ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ
ਵਿਨਯਪਿਟਕੇ
ਮਹਾਵਗ੍ਗ-ਅਟ੍ਠਕਥਾ
੧. ਮਹਾਖਨ੍ਧਕਂ
ਬੋਧਿਕਥਾ
ਉਭਿਨ੍ਨਂ ਪਾਤਿਮੋਕ੍ਖਾਨਂ, ਸਙ੍ਗੀਤਿਸਮਨਨ੍ਤਰਂ;
ਸਙ੍ਗਾਯਿਂਸੁ ਮਹਾਥੇਰਾ, ਖਨ੍ਧਕਂ ਖਨ੍ਧਕੋਵਿਦਾ.
ਯਂ ਤਸ੍ਸ ਦਾਨਿ ਸਮ੍ਪਤ੍ਤੋ, ਯਸ੍ਮਾ ਸਂਵਣ੍ਣਨਾਕ੍ਕਮੋ;
ਤਸ੍ਮਾ ਹੋਤਿ ਅਯਂ ਤਸ੍ਸ, ਅਨੁਤ੍ਤਾਨਤ੍ਥਵਣ੍ਣਨਾ.
ਪਦਭਾਜਨਿਯੇ ਅਤ੍ਥਾ, ਯੇਹਿ ਯੇਸਂ ਪਕਾਸਿਤਾ;
ਤੇ ਚੇ ਪੁਨ ਵਦੇਯ੍ਯਾਮ, ਪਰਿਯੋਸਾਨਂ ਕਦਾ ਭਵੇ.
ਉਤ੍ਤਾਨਾ ਚੇਵ ਯੇ ਅਤ੍ਥਾ, ਤੇਸਂ ਸਂਵਣ੍ਣਨਾਯ ਕਿਂ;
ਅਧਿਪ੍ਪਾਯਾਨੁਸਨ੍ਧੀਹਿ, ਬ੍ਯਞ੍ਜਨੇਨ ਚ ਯੇ ਪਨ.
ਅਨੁਤ੍ਤਾਨਾ ਨ ਤੇ ਯਸ੍ਮਾ, ਸਕ੍ਕਾ ਞਾਤੁਂ ਅਵਣ੍ਣਿਤਾ;
ਤੇਸਂਯੇਵ ਅਯਂ ਤਸ੍ਮਾ, ਹੋਤਿ ਸਂਵਣ੍ਣਨਾਨਯੋਤਿ.
੧. ਤੇਨ ਸਮਯੇਨ ਬੁਦ੍ਧੋ ਭਗਵਾ ਉਰੁਵੇਲਾਯਂ ਵਿਹਰਤਿ ਨਜ੍ਜਾ ਨੇਰਞ੍ਜਰਾਯ ਤੀਰੇ ਬੋਧਿਰੁਕ੍ਖਮੂਲੇ ਪਠਮਾਭਿਸਮ੍ਬੁਦ੍ਧੋਤਿ ਏਤ੍ਥ ਕਿਞ੍ਚਾਪਿ ‘‘ਤੇਨ ਸਮਯੇਨ ਬੁਦ੍ਧੋ ਭਗਵਾ ਵੇਰਞ੍ਜਾਯ’’ਨ੍ਤਿਆਦੀਸੁ ਵਿਯ ਕਰਣਵਚਨੇ ਵਿਸੇਸਕਾਰਣਂ ਨਤ੍ਥਿ, ਵਿਨਯਂ ਪਤ੍ਵਾ ਪਨ ਕਰਣਵਚਨੇਨੇਵ ਅਯਮਭਿਲਾਪੋ ਆਰੋਪਿਤੋਤਿ ਆਦਿਤੋ ਪਟ੍ਠਾਯ ਆਰੁਲ਼੍ਹਾਭਿਲਾਪਵਸੇਨੇਵੇਤਂ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਏਸ ਨਯੋ ਅਞ੍ਞੇਸੁਪਿ ਇਤੋ ਪਰੇਸੁ ਏਵਰੂਪੇਸੁ.
ਕਿਂ ਪਨੇਤਸ੍ਸ ਵਚਨੇ ਪਯੋਜਨਨ੍ਤਿ? ਪਬ੍ਬਜ੍ਜਾਦੀਨਂ ਵਿਨਯਕਮ੍ਮਾਨਂ ਆਦਿਤੋ ਪਟ੍ਠਾਯ ਨਿਦਾਨਦਸ੍ਸਨਂ. ਯਾ ਹਿ ਭਗਵਤਾ ‘‘ਅਨੁਜਾਨਾਮਿ, ਭਿਕ੍ਖਵੇ, ਇਮੇਹਿ ਤੀਹਿ ਸਰਣਗਮਨੇਹਿ ਪਬ੍ਬਜ੍ਜਂ ਉਪਸਮ੍ਪਦ’’ਨ੍ਤਿ (ਮਹਾਵ. ੩੪) ਏਵਂ ਪਬ੍ਬਜ੍ਜਾ ਚੇਵ ਉਪਸਮ੍ਪਦਾ ਚ ਅਨੁਞ੍ਞਾਤਾ, ਯਾਨਿ ਚ ਰਾਜਗਹਾਦੀਸੁ ਉਪਜ੍ਝਾਯਉਪਜ੍ਝਾਯਵਤ੍ਤਆਚਰਿਯਆਚਰਿਯਵਤ੍ਤਾਦੀਨਿ ਅਨੁਞ੍ਞਾਤਾਨਿ, ਤਾਨਿ ਅਭਿਸਮ੍ਬੋਧਿਂ ਪਤ੍ਵਾ ਸਤ੍ਤਸਤ੍ਤਾਹਂ ਬੋਧਿਮਣ੍ਡੇ ਵੀਤਿਨਾਮੇਤ੍ਵਾ ਬਾਰਾਣਸਿਯਂ ਧਮ੍ਮਚਕ੍ਕਂ ਪਵਤ੍ਤੇਤ੍ਵਾ ਇਮਿਨਾ ਅਨੁਕ੍ਕਮੇਨ ਇਦਞ੍ਚਿਦਞ੍ਚ ਠਾਨਂ ਪਤ੍ਵਾ ਇਮਸ੍ਮਿਞ੍ਚ ਇਮਸ੍ਮਿਞ੍ਚ ਵਤ੍ਥੁਸ੍ਮਿਂ ਪਞ੍ਞਤ੍ਤਾਨੀਤਿ ਏਵਮੇਤੇਸਂ ਪਬ੍ਬਜ੍ਜਾਦੀਨਂ ਵਿਨਯਕਮ੍ਮਾਨਂ ਆਦਿਤੋ ਪਟ੍ਠਾਯ ਨਿਦਾਨਦਸ੍ਸਨਂ ਏਤਸ੍ਸ ਵਚਨੇ ਪਯੋਜਨਨ੍ਤਿ ਵੇਦਿਤਬ੍ਬਂ.
ਤਤ੍ਥ ਉਰੁਵੇਲਾਯਨ੍ਤਿ ਮਹਾਵੇਲਾਯਂ; ਮਹਨ੍ਤੇ ਵਾਲਿਕਰਾਸਿਮ੍ਹੀਤਿ ਅਤ੍ਥੋ. ਅਥ ਵਾ ‘‘ਉਰੂ’’ਤਿ ਵਾਲਿਕਾ ਵੁਚ੍ਚਤਿ; ‘‘ਵੇਲਾ’’ਤਿ ਮਰਿਯਾਦਾ; ਵੇਲਾਤਿਕ੍ਕਮਨਹੇਤੁ ਆਹਟਾ ਉਰੁ ਉਰੁਵੇਲਾਤਿ ਏਵਮ੍ਪੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਅਤੀਤੇ ਕਿਰ ਅਨੁਪ੍ਪਨ੍ਨੇ ਬੁਦ੍ਧੇ ਦਸਸਹਸ੍ਸਕੁਲਪੁਤ੍ਤਾ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਤਸ੍ਮਿਂ ਪਦੇਸੇ ਵਿਹਰਨ੍ਤਾ ਏਕਦਿਵਸਂ ਸਨ੍ਨਿਪਤਿਤ੍ਵਾ ਕਤਿਕਵਤ੍ਤਂ ਅਕਂਸੁ – ‘‘ਕਾਯਕਮ੍ਮਵਚੀਕਮ੍ਮਾਨਿ ਨਾਮ ਪਰੇਸਮ੍ਪਿ ਪਾਕਟਾਨਿ ਹੋਨ੍ਤਿ, ਮਨੋਕਮ੍ਮਂ ਪਨ ਅਪਾਕਟਂ; ਤਸ੍ਮਾ ਯੋ ਕਾਮਵਿਤਕ੍ਕਂ ਵਾ ਬ੍ਯਾਪਾਦਵਿਤਕ੍ਕਂ ਵਾ ਵਿਹਿਂਸਾਵਿਤਕ੍ਕਂ ਵਾ ਵਿਤਕ੍ਕੇਤਿ, ਤਸ੍ਸ ਅਞ੍ਞੋ ਚੋਦਕੋ ਨਾਮ ਨਤ੍ਥਿ, ਸੋ ਅਤ੍ਤਨਾਵ ਅਤ੍ਤਾਨਂ ਚੋਦੇਤ੍ਵਾ ਪਤ੍ਤਪੁਟੇਨ ਵਾਲਿਕਂ ਆਹਰਿਤ੍ਵਾ ਇਮਸ੍ਮਿਂ ਠਾਨੇ ਆਕਿਰਤੁ, ਇਦਮਸ੍ਸ ਦਣ੍ਡਕਮ੍ਮ’’ਨ੍ਤਿ. ਤਤੋ ਪਟ੍ਠਾਯ ਯੋ ਤਾਦਿਸਂ ਵਿਤਕ੍ਕਂ ਵਿਤਕ੍ਕੇਤਿ, ਸੋ ਤਤ੍ਥ ਪਤ੍ਤਪੁਟੇਨ ਵਾਲਿਕਂ ਆਕਿਰਤਿ. ਏਵਂ ਤਤ੍ਥ ਅਨੁਕ੍ਕਮੇਨ ਮਹਾਵਾਲਿਕਰਾਸਿ ਜਾਤੋ, ਤਤੋ ਨਂ ਪਚ੍ਛਿਮਾ ਜਨਤਾ ਪਰਿਕ੍ਖਿਪਿਤ੍ਵਾ ਚੇਤਿਯਟ੍ਠਾਨਮਕਾਸਿ. ਤਂ ਸਨ੍ਧਾਯ ਵੁਤ੍ਤਂ – ‘‘ਉਰੁਵੇਲਾਯਨ੍ਤਿ ਮਹਾਵੇਲਾਯਂ; ਮਹਨ੍ਤੇ ਵਾਲਿਕਰਾਸਿਮ੍ਹੀਤਿ ਅਤ੍ਥੋ’’ਤਿ. ਤਮੇਵ ਸਨ੍ਧਾਯ ਵੁਤ੍ਤਂ – ‘‘ਅਥ ਵਾ ਉਰੂਤਿ ਵਾਲਿਕਾ ਵੁਚ੍ਚਤਿ; ਵੇਲਾਤਿ ਮਰਿਯਾਦਾ; ਵੇਲਾਤਿਕ੍ਕਮਨਹੇਤੁ ਆਹਟਾ ਉਰੁ ਉਰੁਵੇਲਾਤਿ ਏਵਮ੍ਪੇਤ੍ਥ ਅਤ੍ਥੋ ਦਟ੍ਠਬ੍ਬੋ’’ਤਿ.
ਬੋਧਿਰੁਕ੍ਖਮੂਲੇਤਿ ਬੋਧਿ ਵੁਚ੍ਚਤਿ ਚਤੂਸੁ ਮਗ੍ਗੇਸੁ ਞਾਣਂ; ਤਂ ਬੋਧਿਂ ਭਗਵਾ ਏਤ੍ਥ ਪਤ੍ਤੋਤਿ ਰੁਕ੍ਖੋਪਿ ‘‘ਬੋਧਿਰੁਕ੍ਖੋ’’ਤ੍ਵੇਵ ਨਾਮਂ ਲਭਿ, ਤਸ੍ਸ ਬੋਧਿਰੁਕ੍ਖਸ੍ਸ ਮੂਲੇ ਬੋਧਿਰੁਕ੍ਖਮੂਲੇ. ਪਠਮਾਭਿਸਮ੍ਬੁਦ੍ਧੋਤਿ ਪਠਮਂ ਅਭਿਸਮ੍ਬੁਦ੍ਧੋ; ਅਭਿਸਮ੍ਬੁਦ੍ਧੋ ਹੁਤ੍ਵਾ ਸਬ੍ਬਪਠਮਂਯੇਵਾਤਿ ਅਤ੍ਥੋ. ਏਕਪਲ੍ਲਙ੍ਕੇਨਾਤਿ ਸਕਿਮ੍ਪਿ ਅਨੁਟ੍ਠਹਿਤ੍ਵਾ ਯਥਾਆਭੁਜਿਤੇਨ ਏਕੇਨੇਵ ਪਲ੍ਲਙ੍ਕੇਨ. ਵਿਮੁਤ੍ਤਿਸੁਖਪਟਿਸਂਵੇਦੀਤਿ ਵਿਮੁਤ੍ਤਿਸੁਖਂ ਫਲਸਮਾਪਤ੍ਤਿਸੁਖਂ ਪਟਿਸਂਵੇਦਯਮਾਨੋ.
ਪਟਿਚ੍ਚਸਮੁਪ੍ਪਾਦਨ੍ਤਿ ਪਚ੍ਚਯਾਕਾਰਂ. ਪਚ੍ਚਯਾਕਾਰੋ ਹਿ ਅਞ੍ਞਮਞ੍ਞਂ ਪਟਿਚ੍ਚ ਸਹਿਤੇ ਧਮ੍ਮੇ ਉਪ੍ਪਾਦੇਤੀਤਿ ‘‘ਪਟਿਚ੍ਚਸਮੁਪ੍ਪਾਦੋ’’ਤਿ ਵੁਚ੍ਚਤਿ. ਅਯਮੇਤ੍ਥ ਸਙ੍ਖੇਪੋ. ਵਿਤ੍ਥਾਰੋ ਪਨ ਸਬ੍ਬਾਕਾਰਸਮ੍ਪਨ੍ਨਂ ਵਿਨਿਚ੍ਛਯਂ ਇਚ੍ਛਨ੍ਤੇਨ ਵਿਸੁਦ੍ਧਿਮਗ੍ਗਤੋ ਗਹੇਤਬ੍ਬੋ. ਅਨੁਲੋਮਪਟਿਲੋਮਨ੍ਤਿ ਅਨੁਲੋਮਞ੍ਚ ਪਟਿਲੋਮਞ੍ਚ. ਤਤ੍ਥ ‘‘ਅਵਿਜ੍ਜਾਪਚ੍ਚਯਾ ਸਙ੍ਖਾਰਾ’’ਤਿਆਦਿਨਾ ਨਯੇਨ ਵੁਤ੍ਤੋ ਅਵਿਜ੍ਜਾਦਿਕੋ ਪਚ੍ਚਯਾਕਾਰੋ ਅਤ੍ਤਨਾ ਕਤ੍ਤਬ੍ਬਕਿਚ੍ਚਕਰਣਤੋ ‘‘ਅਨੁਲੋਮੋ’’ਤਿ ਵੁਚ੍ਚਤਿ. ‘‘ਅਵਿਜ੍ਜਾਯ ਤ੍ਵੇਵ ਅਸੇਸਵਿਰਾਗਨਿਰੋਧਾ ਸਙ੍ਖਾਰਨਿਰੋਧੋ’’ਤਿਆਦਿਨਾ ਨਯੇਨ ਵੁਤ੍ਤੋ ਸ੍ਵੇਵ ਅਨੁਪ੍ਪਾਦਨਿਰੋਧੇਨ ਨਿਰੁਜ੍ਝਮਾਨੋ ਤਂ ਕਿਚ੍ਚਂ ਨ ਕਰੋਤੀਤਿ ਤਸ੍ਸ ਅਕਰਣਤੋ ‘‘ਪਟਿਲੋਮੋ’’ਤਿ ਵੁਚ੍ਚਤਿ. ਪੁਰਿਮਨਯੇਨ ਵਾ ਵੁਤ੍ਤੋ ਪਵਤ੍ਤਿਯਾ ਅਨੁਲੋਮੋ, ਇਤਰੋ ਤਸ੍ਸਾ ਪਟਿਲੋਮੋਤਿ ਏਵਮ੍ਪੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਆਦਿਤੋ ਪਨ ਪਟ੍ਠਾਯ ਯਾਵ ਅਨ੍ਤਂ, ਅਨ੍ਤਤੋ ਚ ਪਟ੍ਠਾਯ ਯਾਵ ਆਦਿਂ ਪਾਪੇਤ੍ਵਾ ਅਵੁਤ੍ਤਤ੍ਤਾ ਇਤੋ ਅਞ੍ਞੇਨਤ੍ਥੇਨ ਅਨੁਲੋਮਪਟਿਲੋਮਤਾ ਨ ਯੁਜ੍ਜਤਿ.
ਮਨਸਾਕਾਸੀਤਿ ਮਨਸਿ ਅਕਾਸਿ. ਤਤ੍ਥ ਯਥਾ ਅਨੁਲੋਮਂ ਮਨਸਿ ਅਕਾਸਿ, ਇਦਂ ਤਾਵ ਦਸ੍ਸੇਤੁਂ ‘‘ਅਵਿਜ੍ਜਾਪਚ੍ਚਯਾ ਸਙ੍ਖਾਰਾ’’ਤਿਆਦਿ ਵੁਤ੍ਤਂ. ਤਤ੍ਥ ਅਵਿਜ੍ਜਾ ਚ ਸਾ ਪਚ੍ਚਯੋ ਚਾਤਿ ਅਵਿਜ੍ਜਾਪਚ੍ਚਯੋ. ਤਸ੍ਮਾ ਅਵਿਜ੍ਜਾਪਚ੍ਚਯਾ ਸਙ੍ਖਾਰਾ ਸਮ੍ਭਵਨ੍ਤੀਤਿ ਇਮਿਨਾ ਨਯੇਨ ਸਬ੍ਬਪਦੇਸੁ ਅਤ੍ਥੋ ਵੇਦਿਤਬ੍ਬੋ. ਅਯਮੇਤ੍ਥ ਸਙ੍ਖੇਪੋ. ਵਿਤ੍ਥਾਰੋ ਪਨ ਸਬ੍ਬਾਕਾਰਸਮ੍ਪਨ੍ਨਂ ਵਿਨਿਚ੍ਛਯਂ ਇਚ੍ਛਨ੍ਤੇਨ ਵਿਸੁਦ੍ਧਿਮਗ੍ਗਤੋਵ ਗਹੇਤਬ੍ਬੋ.
ਯਥਾ ਪਨ ਪਟਿਲੋਮਂ ਮਨਸਿ ਅਕਾਸਿ, ਇਦਂ ਦਸ੍ਸੇਤੁਂ ਅਵਿਜ੍ਜਾਯ ਤ੍ਵੇਵ ਅਸੇਸਵਿਰਾਗਨਿਰੋਧਾ ਸਙ੍ਖਾਰਨਿਰੋਧੋਤਿਆਦਿ ਵੁਤ੍ਤਂ. ਤਤ੍ਥ ਅਵਿਜ੍ਜਾਯ ਤ੍ਵੇਵਾਤਿ ਅਵਿਜ੍ਜਾਯ ਤੁ ਏਵ. ਅਸੇਸਵਿਰਾਗਨਿਰੋਧਾਤਿ ਵਿਰਾਗਸਙ੍ਖਾਤੇਨ ਮਗ੍ਗੇਨ ਅਸੇਸਨਿਰੋਧਾ. ਸਙ੍ਖਾਰਨਿਰੋਧੋਤਿ ਸਙ੍ਖਾਰਾਨਂ ਅਨੁਪ੍ਪਾਦਨਿਰੋਧੋ ਹੋਤਿ. ਏਵਂ ਨਿਰੁਦ੍ਧਾਨਂ ਪਨ ਸਙ੍ਖਾਰਾਨਂ ਨਿਰੋਧਾ ਵਿਞ੍ਞਾਣਂ ਨਿਰੁਦ੍ਧਂ, ਵਿਞ੍ਞਾਣਾਦੀਨਞ੍ਚ ਨਿਰੋਧਾ ਨਾਮਰੂਪਾਦੀਨਿ ਨਿਰੁਦ੍ਧਾਨਿਯੇਵ ਹੋਨ੍ਤੀਤਿ ਦਸ੍ਸੇਤੁਂ ਸਙ੍ਖਾਰਨਿਰੋਧਾ ਵਿਞ੍ਞਾਣਨਿਰੋਧੋਤਿਆਦੀਨਿ ਵਤ੍ਵਾ ਏਵਮੇਤਸ੍ਸ ਕੇਵਲਸ੍ਸ ਦੁਕ੍ਖਕ੍ਖਨ੍ਧਸ੍ਸ ਨਿਰੋਧੋ ਹੋਤੀਤਿ ਵੁਤ੍ਤਂ. ਤਤ੍ਥ ਕੇਵਲਸ੍ਸਾਤਿ ਸਕਲਸ੍ਸ; ਸੁਦ੍ਧਸ੍ਸ ਵਾ ਸਤ੍ਤਵਿਰਹਿਤਸ੍ਸਾਤਿ ਅਤ੍ਥੋ. ਦੁਕ੍ਖਕ੍ਖਨ੍ਧਸ੍ਸਾਤਿ ਦੁਕ੍ਖਰਾਸਿਸ੍ਸ. ਨਿਰੋਧੋ ਹੋਤੀਤਿ ਅਨੁਪ੍ਪਾਦੋ ਹੋਤਿ.
