬਂ. ਸਚੇਪਿਸ੍ਸ ਏਕਪਟ੍ਟਚੀਵਰਂ ਘਨਂ ਹੋਤਿ, ਕਥਿਨਸਾਟਕੋ ਚ ਪੇਲਵੋ, ਸਾਰੁਪ੍ਪਤ੍ਥਾਯ ਦੁਪਟ੍ਟਪ੍ਪਹੋਨਕਮੇਵ ਦਾਤਬ੍ਬਂ, ‘‘ਅਹਂ ਅਲਭਨ੍ਤੋ ਏਕਪਟ੍ਟਂ ਪਾਰੁਪਾਮੀ’’ਤਿ ਵਦਨ੍ਤਸ੍ਸਾਪਿ ਦੁਪਟ੍ਟਂ ਦਾਤੁਂ ਵਟ੍ਟਤਿ. ਯੋ ਪਨ ਲੋਭਪਕਤਿਕੋ ਹੋਤਿ, ਤਸ੍ਸ ਨ ਦਾਤਬ੍ਬਂ. ਤੇਨਾਪਿ ‘‘ਕਥਿਨਂ ਅਤ੍ਥਰਿਤ੍ਵਾ ਪਚ੍ਛਾ ਸਿਬ੍ਬਿਤ੍ਵਾ ਦ੍ਵੇ ਚੀਵਰਾਨਿ ਕਰਿਸ੍ਸਾਮੀ’’ਤਿ ਨ ਗਹੇਤਬ੍ਬਂ. ਯਸ੍ਸ ਪਨ ਦੀਯਤਿ, ਤਸ੍ਸ ਯੇਨ ਵਿਧਿਨਾ ਦਾਤਬ੍ਬਂ, ਤਂ ਦਸ੍ਸੇਤੁਂ ‘‘ਏਵਞ੍ਚ ਪਨ ਭਿਕ੍ਖਵੇ ਕਥਿਨਂ ਅਤ੍ਥਰਿਤਬ੍ਬ’’ਨ੍ਤਿ ਆਰਭਿਤ੍ਵਾ ਸੁਣਾਤੁ ਮੇ ਭਨ੍ਤੇਤਿਆਦਿਕਾ ਦਾਨਕਮ੍ਮਵਾਚਾ ਤਾਵ ਵੁਤ੍ਤਾ.

ਏਵਂ ਦਿਨ੍ਨੇ ਪਨ ਕਥਿਨੇ ਸਚੇ ਤਂ ਕਥਿਨਦੁਸ੍ਸਂ ਨਿਟ੍ਠਿਤਪਰਿਕਮ੍ਮਮੇਵ ਹੋਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਨਿਟ੍ਠਿਤਪਰਿਕਮ੍ਮਂ ਹੋਤਿ, ‘‘ਅਹਂ ਥੇਰੋ’’ਤਿ ਵਾ ‘‘ਬਹੁਸ੍ਸੁਤੋ’’ਤਿ ਵਾ ਏਕੇਨਾਪਿ ਅਕਾਤੁਂ ਨ ਲਬ੍ਭਤਿ, ਸਬ੍ਬੇਹੇਵ ਸਨ੍ਨਿਪਤਿਤ੍ਵਾ ਧੋਵਨਸਿਬ੍ਬਨਰਜਨਾਨਿ ਨਿਟ੍ਠਾਪੇਤਬ੍ਬਾਨਿ. ਇਦਞ੍ਹਿ ਕਥਿਨਵਤ੍ਤਂ ਨਾਮ ਬੁਦ੍ਧਪ੍ਪਸਤ੍ਥਂ. ਅਤੀਤੇ ਪਦੁਮੁਤ੍ਤਰੋਪਿ ਭਗਵਾ ਕਥਿਨਵਤ੍ਤਂ ਅਕਾਸਿ. ਤਸ੍ਸ ਕਿਰ ਅਗ੍ਗਸਾਵਕੋ ਸੁਜਾਤਤ੍ਥੇਰੋ ਨਾਮ ਕਥਿਨਂ ਗਣ੍ਹਿ, ਤਂ ਸਤ੍ਥਾ ਅਟ੍ਠਸਟ੍ਠਿਯਾ ਭਿਕ੍ਖੁਸਤਸਹਸ੍ਸੇਹਿ ਸਦ੍ਧਿਂ ਨਿਸੀਦਿਤ੍ਵਾ ਅਕਾਸਿ.

ਕਤਪਰਿਯੋਸਿਤਂ ਪਨ ਕਥਿਨਂ ਗਹੇਤ੍ਵਾ ਅਤ੍ਥਾਰਕੇਨ ਭਿਕ੍ਖੁਨਾ ‘‘ਸਚੇ ਸਙ੍ਘਾਟਿਯਾ ਕਥਿਨਂ ਅਤ੍ਥਰਿਤੁਕਾਮੋ ਹੋਤਿ, ਪੋਰਾਣਿਕਾ ਸਙ੍ਘਾਟਿ ਪਚ੍ਚੁਦ੍ਧਰਿਤਬ੍ਬਾ, ਨਵਾ ਸਙ੍ਘਾਟਿ ਅਧਿਟ੍ਠਾਤਬ੍ਬਾ. ‘ਇਮਾਯ ਸਙ੍ਘਾਟਿਯਾ ਕਥਿਨਂ ਅਤ੍ਥਰਾਮੀ’ਤਿ ਵਾਚਾ ਭਿਨ੍ਦਿਤਬ੍ਬਾ’’ਤਿਆਦਿਨਾ ਪਰਿਵਾਰੇ ਵੁਤ੍ਤਵਿਧਾਨੇਨ ਕਥਿਨਂ ਅਤ੍ਥਰਿਤਬ੍ਬਂ. ਅਤ੍ਥਰਿਤ੍ਵਾ ਚ ਪਨ ‘‘ਤੇਨ ਕਥਿਨਤ੍ਥਾਰਕੇਨ ਭਿਕ੍ਖੁਨਾ ਸਙ੍ਘਂ ਉਪਸਙ੍ਕਮਿਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘ਅਤ੍ਥਤਂ ਭਨ੍ਤੇ ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਥਾ’ਤਿ ਤੇਹਿ ਅਨੁਮੋਦਕੇਹਿ ਭਿਕ੍ਖੂਹਿ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਅਞ੍ਜਲਿਂ ਪਗ੍ਗਹੇਤ੍ਵਾ ਏਵਮਸ੍ਸ ਵਚਨੀਯੋ – ‘ਅਤ੍ਥਤਂ ਆਵੁਸੋ ਸਙ੍ਘਸ੍ਸ ਕਥਿਨਂ, ਧਮ੍ਮਿਕੋ ਕਥਿਨਤ੍ਥਾਰੋ, ਅਨੁਮੋਦਾਮਾ’’ਤਿ ਏਵਮਾਦਿਨਾ ਪਰਿਵਾਰੇ ਵੁਤ੍ਤਵਿਧਾਨੇਨੇਵ ਅਨੁਮੋਦਾਪੇਤਬ੍ਬਂ, ਇਤਰੇਹਿ ਚ ਅਨੁਮੋਦਿਤਬ੍ਬਂ. ਏਵਂ ਸਬ੍ਬੇਸਂ ਅਤ੍ਥਤਂ ਹੋਤਿ ਕਥਿਨਂ. ਵੁਤ੍ਤਞ੍ਹੇਤਂ ਪਰਿਵਾਰੇ ‘‘ਦ੍ਵਿਨ੍ਨਂ ਪੁਗ੍ਗਲਾਨਂ ਅਤ੍ਥਤਂ ਹੋਤਿ ਕਥਿਨਂ – ਅਤ੍ਥਾਰਕਸ੍ਸ ਚ ਅਨੁਮੋਦਕਸ੍ਸ ਚਾ’’ਤਿ (ਪਰਿ. ੪੦੩). ਪੁਨਪਿ ਵੁਤ੍ਤਂ – ‘‘ਨ ਸਙ੍ਘੋ ਕਥਿਨਂ ਅਤ੍ਥਰਤਿ, ਨ ਗਣੋ ਕਥਿਨਂ ਅਤ੍ਥਰਤਿ, ਪੁਗ੍ਗਲੋ ਕਥਿਨਂ ਅਤ੍ਥਰਤਿ, ਸਙ੍ਘਸ੍ਸ ਅਨੁਮੋਦਨਾ ਗਣਸ੍ਸ ਅਨੁਮੋਦਨਾ ਪੁਗ੍ਗਲਸ੍ਸ ਅਤ੍ਥਾਰਾ ਸਙ੍ਘਸ੍ਸ ਅਤ੍ਥਤਂ ਹੋਤਿ ਕਥਿਨਂ, ਗਣਸ੍ਸ ਅਤ੍ਥਤਂ ਹੋਤਿ ਕਥਿਨਂ, ਪੁਗ੍ਗਲਸ੍ਸ ਅਤ੍ਥਤਂ ਹੋਤਿ ਕਥਿਨਂ’’ਤਿ (ਪਰਿ. ੪੧੪).

ਏਵਂ ਅਤ੍ਥਤੇ ਪਨ ਕਥਿਨੇ ਸਚੇ ਕਥਿਨਚੀਵਰੇਨ ਸਦ੍ਧਿਂ ਆਭਤਂ ਆਨਿਸਂਸਂ ਦਾਯਕਾ ‘‘ਯੇਨ ਅਮ੍ਹਾਕਂ ਕਥਿਨਂ ਗਹਿਤਂ, ਤਸ੍ਸੇਵ ਦੇਮਾ’’ਤਿ ਦੇਨ੍ਤਿ, ਭਿਕ੍ਖੁਸਙ੍ਘੋ ਅਨਿਸ੍ਸਰੋ. ਅਥ ਅਵਿਚਾਰੇਤ੍ਵਾਵ ਦਤ੍ਵਾ ਗਚ੍ਛਨ੍ਤਿ, ਭਿਕ੍ਖੁਸਙ੍ਘੋ ਇਸ੍ਸਰੋ. ਤਸ੍ਮਾ ਸਚੇ ਕਥਿਨਤ੍ਥਾਰਕਸ੍ਸ ਸੇਸਚੀਵਰਾਨਿਪਿ ਦੁਬ੍ਬਲਾਨਿ ਹੋਨ੍ਤਿ, ਸਙ੍ਘੇਨ ਅਪਲੋਕੇਤ੍ਵਾ ਤੇਸਮ੍ਪਿ ਅਤ੍ਥਾਯ ਵਤ੍ਥਾਨਿ ਦਾਤਬ੍ਬਾਨਿ. ਕਮ੍ਮਵਾਚਾ ਪਨ ਏਕਾਯੇਵ ਵਟ੍ਟਤਿ. ਅਵਸੇਸੇ ਕਥਿਨਾਨਿਸਂਸੇ ਬਲਵਵਤ੍ਥਾਨਿ ਵਸ੍ਸਾਵਾਸਿਕਟ੍ਠਿਤਿਕਾਯ ਦਾਤਬ੍ਬਾਨਿ, ਠਿਤਿਕਾਯ ਅਭਾਵੇ ਥੇਰਾਸਨਤੋ ਪਟ੍ਠਾਯ ਦਾਤਬ੍ਬਾਨਿ, ਗਰੁਭਣ੍ਡਂ ਨ ਭਾਜੇਤਬ੍ਬਂ. ਸਚੇ ਪਨ ਏਕਸੀਮਾਯ ਬਹੂ ਵਿਹਾਰਾ ਹੋਨ੍ਤਿ, ਸਬ੍ਬੇ ਭਿਕ੍ਖੂ ਸਨ੍ਨਿਪਾਤੇਤ੍ਵਾ ਏਕਤ੍ਥ ਕਥਿਨਂ ਅਤ੍ਥਰਿਤਬ੍ਬਂ, ਵਿਸੁਂ ਵਿਸੁਂ ਅਤ੍ਥਰਿਤੁਂ ਨ ਵਟ੍ਟਤਿ.