ਏਤਮਤ੍ਥਂ ਵਿਦਿਤ੍ਵਾਤਿ ਯ੍ਵਾਯਂ ‘‘ਅਵਿਜ੍ਜਾਦਿਵਸੇਨ ਸਙ੍ਖਾਰਾਦਿਕਸ੍ਸ ਦੁਕ੍ਖਕ੍ਖਨ੍ਧਸ੍ਸ ਸਮੁਦਯੋ ਚ ਅਵਿਜ੍ਜਾਨਿਰੋਧਾਦਿਵਸੇਨ ਚ ਨਿਰੋਧੋ ਹੋਤੀ’’ਤਿ ਵੁਤ੍ਤੋ, ਸਬ੍ਬਾਕਾਰੇਨ ਏਤਮਤ੍ਥਂ ਵਿਦਿਤ੍ਵਾ. ਤਾਯਂ ਵੇਲਾਯਨ੍ਤਿ ਤਾਯਂ ਤਸ੍ਸ ਅਤ੍ਥਸ੍ਸ ਵਿਦਿਤਵੇਲਾਯਂ. ਇਮਂ ਉਦਾਨਂ ਉਦਾਨੇਸੀਤਿ ਇਮਂ ਤਸ੍ਮਿਂ ਵਿਦਿਤੇ ਅਤ੍ਥੇ ਹੇਤੁਨੋ ਚ ਹੇਤੁਸਮੁਪ੍ਪਨ੍ਨਧਮ੍ਮਸ੍ਸ ਚ ਪਜਾਨਨਾਯ ਆਨੁਭਾਵਦੀਪਕਂ ‘‘ਯਦਾ ਹਵੇ ਪਾਤੁਭਵਨ੍ਤੀ’’ਤਿਆਦਿਕਂ ਸੋਮਨਸ੍ਸਯੁਤ੍ਤਞਾਣਸਮੁਟ੍ਠਾਨਂ ਉਦਾਨਂ ਉਦਾਨੇਸਿ, ਅਤ੍ਤਮਨਵਾਚਂ ਨਿਚ੍ਛਾਰੇਸੀਤਿ ਵੁਤ੍ਤਂ ਹੋਤਿ.
ਤਸ੍ਸਤ੍ਥੋ – ਯਦਾ ਹਵੇਤਿ ਯਸ੍ਮਿਂ ਭਵੇ ਕਾਲੇ. ਪਾਤੁਭਵਨ੍ਤੀਤਿ ਉਪ੍ਪਜ੍ਜਨ੍ਤਿ. ਧਮ੍ਮਾਤਿ ਅਨੁਲੋਮਪਚ੍ਚਯਾਕਾਰਪਟਿਵੇਧਸਾਧਕਾ ਬੋਧਿਪਕ੍ਖਿਯਧਮ੍ਮਾ. ਅਥ ਵਾ ਪਾਤੁਭਵਨ੍ਤੀਤਿ ਪਕਾਸਨ੍ਤਿ; ਅਭਿਸਮਯਵਸੇਨ ਬ੍ਯਤ੍ਤਾ ਪਾਕਟਾ ਹੋਨ੍ਤਿ. ਧਮ੍ਮਾਤਿ ਚਤੁਅਰਿਯਸਚ੍ਚਧਮ੍ਮਾ. ਆਤਾਪੋ ਵੁਚ੍ਚਤਿ ਕਿਲੇਸਸਨ੍ਤਾਪਨਟ੍ਠੇਨ ਵੀਰਿਯਂ; ਆਤਾਪਿਨੋਤਿ ਸਮ੍ਮਪ੍ਪਧਾਨਵੀਰਿਯਵਤੋ. ਝਾਯਤੋਤਿ ਆਰਮ੍ਮਣੂਪਨਿਜ੍ਝਾਨਲਕ੍ਖਣੇਨ ਚ ਲਕ੍ਖਣੂਪਨਿਜ੍ਝਾਨਲਕ੍ਖਣੇਨ ਚ ਝਾਨੇਨ ਝਾਯਨ੍ਤਸ੍ਸ. ਬ੍ਰਾਹ੍ਮਣਸ੍ਸਾਤਿ ਬਾਹਿਤਪਾਪਸ੍ਸ ਖੀਣਾਸਵਸ੍ਸ. ਅਥਸ੍ਸ ਕਙ੍ਖਾ ਵਪਯਨ੍ਤੀਤਿ ਅਥਸ੍ਸ ਏਵਂ ਪਾਤੁਭੂਤਧਮ੍ਮਸ੍ਸ ਕਙ੍ਖਾ ਵਪਯਨ੍ਤਿ. ਸਬ੍ਬਾਤਿ ਯਾ ਏਤਾ ‘‘ਕੋ ਨੁ ਖੋ ਭਨ੍ਤੇ ਫੁਸਤੀਤਿ; ਨੋ ਕਲ੍ਲੋ ਪਞ੍ਹੋਤਿ ਭਗਵਾ ਅਵੋਚਾ’’ਤਿਆਦਿਨਾ, ਤਥਾ ‘‘ਕਤਮਂ ਨੁ ਖੋ ਭਨ੍ਤੇ ਜਰਾਮਰਣਂ; ਕਸ੍ਸ ਚ ਪਨਿਦਂ ਜਰਾਮਰਣਨ੍ਤਿ; ਨੋ ਕਲ੍ਲੋ ਪਞ੍ਹੋਤਿ ਭਗਵਾ ਅਵੋਚਾ’’ਤਿਆਦਿਨਾ ਚ ਨਯੇਨ ਪਚ੍ਚਯਾਕਾਰੇ ਕਙ੍ਖਾ ਵੁਤ੍ਤਾ, ਯਾ ਚ ਪਚ੍ਚਯਾਕਾਰਸ੍ਸੇਵ ਅਪ੍ਪਟਿਵਿਦ੍ਧਤ੍ਤਾ ‘‘ਅਹੋਸਿਂ ਨੁ ਖੋ ਅਹਂ ਅਤੀਤਮਦ੍ਧਾਨ’’ਨ੍ਤਿਆਦਿਕਾ ਸੋਲ਼ਸ ਕਙ੍ਖਾ ਆਗਤਾ, ਤਾ ਸਬ੍ਬਾ ਵਪਯਨ੍ਤਿ ਅਪਗਚ੍ਛਨ੍ਤਿ ਨਿਰੁਜ੍ਝਨ੍ਤਿ. ਕਸ੍ਮਾ? ਯਤੋ ਪਜਾਨਾਤਿ ਸਹੇਤੁਧਮ੍ਮਨ੍ਤਿ ਯਸ੍ਮਾ ਅਵਿਜ੍ਜਾਦਿਕੇਨ ਹੇਤੁਨਾ ਸਹੇਤੁਕਂ ਇਮਂ ਸਙ੍ਖਾਰਾਦਿਂ ਕੇਵਲਂ ਦੁਕ੍ਖਕ੍ਖਨ੍ਧਧਮ੍ਮਂ ਪਜਾਨਾਤਿ ਅਞ੍ਞਾਤਿ ਪਟਿਵਿਜ੍ਝਤੀਤਿ.
੨. ਦੁਤਿਯਵਾਰੇ – ਇਮਂ ਉਦਾਨਂ ਉਦਾਨੇਸੀਤਿ ਇਮਂ ਤਸ੍ਮਿਂ ਵਿਦਿਤੇ ਅਤ੍ਥੇ ‘‘ਅਵਿਜ੍ਜਾਯ ਤ੍ਵੇਵ ਅਸੇਸਵਿਰਾਗਨਿਰੋਧਾ ਸਙ੍ਖਾਰਨਿਰੋਧੋ’’ਤਿ ਏਵਂ ਪਕਾਸਿਤਸ੍ਸ ਨਿਬ੍ਬਾਨਸਙ੍ਖਾਤਸ੍ਸ ਪਚ੍ਚਯਕ੍ਖਯਸ੍ਸ ਅਵਬੋਧਾਨੁਭਾਵਦੀਪਕਂ ਵੁਤ੍ਤਪ੍ਪਕਾਰਂ ਉਦਾਨਂ ਉਦਾਨੇਸੀਤਿ ਅਤ੍ਥੋ. ਤਤ੍ਰਾਯਂ ਸਙ੍ਖੇਪਤ੍ਥੋ – ਯਸ੍ਮਾ ਪਚ੍ਚਯਾਨਂ ਖਯਸਙ੍ਖਾਤਂ ਨਿਬ੍ਬਾਨਂ ਅਵੇਦਿ ਅਞ੍ਞਾਸਿ ਪਟਿਵਿਜ੍ਝਿ, ਤਸ੍ਮਾ ਯਦਾਸ੍ਸ ਆਤਾਪਿਨੋ ਝਾਯਤੋ ਬ੍ਰਾਹ੍ਮਣਸ੍ਸ ਵੁਤ੍ਤਪ੍ਪਕਾਰਾ ਧਮ੍ਮਾ ਪਾਤੁਭਵਨ੍ਤਿ, ਅਥਸ੍ਸ ਯਾ ਨਿਬ੍ਬਾਨਸ੍ਸ ਅਵਿਦਿਤਤ੍ਤਾ ਉਪ੍ਪਜ੍ਜੇਯ੍ਯੁਂ, ਤਾ ਸਬ੍ਬਾਪਿ ਕਙ੍ਖਾ ਵਪਯਨ੍ਤੀਤਿ.
੩. ਤਤਿਯਵਾਰੇ – ਇਮਂ ਉਦਾਨਂ ਉਦਾਨੇਸੀਤਿ ਇਮਂ ਯੇਨ ਮਗ੍ਗੇਨ ਸੋ ਦੁਕ੍ਖਕ੍ਖਨ੍ਧਸ੍ਸ ਸਮੁਦਯਨਿਰੋਧਸਙ੍ਖਾਤੋ ਅਤ੍ਥੋ ਕਿਚ੍ਚਵਸੇਨ ਚ ਆਰਮ੍ਮਣਕਿਰਿਯਾਯ ਚ ਵਿਦਿਤੋ, ਤਸ੍ਸ ਅਰਿਯਮਗ੍ਗਸ੍ਸ ਆਨੁਭਾਵਦੀਪਕਂ ਵੁਤ੍ਤਪ੍ਪਕਾਰਂ ਉਦਾਨਂ ਉਦਾਨੇਸੀਤਿ ਅਤ੍ਥੋ. ਤਤ੍ਰਾਪਾਯਂ ਸਙ੍ਖੇਪਤ੍ਥੋ – ਯਦਾ ਹਵੇ ਪਾਤੁਭਵਨ੍ਤਿ ਧਮ੍ਮਾ ਆਤਾਪਿਨੋ ਝਾਯਤੋ ਬ੍ਰਾਹ੍ਮਣਸ੍ਸ, ਤਦਾ ਸੋ ਬ੍ਰਾਹ੍ਮਣੋ ਤੇਹਿ ਵਾ ਉਪ੍ਪਨ੍ਨੇਹਿ ਬੋਧਿਪਕ੍ਖਿਯਧਮ੍ਮੇਹਿ, ਯਸ੍ਸ ਵਾ ਅਰਿਯਮਗ੍ਗਸ੍ਸ ਚਤੁਸਚ੍ਚਧਮ੍ਮਾ ਪਾਤੁਭੂਤਾ, ਤੇਨ ਅਰਿਯਮਗ੍ਗੇਨ ਵਿਧੂਪਯਂ ਤਿਟ੍ਠਤਿ ਮਾਰਸੇਨਂ ‘‘ਕਾਮਾ ਤੇ ਪਠਮਾ ਸੇਨਾ’’ਤਿਆਦਿਨਾ ਨਯੇਨ ਵੁਤ੍ਤਪ੍ਪਕਾਰਂ ਮਾਰਸੇਨਂ ਵਿਧੂਪਯਨ੍ਤੋ ਵਿਧਮੇਨ੍ਤੋ ਵਿਦ੍ਧਂਸੇਨ੍ਤੋ ਤਿਟ੍ਠਤਿ. ਕਥਂ? ਸੂਰਿਯੋਵ ਓਭਾਸਯਮਨ੍ਤਲਿਕ੍ਖਂ, ਯਥਾ ਸੂਰਿਯੋ ਅਬ੍ਭੁਗ੍ਗਤੋ ਅਤ੍ਤਨੋ ਪਭਾਯ ਅਨ੍ਤਲਿਕ੍ਖਂ ਓਭਾਸੇਨ੍ਤੋਵ ਅਨ੍ਧਕਾਰਂ ਵਿਧਮੇਨ੍ਤੋ ਤਿਟ੍ਠਤਿ, ਏਵਂ ਸੋਪਿ ਬ੍ਰਾਹ੍ਮਣੋ ਤੇਹਿ ਧਮ੍ਮੇਹਿ ਤੇਨ ਵਾ ਮਗ੍ਗੇਨ ਸਚ੍ਚਾਨਿ ਪਟਿਵਿਜ੍ਝਨ੍ਤੋਵ ਮਾਰਸੇਨਂ ਵਿਧੂਪਯਨ੍ਤੋ ਤਿਟ੍ਠਤੀਤਿ.
ਏਵਮੇਤ੍ਥ ਪਠਮਂ ਉਦਾਨਂ ਪਚ੍ਚਯਾਕਾਰਪਚ੍ਚਵੇਕ੍ਖਣਵਸੇਨ, ਦੁਤਿਯਂ ਨਿਬ੍ਬਾਨਪਚ੍ਚਵੇਕ੍ਖਣਵਸੇਨ, ਤਤਿਯਂ ਮਗ੍ਗਪਚ੍ਚਵੇਕ੍ਖਣਵਸੇਨ ਉਪ੍ਪਨ੍ਨਨ੍ਤਿ ਵੇਦਿਤਬ੍ਬਂ. ਉਦਾਨੇ ਪਨ ‘‘ਰਤ੍ਤਿਯਾ ਪਠਮਂ ਯਾਮਂ ਪਟਿਚ੍ਚਸਮੁਪ੍ਪਾਦਂ ਅਨੁਲੋਮਂ, ਦੁਤਿਯਂ ਯਾਮਂ ਪਟਿਲੋਮਂ, ਤਤਿਯਂ ਯਾਮਂ ਅਨੁਲੋਮਪਟਿਲੋਮ’’ਨ੍ਤਿ ਵੁਤ੍ਤਂ; ਤਂ ਸਤ੍ਤਾਹਸ੍ਸ ਅਚ੍ਚਯੇਨ ‘‘ਸ੍ਵੇ ਆਸਨਾ ਵੁਟ੍ਠਹਿਸ੍ਸਾਮੀ’’ਤਿ ਰਤ੍ਤਿਂ ਉਪ੍ਪਾਦਿਤਮਨਸਿਕਾਰਂ ਸਨ੍ਧਾਯ ਵੁਤ੍ਤਂ. ਤਦਾ ਹਿ ਭਗਵਾ ਯਸ੍ਸ ਪਚ੍ਚਯਾਕਾਰਪਜਾਨਨਸ੍ਸ ਚ ਪਚ੍ਚਯਕ੍ਖਯਾਧਿਗਮਸ੍ਸ ਚ ਆਨੁਭਾਵਦੀਪਿਕਾ ਪੁਰਿਮਾ ਦ੍ਵੇ ਉਦਾਨਗਾਥਾ, ਤਸ੍ਸ ਵਸੇਨ ਏਕੇਕਮੇਵ ਕੋਟ੍ਠਾਸਂ ਪਠਮਯਾਮਞ੍ਚ ਮਜ੍ਝਿਮਯਾਮਞ੍ਚ ਮਨਸਾਕਾਸਿ, ਇਧ ਪਨ ਪਾਟਿਪਦਰਤ੍ਤਿਯਾ ਏਵਂ ਮਨਸਾਕਾਸਿ. ਭਗਵਾ ਹਿ ਵਿਸਾਖਪੁਣ੍ਣਮਾਯ ਰਤ੍ਤਿਯਾ ਪਠਮਯਾਮੇ ਪੁਬ੍ਬੇਨਿਵਾਸਂ ਅਨੁਸ੍ਸਰਿ, ਮਜ੍ਝਿਮਯਾਮੇ ਦਿਬ੍ਬਚਕ੍ਖੁਂ ਵਿਸੋਧੇਸਿ, ਪਚ੍ਛਿਮਯਾਮੇ ਪਟਿਚ੍ਚਸਮੁਪ੍ਪਾਦਂ ਅਨੁਲੋਮਪਟਿਲੋਮਂ ਮਨਸਿ ਕਤ੍ਵਾ ‘‘ਇਦਾਨਿ ਅਰੁਣੋ ਉਗ੍ਗਮਿਸ੍ਸਤੀ’’ਤਿ ਸਬ੍ਬਞ੍ਞੁਤਂ ਪਾਪੁਣਿ. ਸਬ੍ਬਞ੍ਞੁਤਪ੍ਪਤ੍ਤਿਸਮਨਨ੍ਤਰਮੇਵ ਚ ਅਰੁਣੋ ਉਗ੍ਗਚ੍ਛਿ. ਤਤੋ ਤਂ ਦਿਵਸਂ ਤੇਨੇਵ ਪਲ੍ਲਙ੍ਕੇਨ ਵੀਤਿਨਾਮੇਤ੍ਵਾ ਸਮ੍ਪਤ੍ਤਾਯ ਪਾਟਿਪਦਰਤ੍ਤਿਯਾ ਤੀਸੁ ਯਾਮੇਸੁ ਏਵਂ ਮਨਸਿ ਕਤ੍ਵਾ ਇਮਾਨਿ ਉਦਾਨਾਨਿ ਉਦਾਨੇਸਿ. ਇਤਿ ਪਾਟਿਪਦਰਤ੍ਤਿਯਾ ਏਵਂ ਮਨਸਿ ਕਤ੍ਵਾ ਤਂ ‘‘ਬੋਧਿਰੁਕ੍ਖਮੂਲੇ ਸਤ੍ਤਾਹਂ ਏਕਪਲ੍ਲਙ੍ਕੇਨ ਨਿਸੀਦੀ’’ਤਿ ਏਵਂ ਵੁਤ੍ਤਸਤ੍ਤਾਹਂ ਤਤ੍ਥੇਵ ਵੀਤਿਨਾਮੇਸਿ.
ਬੋਧਿਕਥਾ ਨਿਟ੍ਠਿਤਾ.
ਅਜਪਾਲਕਥਾ
੪. ਅਥ ਖੋ ਭਗਵਾ ਸਤ੍ਤਾਹਸ੍ਸ ਅਚ੍ਚਯੇਨ ਤਮ੍ਹਾ ਸਮਾਧਿਮ੍ਹਾ ਵੁਟ੍ਠਹਿਤ੍ਵਾ ਬੋਧਿਰੁਕ੍ਖਮੂਲਾ ਯੇਨ ਅਜਪਾਲਨਿਗ੍ਰੋਧੋ ਤੇਨੁਪਸਙ੍ਕਮੀਤਿ ਏਤ੍ਥ ਨ ਭਗਵਾ ਤਮ੍ਹਾ ਸਮਾਧਿਮ੍ਹਾ ਵੁਟ੍ਠਹਿਤ੍ਵਾ ਅਨਨ੍ਤਰਮੇਵ ਬੋਧਿਰੁਕ੍ਖਮੂਲਾ ਯੇਨ ਅਜਪਾਲਨਿਗ੍ਰੋਧੋ ਤੇਨੁਪਸਙ੍ਕਮਿ. ਯਥਾ ਪਨ ‘‘ਭੁਤ੍ਵਾ ਸਯਤੀ’’ਤਿ ਵੁਤ੍ਤੇ ਨ ‘‘ਹਤ੍ਥੇ ਅਧੋਵਿਤ੍ਵਾ ਮੁਖਂ ਅਵਿਕ੍ਖਾਲੇਤ੍ਵਾ ਸਯਨਸਮੀਪਂ ਅਗਨ੍ਤ੍ਵਾ ਅਞ੍ਞਂ ਕਿਞ੍ਚਿ ਆਲਾਪਸਲ੍ਲਾਪਂ ਅਕਤ੍ਵਾ ਸਯਤਿ’’ਚ੍ਚੇਵ ਵੁਤ੍ਤਂ ਹੋਤਿ, ਭੋਜਨਤੋ ਪਨ ਪਚ੍ਛਾ ਸਯਤਿ, ਨ ਨਸਯਤੀਤਿ ਇਦਮੇਵਤ੍ਥ ਦੀਪਿਤਂ ਹੋਤਿ. ਏਵਮਿਧਾਪਿ ‘‘ਨ ਤਮ੍ਹਾ ਸਮਾਧਿਮ੍ਹਾ ਵੁਟ੍ਠਹਿਤ੍ਵਾ ਅਨਨ੍ਤਰਮੇਵ ਪਕ੍ਕਾਮੀ’’ਤਿ ਵੁਤ੍ਤਂ ਹੋਤਿ, ਵੁਟ੍ਠਾਨਤੋ ਚ ਪਨ ਪਚ੍ਛਾ ਪਕ੍ਕਾਮਿ, ਨ ਨਪਕ੍ਕਾਮੀਤਿ ਇਦਮੇਵੇਤ੍ਥ ਦੀਪਿਤਂ ਹੋਤਿ.