੩੦੮. ਇਦਾਨਿ ਯਥਾ ਚ ਕਥਿਨਂ ਅਤ੍ਥਤਂ ਹੋਤਿ, ਯਥਾ ਚ ਅਨਤ੍ਥਤਂ, ਤਂ ਵਿਧਿਂ ਵਿਤ੍ਥਾਰਤੋ ਦਸ੍ਸੇਤੁਂ ਏਵਞ੍ਚ ਪਨ ਭਿਕ੍ਖਵੇ ਅਤ੍ਥਤਂ ਹੋਤਿ ਕਥਿਨਂ ਏਵਂ ਅਨਤ੍ਥਤਨ੍ਤਿ ਵਤ੍ਵਾ ਅਕਰਣੀਯਞ੍ਚੇਵ ਮਹਾਭੂਮਿਕਞ੍ਚ ਅਨਤ੍ਥਤਲਕ੍ਖਣਂ ਤਾਵ ਦਸ੍ਸੇਨ੍ਤੋ ਨ ਉਲ੍ਲਿਖਿਤਮਤ੍ਤੇਨਾਤਿਆਦਿਕੇ ਚਤੁਵੀਸਤਿ ਆਕਾਰੇ ਦਸ੍ਸੇਸਿ. ਤਤੋ ਪਰਂ ਅਤ੍ਥਤਲਕ੍ਖਣਂ ਦਸ੍ਸੇਨ੍ਤੋ ਅਹਤੇਨ ਅਤ੍ਥਤਨ੍ਤਿਆਦਿਕੇ ਸਤ੍ਤਰਸ ਆਕਾਰੇ ਦਸ੍ਸੇਸਿ. ਪਰਿਵਾਰੇਪਿ ਹਿ ‘‘ਚਤੁਵੀਸਤਿਯਾ ਆਕਾਰੇਹਿ ਅਨਤ੍ਥਤਂ ਹੋਤਿ ਕਥਿਨਂ, ਸਤ੍ਤਰਸਹਿ ਆਕਾਰੇਹਿ ਅਤ੍ਥਤਂ ਹੋਤਿ ਕਥਿਨ’’ਨ੍ਤਿ ਇਦਮੇਵ ਲਕ੍ਖਣਂ ਵੁਤ੍ਤਂ.