ਅਨਨ੍ਤਰਂ ਪਨ ਅਪਕ੍ਕਮਿਤ੍ਵਾ ਭਗਵਾ ਕਿਂ ਅਕਾਸੀਤਿ? ਅਪਰਾਨਿਪਿ ਤੀਣਿ ਸਤ੍ਤਾਹਾਨਿ ਬੋਧਿਸਮੀਪੇਯੇਵ ਵੀਤਿਨਾਮੇਸਿ. ਤਤ੍ਰਾਯਂ ਅਨੁਪੁਬ੍ਬਿਕਥਾ – ਭਗਵਤਿ ਕਿਰ ਬੁਦ੍ਧਤ੍ਤਂ ਪਤ੍ਵਾ ਸਤ੍ਤਾਹਂ ਏਕਪਲ੍ਲਙ੍ਕੇਨ ਨਿਸਿਨ੍ਨੇ ‘‘ਨ ਭਗਵਾ ਵੁਟ੍ਠਾਤਿ; ਕਿਂ ਨੁ ਖੋ ਅਞ੍ਞੇਪਿ ਬੁਦ੍ਧਤ੍ਤਕਰਾ ਧਮ੍ਮਾ ਅਤ੍ਥੀ’’ਤਿ ਏਕਚ੍ਚਾਨਂ ਦੇਵਤਾਨਂ ਕਙ੍ਖਾ ਉਦਪਾਦਿ. ਅਥ ਭਗਵਾ ਅਟ੍ਠਮੇ ਦਿਵਸੇ ਸਮਾਪਤ੍ਤਿਤੋ ਵੁਟ੍ਠਾਯ ਦੇਵਤਾਨਂ ਕਙ੍ਖਂ ਞਤ੍ਵਾ ਕਙ੍ਖਾਵਿਧਮਨਤ੍ਥਂ ਆਕਾਸੇ ਉਪ੍ਪਤਿਤ੍ਵਾ ਯਮਕਪਾਟਿਹਾਰਿਯਂ ਦਸ੍ਸੇਤ੍ਵਾ ਤਾਸਂ ਕਙ੍ਖਂ ਵਿਧਮਿਤ੍ਵਾ ਪਲ੍ਲਙ੍ਕਤੋ ਈਸਕਂ ਪਾਚੀਨਨਿਸ੍ਸਿਤੇ ਉਤ੍ਤਰਦਿਸਾਭਾਗੇ ਠਤ੍ਵਾ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਕਪ੍ਪਸਤਸਹਸ੍ਸਞ੍ਚ ਉਪਚਿਤਾਨਂ ਪਾਰਮੀਨਂ ਬਲਾਧਿਗਮਨਟ੍ਠਾਨਂ ਪਲ੍ਲਙ੍ਕਂ ਬੋਧਿਰੁਕ੍ਖਞ੍ਚ ਅਨਿਮਿਸੇਹਿ ਅਕ੍ਖੀਹਿ ਓਲੋਕਯਮਾਨੋ ਸਤ੍ਤਾਹਂ ਵੀਤਿਨਾਮੇਸਿ, ਤਂ ਠਾਨਂ ਅਨਿਮਿਸਚੇਤਿਯਂ ਨਾਮ ਜਾਤਂ. ਅਥ ਪਲ੍ਲਙ੍ਕਸ੍ਸ ਚ ਠਿਤਟ੍ਠਾਨਸ੍ਸ ਚ ਅਨ੍ਤਰਾ ਪੁਰਤ੍ਥਿਮਤੋ ਚ ਪਚ੍ਛਿਮਤੋ ਚ ਆਯਤੇ ਰਤਨਚਙ੍ਕਮੇ ਚਙ੍ਕਮਨ੍ਤੋ ਸਤ੍ਤਾਹਂ ਵੀਤਿਨਾਮੇਸਿ, ਤਂ ਠਾਨਂ ਰਤਨਚਙ੍ਕਮਚੇਤਿਯਂ ਨਾਮ ਜਾਤਂ. ਤਤੋ ਪਚ੍ਛਿਮਦਿਸਾਭਾਗੇ ਦੇਵਤਾ ਰਤਨਘਰਂ ਮਾਪਯਿਂਸੁ. ਤਤ੍ਥ ਪਲ੍ਲਙ੍ਕੇਨ ਨਿਸੀਦਿਤ੍ਵਾ ਅਭਿਧਮ੍ਮਪਿਟਕਂ ਵਿਸੇਸਤੋ ਚੇਤ੍ਥ ਅਨਨ੍ਤਨਯਂ ਸਮਨ੍ਤਪਟ੍ਠਾਨਂ ਵਿਚਿਨਨ੍ਤੋ ਸਤ੍ਤਾਹਂ ਵੀਤਿਨਾਮੇਸਿ, ਤਂ ਠਾਨਂ ਰਤਨਘਰਚੇਤਿਯਂ ਨਾਮ ਜਾਤਂ.
ਏਵਂ ਬੋਧਿਸਮੀਪੇਯੇਵ ਚਤ੍ਤਾਰਿ ਸਤ੍ਤਾਹਾਨਿ ਵੀਤਿਨਾਮੇਤ੍ਵਾ ਪਞ੍ਚਮੇ ਸਤ੍ਤਾਹੇ ਬੋਧਿਰੁਕ੍ਖਮੂਲਾ ਯੇਨ ਅਜਪਾਲਨਿਗ੍ਰੋਧੋ ਤੇਨੁਪਸਙ੍ਕਮਿ. ਤਸ੍ਸ ਕਿਰ ਨਿਗ੍ਰੋਧਸ੍ਸ ਛਾਯਾਯ ਅਜਪਾਲਕਾ ਗਨ੍ਤ੍ਵਾ ਨਿਸੀਦਨ੍ਤਿ; ਤੇਨਸ੍ਸ ਅਜਪਾਲਨਿਗ੍ਰੋਧੋਤ੍ਵੇਵ ਨਾਮਂ ਉਦਪਾਦਿ. ਸਤ੍ਤਾਹਂ ਵਿਮੁਤ੍ਤਿਸੁਖਪਟਿਸਂਵੇਦੀਤਿ ਤਤ੍ਰਾਪਿ ਧਮ੍ਮਂ ਵਿਚਿਨਨ੍ਤੋਯੇਵ ਵਿਮੁਤ੍ਤਿਸੁਖਂ ਪਟਿਸਂਵੇਦੇਨ੍ਤੋ ਨਿਸੀਦਿ. ਬੋਧਿਤੋ ਪੁਰਤ੍ਥਿਮਦਿਸਾਭਾਗੇ ਏਸ ਰੁਕ੍ਖੋ ਹੋਤਿ. ਏਵਂ ਨਿਸਿਨ੍ਨੇ ਚ ਪਨੇਤ੍ਥ ਭਗਵਤਿ ਏਕੋ ਬ੍ਰਾਹ੍ਮਣੋ ਗਨ੍ਤ੍ਵਾ ਪਞ੍ਹਂ ਪੁਚ੍ਛਿ. ਤੇਨ ਵੁਤ੍ਤਂ ‘‘ਅਥ ਖੋ ਅਞ੍ਞਤਰੋ’’ਤਿਆਦਿ. ਤਤ੍ਥ ਹੁਂਹੁਙ੍ਕਜਾਤਿਕੋਤਿ ਸੋ ਕਿਰ ਦਿਟ੍ਠਮਙ੍ਗਲਿਕੋ ਨਾਮ, ਮਾਨਵਸੇਨ ਕੋਧਵਸੇਨ ਚ ‘‘ਹੁਂਹੁ’’ਨ੍ਤਿ ਕਰੋਨ੍ਤੋ ਵਿਚਰਤਿ, ਤਸ੍ਮਾ ‘‘ਹੁਂਹੁਙ੍ਕਜਾਤਿਕੋ’’ਤਿ ਵੁਚ੍ਚਤਿ. ‘‘ਹੁਹੁਕ੍ਕਜਾਤਿਕੋ’’ਤਿਪਿ ਪਠਨ੍ਤਿ.
ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਤੇਨ ਵੁਤ੍ਤਸ੍ਸ ਵਚਨਸ੍ਸ ਸਿਖਾਪਤ੍ਤਮਤ੍ਥਂ ਵਿਦਿਤ੍ਵਾ ਤਾਯਂ ਵੇਲਾਯਂ ਇਮਂ ਉਦਾਨਂ ਉਦਾਨੇਸਿ. ਤਸ੍ਸਤ੍ਥੋ – ਯੋ ਬਾਹਿਤਪਾਪਧਮ੍ਮਤਾਯ ਬ੍ਰਾਹ੍ਮਣੋ ਨ ਦਿਟ੍ਠਮਙ੍ਗਲਿਕਤਾਯ, ਹੁਂਹੁਙ੍ਕਾਰਕਭਾਵਾਦਿਪਾਪਧਮ੍ਮਯੁਤ੍ਤੋ ਹੁਤ੍ਵਾ ਕੇਵਲਂ ਜਾਤਿਮਤ੍ਤਕੇਨ ਬ੍ਰਹ੍ਮਞ੍ਞਂ ਪਟਿਜਾਨਾਤਿ, ਸੋ ਬ੍ਰਾਹ੍ਮਣੋ ਬਾਹਿਤਪਾਪਧਮ੍ਮਤ੍ਤਾ ਹੁਂਹੁਙ੍ਕਾਰਪ੍ਪਹਾਨੇਨ ਨਿਹੁਂਹੁਙ੍ਕੋ, ਰਾਗਾਦਿਕਸਾਵਾਭਾਵੇਨ ਨਿਕ੍ਕਸਾਵੋ, ਭਾਵਨਾਨੁਯੋਗਯੁਤ੍ਤਚਿਤ੍ਤਤਾਯ ਯਤਤ੍ਤੋ, ਸੀਲਸਂਵਰੇਨ ਵਾ ਸਞ੍ਞਤਚਿਤ੍ਤਤਾਯ ਯਤਤ੍ਤੋ, ਚਤੁਮਗ੍ਗਞਾਣਸਙ੍ਖਾਤੇਹਿ ਵੇਦੇਹਿ ਅਨ੍ਤਂ, ਵੇਦਾਨਂ ਵਾ ਅਨ੍ਤਂ ਗਤਤ੍ਤਾ ਵੇਦਨ੍ਤਗੂ, ਮਗ੍ਗਬ੍ਰਹ੍ਮਚਰਿਯਸ੍ਸ ਵੁਸਿਤਤ੍ਤਾ ਵੁਸਿਤਬ੍ਰਹ੍ਮਚਰਿਯੋ. ਧਮ੍ਮੇਨ ਬ੍ਰਹ੍ਮਵਾਦਂ ਵਦੇਯ੍ਯ, ‘‘ਬ੍ਰਾਹ੍ਮਣੋ, ਅਹ’’ਨ੍ਤਿ ਏਤਂ ਵਾਦਂ ਧਮ੍ਮੇਨ ਵਦੇਯ੍ਯ, ਯਸ੍ਸ ਸਕਲੇ ਲੋਕਸਨ੍ਨਿਵਾਸੇ ਕੁਹਿਞ੍ਚਿ ਏਕਾਰਮ੍ਮਣੇਪਿ ਰਾਗੁਸ੍ਸਦੋ ਦੋਸੁਸ੍ਸਦੋ ਮੋਹੁਸ੍ਸਦੋ ਮਾਨੁਸ੍ਸਦੋ ਦਿਟ੍ਠੁਸ੍ਸਦੋਤਿ ਇਮੇ ਉਸ੍ਸਦਾ ਨਤ੍ਥੀਤਿ.
ਅਜਪਾਲਕਥਾ ਨਿਟ੍ਠਿਤਾ.
ਮੁਚਲਿਨ੍ਦਕਥਾ
੫. ਅਕਾਲਮੇਘੋਤਿ ਅਸਮ੍ਪਤ੍ਤੇ ਵਸ੍ਸਕਾਲੇ ਉਪ੍ਪਨ੍ਨਮੇਘੋ. ਅਯਂ ਪਨ ਗਿਮ੍ਹਾਨਂ ਪਚ੍ਛਿਮੇ ਮਾਸੇ ਉਦਪਾਦਿ. ਸਤ੍ਤਾਹਵਦ੍ਦਲਿਕਾਤਿ ਤਸ੍ਮਿਂ ਉਪ੍ਪਨ੍ਨੇ ਸਤ੍ਤਾਹਂ ਅਵਿਚ੍ਛਿਨ੍ਨਵੁਟ੍ਠਿਕਾ ਅਹੋਸਿ. ਸੀਤਵਾਤਦੁਦ੍ਦਿਨੀਤਿ ਸਾ ਚ ਪਨ ਸਤ੍ਤਾਹਵਦ੍ਦਲਿਕਾ ਉਦਕਫੁਸਿਤਸਮ੍ਮਿਸ੍ਸੇਨ ਸੀਤਵਾਤੇਨ ਸਮਨ੍ਤਾ ਪਰਿਬ੍ਭਮਨ੍ਤੇਨ ਦੂਸਿਤਦਿਵਸਤ੍ਤਾ ਸੀਤਵਾਤਦੁਦ੍ਦਿਨੀ ਨਾਮ ਅਹੋਸਿ. ਅਥ ਖੋ ਮੁਚਲਿਨ੍ਦੋ ਨਾਗਰਾਜਾਤਿ ਤਸ੍ਸੇਵ ਮੁਚਲਿਨ੍ਦਰੁਕ੍ਖਸ੍ਸ ਸਮੀਪੇ ਪੋਕ੍ਖਰਣਿਯਾ ਨਿਬ੍ਬਤ੍ਤੋ ਮਹਾਨੁਭਾਵੋ ਨਾਗਰਾਜਾ. ਸਤ੍ਤਕ੍ਖਤ੍ਤੁਂ ਭੋਗੇਹਿ ਪਰਿਕ੍ਖਿਪਿਤ੍ਵਾਤਿ ਏਵਂ ਭੋਗੇਹਿ ਪਰਿਕ੍ਖਿਪਿਤ੍ਵਾ ਉਪਰਿਮੁਦ੍ਧਨਿ ਮਹਨ੍ਤਂ ਫਣਂ ਕਰਿਤ੍ਵਾਵ ਠਿਤੇ; ਤਸ੍ਮਿਂ ਤਸ੍ਸ ਪਰਿਕ੍ਖੇਪਬ੍ਭਨ੍ਤਰਂ ਲੋਹਪਾਸਾਦੇ ਭਣ੍ਡਾਗਾਰਗਬ੍ਭਪ੍ਪਮਾਣਂ ਅਹੋਸਿ, ਤਸ੍ਮਾ ਭਗਵਾ ਨਿਵਾਤੇ ਪਿਹਿਤਦ੍ਵਾਰਵਾਤਪਾਨੇ ਕੂਟਾਗਾਰੇ ਨਿਸਿਨ੍ਨੋ ਵਿਯ ਜਾਤੋ. ਮਾ ਭਗਵਨ੍ਤਂ ਸੀਤਨ੍ਤਿਆਦਿ ਤਸ੍ਸ ਤਥਾ ਕਰਿਤ੍ਵਾ ਠਾਨਕਾਰਣਪਰਿਦੀਪਨਂ. ਸੋ ਹਿ ‘‘ਮਾ ਭਗਵਨ੍ਤਂ ਸੀਤਂ ਬਾਧਯਿਤ੍ਥ, ਮਾ ਉਣ੍ਹਂ, ਮਾ ਡਂਸਾਦਿਸਮ੍ਫਸ੍ਸੋ ਬਾਧਯਿਤ੍ਥਾ’’ਤਿ ਤਥਾ ਕਰਿਤ੍ਵਾ ਅਟ੍ਠਾਸਿ. ਤਤ੍ਥ ਕਿਞ੍ਚਾਪਿ ਸਤ੍ਤਾਹਵਦ੍ਦਲਿਕਾਯ ਉਣ੍ਹਮੇਵ ਨਤ੍ਥਿ, ਸਚੇ ਪਨ ਅਨ੍ਤਰਨ੍ਤਰਾ ਮੇਘੋ ਵਿਗਚ੍ਛੇਯ੍ਯ ਉਣ੍ਹਂ ਭਵੇਯ੍ਯ, ਤਮ੍ਪਿ ਨਂ ਮਾ ਬਾਧਯਿਤ੍ਥਾਤਿ ਏਵਂ ਤਸ੍ਸ ਚਿਨ੍ਤੇਤੁਂ ਯੁਤ੍ਤਂ. ਵਿਦ੍ਧਨ੍ਤਿ ਉਬ੍ਬਿਦ੍ਧਂ; ਮੇਘਵਿਗਮੇਨ ਦੂਰੀਭੂਤਨ੍ਤਿ ਅਤ੍ਥੋ. ਵਿਗਤਵਲਾਹਕਨ੍ਤਿ ਅਪਗਤਮੇਘਂ. ਦੇਵਨ੍ਤਿ ਆਕਾਸਂ. ਸਕਵਣ੍ਣਨ੍ਤਿ ਅਤ੍ਤਨੋ ਰੂਪਂ.
ਸੁਖੋ ਵਿਵੇਕੋਤਿ ਨਿਬ੍ਬਾਨਸਙ੍ਖਾਤੋ ਉਪਧਿਵਿਵੇਕੋ ਸੁਖੋ. ਤੁਟ੍ਠਸ੍ਸਾਤਿ ਚਤੁਮਗ੍ਗਞਾਣਸਨ੍ਤੋਸੇਨ ਸਨ੍ਤੁਟ੍ਠਸ੍ਸ. ਸੁਤਧਮ੍ਮਸ੍ਸਾਤਿ ਪਕਾਸਿਤਧਮ੍ਮਸ੍ਸ. ਪਸ੍ਸਤੋਤਿ ਤਂ ਵਿਵੇਕਂ ਯਂ ਵਾ ਕਿਞ੍ਚਿ ਪਸ੍ਸਿਤਬ੍ਬਂ ਨਾਮ, ਤਂ ਸਬ੍ਬਂ ਅਤ੍ਤਨੋ ਵੀਰਿਯਬਲਾਧਿਗਤੇਨ ਞਾਣਚਕ੍ਖੁਨਾ ਪਸ੍ਸਨ੍ਤਸ੍ਸ. ਅਬ੍ਯਾਪਜ੍ਜਨ੍ਤਿ ਅਕੁਪ੍ਪਨਭਾਵੋ; ਏਤੇਨ ਮੇਤ੍ਤਾਪੁਬ੍ਬਭਾਗੋ ਦਸ੍ਸਿਤੋ. ਪਾਣਭੂਤੇਸੁ ਸਂਯਮੋਤਿ ਸਤ੍ਤੇਸੁ ਚ ਸਂਯਮੋ; ਅਵਿਹਿਂਸਨਭਾਵੋ ਸੁਖੋਤਿ ਅਤ੍ਥੋ. ਏਤੇਨ ਕਰੁਣਾਪੁਬ੍ਬਭਾਗੋ ਦਸ੍ਸਿਤੋ. ਸੁਖਾ ਵਿਰਾਗਤਾ ਲੋਕੇਤਿ ਵੀਤਰਾਗਤਾਪਿ ਸੁਖਾਤਿ ਦੀਪੇਤਿ. ਕਾਮਾਨਂ ਸਮਤਿਕ੍ਕਮੋਤਿ ਯਾ ‘‘ਕਾਮਾਨਂ ਸਮਤਿਕ੍ਕਮੋ’’ਤਿ ਵੁਚ੍ਚਤਿ; ਸਾ ਵਿਰਾਗਤਾਪਿ ਸੁਖਾਤਿ ਅਤ੍ਥੋ. ਏਤੇਨ ਅਨਾਗਾਮਿਮਗ੍ਗੋ ਕਥਿਤੋ. ਅਸ੍ਮਿਮਾਨਸ੍ਸ ਯੋ ਵਿਨਯੋਤਿ ਇਮਿਨਾ ਪਨ ਅਰਹਤ੍ਤਂ ਕਥਿਤਂ; ਅਰਹਤ੍ਤਞ੍ਹਿ ਅਸ੍ਮਿਮਾਨਸ੍ਸ ‘‘ਪਸ੍ਸਦ੍ਧਿਵਿਨਯੋ’’ਤਿ ਵੁਚ੍ਚਤਿ. ਇਤੋ ਪਰਞ੍ਚ ਸੁਖਂ ਨਾਮ ਨਤ੍ਥਿ, ਤੇਨਾਹ ‘‘ਏਤਂ ਵੇ ਪਰਮਂ ਸੁਖ’’ਨ੍ਤਿ.
ਮੁਚਲਿਨ੍ਦਕਥਾ ਨਿਟ੍ਠਿਤਾ.
ਰਾਜਾਯਤਨਕਥਾ
੬. ਮੁਚਲਿਨ੍ਦਮੂਲਾਤਿ ਮਹਾਬੋਧਿਤੋ ਪਾਚੀਨਕੋਣੇ ਠਿਤਮੁਚਲਿਨ੍ਦਰੁਕ੍ਖਮੂਲਾ. ਰਾਜਾਯਤਨਨ੍ਤਿ ਦਕ੍ਖਿਣਦਿਸਾਭਾਗੇ ਠਿਤਂ ਰਾਜਾਯਤਨਰੁਕ੍ਖਂ ਉਪਸਙ੍ਕਮਿ. ਤੇਨ ਖੋ ਪਨ ਸਮਯੇਨਾਤਿ ਕਤਰੇਨ ਸਮਯੇਨ. ਭਗਵਤੋ ਕਿਰ ਰਾਜਾਯਤਨਮੂਲੇ ਸਤ੍ਤਾਹਂ ਏਕਪਲ੍ਲਙ੍ਕੇਨ ਨਿਸਿਨ੍ਨਸ੍ਸ ਸਮਾਧਿਤੋ ਵੁਟ੍ਠਾਨਦਿਵਸੇ ਅਰੁਣੁਗ੍ਗਮਨਵੇਲਾਯਮੇਵ ‘‘ਭੋਜਨਕਿਚ੍ਚੇਨ ਭਵਿਤਬ੍ਬ’’ਨ੍ਤਿ ਞਤ੍ਵਾ ਸਕ੍ਕੋ ਦੇਵਰਾਜਾ ਓਸਧਹਰੀਤਕਂ ਉਪਨੇਸਿ. ਭਗਵਾ ਤਂ ਪਰਿਭੁਞ੍ਜਿ, ਪਰਿਭੁਤ੍ਤਮਤ੍ਤਸ੍ਸੇਵ ਸਰੀਰਕਿਚ੍ਚਂ ਅਹੋਸਿ. ਸਕ੍ਕੋ ਮੁਖੋਦਕਂ ਅਦਾਸਿ. ਭਗਵਾ ਮੁਖਂ ਧੋਵਿਤ੍ਵਾ ਤਸ੍ਮਿਂਯੇਵ ਰੁਕ੍ਖਮੂਲੇ ਨਿਸੀਦਿ. ਏਵਂ ਉਗ੍ਗਤੇ ਅਰੁਣਮ੍ਹਿ ਨਿਸਿਨ੍ਨੇ ਭਗਵਤਿ.
ਤੇਨ ਖੋ ਪਨ ਸਮਯੇਨ ਤਪੁਸ੍ਸਭਲ੍ਲਿਕਾ ਵਾਣਿਜਾਤਿ ਤਪੁਸ੍ਸੋ ਚ ਭਲ੍ਲਿਕੋ ਚਾਤਿ ਦ੍ਵੇ ਭਾਤਰੋ ਵਾਣਿਜਾ. ਉਕ੍ਕਲਾਤਿ ਉਕ੍ਕਲਜਨਪਦਤੋ. ਤਂ ਦੇਸਨ੍ਤਿ ਯਸ੍ਮਿਂ ਦੇਸੇ ਭਗਵਾ ਵਿਹਰਤਿ. ਕਤਰਸ੍ਮਿਞ੍ਚ ਦੇਸੇ ਭਗਵਾ ਵਿਹਰਤਿ? ਮਜ੍ਝਿਮਦੇਸੇ. ਤਸ੍ਮਾ ਮਜ੍ਝਿਮਦੇਸਂ ਗਨ੍ਤੁਂ ਅਦ੍ਧਾਨਮਗ੍ਗਪ੍ਪਟਿਪਨ੍ਨਾ ਹੋਨ੍ਤੀਤਿ ਅਯਮੇਤ੍ਥ ਅਤ੍ਥੋ. ਞਾਤਿਸਾਲੋਹਿਤਾ ਦੇਵਤਾਤਿ ਤੇਸਂ ਞਾਤਿਭੂਤਪੁਬ੍ਬਾ ਦੇਵਤਾ. ਏਤਦਵੋਚਾਤਿ ਸਾ ਕਿਰ ਨੇਸਂ ਸਬ੍ਬਸਕਟਾਨਿ ਅਪ੍ਪਵਤ੍ਤੀਨਿ ਅਕਾਸਿ. ਤਤੋ ਤੇ ਕਿਂ ਇਦਨ੍ਤਿ ਮਗ੍ਗਦੇਵਤਾਨਂ ਬਲਿਂ ਅਕਂਸੁ. ਤੇਸਂ ਬਲਿਕਮ੍ਮਕਾਲੇ ਸਾ ਦੇਵਤਾ ਦਿਸ੍ਸਮਾਨੇਨੇਵ ਕਾਯੇਨ ਏਤਂ ਅਵੋਚ. ਮਨ੍ਥੇਨ ਚ ਮਧੁਪਿਣ੍ਡਿਕਾਯ ਚਾਤਿ ਅਬਦ੍ਧਸਤ੍ਤੁਨਾ ਚ ਸਪ੍ਪਿਮਧੁਫਾਣਿਤਾਦੀਹਿ ਯੋਜੇਤ੍ਵਾ ਬਦ੍ਧਸਤ੍ਤੁਨਾ ਚ. ਪਤਿਮਾਨੇਥਾਤਿ ਉਪਟ੍ਠਹਥ. ਤਂ ਵੋਤਿ ਤਂ ਪਤਿਮਾਨਨਂ ਤੁਮ੍ਹਾਕਂ ਭਵਿਸ੍ਸਤਿ ਦੀਘਰਤ੍ਤਂ ਹਿਤਾਯ ਸੁਖਾਯ. ਯਂ ਅਮ੍ਹਾਕਨ੍ਤਿ ਯਂ ਪਟਿਗ੍ਗਹਣਂ ਅਮ੍ਹਾਕਂ ਅਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯ. ਭਗਵਤੋ ਏਤਦਹੋਸੀਤਿ ਯੋ ਕਿਰਸ੍ਸ ਪਧਾਨਾਨੁਯੋਗਕਾਲੇ ਪਤ੍ਤੋ ਅਹੋਸਿ, ਸੋ ਸੁਜਾਤਾਯ ਪਾਯਾਸਂ ਦਾਤੁਂ ਆਗਚ੍ਛਨ੍ਤਿਯਾ ਏਵ ਅਨ੍ਤਰਧਾਯਿ. ਤੇਨਸ੍ਸ ਏਤਦਹੋਸਿ – ‘‘ਪਤ੍ਤੋ ਮੇ ਨਤ੍ਥਿ, ਪੁਰਿਮਕਾਪਿ ਚ ਨ ਖੋ ਤਥਾਗਤਾ ਹਤ੍ਥੇਸੁ ਪਟਿਗ੍ਗਣ੍ਹਨ੍ਤਿ, ਕਿਮ੍ਹਿ ਨੁ ਖੋ ਅਹਂ ਪਟਿਗ੍ਗਣ੍ਹੇਯ੍ਯਂ ਮਨ੍ਥਞ੍ਚ ਮਧੁਪਿਣ੍ਡਕਞ੍ਚਾ’’ਤਿ.
ਪਰਿਵਿਤਕ੍ਕਮਞ੍ਞਾਯਾਤਿ ਇਤੋ ਪੁਬ੍ਬੇਵ ਭਗਵਤੋ ਸੁਜਾਤਾਯ ਦਿਨ੍ਨਭੋਜਨਂਯੇਵ ਓਜਾਨੁਪ੍ਪਬਨ੍ਧਨਵਸੇਨ ਅਟ੍ਠਾਸਿ, ਏਤ੍ਤਕਂ ਕਾਲਂ ਨੇਵ ਜਿਘਚ੍ਛਾ ਨ ਪਿਪਾਸਾ ਨ ਕਾਯਦੁਬ੍ਬਲ੍ਯਂ ਅਹੋਸਿ. ਇਦਾਨਿ ਪਨਸ੍ਸ ਆਹਾਰਂ ਪਟਿਗ੍ਗਹੇਤੁਕਾਮਤਾਯ ‘‘ਨ ਖੋ ਤਥਾਗਤਾ’’ਤਿਆਦਿਨਾ ਨਯੇਨ ਪਰਿਵਿਤਕ੍ਕੋ ਉਦਪਾਦਿ. ਤਂ ਏਵਂ ਉਪ੍ਪਨ੍ਨਂ ਅਤ੍ਤਨੋ ਚੇਤਸਾ ਭਗਵਤੋ ਚੇਤੋਪਰਿਵਿਤਕ੍ਕਮਞ੍ਞਾਯ. ਚਤੁਦ੍ਦਿਸਾਤਿ ਚਤੂਹਿ ਦਿਸਾਹਿ. ਸੇਲਮਯੇ ਪਤ੍ਤੇਤਿ ਮੁਗ੍ਗਵਣ੍ਣਸੇਲਮਯੇ ਪਤ੍ਤੇ. ਇਦਂਯੇਵ ਭਗਵਾ ਪਟਿਗ੍ਗਹੇਸਿ, ਤੇਯੇਵ ਸਨ੍ਧਾਯ ਵੁਤ੍ਤਂ. ਚਤ੍ਤਾਰੋ ਪਨ ਮਹਾਰਾਜਾਨੋ ਪਠਮਂ ਇਨ੍ਦਨੀਲਮਣਿਮਯੇ ਪਤ੍ਤੇ ਉਪਨਾਮੇਸੁਂ, ਨ ਤੇ ਭਗਵਾ ਅਗ੍ਗਹੇਸਿ. ਤਤੋ ਇਮੇ ਚਤ੍ਤਾਰੋਪਿ ਮੁਗ੍ਗਵਣ੍ਣਸਿਲਾਮਯੇ ਪਤ੍ਤੇ ਉਪਨਾਮੇਸੁਂ, ਭਗਵਾ ਚਤ੍ਤਾਰੋਪਿ ਪਤ੍ਤੇ ਅਗ੍ਗਹੇਸਿ ਤੇਸਂ ਪਸਾਦਾਨੁਰਕ੍ਖਣਤ੍ਥਾਯ, ਨੋ ਮਹਿਚ੍ਛਤਾਯ. ਗਹੇਤ੍ਵਾ ਚ ਪਨ ਚਤ੍ਤਾਰੋਪਿ ਯਥਾ ਏਕੋਵ ਪਤ੍ਤੋ ਹੋਤਿ ਤਥਾ ਅਧਿਟ੍ਠਹਿ, ਚਤੁਨ੍ਨਮ੍ਪਿ ਏਕਸਦਿਸੋ ਪੁਞ੍ਞਵਿਪਾਕੋ ਅਹੋਸਿ. ਏਵਂ ਏਕਂ ਕਤ੍ਵਾ ਅਧਿਟ੍ਠਿਤੇ ਪਟਿਗ੍ਗਹੇਸਿ ਭਗਵਾ ਪਚ੍ਚਗ੍ਘੇ ਸੇਲਮਯੇ ਪਤ੍ਤੇ ਮਨ੍ਥਞ੍ਚ ਮਧੁਪਿਣ੍ਡਿਕਞ੍ਚ. ਪਚ੍ਚਗ੍ਘੇਤਿ ਪਚ੍ਚਗ੍ਘਸ੍ਮਿਂ; ਪਾਟੇਕ੍ਕਂ ਮਹਗ੍ਘਸ੍ਮਿਨ੍ਤਿ ਅਤ੍ਥੋ. ਅਥ ਵਾ ਪਚ੍ਚਗ੍ਘੇਤਿ ਅਭਿਨਵੇ ਅਬ੍ਭੁਣ੍ਹੇ; ਤਙ੍ਖਣੇ ਨਿਬ੍ਬਤ੍ਤਸ੍ਮਿਨ੍ਤਿ ਅਤ੍ਥੋ. ਦ੍ਵੇ ਵਾਚਾ ਏਤੇਸਂ ਅਹੇਸੁਨ੍ਤਿ ਦ੍ਵੇਵਾਚਿਕਾ. ਅਥ ਵਾ ਦ੍ਵੀਹਿ ਵਾਚਾਹਿ ਉਪਾਸਕਭਾਵਂ ਪਤ੍ਤਾਤਿ ਅਤ੍ਥੋ. ਤੇ ਏਵਂ ਉਪਾਸਕਭਾਵਂ ਪਟਿਵੇਦੇਤ੍ਵਾ ਭਗਵਨ੍ਤਂ ਆਹਂਸੁ – ‘‘ਕਸ੍ਸ ਦਾਨਿ ਭਨ੍ਤੇ ਅਮ੍ਹੇਹਿ ਅਜ੍ਜ ਪਟ੍ਠਾਯ ਅਭਿਵਾਦਨਪਚ੍ਚੁਟ੍ਠਾਨਂ ਕਾਤਬ੍ਬ’’ਨ੍ਤਿ? ਅਥ ਭਗਵਾ ਸੀਸਂ ਪਰਾਮਸਿ, ਕੇਸਾ ਹਤ੍ਥੇ ਲਗ੍ਗਿਂਸੁ. ਤੇ ਤੇਸਂ ਅਦਾਸਿ ‘‘ਇਮੇ ਤੁਮ੍ਹੇ ਪਰਿਹਰਥਾ’’ਤਿ. ਤੇ ਕੇਸਧਾਤੁਯੋ ਲਭਿਤ੍ਵਾ ਅਮਤੇਨੇਵ ਅਭਿਸਿਤ੍ਤਾ ਹਟ੍ਠਤੁਟ੍ਠਾ ਭਗਵਨ੍ਤਂ ਵਨ੍ਦਿਤ੍ਵਾ ਪਕ੍ਕਮਿਂਸੁ.
ਰਾਜਾਯਤਨਕਥਾ ਨਿਟ੍ਠਿਤਾ.
ਬ੍ਰਹ੍ਮਯਾਚਨਕਥਾ
੭. ਅਥ ਖੋ ਭਗਵਾ ਸਤ੍ਤਾਹਸ੍ਸ ਅਚ੍ਚਯੇਨ ਤਮ੍ਹਾ ਸਮਾਧਿਮ੍ਹਾ ਵੁਟ੍ਠਹਿਤ੍ਵਾ ਵੁਤ੍ਤਪ੍ਪਕਾਰਮੇਤਂ ਸਬ੍ਬਂ ਕਿਚ੍ਚਂ ਨਿਟ੍ਠਾਪੇਤ੍ਵਾ ਰਾਜਾਯਤਨਮੂਲਾ ਪੁਨਪਿ ਯੇਨ ਅਜਪਾਲਨਿਗ੍ਰੋਧੋ ਤੇਨੁਪਸਙ੍ਕਮਿ. ਪਰਿਵਿਤਕ੍ਕੋ ਉਦਪਾਦੀਤਿ ਤਸ੍ਮਿਂ ਨਿਸਿਨ੍ਨਮਤ੍ਤਸ੍ਸੇਵ ਸਬ੍ਬਬੁਦ੍ਧਾਨਂ ਆਚਿਣ੍ਣਸਮਾਚਿਣ੍ਣੋ ਅਯਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ. ਕਸ੍ਮਾ ਪਨਾਯਂ ਸਬ੍ਬਬੁਦ੍ਧਾਨਂ ਉਪ੍ਪਜ੍ਜਤੀਤਿ? ਧਮ੍ਮਸ੍ਸ ਮਹਨ੍ਤਭਾਵਂ ਗਰੁਭਾਵਂ ਭਾਰਿਯਭਾਵਂ ਪਚ੍ਚਵੇਕ੍ਖਣਾਯ ਬ੍ਰਹ੍ਮੁਨਾ ਯਾਚਿਤੇ ਦੇਸੇਤੁਕਾਮਤਾਯ ਚ. ਜਾਨਨ੍ਤਿ ਹਿ ਬੁਦ੍ਧਾ ‘‘ਏਵਂ ਪਰਿਵਿਤਕ੍ਕਿਤੇ ਬ੍ਰਹ੍ਮਾ ਆਗਨ੍ਤ੍ਵਾ ਧਮ੍ਮਦੇਸਨਂ ਯਾਚਿਸ੍ਸਤਿ, ਤਤੋ ਸਤ੍ਤਾ ਧਮ੍ਮੇ ਗਾਰਵਂ ਉਪ੍ਪਾਦੇਸ੍ਸਨ੍ਤਿ, ਬ੍ਰਹ੍ਮਗਰੁਕੋ ਹਿ ਲੋਕਸਨ੍ਨਿਵਾਸੋ’’ਤਿ. ਇਤਿ ਇਮੇਹਿ ਦ੍ਵੀਹਿ ਕਾਰਣੇਹਿ ਅਯਂ ਵਿਤਕ੍ਕੋ ਉਪ੍ਪਜ੍ਜਤੀਤਿ.
ਤਤ੍ਥ ਅਧਿਗਤੋ ਖੋ ਮ੍ਯਾਯਨ੍ਤਿ ਅਧਿਗਤੋ ਖੋ ਮੇ ਅਯਂ. ਆਲਯਰਾਮਾਤਿ ਸਤ੍ਤਾ ਪਞ੍ਚ ਕਾਮਗੁਣੇ ਅਲ੍ਲੀਯਨ੍ਤਿ, ਤਸ੍ਮਾ ਤੇ ‘‘ਆਲਯਾ’’ਤਿ ਵੁਚ੍ਚਨ੍ਤਿ. ਤੇਹਿ ਆਲਯੇਹਿ ਰਮਨ੍ਤੀਤਿ ਆਲਯਰਾਮਾ. ਆਲਯੇਸੁ ਰਤਾਤਿ ਆਲਯਰਤਾ. ਆਲਯੇਸੁ ਸੁਟ੍ਠੁਮੁਦਿਤਾਤਿ ਆਲਯਸਮ੍ਮੁਦਿਤਾ. ਯਦਿਦਨ੍ਤਿ ਨਿਪਾਤੋ. ਤਸ੍ਸ ਠਾਨਂ ਸਨ੍ਧਾਯ ‘‘ਯਂ ਇਦ’’ਨ੍ਤਿ ਪਟਿਚ੍ਚਸਮੁਪ੍ਪਾਦਂ ਸਨ੍ਧਾਯ ‘‘ਯੋ ਅਯ’’ਨ੍ਤਿ ਏਵਮਤ੍ਥੋ ਦਟ੍ਠਬ੍ਬੋ. ਇਦਪ੍ਪਚ੍ਚਯਤਾਪਟਿਚ੍ਚਸਮੁਪ੍ਪਾਦੋਤਿ ਇਮੇਸਂ ਪਚ੍ਚਯਾ ਇਦਪ੍ਪਚ੍ਚਯਾ, ਇਦਪ੍ਪਚ੍ਚਯਾਵ ਇਦਪ੍ਪਚ੍ਚਯਤਾ, ਇਦਪ੍ਪਚ੍ਚਯਤਾ ਚ ਸਾ ਪਟਿਚ੍ਚਸਮੁਪ੍ਪਾਦੋ ਚਾਤਿ ਇਦਪ੍ਪਚ੍ਚਯਤਾਪਟਿਚ੍ਚਸਮੁਪ੍ਪਾਦੋ. ਸੋ ਮਮਸ੍ਸ ਕਿਲਮਥੋਤਿ ਯਾ ਅਜਾਨਨ੍ਤਾਨਂ ਦੇਸਨਾ ਨਾਮ, ਸੋ ਮਮ ਕਿਲਮਥੋ ਅਸ੍ਸ; ਸਾ ਮਮ ਵਿਹੇਸਾ ਅਸ੍ਸਾਤਿ ਅਤ੍ਥੋ. ਭਗਵਨ੍ਤਨ੍ਤਿ ਭਗਵਤੋ. ਅਨਚ੍ਛਰਿਯਾਤਿ ਅਨੁ ਅਚ੍ਛਰਿਯਾ. ਪਟਿਭਂਸੂਤਿ ਪਟਿਭਾਨਸਙ੍ਖਾਤਸ੍ਸ ਞਾਣਸ੍ਸ ਗੋਚਰਾ ਅਹੇਸੁਂ, ਪਰਿਵਿਤਕ੍ਕਯਿਤਬ੍ਬਭਾਵਂ ਪਾਪੁਣਿਂਸੁ.
ਹਲਨ੍ਤਿ ਏਤ੍ਥ ਹਕਾਰੋ ਨਿਪਾਤਮਤ੍ਤੋ; ਅਲਨ੍ਤਿ ਅਤ੍ਥੋ. ਪਕਾਸਿਤੁਨ੍ਤਿ ਦੇਸਿਤੁਂ. ਅਲਂ ਦਾਨਿ ਮੇ ਇਮਂ ਕਿਚ੍ਛੇਨ ਅਧਿਗਤਂ ਧਮ੍ਮਂ ਦੇਸੇਤੁਨ੍ਤਿ ਵੁਤ੍ਤਂ ਹੋਤਿ. ਪਟਿਸੋਤਗਾਮਿਨ੍ਤਿ ਪਟਿਸੋਤਂ ਵੁਚ੍ਚਤਿ ਨਿਬ੍ਬਾਨਂ; ਨਿਬ੍ਬਾਨਗਾਮਿਨ੍ਤਿ ਅਤ੍ਥੋ. ਰਾਗਰਤ੍ਤਾਤਿ ਕਾਮਰਾਗਭਵਰਾਗਦਿਟ੍ਠਿਰਾਗੇਨ ਰਤ੍ਤਾ. ਨ ਦਕ੍ਖਨ੍ਤੀਤਿ ਨ ਪਸ੍ਸਿਸ੍ਸਨ੍ਤਿ. ਤਮੋਖਨ੍ਧੇਨ ਆਵੁਟਾਤਿ ਅਵਿਜ੍ਜਾਰਾਸਿਨਾ ਅਜ੍ਝੋਤ੍ਥਟਾ. ਅਪ੍ਪੋਸ੍ਸੁਕ੍ਕਤਾਯਾਤਿ ਨਿਰੁਸ੍ਸੁਕ੍ਕਭਾਵੇਨ; ਅਦੇਸੇਤੁਕਾਮਤਾਯਾਤਿ ਅਤ੍ਥੋ.
੮. ਯਤ੍ਰ ਹਿ ਨਾਮਾਤਿ ਯਸ੍ਮਿਂ ਨਾਮ ਲੋਕੇ. ਭਗਵਤੋ ਪੁਰਤੋ ਪਾਤੁਰਹੋਸੀਤਿ ਧਮ੍ਮਦੇਸਨਾਯਾਚਨਤ੍ਥਂ ਦਸਸੁ ਚਕ੍ਕਵਾਲ਼ਸਹਸ੍ਸੇਸੁ ਮਹਾਬ੍ਰਹ੍ਮਾਨੋ ਗਹੇਤ੍ਵਾ ਆਗਮ੍ਮ ਭਗਵਤੋ ਪੁਰਤੋ ਪਾਤੁਰਹੋਸਿ. ਅਪ੍ਪਰਜਕ੍ਖਜਾਤਿਕਾਤਿ ਪਞ੍ਞਾਮਯੇ ਅਕ੍ਖਿਮ੍ਹਿ ਅਪ੍ਪਂ ਰਾਗਦੋਸਮੋਹਰਜਂ ਏਤੇਸਂ ਏਵਂਸਭਾਵਾਤਿ ਅਪ੍ਪਰਜਕ੍ਖਜਾਤਿਕਾ. ਭਵਿਸ੍ਸਨ੍ਤਿ ਧਮ੍ਮਸ੍ਸ ਅਞ੍ਞਾਤਾਰੋਤਿ ਪਟਿਵਿਜ੍ਝਿਤਾਰੋ.