ਤਤ੍ਥ ਉਲ੍ਲਿਖਿਤਮਤ੍ਤੇਨਾਤਿ ਦੀਘਤੋ ਚ ਪੁਥੁਲਤੋ ਚ ਪਮਾਣਗ੍ਗਹਣਮਤ੍ਤੇਨ. ਪਮਾਣਞ੍ਹਿ ਗਣ੍ਹਨ੍ਤੋ ਤਸ੍ਸ ਤਸ੍ਸ ਪਦੇਸਸ੍ਸ ਸਞ੍ਜਾਨਨਤ੍ਥਂ ਨਖਾਦੀਹਿ ਵਾ ਪਰਿਚ੍ਛੇਦਂ ਦਸ੍ਸੇਨ੍ਤੋ ਉਲ੍ਲਿਖਤਿ, ਨਲਾਟਾਦੀਸੁ ਵਾ ਘਂਸਤਿ, ਤਸ੍ਮਾ ਤਂ ਪਮਾਣਗ੍ਗਹਣਂ ‘‘ਉਲ੍ਲਿਖਿਤਮਤ੍ਤ’’ਨ੍ਤਿ ਵੁਚ੍ਚਤਿ. ਧੋਵਨਮਤ੍ਤੇਨਾਤਿ ਕਥਿਨਦੁਸ੍ਸਧੋਵਨਮਤ੍ਤੇਨ. ਚੀਵਰਵਿਚਾਰਣਮਤ੍ਤੇਨਾਤਿ ‘‘ਪਞ੍ਚਕਂ ਵਾ ਸਤ੍ਤਕਂ ਵਾ ਨਵਕਂ ਵਾ ਏਕਾਦਸਕਂ ਵਾ ਹੋਤੂ’’ਤਿ ਏਵਂ ਵਿਚਾਰਿਤਮਤ੍ਤੇਨ. ਛੇਦਨਮਤ੍ਤੇਨਾਤਿ ਯਥਾਵਿਚਾਰਿਤਸ੍ਸ ਵਤ੍ਥਸ੍ਸ ਛੇਦਨਮਤ੍ਤੇਨ. ਬਨ੍ਧਨਮਤ੍ਤੇਨਾਤਿ ਮੋਘਸੁਤ੍ਤਕਾਰੋਪਨਮਤ੍ਤੇਨ. ਓਵਟ੍ਟਿਯਕਰਣਮਤ੍ਤੇਨਾਤਿ ਮੋਘਸੁਤ੍ਤਕਾਨੁਸਾਰੇਨ ਦੀਘਸਿਬ੍ਬਿਤਮਤ੍ਤੇਨ. ਕਣ੍ਡੁਸਕਰਣਮਤ੍ਤੇਨਾਤਿ ਮੁਦ੍ਧਿਯਪਤ੍ਤਬਨ੍ਧਨਮਤ੍ਤੇਨ. ਦਲ਼੍ਹੀਕਮ੍ਮਕਰਣਮਤ੍ਤੇਨਾਤਿ ਦ੍ਵੇ ਚਿਮਿਲਿਕਾਯੋ ਏਕਤੋ ਕਤ੍ਵਾ ਸਿਬ੍ਬਿਤਮਤ੍ਤੇਨ. ਅਥ ਵਾ ਪਠਮਚਿਮਿਲਿਕਾ ਘਟੇਤ੍ਵਾ ਠਪਿਤਾ ਹੋਤਿ, ਕਥਿਨਸਾਟਕਂ ਤਸ੍ਸਾ ਕੁਚ੍ਛਿਚਿਮਿਲਿਕਂ ਕਤ੍ਵਾ ਸਿਬ੍ਬਿਤਮਤ੍ਤੇਨਾਤਿਪਿ ਅਤ੍ਥੋ. ਮਹਾਪਚ੍ਚਰਿਯਂ ‘‘ਪਕਤਿਚੀਵਰਸ੍ਸ ਉਪਸ੍ਸਯਦਾਨੇਨਾ’’ਤਿ ਵੁਤ੍ਤਂ. ਕੁਰੁਨ੍ਦਿਯਂ ਪਨ ‘‘ਪਕਤਿਪਤ੍ਤਬਦ੍ਧਚੀਵਰਂ ਦੁਪਟ੍ਟਂ ਕਾਤੁਂ ਕੁਚ੍ਛਿਚਿਮਿਲਿਕਂ ਅਲ੍ਲਿਯਾਪਨਮਤ੍ਤੇਨਾ’’ਤਿ ਵੁਤ੍ਤਂ. ਅਨੁਵਾਤਕਰਣਮਤ੍ਤੇਨਾਤਿ ਪਿਟ੍ਠਿਅਨੁਵਾਤਾਰੋਪਨਮਤ੍ਤੇਨ. ਪਰਿਭਣ੍ਡਕਰਣਮਤ੍ਤੇਨਾਤਿ ਕੁਚ੍ਛਿਅਨਉਵਾਤਾਰੋਪਨਮਤ੍ਤੇਨ. ਓਵਦ੍ਧੇਯ੍ਯਕਰਣਮਤ੍ਤੇਨਾਤਿ ਆਗਨ੍ਤੁਕਪਤ੍ਤਾਰੋਪਨਮਤ੍ਤੇਨ. ਕਥਿਨਚੀਵਰਤੋ ਵਾ ਪਤ੍ਤਂ ਗਹੇਤ੍ਵਾ ਅਞ੍ਞਸ੍ਮਿਂ ਅਕਥਿਨਚੀਵਰੇ ਪਤ੍ਤਾਰੋਪਨਮਤ੍ਤੇਨ.

ਕਮ੍ਬਲਮਦ੍ਦਨਮਤ੍ਤੇਨਾਤਿ ਏਕਵਾਰਂਯੇਵ ਰਜਨੇ ਪਕ੍ਖਿਤ੍ਤੇਨ ਦਨ੍ਤਵਣ੍ਣੇਨ ਪਣ੍ਡੁਪਲਾਸਵਣ੍ਣੇਨ ਵਾ. ਸਚੇ ਪਨ ਸਕਿਂ ਵਾ ਦ੍ਵਿਕ੍ਖਤ੍ਤੁਂ ਵਾ ਰਤ੍ਤਮ੍ਪਿ ਸਾਰੁਪ੍ਪਂ ਹੋਤਿ, ਵਟ੍ਟਤਿ. ਨਿਮਿਤ੍ਤਕਤੇਨਾਤਿ ‘‘ਇਮਿਨਾ ਦੁਸ੍ਸੇਨ ਕਥਿਨਂ ਅਤ੍ਥਰਿਸ੍ਸਾਮੀ’’ਤਿ ਏਵਂ ਨਿਮਿਤ੍ਤਕਤੇਨ. ਏਤ੍ਤਕਮੇਵ ਹਿ ਪਰਿਵਾਰੇ ਵੁਤ੍ਤਂ. ਅਟ੍ਠਕਥਾਸੁ ਪਨ ‘‘ਅਯਂ ਸਾਟਕੋ ਸੁਨ੍ਦਰੋ, ਸਕ੍ਕਾ ਇਮਿਨਾ ਕਥਿਨਂ ਅਤ੍ਥਰਿਤੁ’ਨ੍ਤਿ ਏਵਂ ਨਿਮਿਤ੍ਤਕਮ੍ਮਂ ਕਤ੍ਵਾ ਲਦ੍ਧੇਨਾ’’ਤਿ ਵੁਤ੍ਤਂ. ਪਰਿਕਥਾਕਤੇਨਾਤਿ ‘‘ਕਥਿਨਂ ਨਾਮ ਦਾਤੁਂ ਵਟ੍ਟਤਿ, ਕਥਿਨਦਾਯਕੋ ਬਹੁਂ ਪੁਞ੍ਞਂ ਪਸਵਤੀ’’ਤਿ ਏਵਂ ਪਰਿਕਥਾਯ ਉਪ੍ਪਾਦਿਤੇਨ. ਕਥਿਨਂ ਨਾਮ ਅਤਿਉਕ੍ਕਟ੍ਠਂ ਵਟ੍ਟਤਿ, ਮਾਤਰਮ੍ਪਿ ਵਿਞ੍ਞਾਪੇਤੁਂ ਨ ਵਟ੍ਟਤਿ, ਆਕਾਸਤੋ ਓਤਿਣ੍ਣਸਦਿਸਮੇਵ ਵਟ੍ਟਤੀਤਿ. ਕੁਕ੍ਕੁਕਤੇਨਾਤਿ ਤਾਵਕਾਲਿਕੇਨ. ਸਨ੍ਨਿਧਿਕਤੇਨਾਤਿ ਏਤ੍ਥ ਦੁਵਿਧੋ ਸਨ੍ਨਿਧਿ ਕਰਣਸਨ੍ਨਿਧਿ ਚ ਨਿਚਯਸਨ੍ਨਿਧਿ ਚ. ਤਤ੍ਥ ਤਦਹੇਵ ਅਕਤ੍ਵਾ ਠਪੇਤ੍ਵਾ ਕਰਣਂ ਕਰਣਸਨ੍ਨਿਧਿ. ਸਙ੍ਘੋ ਅਜ੍ਜ ਕਥਿਨਦੁਸ੍ਸਂ ਲਭਿਤ੍ਵਾ ਪੁਨਦਿਵਸੇ ਦੇਤਿ, ਅਯਂ ਨਿਚਯਸਨ੍ਨਿਧਿ.

ਨਿਸ੍ਸਗ੍ਗਿਯੇਨਾਤਿ ਰਤ੍ਤਿਨਿਸ੍ਸਗ੍ਗਿਯੇਨ. ਪਰਿਵਾਰੇਪਿ ਵੁਤ੍ਤਂ – ‘‘ਨਿਸ੍ਸਗ੍ਗਿਯਂ ਨਾਮ ਕਰਿਯਮਾਨੇ ਅਰੁਣਂ ਉਟ੍ਠਹਤੀ’’ਤਿ. ਅਕਪ੍ਪਕਤੇਨਾਤਿ ਅਨਾਦਿਨ੍ਨਕਪ੍ਪਬਿਨ੍ਦੁਨਾ. ਅਞ੍ਞਤ੍ਰ ਸਙ੍ਘਾਟਿਯਾਤਿਆਦੀਸੁ ਠਪੇਤ੍ਵਾ ਸਙ੍ਘਾਟਿਉਤ੍ਤਰਾਸਙ੍ਗਅਨ੍ਤਰਵਾਸਕੇ ਅਞ੍ਞੇਨ ਪਚ੍ਚਤ੍ਥਰਣਾਦਿਨਾ ਅਤ੍ਥਤਂ ਅਨਤ੍ਥਤਂ ਹੋਤੀਤਿ. ਅਞ੍ਞਤ੍ਰ ਪਞ੍ਚਕੇਨ ਵਾ ਅਤਿਰੇਕਪਞ੍ਚਕੇਨ ਵਾਤਿ ਪਞ੍ਚ ਵਾ ਅਤਿਰੇਕਾਨਿ ਵਾ ਖਣ੍ਡਾਨਿ ਕਤ੍ਵਾ ਮਹਾਮਣ੍ਡਲਅਡ੍ਢਮਣ੍ਡਲਾਨਿ ਦਸ੍ਸੇਤ੍ਵਾ ਕਤੇਨੇਵ ਵਟ੍ਟਤਿ. ਏਵਞ੍ਹਿ ਸਮਣ੍ਡਲਿਕਤਂ ਹੋਤਿ, ਤਂ ਠਪੇਤ੍ਵਾ ਅਞ੍ਞੇਨ ਅਚ੍ਛਿਨ੍ਨਕੇਨ ਵਾ ਦ੍ਵਤ੍ਤਿਚਤੁਖਣ੍ਡੇਨ ਵਾ ਨ ਵਟ੍ਟਤਿ. ਅਞ੍ਞਤ੍ਰ ਪੁਗ੍ਗਲਸ੍ਸ ਅਤ੍ਥਾਰਾਤਿ ਪੁਗ੍ਗਲਸ੍ਸ ਅਤ੍ਥਾਰਂ ਠਪੇਤ੍ਵਾ ਨ ਅਞ੍ਞੇਨ ਸਙ੍ਘਸ੍ਸ ਵਾ ਗਣਸ੍ਸ ਵਾ ਅਤ੍ਥਾਰੇਨ ਅਤ੍ਥਤਂ ਹੋਤਿ. ਨਿਸ੍ਸੀਮਟ੍ਠੋ ਅਨੁਮੋਦਤੀਤਿ ਬਹਿਉਪਚਾਰਸੀਮਾਯ ਠਿਤੋ ਅਨੁਮੋਦਤਿ.