ਪਾਤੁਰਹੋਸੀਤਿ ਪਾਤੁਭਵਿ. ਸਮਲੇਹਿ ਚਿਨ੍ਤਿਤੋਤਿ ਰਾਗਾਦੀਹਿ ਮਲੇਹਿ ਸਮਲੇਹਿ ਛਹਿ ਸਤ੍ਥਾਰੇਹਿ ਚਿਨ੍ਤਿਤੋ. ਅਪਾਪੁਰੇਤਨ੍ਤਿ ਵਿਵਰ ਏਤਂ. ਅਮਤਸ੍ਸ ਦ੍ਵਾਰਨ੍ਤਿ ਅਮਤਸ੍ਸ ਨਿਬ੍ਬਾਨਸ੍ਸ ਦ੍ਵਾਰਭੂਤਂ ਅਰਿਯਮਗ੍ਗਂ. ਸੁਣਨ੍ਤੁ ਧਮ੍ਮਂ ਵਿਮਲੇਨਾਨੁਬੁਦ੍ਧਨ੍ਤਿ ਇਮੇ ਸਤ੍ਤਾ ਰਾਗਾਦਿਮਲਾਨਂ ਅਭਾਵਤੋ ਵਿਮਲੇਨ ਸਮ੍ਮਾਸਮ੍ਬੁਦ੍ਧੇਨ ਅਨੁਬੁਦ੍ਧਂ ਚਤੁਸਚ੍ਚਧਮ੍ਮਂ ਸੁਣਨ੍ਤੁ.
ਸੇਲੇ ਯਥਾ ਪਬ੍ਬਤਮੁਦ੍ਧਨਿਟ੍ਠਿਤੋਤਿ ਸੇਲਮਯੇ ਏਕਗ੍ਘਨੇ ਪਬ੍ਬਤਮੁਦ੍ਧਨਿ ਯਥਾਠਿਤੋਵ ਯਥਾ ਚਕ੍ਖੁਮਾ ਪੁਰਿਸੋ ਸਮਨ੍ਤਤੋ ਜਨਤਂ ਪਸ੍ਸੇਯ੍ਯ, ਤ੍ਵਮ੍ਪਿ ਸੁਮੇਧ ਸੁਨ੍ਦਰਪਞ੍ਞ ਸਬ੍ਬਞ੍ਞੁਤਞ੍ਞਾਣੇਨ ਸਮਨ੍ਤਚਕ੍ਖੁ ਭਗਵਾ ਧਮ੍ਮਮਯਂ ਪਞ੍ਞਾਮਯਂ ਪਾਸਾਦਮਾਰੁਯ੍ਹ ਸਯਂ ਅਪੇਤਸੋਕੋ ਸੋਕਾਵਤਿਣ੍ਣਂ ਜਾਤਿਜਰਾਭਿਭੂਤਞ੍ਚ ਜਨਤਂ ਅਵੇਕ੍ਖਸ੍ਸੁ ਉਪਧਾਰਯ.
ਉਟ੍ਠੇਹੀਤਿ ਭਗਵਤੋ ਧਮ੍ਮਦੇਸਨਤ੍ਥਂ ਚਾਰਿਕਚਰਣਂ ਯਾਚਨ੍ਤੋ ਭਣਤਿ. ਵੀਰਾਤਿਆਦੀਸੁ ਭਗਵਾ ਵੀਰਿਯਵਨ੍ਤਤਾਯ ਵੀਰੋ. ਦੇਵਪੁਤ੍ਤਮਚ੍ਚੁਕਿਲੇਸਾਭਿਸਙ੍ਖਾਰਮਾਰਾਨਂ ਵਿਜਿਤਤ੍ਤਾ ਵਿਜਿਤਸਙ੍ਗਾਮੋ. ਜਾਤਿਕਨ੍ਤਾਰਾਦਿਨਿਤ੍ਥਰਣਸਮਤ੍ਥਤਾਯ ਸਤ੍ਥਵਾਹੋ. ਕਾਮਚ੍ਛਨ੍ਦਇਣਸ੍ਸ ਅਭਾਵਤੋ ਅਣਣੋ.
੯. ਅਜ੍ਝੇਸਨਨ੍ਤਿ ਯਾਚਨਂ. ਬੁਦ੍ਧਚਕ੍ਖੁਨਾਤਿ ਇਨ੍ਦ੍ਰਿਯਪਰੋਪਰਿਯਤ੍ਤਞਾਣੇਨ ਚ ਆਸਯਾਨੁਸਯਞਾਣੇਨ ਚ. ਇਮੇਸਞ੍ਹਿ ਦ੍ਵਿਨ੍ਨਂ ਞਾਣਾਨਂ ਬੁਦ੍ਧਚਕ੍ਖੂਤਿ ਨਾਮਂ. ਅਪ੍ਪਰਜਕ੍ਖਾਤਿ ਪਞ੍ਞਾਚਕ੍ਖੁਮ੍ਹਿ ਰਾਗਾਦਿਰਜਂ ਅਪ੍ਪਂ ਯੇਸਂ, ਤੇ ਅਪ੍ਪਰਜਕ੍ਖਾ. ਯੇਸਂ ਤਂ ਮਹਨ੍ਤਂ ਤੇ ਮਹਾਰਜਕ੍ਖਾ. ਯੇਸਂ ਸਦ੍ਧਾਦੀਨਿ ਇਨ੍ਦ੍ਰਿਯਾਨਿ ਤਿਕ੍ਖਾਨਿ ਤੇ ਤਿਕ੍ਖਿਨ੍ਦ੍ਰਿਯਾ. ਯੇਸਂ ਤਾਨਿ ਮੁਦੂਨਿ ਤੇ ਮੁਦਿਨ੍ਦ੍ਰਿਯਾ. ਯੇਸਂ ਤੇਯੇਵ ਸਦ੍ਧਾਦਯੋ ਆਕਾਰਾ ਸੁਨ੍ਦਰਾ ਤੇ ਸ੍ਵਾਕਾਰਾ. ਯੇਸਂ ਤੇਯੇਵ ਸਦ੍ਧਾਦਯੋ ਆਕਾਰਾ ਅਸੁਨ੍ਦਰਾ ਤੇ ਦ੍ਵਾਕਾਰਾ. ਯੇ ਕਥਿਤਕਾਰਣਂ ਸਲ੍ਲਕ੍ਖੇਨ੍ਤਿ, ਸੁਖੇਨ ਸਕ੍ਕਾ ਹੋਨ੍ਤਿ ਵਿਞ੍ਞਾਪੇਤੁਂ ਤੇ ਸੁਵਿਞ੍ਞਾਪਯਾ. ਯੇ ਪਰਲੋਕਞ੍ਚ ਵਜ੍ਜਞ੍ਚ ਭਯਤੋ ਪਸ੍ਸਨ੍ਤਿ ਤੇ ਪਰਲੋਕਵਜ੍ਜਭਯਦਸ੍ਸਾਵਿਨੋ. ਉਪ੍ਪਲਿਨਿਯਨ੍ਤਿ ਉਪ੍ਪਲਵਨੇ. ਇਤਰੇਸੁਪਿ ਏਸੇਵ ਨਯੋ. ਅਨ੍ਤੋਨਿਮੁਗ੍ਗਪੋਸੀਨੀਤਿ ਯਾਨਿ ਉਦਕਸ੍ਸ ਅਨ੍ਤੋ ਨਿਮੁਗ੍ਗਾਨੇਵ ਪੋਸਯਨ੍ਤਿ. ਸਮੋਦਕਂ ਠਿਤਾਨੀਤਿ ਉਦਕੇਨ ਸਮਂ ਠਿਤਾਨਿ. ਉਦਕਂ ਅਚ੍ਚੁਗ੍ਗਮ੍ਮ ਠਿਤਾਨੀਤਿ ਉਦਕਂ ਅਤਿਕ੍ਕਮਿਤ੍ਵਾ ਠਿਤਾਨਿ.
ਅਪਾਰੁਤਾਤਿ ਵਿਵਟਾ. ਅਮਤਸ੍ਸ ਦ੍ਵਾਰਾਤਿ ਅਰਿਯਮਗ੍ਗੋ. ਸੋ ਹਿ ਅਮਤਸਙ੍ਖਾਤਸ੍ਸ ਨਿਬ੍ਬਾਨਸ੍ਸ ਦ੍ਵਾਰਂ. ਪਮੁਞ੍ਚਨ੍ਤੁ ਸਦ੍ਧਨ੍ਤਿ ਸਬ੍ਬੇ ਅਤ੍ਤਨੋ ਸਦ੍ਧਂ ਪਮੁਞ੍ਚਨ੍ਤੁ. ਪਚ੍ਛਿਮਪਦਦ੍ਵਯੇ ਅਯਮਤ੍ਥੋ, ਅਹਞ੍ਹਿ ਅਤ੍ਤਨੋ ਪਗੁਣਂ ਸੁਪ੍ਪਵਤ੍ਤਿਮ੍ਪਿ ਇਮਂ ਪਣੀਤਂ ਉਤ੍ਤਮਂ ਧਮ੍ਮਂ ਕਾਯਵਾਚਾਕਿਲਮਥਸਞ੍ਞੀ ਹੁਤ੍ਵਾ ਮਨੁਜੇਸੁ ਦੇਵਮਨੁਸ੍ਸੇਸੁ ਨ ਭਾਸਿਨ੍ਤਿ.
ਬ੍ਰਹ੍ਮਯਾਚਨਕਥਾ ਨਿਟ੍ਠਿਤਾ.
ਪਞ੍ਚਵਗ੍ਗਿਯਕਥਾ
੧੦. ਪਣ੍ਡਿਤੋਤਿ ਪਣ੍ਡਿਚ੍ਚੇਨ ਸਮਨ੍ਨਾਗਤੋ. ਬ੍ਯਤ੍ਤੋਤਿ ਵੇਯ੍ਯਤ੍ਤਿਯੇਨ ਸਮਨ੍ਨਾਗਤੋ. ਮੇਧਾਵੀਤਿ ਠਾਨੁਪ੍ਪਤ੍ਤਿਯਾ ਪਞ੍ਞਾਯ ਸਮਨ੍ਨਾਗਤੋ. ਅਪ੍ਪਰਜਕ੍ਖਜਾਤਿਕੋਤਿ ਸਮਾਪਤ੍ਤਿਯਾ ਵਿਕ੍ਖਮ੍ਭਿਤਤ੍ਤਾ ਨਿਕ੍ਕਿਲੇਸਜਾਤਿਕੋ ਵਿਸੁਦ੍ਧਸਤ੍ਤੋ. ਆਜਾਨਿਸ੍ਸਤੀਤਿ ਸਲ੍ਲਕ੍ਖੇਸ੍ਸਤਿ ਪਟਿਵਿਜ੍ਝਿਸ੍ਸਤਿ. ਭਗਵਤੋਪਿ ਖੋ ਞਾਣਂ ਉਦਪਾਦੀਤਿ ਸਬ੍ਬਞ੍ਞੁਤਞ੍ਞਾਣਂ ਉਪ੍ਪਜ੍ਜਿ ‘‘ਇਤੋ ਸਤ੍ਤਮਦਿਵਸਮਤ੍ਥਕੇ ਕਾਲਂਕਤ੍ਵਾ ਆਕਿਞ੍ਚਞ੍ਞਾਯਤਨੇ ਨਿਬ੍ਬਤ੍ਤੋ’’ਤਿ. ਮਹਾਜਾਨਿਯੋਤਿ ਸਤ੍ਤਦਿਵਸਬ੍ਭਨ੍ਤਰੇ ਪਤ੍ਤਬ੍ਬਮਗ੍ਗਫਲਤੋ ਪਰਿਹੀਨਤ੍ਤਾ ਮਹਤੀ ਜਾਨਿ ਅਸ੍ਸਾਤਿ ਮਹਾਜਾਨਿਯੋ ਅਕ੍ਖਣੇ ਨਿਬ੍ਬਤ੍ਤਤ੍ਤਾ. ਅਭਿਦੋਸਕਾਲਂਕਤੋਤਿ ਹਿਯ੍ਯੋ ਕਾਲਂਕਤੋ, ਸੋਪਿ ਨੇਵਸਞ੍ਞਾਨਾਸਞ੍ਞਾਯਤਨੇ ਨਿਬ੍ਬਤ੍ਤੋਤਿ ਅਦ੍ਦਸ. ਬਹੂਕਾਰਾਤਿ ਬਹੂਪਕਾਰਾ. ਪਧਾਨਪਹਿਤਤ੍ਤਂ ਉਪਟ੍ਠਹਿਂਸੂਤਿ ਪਧਾਨਤ੍ਥਾਯ ਪੇਸਿਤਤ੍ਤਭਾਵਂ ਮੁਖੋਦਕਦਾਨਾਦਿਨਾ ਉਪਟ੍ਠਹਿਂਸੁ.
੧੧. ਅਨ੍ਤਰਾ ਚ ਗਯਂ ਅਨ੍ਤਰਾ ਚ ਬੋਧਿਨ੍ਤਿ ਉਪਕੋ ਬੋਧਿਮਣ੍ਡਸ੍ਸ ਚ ਗਯਾਯ ਚ ਅਨ੍ਤਰੇ ਭਗਵਨ੍ਤਂ ਅਦ੍ਦਸ. ਅਦ੍ਧਾਨਮਗ੍ਗਪ੍ਪਟਿਪਨ੍ਨਨ੍ਤਿ ਅਦ੍ਧਾਨਮਗ੍ਗਂ ਪਟਿਪਨ੍ਨਂ.
ਸਬ੍ਬਾਭਿਭੂਤਿ ਸਬ੍ਬਂ ਤੇਭੂਮਕਧਮ੍ਮਂ ਅਭਿਭਵਿਤ੍ਵਾ ਠਿਤੋ. ਸਬ੍ਬਵਿਦੂਤਿ ਸਬ੍ਬਂ ਚਤੁਭੂਮਕਧਮ੍ਮਂ ਅਵੇਦਿਂ ਅਞ੍ਞਾਸਿਂ. ਸਬ੍ਬੇਸੁ ਧਮ੍ਮੇਸੁ ਅਨੂਪਲਿਤ੍ਤੋਤਿ ਸਬ੍ਬੇਸੁ ਤੇਭੂਮਕਧਮ੍ਮੇਸੁ ਕਿਲੇਸਲੇਪੇਨ ਅਲਿਤ੍ਤੋ. ਸਬ੍ਬਞ੍ਜਹੋਤਿ ਸਬ੍ਬਂ ਤੇਭੂਮਕਧਮ੍ਮਂ ਜਹਿਤ੍ਵਾ ਠਿਤੋ. ਤਣ੍ਹਕ੍ਖਯੇ ਵਿਮੁਤ੍ਤੋਤਿ ਤਣ੍ਹਕ੍ਖਯੇ ਨਿਬ੍ਬਾਨੇ ਆਰਮ੍ਮਣਤੋ ਵਿਮੁਤ੍ਤੋ. ਸਯਂ ਅਭਿਞ੍ਞਾਯਾਤਿ ਸਬ੍ਬਂ ਚਤੁਭੂਮਕਧਮ੍ਮਂ ਅਤ੍ਤਨਾਵ ਜਾਨਿਤ੍ਵਾ. ਕਮੁਦ੍ਦਿਸੇਯ੍ਯਨ੍ਤਿ ਕਂ ਅਞ੍ਞਂ ‘‘ਅਯਂ ਮੇ ਆਚਰਿਯੋ’’ਤਿ ਉਦ੍ਦਿਸੇਯ੍ਯਂ.
ਨ ਮੇ ਆਚਰਿਯੋ ਅਤ੍ਥੀਤਿ ਲੋਕੁਤ੍ਤਰਧਮ੍ਮੇ ਮਯ੍ਹਂ ਆਚਰਿਯੋ ਨਾਮ ਨਤ੍ਥਿ. ਨਤ੍ਥਿ ਮੇ ਪਟਿਪੁਗ੍ਗਲੋਤਿ ਮਯ੍ਹਂ ਪਟਿਭਾਗਪੁਗ੍ਗਲੋ ਨਾਮ ਨਤ੍ਥਿ. ਸੀਤਿਭੂਤੋਤਿ ਸਬ੍ਬਕਿਲੇਸਗ੍ਗਿਨਿਬ੍ਬਾਪਨੇਨ ਸੀਤਿਭੂਤੋ. ਕਿਲੇਸਾਨਂਯੇਵ ਨਿਬ੍ਬੁਤਤ੍ਤਾ ਨਿਬ੍ਬੁਤੋ.
ਕਾਸੀਨਂ ਪੁਰਨ੍ਤਿ ਕਾਸਿਰਟ੍ਠੇ ਨਗਰਂ. ਆਹਞ੍ਛਂ ਅਮਤਦੁਨ੍ਦੁਭਿਨ੍ਤਿ ਧਮ੍ਮਚਕ੍ਕਪ੍ਪਟਿਲਾਭਾਯ ਅਮਤਭੇਰਿਂ ਪਹਰਿਸ੍ਸਾਮੀਤਿ ਗਚ੍ਛਾਮਿ.
ਅਰਹਸਿ ਅਨਨ੍ਤਜਿਨੋਤਿ ਅਨਨ੍ਤਜਿਨੋ ਭਵਿਤੁਂ ਯੁਤ੍ਤੋ. ਹੁਪੇਯ੍ਯਪਾਵੁਸੋਤਿ ਆਵੁਸੋ ਏਵਮ੍ਪਿ ਨਾਮ ਭਵੇਯ੍ਯ. ਸੀਸਂ ਓਕਮ੍ਪੇਤ੍ਵਾਤਿ ਸੀਸਂ ਚਾਲੇਤ੍ਵਾ.
੧੨. ਸਣ੍ਠਪੇਸੁਨ੍ਤਿ ਕਤਿਕਂ ਅਕਂਸੁ. ਬਾਹੁਲ੍ਲਿਕੋਤਿ ਚੀਵਰਬਾਹੁਲ੍ਲਾਦੀਨਂ ਅਤ੍ਥਾਯ ਪਟਿਪਨ੍ਨੋ. ਪਧਾਨਵਿਬ੍ਭਨ੍ਤੋਤਿ ਪਧਾਨਤੋ ਵਿਬ੍ਭਨ੍ਤੋ ਭਟ੍ਠੋ ਪਰਿਹੀਨੋ. ਆਵਤ੍ਤੋ ਬਾਹੁਲ੍ਲਾਯਾਤਿ ਚੀਵਰਾਦਿਬਹੁਲਭਾਵਤ੍ਥਾਯ ਆਵਤ੍ਤੋ. ਓਦਹਥ ਭਿਕ੍ਖਵੇ ਸੋਤਨ੍ਤਿ ਉਪਨੇਥ ਭਿਕ੍ਖਵੇ ਸੋਤਂ; ਸੋਤਿਨ੍ਦ੍ਰਿਯਂ ਧਮ੍ਮਸਵਨਤ੍ਥਂ ਅਭਿਮੁਖਂ ਕਰੋਥਾਤਿ ਅਤ੍ਥੋ. ਅਮਤਮਧਿਗਤਨ੍ਤਿ ਅਮਤਂ ਨਿਬ੍ਬਾਨਂ ਮਯਾ ਅਧਿਗਤਨ੍ਤਿ ਦਸ੍ਸੇਤਿ. ਇਰਿਯਾਯਾਤਿ ਦੁਕ੍ਕਰਇਰਿਯਾਯ. ਪਟਿਪਦਾਯਾਤਿ ਦੁਕ੍ਕਰਪਟਿਪਦਾਯ. ਅਭਿਜਾਨਾਥ ਮੇ ਨੋਤਿ ਅਭਿਜਾਨਾਥ ਨੁ ਮੇ ਸਮਨੁਪਸ੍ਸਥ. ਏਵਰੂਪਂ ਭਾਸਿਤਮੇਤਨ੍ਤਿ ਏਤਂ ਏਵਰੂਪਂ ਵਾਕ੍ਯਂ ਭਾਸਿਤਨ੍ਤਿ ਅਤ੍ਥੋ. ਅਸਕ੍ਖਿ ਖੋ ਭਗਵਾ ਪਞ੍ਚਵਗ੍ਗਿਯੇ ਭਿਕ੍ਖੂ ਸਞ੍ਞਾਪੇਤੁਨ੍ਤਿ ‘‘ਅਹਂ ਬੁਦ੍ਧੋ’’ਤਿ ਜਾਨਾਪੇਤੁਂ ਅਸਕ੍ਖਿ.
੧੩. ਚਕ੍ਖੁਕਰਣੀਤਿ ਪਞ੍ਞਾਚਕ੍ਖੁਂ ਸਨ੍ਧਾਯਾਹ. ਇਤੋ ਪਰਂ ਸਬ੍ਬਂ ਪਦਤ੍ਥਤੋ ਉਤ੍ਤਾਨਮੇਵ. ਅਧਿਪ੍ਪਾਯਾਨੁਸਨ੍ਧਿਯੋਜਨਾਦਿਭੇਦਤੋ ਪਨ ਪਪਞ੍ਚਸੂਦਨਿਯਾ ਮਜ੍ਝਿਮਟ੍ਠਕਥਾਯਂ ਵੁਤ੍ਤਨਯੇਨ ਵੇਦਿਤਬ੍ਬਂ. ਇਤੋ ਪਟ੍ਠਾਯ ਹਿ ਅਤਿਵਿਤ੍ਥਾਰਭੀਰੁਕਸ੍ਸ ਮਹਾਜਨਸ੍ਸ ਚਿਤ੍ਤਂ ਅਨੁਰਕ੍ਖਨ੍ਤਾ ਸੁਤ੍ਤਨ੍ਤਕਥਂ ਅਵਣ੍ਣਯਿਤ੍ਵਾ ਵਿਨਯਕਥਂਯੇਵ ਵਣ੍ਣਯਿਸ੍ਸਾਮ.