੩੦੯. ਅਹਤੇਨਾਤਿ ਅਪਰਿਭੁਤ੍ਤੇਨ. ਅਹਤਕਪ੍ਪੇਨਾਤਿ ਅਹਤਸਦਿਸੇਨ ਏਕਵਾਰਂ ਵਾ ਦ੍ਵਿਕ੍ਖਤ੍ਤੁਂ ਵਾ ਧੋਤੇਨ. ਪਿਲੋਤਿਕਾਯਾਤਿ ਹਤਵਤ੍ਥਕਸਾਟਕੇਨ. ਪਂਸੁਕੂਲੇਨਾਤਿ ਤੇਵੀਸਤਿਯਾ ਖੇਤ੍ਤੇਸੁ ਉਪ੍ਪਨ੍ਨਪਂਸੁਕੂਲੇਨ. ਪਂਸੁਕੂਲਿਕਭਿਕ੍ਖੁਨਾ ਚੋਲ਼ਕਭਿਕ੍ਖਂ ਆਹਿਣ੍ਡਿਤ੍ਵਾ ਲਦ੍ਧਚੋਲ਼ਕੇਹਿ ਕਤਚੀਵਰੇਨਾਤਿਪਿ ਕੁਰੁਨ੍ਦਿਮਹਾਪਚ੍ਚਰੀਸੁ ਵੁਤ੍ਤਂ. ਪਾਪਣਿਕੇਨਾਤਿ ਆਪਣਦ੍ਵਾਰੇ ਪਤਿਤਪਿਲੋਤਿਕਂ ਗਹੇਤ੍ਵਾ ਕਥਿਨਤ੍ਥਾਯ ਦੇਤਿ, ਤੇਨਾਪਿ ਵਟ੍ਟਤੀਤਿ ਅਤ੍ਥੋ. ਸੇਸਂ ਵੁਤ੍ਤਵਿਪਲ੍ਲਾਸੇਨੇਵ ਵੇਦਿਤਬ੍ਬਂ. ਇਮਸ੍ਮਿਂ ਪਨ ਠਾਨੇ ‘‘ਸਹ ਕਥਿਨਸ੍ਸ ਅਤ੍ਥਾਰਾ ਕਤਿ ਧਮ੍ਮਾ ਜਾਯਨ੍ਤੀ’’ਤਿਆਦਿ ਬਹੁਅਟ੍ਠਕਥਾਸੁ ਵੁਤ੍ਤਂ, ਤਂ ਸਬ੍ਬਂ ਪਰਿਵਾਰੇ ਪਾਲ਼ਿਆਰੂਲ਼੍ਹਮੇਵ, ਤਸ੍ਮਾ ਤਤ੍ਥ ਆਗਤਨਯੇਨੇਵ ਵੇਦਿਤਬ੍ਬਂ. ਨ ਹਿ ਤੇਨ ਇਧ ਅਵੁਚ੍ਚਮਾਨੇਨ ਕਥਿਨਤ੍ਥਾਰਕਸ੍ਸ ਕਿਞ੍ਚਿ ਪਰਿਹਾਯਤਿ.

੩੧੦. ਏਵਂ ਕਥਿਨਤ੍ਥਾਰਂ ਦਸ੍ਸੇਤ੍ਵਾ ਇਦਾਨਿ ਉਬ੍ਭਾਰਂ ਦਸ੍ਸੇਤੁਂ ਕਥਞ੍ਚ ਭਿਕ੍ਖਵੇ ਉਬ੍ਭਤਂ ਹੋਤਿ ਕਥਿਨਨ੍ਤਿਆਦਿਮਾਹ. ਤਤ੍ਥ ਮਾਤਿਕਾਤਿ ਮਾਤਰੋ; ਜਨੇਤ੍ਤਿਯੋਤਿ ਅਤ੍ਥੋ. ਕਥਿਨੁਬ੍ਭਾਰਞ੍ਹਿ ਏਤਾ ਅਟ੍ਠ ਜਨੇਤ੍ਤਿਯੋ. ਤਾਸੁ ਪਕ੍ਕਮਨਂ ਅਨ੍ਤੋ ਅਸ੍ਸਾਤਿ ਪਕ੍ਕਮਨਨ੍ਤਿਕਾ. ਏਵਂ ਸੇਸਾਪਿ ਵੇਦਿਤਬ੍ਬਾ.

ਆਦਾਯਸਤ੍ਤਕਕਥਾ

੩੧੧. ਨ ਪਚ੍ਚੇਸ੍ਸਨ੍ਤਿ ਨ ਪੁਨ ਆਗਮਿਸ੍ਸਂ. ਏਤਸ੍ਮਿਂ ਪਨ ਪਕ੍ਕਮਨਨ੍ਤਿਕੇ ਕਥਿਨੁਦ੍ਧਾਰੇ ਪਠਮਂ ਚੀਵਰਪਲਿਬੋਧੋ ਛਿਜ੍ਜਤਿ, ਪਚ੍ਛਾ ਆਵਾਸਪਲਿਬੋਧੋ. ਏਵਂ ਪਕ੍ਕਮਤੋ ਹਿ ਚੀਵਰਪਲਿਬੋਧੋ ਅਨ੍ਤੋਸੀਮਾਯਮੇਵ ਛਿਜ੍ਜਤਿ, ਆਵਾਸਪਲਿਬੋਧੋ ਸੀਮਾਤਿਕ੍ਕਮੇ. ਵੁਤ੍ਤਮ੍ਪਿ ਚੇਤਂ ਪਰਿਵਾਰੇ –

‘‘ਪਕ੍ਕਮਨਨ੍ਤਿਕੋ ਕਥਿਨੁਦ੍ਧਾਰੋ, ਵੁਤ੍ਤੋ ਆਦਿਚ੍ਚਬਨ੍ਧੁਨਾ;

ਏਤਞ੍ਚ ਤਾਹਂ ਵਿਸ੍ਸਜ੍ਜਿਸ੍ਸਂ, ਚੀਵਰਪਲਿਬੋਧੋ ਪਠਮਂ ਛਿਜ੍ਜਤਿ;

ਪਚ੍ਛਾ ਆਵਾਸਪਲਿਬੋਧੋ ਛਿਜ੍ਜਤੀ’’ਤਿ. (ਪਰਿ. ੪੧੫);

ਚੀਵਰਂ ਆਦਾਯਾਤਿ ਅਕਤਚੀਵਰਂ ਆਦਾਯ. ਬਹਿਸੀਮਗਤਸ੍ਸਾਤਿ ਅਞ੍ਞਂ ਸਾਮਨ੍ਤਵਿਹਾਰਂ ਗਤਸ੍ਸ. ਏਵਂ ਹੋਤੀਤਿ ਤਸ੍ਮਿਂ ਵਿਹਾਰੇ ਸੇਨਾਸਨਫਾਸੁਕਂ ਵਾ ਸਹਾਯਸਮ੍ਪਤ੍ਤਿਂ ਵਾ ਦਿਸ੍ਵਾ ਏਵਂ ਹੋਤਿ. ਏਤਸ੍ਮਿਂ ਪਨ ਨਿਟ੍ਠਾਨਨ੍ਤਿਕੇ ਕਥਿਨੁਦ੍ਧਾਰੇ ਆਵਾਸਪਲਿਬੋਧੋ ਪਠਮਂ ਛਿਜ੍ਜਤਿ, ਸੋ ਹਿ ‘‘ਨ ਪਚ੍ਚੇਸ੍ਸ’’ਨ੍ਤਿ ਚਿਤ੍ਤੇ ਉਪ੍ਪਨ੍ਨਮਤ੍ਤੇਯੇਵ ਛਿਜ੍ਜਤਿ. ਵੁਤ੍ਤਮ੍ਪਿ ਚੇਤਂ –

‘‘ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ, ਵੁਤ੍ਤੋ ਆਦਿਚ੍ਚਬਨ੍ਧੁਨਾ;

ਏਤਞ੍ਚ ਤਾਹਂ ਵਿਸ੍ਸਜ੍ਜਿਸ੍ਸਂ, ਆਵਾਸਪਲਿਬੋਧੋ ਪਠਮਂ ਛਿਜ੍ਜਤਿ;

ਚੀਵਰੇ ਨਿਟ੍ਠਿਤੇ ਚੀਵਰਪਲਿਬੋਧੋ ਛਿਜ੍ਜਤੀ’’ਤਿ.

ਏਤੇਨ ਨਯੇਨ ਸੇਸਮਾਤਿਕਾਵਿਭਜਨੇਪਿ ਅਤ੍ਥੋ ਵੇਦਿਤਬ੍ਬੋ. ਅਯਂ ਪਨ ਵਿਸੇਸੋ – ‘‘ਸਨ੍ਨਿਟ੍ਠਾਨਨ੍ਤਿਕੇ ਦ੍ਵੇਪਿ ਪਲਿਬੋਧਾ ਨੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸਨ੍ਤਿ ਚਿਤ੍ਤੇ ਉਪ੍ਪਨ੍ਨਮਤ੍ਤੇਯੇਵ ਏਕਤੋ ਛਿਜ੍ਜਨ੍ਤੀਤਿ. ਵੁਤ੍ਤਞ੍ਹੇਤਂ –

‘‘ਸਨ੍ਨਿਟ੍ਠਾਨਨ੍ਤਿਕੋ ਕਥਿਨੁਦ੍ਧਾਰੋ, ਵੁਤ੍ਤੋ ਆਦਿਚ੍ਚਬਨ੍ਧੁਨਾ;

ਏਤਞ੍ਚ ਤਾਹਂ ਵਿਸ੍ਸਜ੍ਜਿਸ੍ਸਂ, ਦ੍ਵੇ ਪਲਿਬੋਧਾ ਅਪੁਬ੍ਬਂ ਅਚਰਿਮਂ ਛਿਜ੍ਜਨ੍ਤੀ’’ਤਿ.

ਏਵਂ ਸਬ੍ਬਕਥਿਨੁਦ੍ਧਾਰੇਸੁ ਪਲਿਬੋਧੁਪਚ੍ਛੇਦੋ ਵੇਦਿਤਬ੍ਬੋ. ਸੋ ਪਨ ਯਸ੍ਮਾ ਇਮਿਨਾ ਚ ਵੁਤ੍ਤਨਯੇਨ ਪਰਿਵਾਰੇ ਚ ਆਗਤਭਾਵੇਨ ਸਕ੍ਕਾ ਜਾਨਿਤੁਂ, ਤਸ੍ਮਾ ਵਿਤ੍ਥਾਰਤੋ ਨ ਵੁਤ੍ਤੋ. ਅਯਂ ਪਨੇਤ੍ਥ ਸਙ੍ਖੇਪੋ – ਨਾਸਨਨ੍ਤਿਕੇ ਆਵਾਸਪਲਿਬੋਧੋ ਪਠਮਂ ਛਿਜ੍ਜਤਿ, ਚੀਵਰੇ ਨਟ੍ਠੇ ਚੀਵਰਪਲਿਬੋਧੋ ਛਿਜ੍ਜਤਿ. ਯਸ੍ਮਾ ਚੀਵਰੇ ਨਟ੍ਠੇ ਚੀਵਰਪਲਿਬੋਧੋ ਛਿਜ੍ਜਤਿ, ਤਸ੍ਮਾ ‘‘ਨਾਸਨਨ੍ਤਿਕੋ’’ਤਿ ਵੁਤ੍ਤਂ.

ਸਵਨਨ੍ਤਿਕੇ ਚੀਵਰਪਲਿਬੋਧੋ ਪਠਮਂ ਛਿਜ੍ਜਤਿ, ਤਸ੍ਮਾ ਤਸ੍ਸ ਸਹ ਸਵਨੇਨ ਆਵਾਸਪਲਿਬੋਧੋ ਛਿਜ੍ਜਤਿ.