੧੮. ਸਾਵ ਤਸ੍ਸ ਆਯਸ੍ਮਤੋ ਉਪਸਮ੍ਪਦਾ ਅਹੋਸੀਤਿ ਆਸਾਲ਼੍ਹੀਪੁਣ੍ਣਮਾਯ ਅਟ੍ਠਾਰਸਹਿ ਦੇਵਤਾਕੋਟੀਹਿ ਸਦ੍ਧਿਂ ਸੋਤਾਪਤ੍ਤਿਫਲੇ ਪਤਿਟ੍ਠਿਤਸ੍ਸ ‘‘ਏਹਿ ਭਿਕ੍ਖੂ’’ਤਿ ਭਗਵਤੋ ਵਚਨੇਨ ਅਭਿਨਿਪ੍ਫਨ੍ਨਾ ਸਾਵ ਤਸ੍ਸ ਆਯਸ੍ਮਤੋ ਏਹਿਭਿਕ੍ਖੂਪਸਮ੍ਪਦਾ ਅਹੋਸਿ.
੧੯. ਅਥ ਖੋ ਆਯਸ੍ਮਤੋ ਚ ਵਪ੍ਪਸ੍ਸਾਤਿ ਆਦਿਮ੍ਹਿ ਵਪ੍ਪਤ੍ਥੇਰਸ੍ਸ ਪਾਟਿਪਦਦਿਵਸੇ ਧਮ੍ਮਚਕ੍ਖੁਂ ਉਦਪਾਦਿ, ਭਦ੍ਦਿਯਤ੍ਥੇਰਸ੍ਸ ਦੁਤਿਯਦਿਵਸੇ, ਮਹਾਨਾਮਤ੍ਥੇਰਸ੍ਸ ਤਤਿਯਦਿਵਸੇ, ਅਸ੍ਸਜਿਤ੍ਥੇਰਸ੍ਸ ਚਤੁਤ੍ਥਿਯਨ੍ਤਿ. ਇਮੇਸਞ੍ਚ ਪਨ ਭਿਕ੍ਖੂਨਂ ਕਮ੍ਮਟ੍ਠਾਨੇਸੁ ਉਪ੍ਪਨ੍ਨਮਲਵਿਸੋਧਨਤ੍ਥਂ ਭਗਵਾ ਅਨ੍ਤੋਵਿਹਾਰੇਯੇਵ ਅਹੋਸਿ. ਉਪ੍ਪਨ੍ਨੇ ਉਪ੍ਪਨ੍ਨੇ ਕਮ੍ਮਟ੍ਠਾਨਮਲੇ ਆਕਾਸੇਨ ਗਨ੍ਤ੍ਵਾ ਮਲਂ ਵਿਨੋਦੇਸਿ. ਪਕ੍ਖਸ੍ਸ ਪਨ ਪਞ੍ਚਮਿਯਂ ਸਬ੍ਬੇ ਤੇ ਏਕਤੋ ਸਨ੍ਨਿਪਾਤੇਤ੍ਵਾ ਅਨਤ੍ਤਸੁਤ੍ਤੇਨ ਓਵਦਿ. ਤੇਨ ਵੁਤ੍ਤਂ ‘‘ਅਥ ਖੋ ਭਗਵਾ ਪਞ੍ਚਵਗ੍ਗਿਯੇ’’ਤਿਆਦਿ.
੨੪. ਤੇਨ ਖੋ ਪਨ ਸਮਯੇਨ ਛ ਲੋਕੇ ਅਰਹਨ੍ਤੋ ਹੋਨ੍ਤੀਤਿ ਪਞ੍ਚਮਿਯਾ ਪਕ੍ਖਸ੍ਸ ਲੋਕਸ੍ਮਿਂ ਛ ਮਨੁਸ੍ਸਾ ਅਰਹਨ੍ਤੋ ਹੋਨ੍ਤੀਤਿ ਅਤ੍ਥੋ.
ਪਞ੍ਚਵਗ੍ਗਿਯਕਥਾ ਨਿਟ੍ਠਿਤਾ.
ਪਬ੍ਬਜ੍ਜਾਕਥਾ
੩੧. ਪੁਬ੍ਬਾਨੁਪੁਬ੍ਬਕਾਨਨ੍ਤਿ ਪਵੇਣਿਵਸੇਨ ਪੋਰਾਣਾਨੁਪੋਰਾਣਾਨਨ੍ਤਿ ਅਤ੍ਥੋ. ਤੇਨ ਖੋ ਪਨ ਸਮਯੇਨ ਏਕਸਟ੍ਠਿ ਲੋਕੇ ਅਰਹਨ੍ਤੋ ਹੋਨ੍ਤੀਤਿ ਪੁਰਿਮਾ ਛ ਇਮੇ ਚ ਪਞ੍ਚਪਞ੍ਞਾਸਾਤਿ ਅਨ੍ਤੋਵਸ੍ਸਮ੍ਹਿਯੇਵ ਏਕਸਟ੍ਠਿ ਮਨੁਸ੍ਸਾ ਅਰਹਨ੍ਤੋ ਹੋਨ੍ਤੀਤਿ ਅਤ੍ਥੋ.
ਤਤ੍ਰ ਯਸਆਦੀਨਂ ਕੁਲਪੁਤ੍ਤਾਨਂ ਅਯਂ ਪੁਬ੍ਬਯੋਗੋ – ਅਤੀਤੇ ਕਿਰ ਪਞ੍ਚਪਞ੍ਞਾਸਜਨਾ ਸਹਾਯਕਾ ਵਗ੍ਗਬਨ੍ਧੇਨ ਪੁਞ੍ਞਾਨਿ ਕਰੋਨ੍ਤਾ ਅਨਾਥਸਰੀਰਾਨਿ ਪਟਿਜਗ੍ਗਨ੍ਤਾ ਵਿਚਰਨ੍ਤਿ, ਤੇ ਏਕਦਿਵਸਂ ਗਬ੍ਭਿਨਿਂ ਇਤ੍ਥਿਂ ਕਾਲਂਕਤਂ ਦਿਸ੍ਵਾ ‘‘ਝਾਪੇਸ੍ਸਾਮਾ’’ਤਿ ਸੁਸਾਨਂ ਨੀਹਰਿਂਸੁ. ਤੇਸੁ ਪਞ੍ਚ ਜਨੇ ‘‘ਤੁਮ੍ਹੇ ਝਾਪੇਥਾ’’ਤਿ ਸੁਸਾਨੇ ਠਪੇਤ੍ਵਾ ਸੇਸਾ ਗਾਮਂ ਪਵਿਟ੍ਠਾ. ਯਸੋ ਦਾਰਕੋ ਤਂ ਸਰੀਰਂ ਵਿਜ੍ਝਿਤ੍ਵਾ ਪਰਿਵਤ੍ਤੇਤ੍ਵਾ ਚ ਝਾਪਯਮਾਨੋ ਅਸੁਭਸਞ੍ਞਂ ਪਟਿਲਭਿ. ਸੋ ਇਤਰੇਸਮ੍ਪਿ ਚਤੁਨ੍ਨਂ ਜਨਾਨਂ ‘‘ਪਸ੍ਸਥ ਭੋ ਇਮਂ ਅਸੁਚਿਂ ਪਟਿਕੂਲ’’ਨ੍ਤਿ ਦਸ੍ਸੇਸਿ. ਤੇਪਿ ਤਤ੍ਥ ਅਸੁਭਸਞ੍ਞਂ ਪਟਿਲਭਿਂਸੁ. ਤੇ ਪਞ੍ਚਪਿ ਜਨਾ ਗਾਮਂ ਗਨ੍ਤ੍ਵਾ ਸੇਸਸਹਾਯਕਾਨਂ ਕਥਯਿਂਸੁ. ਯਸੋ ਪਨ ਦਾਰਕੋ ਗੇਹਮ੍ਪਿ ਗਨ੍ਤ੍ਵਾ ਮਾਤਾਪਿਤੂਨ੍ਨਞ੍ਚ ਭਰਿਯਾਯ ਚ ਕਥੇਸਿ. ਤੇ ਸਬ੍ਬੇਪਿ ਅਸੁਭਂ ਭਾਵਯਿਂਸੁ. ਅਯਮੇਤੇਸਂ ਪੁਬ੍ਬਯੋਗੋ. ਤੇਨਾਯਸ੍ਮਤੋ ਯਸਸ੍ਸ ਨਾਟਕਜਨੇਸੁ ਸੁਸਾਨਸਞ੍ਞਾਯੇਵ ਉਪ੍ਪਜ੍ਜਿ, ਤਾਯੇਵ ਚ ਉਪਨਿਸ੍ਸਯਸਮ੍ਪਤ੍ਤਿਯਾ ਸਬ੍ਬੇਸਂ ਵਿਸੇਸਾਧਿਗਮੋ ਨਿਬ੍ਬਤ੍ਤੀਤਿ.
ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸੀਤਿ ਭਗਵਾ ਯਾਵ ਪਚ੍ਛਿਮਕਤ੍ਤਿਕਪੁਣ੍ਣਮਾ, ਤਾਵ ਬਾਰਾਣਸਿਯਂ ਵਿਹਰਨ੍ਤੋ ਏਕਦਿਵਸਂ ਤੇ ਖੀਣਾਸਵੇ ਸਟ੍ਠਿ ਭਿਕ੍ਖੂ ਆਮਨ੍ਤੇਸਿ.
੩੨. ਦਿਬ੍ਬਾ ਨਾਮ ਦਿਬ੍ਬੇਸੁ ਵਿਸਯੇਸੁ ਲੋਭਪਾਸਾ. ਮਾਨੁਸਾ ਨਾਮ ਮਾਨੁਸਕੇਸੁ ਵਿਸਯੇਸੁ ਲੋਭਪਾਸਾ. ਮਾ ਏਕੇਨ ਦ੍ਵੇਤਿ ਏਕੇਨ ਮਗ੍ਗੇਨ ਦ੍ਵੇ ਮਾ ਅਗਮਿਤ੍ਥ. ਅਸ੍ਸਵਨਤਾਤਿ ਅਸ੍ਸਵਨਤਾਯ. ਪਰਿਹਾਯਨ੍ਤੀਤਿ ਅਨਧਿਗਤਂ ਨਾਧਿਗਚ੍ਛਨ੍ਤਾ ਵਿਸੇਸਾਧਿਗਮਤੋ ਪਰਿਹਾਯਨ੍ਤਿ.
੩੩. ਅਨ੍ਤਕਾਤਿ ਲਾਮਕ ਹੀਨਸਤ੍ਤ. ਅਨ੍ਤਲਿਕ੍ਖਚਰੋਤਿ ਰਾਗਪਾਸਂ ਸਨ੍ਧਾਯਾਹ. ਤਞ੍ਹਿ ਸੋ ‘‘ਅਨ੍ਤਲਿਕ੍ਖਚਰੋ’’ਤਿ ਮਨ੍ਤ੍ਵਾ ਆਹ.
੩੪. ਨਾਨਾਦਿਸਾ ਨਾਨਾਜਨਪਦਾਤਿ ਨਾਨਾਦਿਸਤੋ ਚ ਨਾਨਾਜਨਪਦਤੋ ਚ. ਅਨੁਜਾਨਾਮਿ ਭਿਕ੍ਖਵੇ ਤੁਮ੍ਹੇਵ ਦਾਨਿ ਤਾਸੁ ਤਾਸੁ ਦਿਸਾਸੁ ਤੇਸੁ ਤੇਸੁ ਜਨਪਦੇਸੁ ਪਬ੍ਬਾਜੇਥਾਤਿਆਦਿਮ੍ਹਿ ਪਬ੍ਬਜ੍ਜਾਪੇਕ੍ਖਂ ਕੁਲਪੁਤ੍ਤਂ ਪਬ੍ਬਾਜੇਨ੍ਤੇਨ ਯੇ ਪਰਤੋ ‘‘ਨ ਭਿਕ੍ਖਵੇ ਪਞ੍ਚਹਿ ਆਬਾਧੇਹਿ ਫੁਟ੍ਠੋ ਪਬ੍ਬਾਜੇਤਬ੍ਬੋ’’ਤਿਆਦਿਂ ਕਤ੍ਵਾ ਯਾਵ ‘‘ਨ ਅਨ੍ਧਮੂਗਬਧਿਰੋ ਪਬ੍ਬਾਜੇਤਬ੍ਬੋ’’ਤਿ ਏਵਂ ਪਟਿਕ੍ਖਿਤ੍ਤਾ ਪੁਗ੍ਗਲਾ, ਤੇ ਵਜ੍ਜੇਤ੍ਵਾ ਪਬ੍ਬਜ੍ਜਾਦੋਸਵਿਰਹਿਤੋ ਪੁਗ੍ਗਲੋ ਪਬ੍ਬਾਜੇਤਬ੍ਬੋ. ਸੋਪਿ ਚ ਮਾਤਾਪਿਤੂਹਿ ਅਨੁਞ੍ਞਾਤੋਯੇਵ. ਤਸ੍ਸ ਅਨੁਜਾਨਨਲਕ੍ਖਣਂ ‘‘ਨ ਭਿਕ੍ਖਵੇ ਅਨਨੁਞ੍ਞਾਤੋ ਮਾਤਾਪਿਤੂਹਿ ਪੁਤ੍ਤੋ ਪਬ੍ਬਾਜੇਤਬ੍ਬੋ, ਯੋ ਪਬ੍ਬਾਜੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ ਏਤਸ੍ਮਿਂ ਸੁਤ੍ਤੇ ਵਣ੍ਣਯਿਸ੍ਸਾਮ.
ਏਵਂ ਪਬ੍ਬਜ੍ਜਾਦੋਸਵਿਰਹਿਤਂ ਮਾਤਾਪਿਤੂਹਿ ਅਨੁਞ੍ਞਾਤਂ ਪਬ੍ਬਾਜੇਨ੍ਤੇਨਾਪਿ ਚ ਸਚੇ ਅਚ੍ਛਿਨ੍ਨਕੇਸੋ ਹੋਤਿ, ਏਕਸੀਮਾਯ ਚ ਅਞ੍ਞੇਪਿ ਭਿਕ੍ਖੂ ਅਤ੍ਥਿ, ਕੇਸਚ੍ਛੇਦਨਤ੍ਥਾਯ ਭਣ੍ਡੁਕਮ੍ਮਂ ਆਪੁਚ੍ਛਿਤਬ੍ਬਂ. ਤਸ੍ਸ ਆਪੁਚ੍ਛਨਾਕਾਰਂ ‘‘ਅਨੁਜਾਨਾਮਿ, ਭਿਕ੍ਖਵੇ, ਸਙ੍ਘਂ ਅਪਲੋਕੇਤੁਂ ਭਣ੍ਡੁਕਮ੍ਮਾਯਾ’’ਤਿ ਏਤ੍ਥ ਵਣ੍ਣਯਿਸ੍ਸਾਮ. ਸਚੇ ਓਕਾਸੋ ਹੋਤਿ, ਸਯਂ ਪਬ੍ਬਾਜੇਤਬ੍ਬੋ. ਸਚੇ ਉਦ੍ਦੇਸਪਰਿਪੁਚ੍ਛਾਦੀਹਿ ਬ੍ਯਾਵਟੋ ਹੋਤਿ, ਓਕਾਸਂ ਨ ਲਭਤਿ, ਏਕੋ ਦਹਰਭਿਕ੍ਖੁ ਵਤ੍ਤਬ੍ਬੋ ‘‘ਏਤਂ ਪਬ੍ਬਾਜੇਹੀ’’ਤਿ. ਅਵੁਤ੍ਤੋਪਿ ਚੇ ਦਹਰਭਿਕ੍ਖੁ ਉਪਜ੍ਝਾਯਂ ਉਦ੍ਦਿਸ੍ਸ ਪਬ੍ਬਾਜੇਤਿ, ਵਟ੍ਟਤਿ. ਸਚੇ ਦਹਰਭਿਕ੍ਖੁ ਨਤ੍ਥਿ, ਸਾਮਣੇਰੋਪਿ ਵਤ੍ਤਬ੍ਬੋ ‘‘ਏਤਂ ਖਣ੍ਡਸੀਮਂ ਨੇਤ੍ਵਾ ਪਬ੍ਬਾਜੇਤ੍ਵਾ ਕਾਸਾਯਾਨਿ ਅਚ੍ਛਾਦੇਤ੍ਵਾ ਏਹੀ’’ਤਿ. ਸਰਣਾਨਿ ਪਨ ਸਯਂ ਦਾਤਬ੍ਬਾਨਿ. ਏਵਂ ਭਿਕ੍ਖੁਨਾਵ ਪਬ੍ਬਜਿਤੋ ਹੋਤਿ. ਪੁਰਿਸਞ੍ਹਿ ਭਿਕ੍ਖੁਤੋ ਅਞ੍ਞੋ ਪਬ੍ਬਾਜੇਤੁਂ ਨ ਲਭਤਿ, ਮਾਤੁਗਾਮਂ ਭਿਕ੍ਖੁਨਿਤੋ ਅਞ੍ਞੋ. ਸਾਮਣੇਰੋ ਪਨ ਸਾਮਣੇਰੀ ਵਾ ਆਣਤ੍ਤਿਯਾ ਕਾਸਾਯਾਨਿ ਦਾਤੁਂ ਲਭਤਿ. ਕੇਸੋਰੋਪਨਂ ਯੇਨ ਕੇਨਚਿ ਕਤਂ ਸੁਕਤਂ.
ਸਚੇ ਪਨ ਭਬ੍ਬਰੂਪੋ ਹੋਤਿ ਸਹੇਤੁਕੋ ਞਾਤੋ ਯਸਸ੍ਸੀ ਕੁਲਪੁਤ੍ਤੋ, ਓਕਾਸਂ ਕਤ੍ਵਾਪਿ ਸਯਮੇਵ ਪਬ੍ਬਾਜੇਤਬ੍ਬੋ. ‘‘ਮਤ੍ਤਿਕਾਮੁਟ੍ਠਿਂ ਗਹੇਤ੍ਵਾ ਨ੍ਹਾਯਿਤ੍ਵਾ ਕੇਸੇ ਤੇਮੇਤ੍ਵਾ ਆਗਚ੍ਛਾਹੀ’’ਤਿ ਚ ਪਨ ਨ ਵਿਸ੍ਸਜ੍ਜੇਤਬ੍ਬੋ. ਪਬ੍ਬਜਿਤੁਕਾਮਾਨਞ੍ਹਿ ਪਠਮਂ ਬਲਵਉਸ੍ਸਾਹੋ ਹੋਤਿ, ਪਚ੍ਛਾ ਪਨ ਕਾਸਾਯਾਨਿ ਚ ਕੇਸਹਰਣਸਤ੍ਥਕਞ੍ਚ ਦਿਸ੍ਵਾ ਉਤ੍ਰਸਨ੍ਤਿ, ਏਤ੍ਤੋਯੇਵ ਪਲਾਯਨ੍ਤਿ, ਤਸ੍ਮਾ ਸਯਮੇਵ ਨਹਾਨਤਿਤ੍ਥਂ ਨੇਤ੍ਵਾ ਸਚੇ ਨਾਤਿਦਹਰੋ ਹੋਤਿ, ‘‘ਨਹਾਹੀ’’ਤਿ ਵਤ੍ਤਬ੍ਬੋ. ਕੇਸਾ ਪਨਸ੍ਸ ਸਯਮੇਵ ਮਤ੍ਤਿਕਂ ਗਹੇਤ੍ਵਾ ਧੋਵਿਤਬ੍ਬਾ. ਦਹਰਕੁਮਾਰਕੋ ਪਨ ਸਯਂ ਉਦਕਂ ਓਤਰਿਤ੍ਵਾ ਗੋਮਯਮਤ੍ਤਿਕਾਹਿ ਘਂਸਿਤ੍ਵਾ ਨਹਾਪੇਤਬ੍ਬੋ. ਸਚੇਪਿਸ੍ਸ ਕਚ੍ਛੁ ਵਾ ਪਿਲ਼ਕਾ ਵਾ ਹੋਨ੍ਤਿ, ਯਥਾ ਮਾਤਾ ਪੁਤ੍ਤਂ ਨ ਜਿਗੁਚ੍ਛਤਿ, ਏਵਮੇਵ ਅਜਿਗੁਚ੍ਛਨ੍ਤੇਨ ਸਾਧੁਕਂ ਹਤ੍ਥਪਾਦਸੀਸਾਨਿ ਘਂਸਿਤ੍ਵਾ ਨਹਾਪੇਤਬ੍ਬੋ. ਕਸ੍ਮਾ? ਏਤ੍ਤਕੇਨ ਹਿ ਉਪਕਾਰੇਨ ਕੁਲਪੁਤ੍ਤਾ ਆਚਰਿਯੁਪਜ੍ਝਾਯੇਸੁ ਚ ਸਾਸਨੇ ਚ ਬਲਵਸਿਨੇਹਾ ਤਿਬ੍ਬਗਾਰਵਾ ਅਨਿਵਤ੍ਤਿਧਮ੍ਮਾ ਹੋਨ੍ਤਿ, ਉਪ੍ਪਨ੍ਨਂ ਅਨਭਿਰਤਿਂ ਵਿਨੋਦੇਤ੍ਵਾ ਥੇਰਭਾਵਂ ਪਾਪੁਣਨ੍ਤਿ, ਕਤਞ੍ਞੂ ਕਤਵੇਦਿਨੋ ਹੋਨ੍ਤਿ.
ਏਵਂ ਨਹਾਪਨਕਾਲੇ ਪਨ ਕੇਸਮਸ੍ਸੁਂ ਓਰੋਪਨਕਾਲੇ ਵਾ ‘‘ਤ੍ਵਂ ਞਾਤੋ ਯਸਸ੍ਸੀ, ਇਦਾਨਿ ਮਯਂ ਤਂ ਨਿਸ੍ਸਾਯ ਪਚ੍ਚਯੇਹਿ ਨ ਕਿਲਮਿਸ੍ਸਾਮਾ’’ਤਿ ਨ ਵਤ੍ਤਬ੍ਬੋ, ਅਞ੍ਞਾਪਿ ਅਨਿਯ੍ਯਾਨਿਕਕਥਾ ਨ ਕਥੇਤਬ੍ਬਾ. ਅਥ ਖ੍ਵਸ੍ਸ ‘‘ਆਵੁਸੋ, ਸੁਟ੍ਠੁ ਉਪਧਾਰੇਹਿ ਸਤਿਂ ਉਪਟ੍ਠਾਪੇਹੀ’’ਤਿ ਵਤ੍ਵਾ ਤਚਪਞ੍ਚਕਕਮ੍ਮਟ੍ਠਾਨਂ ਆਚਿਕ੍ਖਿਤਬ੍ਬਂ, ਆਚਿਕ੍ਖਨ੍ਤੇਨ ਚ ਵਣ੍ਣਸਣ੍ਠਾਨਗਨ੍ਧਾਸਯੋਕਾਸਵਸੇਨ ਅਸੁਚਿਜੇਗੁਚ੍ਛਪਟਿਕੂਲਭਾਵਂ ਨਿਜ੍ਜੀਵਨਿਸ੍ਸਤ੍ਤਭਾਵਂ ਵਾ ਪਾਕਟਂ ਕਰੋਨ੍ਤੇਨ ਆਚਿਕ੍ਖਿਤਬ੍ਬਂ. ਸਚੇ ਹਿ ਸੋ ਪੁਬ੍ਬੇ ਮਦ੍ਦਿਤਸਙ੍ਖਾਰੋ ਹੋਤਿ ਭਾਵਿਤਭਾਵਨੋ, ਕਣ੍ਟਕਵੇਧਾਪੇਕ੍ਖੋ ਵਿਯ ਪਰਿਪਕ੍ਕਗਣ੍ਡੋ, ਸੂਰਿਯੁਗ੍ਗਮਨਾਪੇਕ੍ਖਂ ਵਿਯ ਚ ਪਰਿਣਤਪਦੁਮਂ, ਅਥਸ੍ਸ ਆਰਦ੍ਧਮਤ੍ਤੇ ਕਮ੍ਮਟ੍ਠਾਨਮਨਸਿਕਾਰੇ ਇਨ੍ਦਾਸਨਿ ਵਿਯ ਪਬ੍ਬਤੇ ਕਿਲੇਸਪਬ੍ਬਤੇ ਚੁਣ੍ਣਯਮਾਨਂਯੇਵ ਞਾਣਂ ਪਵਤ੍ਤਤਿ, ਖੁਰਗ੍ਗੇਯੇਵ ਅਰਹਤ੍ਤਂ ਪਾਪੁਣਾਤਿ. ਯੇ ਹਿ ਕੇਚਿ ਖੁਰਗ੍ਗੇ ਅਰਹਤ੍ਤਂ ਪਤ੍ਤਾ, ਸਬ੍ਬੇ ਤੇ ਏਵਰੂਪਂ ਸਵਨਂ ਲਭਿਤ੍ਵਾ ਕਲ੍ਯਾਣਮਿਤ੍ਤੇਨ ਆਚਰਿਯੇਨ ਦਿਨ੍ਨਨਯਂ ਨਿਸ੍ਸਾਯ ਨੋ ਅਨਿਸ੍ਸਾਯ. ਤਸ੍ਮਾਸ੍ਸ ਆਦਿਤੋਵ ਏਵਰੂਪੀ ਕਥਾ ਕਥੇਤਬ੍ਬਾਤਿ.
ਕੇਸੇਸੁ ਪਨ ਓਰੋਪਿਤੇਸੁ ਹਲਿਦ੍ਦਿਚੁਣ੍ਣੇਨ ਵਾ ਗਨ੍ਧਚੁਣ੍ਣੇਨ ਵਾ ਸੀਸਞ੍ਚ ਸਰੀਰਞ੍ਚ ਉਬ੍ਬਟ੍ਟੇਤ੍ਵਾ ਗਿਹਿਗਨ੍ਧਂ ਅਪਨੇਤ੍ਵਾ ਕਾਸਾਯਾਨਿ ਤਿਕ੍ਖਤ੍ਤੁਂ ਵਾ ਦ੍ਵਿਕ੍ਖਤ੍ਤੁਂ ਵਾ ਸਕਿਂ ਵਾ ਪਟਿਗ੍ਗਾਹੇਤਬ੍ਬੋ. ਅਥਾਪਿਸ੍ਸ ਹਤ੍ਥੇ ਅਦਤ੍ਵਾ ਆਚਰਿਯੋ ਵਾ ਉਪਜ੍ਝਾਯੋ ਵਾ ਸਯਮੇਵ ਅਚ੍ਛਾਦੇਤਿ, ਵਟ੍ਟਤਿ. ਸਚੇਪਿ ਅਞ੍ਞਂ ਦਹਰਂ ਵਾ ਸਾਮਣੇਰਂ ਵਾ ਉਪਾਸਕਂ ਵਾ ਆਣਾਪੇਤਿ ‘‘ਆਵੁਸੋ, ਏਤਾਨਿ ਕਾਸਾਯਾਨਿ ਗਹੇਤ੍ਵਾ ਏਤਂ ਅਚ੍ਛਾਦੇਹੀ’’ਤਿ ਤਂਯੇਵ ਵਾ ਆਣਾਪੇਤਿ ‘‘ਏਤਾਨਿ ਗਹੇਤ੍ਵਾ ਅਚ੍ਛਾਦੇਹੀ’’ਤਿ ਸਬ੍ਬਂ ਵਟ੍ਟਤਿ. ਸਬ੍ਬਂ ਤੇਨ ਭਿਕ੍ਖੁਨਾਵ ਦਿਨ੍ਨਂ ਹੋਤਿ.
ਯਂ ਪਨ ਨਿਵਾਸਨਂ ਵਾ ਪਾਰੁਪਨਂ ਵਾ ਅਨਾਣਤ੍ਤਿਯਾ ਨਿਵਾਸੇਤਿ ਵਾ ਪਾਰੁਪਤਿ ਵਾ, ਤਂ ਅਪਨੇਤ੍ਵਾ ਪੁਨ ਦਾਤਬ੍ਬਂ. ਭਿਕ੍ਖੁਨਾ ਹਿ ਸਹਤ੍ਥੇਨ ਵਾ ਆਣਤ੍ਤਿਯਾ ਵਾ ਦਿਨ੍ਨਮੇਵ ਕਾਸਾਵਂ ਵਟ੍ਟਤਿ, ਅਦਿਨ੍ਨਂ ਨ ਵਟ੍ਟਤਿ, ਸਚੇਪਿ ਤਸ੍ਸੇਵ ਸਨ੍ਤਕਂ ਹੋਤਿ, ਕੋ ਪਨ ਵਾਦੋ ਉਪਜ੍ਝਾਯਮੂਲਕੇ! ਅਯਂ ‘‘ਪਠਮਂ ਕੇਸਮਸ੍ਸੁਂ ਓਹਾਰੇਤ੍ਵਾ ਕਾਸਾਯਾਨਿ ਵਤ੍ਥਾਨਿ ਅਚ੍ਛਾਦਾਪੇਤ੍ਵਾ ਏਕਂਸਂ ਉਤ੍ਤਰਾਸਙ੍ਗਂ ਕਾਰਾਪੇਤ੍ਵਾ’’ਤਿ ਏਤ੍ਥ ਵਿਨਿਚ੍ਛਯੋ.
ਭਿਕ੍ਖੂਨਂ ਪਾਦੇ ਵਨ੍ਦਾਪੇਤ੍ਵਾਤਿ ਯੇ ਤਤ੍ਥ ਸਨ੍ਨਿਪਤਿਤਾ ਭਿਕ੍ਖੂ, ਤੇਸਂ ਪਾਦੇ ਵਨ੍ਦਾਪੇਤ੍ਵਾ; ਅਥ ਸਰਣਗ੍ਗਹਣਤ੍ਥਂ ਉਕ੍ਕੁਟਿਕਂ ਨਿਸੀਦਾਪੇਤ੍ਵਾ ਅਞ੍ਜਲਿਂ ਪਗ੍ਗਣ੍ਹਾਪੇਤ੍ਵਾ ਏਵਂ ਵਦੇਹੀਤਿ ਵਤ੍ਤਬ੍ਬੋ. ‘‘ਯਮਹਂ ਵਦਾਮਿ, ਤਂ ਵਦੇਹੀ’’ਤਿ ਵਤ੍ਤਬ੍ਬੋ. ਅਥਸ੍ਸ ਉਪਜ੍ਝਾਯੇਨ ਵਾ ਆਚਰਿਯੇਨ ਵਾ ‘‘ਬੁਦ੍ਧਂ ਸਰਣਂ ਗਚ੍ਛਾਮੀ’’ਤਿਆਦਿਨਾ ਨਯੇਨ ਸਰਣਾਨਿ ਦਾਤਬ੍ਬਾਨਿ ਯਥਾਵੁਤ੍ਤਪਟਿਪਾਟਿਯਾਵ ਨ ਉਪ੍ਪਟਿਪਾਟਿਯਾ. ਸਚੇ ਹਿ ਏਕਪਦਮ੍ਪਿ ਏਕਕ੍ਖਰਮ੍ਪਿ ਉਪ੍ਪਟਿਪਾਟਿਯਾ ਦੇਤਿ, ਬੁਦ੍ਧਂ ਸਰਣਂਯੇਵ ਵਾ ਤਿਕ੍ਖਤ੍ਤੁਂ ਦਤ੍ਵਾ ਪੁਨ ਇਤਰੇਸੁ ਏਕੇਕਂ ਤਿਕ੍ਖਤ੍ਤੁਂ ਦੇਤਿ, ਅਦਿਨ੍ਨਾਨਿ ਹੋਨ੍ਤਿ ਸਰਣਾਨਿ.
ਇਮਞ੍ਚ ਪਨ ਸਰਣਗਮਨੂਪਸਮ੍ਪਦਂ ਪਟਿਕ੍ਖਿਪਿਤ੍ਵਾ ਅਨੁਞ੍ਞਾਤਉਪਸਮ੍ਪਦਾ ਏਕਤੋ ਸੁਦ੍ਧਿਯਾ ਵਟ੍ਟਤਿ. ਸਾਮਣੇਰਪਬ੍ਬਜ੍ਜਾ ਪਨ ਉਭਤੋਸੁਦ੍ਧਿਯਾਵ ਵਟ੍ਟਤਿ, ਨੋ ਏਕਤੋ ਸੁਦ੍ਧਿਯਾ. ਤਸ੍ਮਾ ਉਪਸਮ੍ਪਦਾਯ ਸਚੇ ਆਚਰਿਯੋ ਞਤ੍ਤਿਦੋਸਞ੍ਚੇਵ ਕਮ੍ਮਵਾਚਾਦੋਸਞ੍ਚ ਵਜ੍ਜੇਤ੍ਵਾ ਕਮ੍ਮਂ ਕਰੋਤਿ, ਸੁਕਤਂ ਹੋਤਿ. ਪਬ੍ਬਜ੍ਜਾਯ ਪਨ ਇਮਾਨਿ ਤੀਣਿ ਸਰਣਾਨਿ ਬੁਕਾਰਧਕਾਰਾਦੀਨਂ ਬ੍ਯਞ੍ਜਨਾਨਂ ਠਾਨਕਰਣਸਮ੍ਪਦਂ ਅਹਾਪੇਨ੍ਤੇਨੇਵ ਆਚਰਿਯੇਨਪਿ ਅਨ੍ਤੇਵਾਸਿਕੇਨਪਿ ਵਤ੍ਤਬ੍ਬਾਨਿ. ਸਚੇ ਆਚਰਿਯੋ ਵਤ੍ਤੁਂ ਸਕ੍ਕੋਤਿ, ਅਨ੍ਤੇਵਾਸਿਕੋ ਨ ਸਕ੍ਕੋਤਿ; ਅਨ੍ਤੇਵਾਸਿਕੋ ਵਾ ਸਕ੍ਕੋਤਿ, ਆਚਰਿਯੋ ਨ ਸਕ੍ਕੋਤਿ; ਉਭੋਪਿ ਵਾ ਨ ਸਕ੍ਕੋਨ੍ਤਿ, ਨ ਵਟ੍ਟਤਿ. ਸਚੇ ਪਨ ਉਭੋਪਿ ਸਕ੍ਕੋਨ੍ਤਿ, ਵਟ੍ਟਤਿ.
ਇਮਾਨਿ ਚ ਪਨ ਦਦਮਾਨੇਨ ‘‘ਬੁਦ੍ਧਂ ਸਰਣਂ ਗਚ੍ਛਾਮੀ’’ਤਿ ਏਵਂ ਏਕਸਮ੍ਬਨ੍ਧਾਨਿ ਅਨੁਨਾਸਿਕਨ੍ਤਾਨਿ ਵਾ ਕਤ੍ਵਾ ਦਾਤਬ੍ਬਾਨਿ, ‘‘ਬੁਦ੍ਧਂ ਸਰਣਂ ਗਚ੍ਛਾਮੀ’’ਤਿ ਏਵਂ ਵਿਚ੍ਛਿਨ੍ਦਿਤ੍ਵਾ ਮਕਾਰਨ੍ਤਾਨਿ ਵਾ ਕਤ੍ਵਾ ਦਾਤਬ੍ਬਾਨਿ. ਅਨ੍ਧਕਟ੍ਠਕਥਾਯਂ ਨਾਮਂ ਸਾਵੇਤ੍ਵਾ ‘‘ਅਹਂ ਭਨ੍ਤੇ ਬੁਦ੍ਧਰਕ੍ਖਿਤੋ ਯਾਵਜੀਵਂ ਬੁਦ੍ਧਂ ਸਰਣਂ ਗਚ੍ਛਾਮੀ’’ਤਿ ਵੁਤ੍ਤਂ, ਤਂ ਏਕਅਟ੍ਠਕਥਾਯਮ੍ਪਿ ਨਤ੍ਥਿ, ਪਾਲ਼ਿਯਮ੍ਪਿ ਨ ਵੁਤ੍ਤਂ, ਤੇਸਂ ਰੁਚਿਮਤ੍ਤਮੇਵ, ਤਸ੍ਮਾ ਨ ਗਹੇਤਬ੍ਬਂ. ਨ ਹਿ ਤਥਾ ਅਵਦਨ੍ਤਸ੍ਸ ਸਰਣਂ ਕੁਪ੍ਪਤੀਤਿ.
ਅਨੁਜਾਨਾਮਿ ਭਿਕ੍ਖਵੇ ਇਮੇਹਿ ਤੀਹਿ ਸਰਣਗਮਨੇਹਿ ਪਬ੍ਬਜ੍ਜਂ ਉਪਸਮ੍ਪਦਨ੍ਤਿ ਇਮੇਹਿ ਬੁਦ੍ਧਂ ਸਰਣਂ ਗਚ੍ਛਾਮੀਤਿਆਦੀਹਿ ਏਵਂ ਤਿਕ੍ਖਤ੍ਤੁਂ ਉਭਤੋਸੁਦ੍ਧਿਯਾ ਵੁਤ੍ਤੇਹਿ ਤੀਹਿ ਸਰਣਗਮਨੇਹਿ ਪਬ੍ਬਜ੍ਜਞ੍ਚੇਵ ਉਪਸਮ੍ਪਦਞ੍ਚ ਅਨੁਜਾਨਾਮੀਤਿ ਅਤ੍ਥੋ. ਤਤ੍ਥ ਯਸ੍ਮਾ ਉਪਸਮ੍ਪਦਾ ਪਰਤੋ ਪਟਿਕ੍ਖਿਤ੍ਤਾ, ਤਸ੍ਮਾ ਸਾ ਏਤਰਹਿ ਸਰਣਮਤ੍ਤੇਨੇਵ ਨ ਰੁਹਤਿ. ਪਬ੍ਬਜ੍ਜਾ ਪਨ ਯਸ੍ਮਾ ਪਰਤੋ ‘‘ਅਨੁਜਾਨਾਮਿ, ਭਿਕ੍ਖਵੇ, ਇਮੇਹਿ ਤੀਹਿ ਸਰਣਗਮਨੇਹਿ ਸਾਮਣੇਰਪਬ੍ਬਜ੍ਜ’’ਨ੍ਤਿ ਅਨੁਞ੍ਞਾਤਾ ਏਵ, ਤਸ੍ਮਾ ਸਾ ਏਤਰਹਿਪਿ ਸਰਣਮਤ੍ਤੇਨੇਵ ਰੁਹਤਿ. ਏਤ੍ਤਾਵਤਾ ਹਿ ਸਾਮਣੇਰਭੂਮਿਯਂ ਪਤਿਟ੍ਠਿਤੋ ਹੋਤਿ.
ਸਚੇ ਪਨੇਸ ਮਤਿਮਾ ਹੋਤਿ ਪਣ੍ਡਿਤਜਾਤਿਕੋ, ਅਥਸ੍ਸ ਤਸ੍ਮਿਂਯੇਵ ਠਾਨੇ ਸਿਕ੍ਖਾਪਦਾਨਿ ਉਦ੍ਦਿਸਿਤਬ੍ਬਾਨਿ. ਕਥਂ? ਯਥਾ ਭਗਵਤਾ ਉਦ੍ਦਿਟ੍ਠਾਨਿ. ਵੁਤ੍ਤਞ੍ਹੇਤਂ –
‘‘ਅਨੁਜਾਨਾਮਿ, ਭਿਕ੍ਖਵੇ, ਸਾਮਣੇਰਾਨਂ ਦਸ ਸਿਕ੍ਖਾਪਦਾਨਿ, ਤੇਸੁ ਚ ਸਾਮਣੇਰੇਹਿ ਸਿਕ੍ਖਿਤੁਂ. ਪਾਣਾਤਿਪਾਤਾ ਵੇਰਮਣੀ, ਅਦਿਨ੍ਨਾਦਾਨਾ ਵੇਰਮਣੀ, ਅਬ੍ਰਹ੍ਮਚਰਿਯਾ ਵੇਰਮਣੀ, ਮੁਸਾਵਾਦਾ ਵੇਰਮਣੀ, ਸੁਰਾਮੇਰਯਮਜ੍ਜਪਮਾਦਟ੍ਠਾਨਾ ਵੇਰਮਣੀ, ਵਿਕਾਲਭੋਜਨਾ ਵੇਰਮਣੀ, ਨਚ੍ਚਗੀਤਵਾਦਿਤਵਿਸੂਕਦਸ੍ਸਨਾ ਵੇਰਮਣੀ, ਮਾਲਾਗਨ੍ਧਵਿਲੇਪਨਧਾਰਣਮਣ੍ਡਨਵਿਭੂਸਨਟ੍ਠਾਨਾ ਵੇਰਮਣੀ, ਉਚ੍ਚਾਸਯਨਮਹਾਸਯਨਾ ਵੇਰਮਣੀ, ਜਾਤਰੂਪਰਜਤਪਟਿਗ੍ਗਹਣਾ ਵੇਰਮਣੀ’’ਤਿ (ਮਹਾਵ. ੧੦੬).