ਆਸਾਵਚ੍ਛੇਦਿਕੇ ਆਵਾਸਪਲਿਬੋਧੋ ਪਠਮਂ ਛਿਜ੍ਜਤਿ. ਚੀਵਰਾਸਾਯ ਉਪਚ੍ਛਿਨ੍ਨਾਯ ਚੀਵਰਪਲਿਬੋਧੋ ਛਿਜ੍ਜਤਿ. ਅਯਂ ਪਨ ਯਸ੍ਮਾ ‘‘ਅਨਾਸਾਯ ਲਭਤਿ; ਆਸਾਯ ਨ ਲਭਤਿ; ਤਸ੍ਸ ਏਵਂ ਹੋਤਿ ‘ਇਧੇਵਿਮਂ ਚੀਵਰਂ ਕਾਰੇਸ੍ਸਂ, ਨ ਪਚ੍ਚੇਸ੍ਸ’’’ਨ੍ਤਿਆਦਿਨਾ ਨਯੇਨ ਇਤਰੇਹਿ ਉਦ੍ਧਾਰੇਹਿ ਸਦ੍ਧਿਂ ਵੋਮਿਸ੍ਸਕਦੇਸਨੋ ਅਨੇਕਪ੍ਪਭੇਦੋ ਹੋਤਿ, ਤਸ੍ਮਾ ਪਰਤੋ ਵਿਸੁਂ ਵਿਤ੍ਥਾਰੇਤ੍ਵਾ ਵੁਤ੍ਤੋ, ਇਧ ਨ ਵੁਤ੍ਤੋ. ਇਧ ਪਨ ਸਵਨਨ੍ਤਿਕਸ੍ਸ ਅਨਨ੍ਤਰਂ ਸੀਮਾਤਿਕ੍ਕਨ੍ਤਿਕੋ ਵੁਤ੍ਤੋ. ਤਤ੍ਥ ਚੀਵਰਪਲਿਬੋਧੋ ਪਠਮਂ ਛਿਜ੍ਜਤਿ, ਤਸ੍ਸ ਬਹਿਸੀਮੇ ਆਵਾਸਪਲਿਬੋਧੋ ਛਿਜ੍ਜਤਿ. ਸਹੁਬ੍ਭਾਰੇ ਦ੍ਵੇ ਪਲਿਬੋਧਾ ਅਪੁਬ੍ਬਂ ਅਚਰਿਮਂ ਛਿਜ੍ਜਨ੍ਤੀਤਿ.

੩੧੬-੩੨੫. ਏਵਂ ਆਦਾਯਵਾਰੇ ਸਤ੍ਤਕਥਿਨੁਦ੍ਧਾਰੇ ਦਸ੍ਸੇਤ੍ਵਾ ਪੁਨ ਸਮਾਦਾਯਵਾਰੇਪਿ ਵਿਪ੍ਪਕਤਚੀਵਰਸ੍ਸ ਆਦਾਯਸਮਾਦਾਯਵਾਰੇਸੁਪਿ ਯਥਾਸਮ੍ਭਵਂ ਤੇਯੇਵ ਦਸ੍ਸਿਤਾ. ਤਤੋ ਪਰਂ ਅਨ੍ਤੋਸੀਮਾਯਂ ‘‘ਪਚ੍ਚੇਸ੍ਸਂ ਨ ਪਚ੍ਚੇਸ੍ਸ’’ਨ੍ਤਿ ਇਮਂ ਵਿਧਿਂ ਅਨਾਮਸਿਤ੍ਵਾਵ ‘‘ਨ ਪਚ੍ਚੇਸ੍ਸ’’ਨ੍ਤਿ ਇਮਮੇਵ ਆਮਸਿਤ੍ਵਾ ਅਨਧਿਟ੍ਠਿਤੇਨਾ’’ਤਿਆਦਿਨਾ ਨਯੇਨ ਚ ਯੇ ਯੇ ਯੁਜ੍ਜਨ੍ਤਿ, ਤੇ ਤੇ ਦਸ੍ਸਿਤਾ. ਤਤੋ ਪਰਂ ‘‘ਚੀਵਰਾਸਾਯ ਪਕ੍ਕਮਤੀ’’ਤਿਆਦਿਨਾ ਨਯੇਨ ਇਤਰੇਹਿ ਸਦ੍ਧਿਂ ਵੋਮਿਸ੍ਸਕਨਯੇਨ ਅਨੇਕਕ੍ਖਤ੍ਤੁਂ ਆਸਾਵਚ੍ਛੇਦਿਕਂ ਦਸ੍ਸੇਤ੍ਵਾ ਪੁਨ ਦਿਸਂਗਮਿਯਵਸੇਨ ਚ ਫਾਸੁਵਿਹਾਰਿਕਵਸੇਨ ਚ ਨਿਟ੍ਠਾਨਨ੍ਤਿਕੇਸੁ ਯੁਜ੍ਜਮਾਨਾ ਕਥਿਨੁਦ੍ਧਾਰਾ ਦਸ੍ਸਿਤਾ. ਏਵਂ ਪਭੇਦਤੋ ਕਥਿਨੁਦ੍ਧਾਰਂ ਦਸ੍ਸੇਤ੍ਵਾ ਇਦਾਨਿ ਯੇ ਤੇਨ ਤੇਨ ਕਥਿਨੁਦ੍ਧਾਰੇਨ ਪਲਿਬੋਧਾ ਛਿਜ੍ਜਨ੍ਤੀਤਿ ਵੁਤ੍ਤਾ, ਤੇਸਂ ਪਟਿਪਕ੍ਖੇ ਦਸ੍ਸੇਨ੍ਤੋ ਦ੍ਵੇਮੇ ਭਿਕ੍ਖਵੇ ਕਥਿਨਸ੍ਸ ਪਲਿਬੋਧਾਤਿਆਦਿਮਾਹ. ਤਤ੍ਥ ਚਤ੍ਤੇਨਾਤਿ ਯੇਨ ਚਿਤ੍ਤੇਨ ਸੋ ਆਵਾਸੋ ਚਤ੍ਤੋ ਹੋਤਿ, ਤਂ ਚਤ੍ਤਂ ਨਾਮ, ਤੇਨ ਚਤ੍ਤੇਨ. ਵਨ੍ਤਮੁਤ੍ਤੇਸੁਪਿ ਏਸੇਵ ਨਯੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਕਥਿਨਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.