ਅਨ੍ਧਕਟ੍ਠਕਥਾਯਂ ਪਨ ‘‘ਅਹਂ, ਭਨ੍ਤੇ, ਇਤ੍ਥਨ੍ਨਾਮੋ ਯਾਵਜੀਵਂ ਪਾਣਾਤਿਪਾਤਾ ਵੇਰਮਣਿਸਿਕ੍ਖਾਪਦਂ
ਸਮਾਦਿਯਾਮੀ’’ਤਿ ਏਵਂ ਸਰਣਦਾਨਂ ਵਿਯ ਸਿਕ੍ਖਾਪਦਦਾਨਮ੍ਪਿ ਵੁਤ੍ਤਂ, ਤਂ ਨੇਵ ਪਾਲ਼ਿਯਂ ਨ ਅਟ੍ਠਕਥਾਸੁ ਅਤ੍ਥਿ, ਤਸ੍ਮਾ ਯਥਾਪਾਲ਼ਿਯਾਵ ਉਦ੍ਦਿਸਿਤਬ੍ਬਾਨਿ. ਪਬ੍ਬਜ੍ਜਾ ਹਿ ਸਰਣਗਮਨੇਹੇਵ ਸਿਦ੍ਧਾ, ਸਿਕ੍ਖਾਪਦਾਨਿ ਪਨ ਕੇਵਲਂ ਸਿਕ੍ਖਾਪਰਿਪੂਰਣਤ੍ਥਂ ਜਾਨਿਤਬ੍ਬਾਨਿ. ਤਸ੍ਮਾ ਤਾਨਿ ਪਾਲ਼ਿਯਂ ਆਗਤਨਯੇਨ ਉਗ੍ਗਹੇਤੁਂ ਅਸਕ੍ਕੋਨ੍ਤਸ੍ਸ ਯਾਯ ਕਾਯਚਿ ਭਾਸਾਯ ਅਤ੍ਥਵਸੇਨਪਿ ਆਚਿਕ੍ਖਿਤੁਂ ਵਟ੍ਟਤਿ. ਯਾਵ ਪਨ ਅਤ੍ਤਨਾ ਸਿਕ੍ਖਿਤਬ੍ਬਸਿਕ੍ਖਾਪਦਾਨਿ ਨ ਜਾਨਾਤਿ, ਸਙ੍ਘਾਟਿਪਤ੍ਤਚੀਵਰਧਾਰਣਟ੍ਠਾਨਨਿਸਜ੍ਜਾਦੀਸੁ ਪਾਨਭੋਜਨਾਦਿਵਿਧਿਮ੍ਹਿ ਚ ਨ ਕੁਸਲੋ ਹੋਤਿ, ਤਾਵ ਭੋਜਨਸਾਲਂ ਵਾ ਸਲਾਕਭਾਜਨਟ੍ਠਾਨਂ ਵਾ ਅਞ੍ਞਂ ਵਾ ਤਥਾਰੂਪਟ੍ਠਾਨਂ ਨ ਪੇਸੇਤਬ੍ਬੋ, ਸਨ੍ਤਿਕਾਵਚਰੋਯੇਵ ਕਾਤਬ੍ਬੋ, ਬਾਲਦਾਰਕੋ ਵਿਯ ਪਟਿਜਗ੍ਗਿਤਬ੍ਬੋ, ਸਬ੍ਬਮਸ੍ਸ ਕਪ੍ਪਿਯਾਕਪ੍ਪਿਯਂ ਆਚਿਕ੍ਖਿਤਬ੍ਬਂ, ਨਿਵਾਸਨਪਾਰੁਪਨਾਦੀਸੁ ਆਭਿਸਮਾਚਾਰਿਕੇਸੁ ਵਿਨੇਤਬ੍ਬੋ. ਤੇਨਾਪਿ ‘‘ਅਨੁਜਾਨਾਮਿ, ਭਿਕ੍ਖਵੇ, ਦਸਹਙ੍ਗੇਹਿ ਸਮਨ੍ਨਾਗਤਂ ਸਾਮਣੇਰਂ ਨਾਸੇਤੁ’’ਨ੍ਤਿ (ਮਹਾਵ. ੧੦੮) ਏਵਂ ਪਰਤੋ ਵੁਤ੍ਤਾਨਿ ਦਸ ਨਾਸਨਙ੍ਗਾਨਿ ਆਰਕਾ ਪਰਿਵਜ੍ਜੇਤ੍ਵਾ ਆਭਿਸਮਾਚਾਰਿਕਂ ਪਰਿਪੂਰੇਨ੍ਤੇਨ ਦਸਵਿਧੇ ਸੀਲੇ ਸਾਧੁਕਂ ਸਿਕ੍ਖਿਤਬ੍ਬਨ੍ਤਿ.
ਪਬ੍ਬਜ੍ਜਾਕਥਾ ਨਿਟ੍ਠਿਤਾ.
ਦੁਤਿਯਮਾਰਕਥਾ
੩੫. ਮਯ੍ਹਂ ਖੋ ਭਿਕ੍ਖਵੇਤਿ ਮਯਾ ਖੋਤਿ ਅਤ੍ਥੋ. ਅਥ ਵਾ ਯੋ ਮਯ੍ਹਂ ਯੋਨਿਸੋ ਮਨਸਿਕਾਰੋ, ਤੇਨ ਹੇਤੁਨਾਤਿ ਅਤ੍ਥੋ. ਪੁਨ ਅਨੁਪ੍ਪਤ੍ਤਾਤਿ ਏਤ੍ਥ ਵਿਭਤ੍ਤਿਂ ਪਰਿਣਾਮੇਤ੍ਵਾ ਮਯਾਤਿ ਵਤ੍ਤਬ੍ਬਂ.
ਦੁਤਿਯਮਾਰਕਥਾ ਨਿਟ੍ਠਿਤਾ.
ਭਦ੍ਦਵਗ੍ਗਿਯਕਥਾ
੩੬. ਭਦ੍ਦਵਗ੍ਗਿਯਾਤਿ ਤੇ ਕਿਰ ਰਾਜਕੁਮਾਰਾ ਰੂਪੇਨ ਚ ਚਿਤ੍ਤੇਨ ਚ ਭਦ੍ਦਕਾ ਵਗ੍ਗਬਨ੍ਧੇਨ ਚ ਵਿਚਰਨ੍ਤਿ, ਤਸ੍ਮਾ ‘‘ਭਦ੍ਦਵਗ੍ਗਿਯਾ’’ਤਿ ਵੁਚ੍ਚਨ੍ਤਿ. ਤੇਨ ਹਿ ਵੋਤਿ ਏਤ੍ਥ ਵੋਕਾਰੋ ਨਿਪਾਤਮਤ੍ਤੋ. ਧਮ੍ਮਚਕ੍ਖੁਂ ਉਦਪਾਦੀਤਿ ਕੇਸਞ੍ਚਿ ਸੋਤਾਪਤ੍ਤਿਮਗ੍ਗੋ, ਕੇਸਞ੍ਚਿ ਸਕਦਾਗਾਮਿਮਗ੍ਗੋ, ਕੇਸਞ੍ਚਿ ਅਨਾਗਾਮਿਮਗ੍ਗੋ ਉਦਪਾਦਿ. ਤਯੋਪਿ ਹਿ ਏਤੇ ਮਗ੍ਗਾ ‘‘ਧਮ੍ਮਚਕ੍ਖੂ’’ਤਿ ਵੁਚ੍ਚਨ੍ਤਿ. ਤੇ ਕਿਰ ਤੁਣ੍ਡਿਲਜਾਤਕੇ ਤਿਂਸਧੁਤ੍ਤਾ ਅਹੇਸੁਂ, ਅਥ ਤੁਣ੍ਡਿਲੋਵਾਦਂ ਸੁਤ੍ਵਾ ਪਞ੍ਚਸੀਲਾਨਿ ਰਕ੍ਖਿਂਸੁ; ਇਦਂ ਨੇਸਂ ਪੁਬ੍ਬਕਮ੍ਮਂ.
ਭਦ੍ਦਵਗ੍ਗਿਯਕਥਾ ਨਿਟ੍ਠਿਤਾ.
ਉਰੁਵੇਲਪਾਟਿਹਾਰਿਯਕਥਾ
੩੭. ਪਮੁਖੋਤਿ ਪੁਬ੍ਬਙ੍ਗਮੋ. ਪਾਮੋਕ੍ਖੋਤਿ ਉਤ੍ਤਮੋ ਵਿਸੁਦ੍ਧਪਞ੍ਞੋ.
੩੮. ਅਨੁਪਹਚ੍ਚਾਤਿ ਅਵਿਨਾਸੇਤ੍ਵਾ. ਤੇਜਸਾ ਤੇਜਨ੍ਤਿ ਅਤ੍ਤਨੋ ਤੇਜੇਨ ਨਾਗਸ੍ਸ ਤੇਜਂ. ਪਰਿਯਾਦਿਯੇਯ੍ਯਨ੍ਤਿ ਅਭਿਭਵੇਯ੍ਯਂ, ਵਿਨਾਸੇਯ੍ਯਂ ਵਾਤਿ. ਮਕ੍ਖਨ੍ਤਿ ਕੋਧਂ. ਨਤ੍ਵੇਵ ਚ ਖੋ ਅਰਹਾ ਯਥਾ ਅਹਨ੍ਤਿ ਅਤ੍ਤਾਨਂ ‘‘ਅਰਹਾ ਅਹ’’ਨ੍ਤਿ ਮਞ੍ਞਮਾਨੋ ਵਦਤਿ.
੩੯. ਨੇਰਞ੍ਜਰਾਯਂ ਭਗਵਾਤਿਆਦਿਕਾ ਗਾਥਾਯੋ ਪਚ੍ਛਾ ਪਕ੍ਖਿਤ੍ਤਾ.
੪੪-੯. ਵਿਸ੍ਸਜ੍ਜੇਯ੍ਯਨ੍ਤਿ ਸੁਕ੍ਖਾਪਨਤ੍ਥਾਯ ਪਸਾਰੇਤ੍ਵਾ ਠਪੇਯ੍ਯਨ੍ਤਿ ਅਤ੍ਥੋ. ‘‘ਭਨ੍ਤੇ ਆਹਰ ਹਤ੍ਥ’’ਨ੍ਤਿ ਏਵਂ ਵਦਨ੍ਤੋ ਵਿਯ ਓਣਤੋਤਿ ਆਹਰਹਤ੍ਥੋ. ਉਯ੍ਯੋਜੇਤ੍ਵਾਤਿ ਵਿਸ੍ਸਜ੍ਜੇਤ੍ਵਾ. ਮਨ੍ਦਾਮੁਖਿਯੋਤਿ ਅਗ੍ਗਿਭਾਜਨਾਨਿ ਵੁਚ੍ਚਨ੍ਤਿ.
੫੧. ਚਿਰਪਟਿਕਾਤਿ ਚਿਰਕਾਲਤੋ ਪਟ੍ਠਾਯ.
੫੨. ਕੇਸਮਿਸ੍ਸਨ੍ਤਿਆਦੀਸੁ ਕੇਸਾ ਏਵ ਕੇਸਮਿਸ੍ਸਂ. ਏਸ ਨਯੋ ਸਬ੍ਬਤ੍ਥ. ਖਾਰਿਕਾਜਨ੍ਤਿ ਖਾਰਿਭਾਰੋ.
ਉਰੁਵੇਲਪਾਟਿਹਾਰਿਯਕਥਾ ਨਿਟ੍ਠਿਤਾ.
ਬਿਮ੍ਬਿਸਾਰਸਮਾਗਮਕਥਾ
੫੫. ਲਟ੍ਠਿਵਨੇਤਿ ਤਾਲੁਯ੍ਯਾਨੇ. ਸੁਪ੍ਪਤਿਟ੍ਠੇ ਚੇਤਿਯੇਤਿ ਅਞ੍ਞਤਰਸ੍ਮਿਂ ਵਟਰੁਕ੍ਖੇ; ਤਸ੍ਸ ਕਿਰੇਤਂ ਨਾਮਂ. ਦ੍ਵਾਦਸਨਹੁਤੇਹੀਤਿ ਏਤ੍ਥ ਏਕਂ ਨਹੁਤਂ ਦਸਸਹਸ੍ਸਾਨਿ. ਅਜ੍ਝਭਾਸੀਤਿ ਤੇਸਂ ਕਙ੍ਖਾਚ੍ਛੇਦਨਤ੍ਥਂ ਅਭਾਸਿ.
ਕਿਸਕੋਵਦਾਨੋਤਿ ਤਾਪਸਚਰਿਯਾਯ ਕਿਸਸਰੀਰਤ੍ਤਾ ‘‘ਕਿਸਕੋ’’ਤਿ ਲਦ੍ਧਨਾਮਾਨਂ ਤਾਪਸਾਨਂ ਓਵਾਦਕੋ ਅਨੁਸਾਸਕੋ ਸਮਾਨੋਤਿ ਅਤ੍ਥੋ. ਅਥ ਵਾ ਸਯਂ ਕਿਸਕੋ ਤਾਪਸੋ ਸਮਾਨੋ ਵਦਾਨੋ ਚ ਅਞ੍ਞੇ ਓਵਦਨ੍ਤੋ ਅਨੁਸਾਸਨ੍ਤੋਤਿਪਿ ਅਤ੍ਥੋ. ਕਥਂ ਪਹੀਨਨ੍ਤਿ ਕੇਨ ਕਾਰਣੇਨ ਪਹੀਨਂ. ਇਦਂ ਵੁਤ੍ਤਂ ਹੋਤਿ – ‘‘ਤ੍ਵਂ ਉਰੁਵੇਲਵਾਸਿਅਗ੍ਗਿਪਰਿਚਾਰਕਾਨਂ ਤਾਪਸਾਨਂ ਸਯਂ ਓਵਾਦਾਚਰਿਯੋ ਸਮਾਨੋ ਕਿਂ ਦਿਸ੍ਵਾ ਪਹਾਸਿ, ਪੁਚ੍ਛਾਮਿ ਤਂ ਏਤਮਤ੍ਥਂ ਕੇਨ ਕਾਰਣੇਨ ਤਵ ਅਗ੍ਗਿਹੁਤ੍ਤਂ ਪਹੀਨ’’ਨ੍ਤਿ.
ਦੁਤਿਯਗਾਥਾਯ ਅਯਮਤ੍ਥੋ – ਏਤੇ ਰੂਪਾਦਿਕੇ ਕਾਮੇ ਇਤ੍ਥਿਯੋ ਚ ਯਞ੍ਞਾ ਅਭਿਵਦਨ੍ਤਿ, ਸ੍ਵਾਹਂ ਏਤਂ ਸਬ੍ਬਮ੍ਪਿ ਰੂਪਾਦਿਕਂ ਕਾਮਪ੍ਪਭੇਦਂ ਖਨ੍ਧੁਪਧੀਸੁ ਮਲਨ੍ਤਿ ਞਤ੍ਵਾ ਯਸ੍ਮਾ ਇਮੇ ਯਿਟ੍ਠਹੁਤਪ੍ਪਭੇਦਾ ਯਞ੍ਞਾ ਮਲਮੇਵ ਵਦਨ੍ਤਿ, ਤਸ੍ਮਾ ਨ ਯਿਟ੍ਠੇ ਨ ਹੁਤੇ ਅਰਞ੍ਜਿਂ; ਯਿਟ੍ਠੇ ਵਾ ਹੁਤੇ ਵਾ ਨਾਭਿਰਮਿਨ੍ਤਿ ਅਤ੍ਥੋ.
ਤਤਿਯਗਾਥਾਯ – ਅਥ ਕੋਚਰਹੀਤਿ ਅਥ ਕ੍ਵਚਰਹਿ. ਸੇਸਂ ਉਤ੍ਤਾਨਮੇਵ.
ਚਤੁਤ੍ਥਗਾਥਾਯ – ਪਦਨ੍ਤਿ ਨਿਬ੍ਬਾਨਪਦਂ. ਸਨ੍ਤਸਭਾਵਤਾਯ ਸਨ੍ਤਂ. ਉਪਧੀਨਂ ਅਭਾਵੇਨ ਅਨੁਪਧਿਕਂ. ਰਾਗਕਿਞ੍ਚਨਾਦੀਨਂ ਅਭਾਵੇਨ ਅਕਿਞ੍ਚਨਂ. ਤੀਸੁ ਭਵੇਸੁ ਅਲਗ੍ਗਤਾਯ ਯਂ ਕਾਮਭਵਂ ਯਞ੍ਞਾ ਵਦਨ੍ਤਿ, ਤਸ੍ਮਿਮ੍ਪਿ ਕਾਮਭਵੇ ਅਸਤ੍ਤਂ. ਜਾਤਿਜਰਾਮਰਣਾਨਂ ਅਭਾਵੇਨ ਅਨਞ੍ਞਥਾਭਾਵਿਂ. ਅਤ੍ਤਨਾ ਭਾਵਿਤੇਨ ਮਗ੍ਗੇਨੇਵ ਅਧਿਗਨ੍ਤਬ੍ਬਂ, ਨ ਅਞ੍ਞੇਨ ਕੇਨਚਿ ਅਧਿਗਮੇਤਬ੍ਬਨ੍ਤਿ ਅਨਞ੍ਞਨੇਯ੍ਯਂ. ਯਸ੍ਮਾ ਈਦਿਸਂ ਪਦਮਦ੍ਦਸਂ, ਤਸ੍ਮਾ ਨ ਯਿਟ੍ਠੇ ਨ ਹੁਤੇ ਅਰਞ੍ਜਿਂ. ਤੇਨ ਕਿਂ ਦਸ੍ਸੇਤਿ? ਯੋ ਅਹਂ ਦੇਵਮਨੁਸ੍ਸਲੋਕਸਮ੍ਪਤ੍ਤਿਸਾਧਕੇ ਨ ਯਿਟ੍ਠੇ ਨ ਹੁਤੇ ਅਰਞ੍ਜਿਂ, ਸੋ ਕਿਂ ਵਕ੍ਖਾਮਿ ‘‘ਏਤ੍ਥ ਨਾਮ ਮੇ ਦੇਵਮਨੁਸ੍ਸਲੋਕੇ ਰਤੋ ਮਨੋ’’ਤਿ.
੫੬. ਏਵਂ ਸਬ੍ਬਲੋਕੇ ਅਨਭਿਰਤਿਭਾਵਂ ਪਕਾਸੇਤ੍ਵਾ ਅਥ ਖੋ ਆਯਸ੍ਮਾ ਉਰੁਵੇਲਕਸ੍ਸਪੋ ‘‘ਸਾਵਕੋਹਮਸ੍ਮੀ’’ਤਿ ਏਵਂ ਭਗਵਤੋ ਸਾਵਕਭਾਵਂ ਪਕਾਸੇਸਿ. ਤਞ੍ਚ ਖੋ ਆਕਾਸੇ ਵਿਵਿਧਾਨਿ ਪਾਟਿਹਾਰਿਯਾਨਿ ਦਸ੍ਸੇਤ੍ਵਾ. ਧਮ੍ਮਚਕ੍ਖੁਨ੍ਤਿ ਸੋਤਾਪਤ੍ਤਿਮਗ੍ਗਞਾਣਂ.
੫੭. ਅਸ੍ਸਾਸਕਾਤਿ ਆਸੀਸਨਾ; ਪਤ੍ਥਨਾਤਿ ਅਤ੍ਥੋ. ਏਸਾਹਂ ਭਨ੍ਤੇਤਿ ਏਤ੍ਥ ਪਨ ਕਿਞ੍ਚਾਪਿ ਮਗ੍ਗਪ੍ਪਟਿਵੇਧੇਨੇਵਸ੍ਸ ਸਿਦ੍ਧਂ ਸਰਣਗਮਨਂ, ਤਤ੍ਥ ਪਨ ਨਿਚ੍ਛਯਗਮਨਮੇਵ ਗਤੋ, ਇਦਾਨਿ ਵਾਚਾਯ ਅਤ੍ਤਸਨ੍ਨਿਯ੍ਯਾਤਨਂ ਕਰੋਤਿ. ਮਗ੍ਗਵਸੇਨੇਵਾਯਂ ਨਿਯਤਸਰਣਤਂ ਪਤ੍ਤੋ, ਤਂ ਪਰੇਸਂ ਵਾਚਾਯ ਪਾਕਟਂ ਕਰੋਨ੍ਤੋ ਪਣਿਪਾਤਗਮਨਞ੍ਚ ਗਚ੍ਛਨ੍ਤੋ ਏਵਂ ਵਦਤਿ.
੫੮. ਸਿਙ੍ਗੀਨਿਕ੍ਖਸਵਣ੍ਣੋਤਿ ਸਿਙ੍ਗੀਸੁਵਣ੍ਣਨਿਕ੍ਖੇਨ ਸਮਾਨਵਣ੍ਣੋ. ਦਸਵਾਸੋਤਿ ਦਸਸੁ ਅਰਿਯਵਾਸੇਸੁ ਵੁਤ੍ਥਵਾਸੋ. ਦਸਧਮ੍ਮਵਿਦੂਤਿ ਦਸਕਮ੍ਮਪਥਵਿਦੂ. ਦਸਭਿ ਚੁਪੇਤੋਤਿ ਦਸਹਿ ਅਸੇਕ੍ਖੇਹਿ ਅਙ੍ਗੇਹਿ ਉਪੇਤੋ. ਸਬ੍ਬਧਿਦਨ੍ਤੋਤਿ ਸਬ੍ਬੇਸੁ ਦਨ੍ਤੋ; ਭਗਵਤੋ ਹਿ ਚਕ੍ਖੁਆਦੀਸੁ ਕਿਞ੍ਚਿ ਅਦਨ੍ਤਂ ਨਾਮ ਨਤ੍ਥਿ.
੫੯. ਭਗਵਨ੍ਤਂ ਭੁਤ੍ਤਾਵਿਂ ਓਨੀਤਪਤ੍ਤਪਾਣਿਂ ਏਕਮਨ੍ਤਂ ਨਿਸੀਦੀਤਿ ਭਗਵਨ੍ਤਂ ਭੁਤ੍ਤਵਨ੍ਤਂ ਪਤ੍ਤਤੋ ਚ ਅਪਨੀਤਪਾਣਿਂ ਸਲ੍ਲਕ੍ਖੇਤ੍ਵਾ ਏਕਸ੍ਮਿਂ ਪਦੇਸੇ ਨਿਸੀਦੀਤਿ ਅਤ੍ਥੋ. ਅਤ੍ਥਿਕਾਨਨ੍ਤਿ ਬੁਦ੍ਧਾਭਿਵਾਦਨਗਮਨੇਨ ਚ ਧਮ੍ਮਸਵਨੇਨ ਚ ਅਤ੍ਥਿਕਾਨਂ. ਅਭਿਕ੍ਕਮਨੀਯਨ੍ਤਿ ਅਭਿਗਨ੍ਤੁਂ ਸਕ੍ਕੁਣੇਯ੍ਯਂ. ਅਪ੍ਪਾਕਿਣ੍ਣਨ੍ਤਿ ਅਨਾਕਿਣ੍ਣਂ. ਅਪ੍ਪਸਦ੍ਦਨ੍ਤਿ ਵਚਨਸਦ੍ਦੇਨ ਅਪ੍ਪਸਦ੍ਦਂ. ਅਪ੍ਪਨਿਗ੍ਘੋਸਨ੍ਤਿ ਨਗਰਨਿਗ੍ਘੋਸਸਦ੍ਦੇਨ ਅਪ੍ਪਨਿਗ੍ਘੋਸਂ. ਵਿਜਨਵਾਤਨ੍ਤਿ ਅਨੁਸਞ੍ਚਰਣਜਨਸ੍ਸ ਸਰੀਰਵਾਤੇਨ ਵਿਰਹਿਤਂ. ‘‘ਵਿਜਨਵਾਦ’’ਨ੍ਤਿਪਿ ਪਾਠੋ; ਅਨ੍ਤੋ ਜਨਵਾਦੇਨ ਰਹਿਤਨ੍ਤਿ ਅਤ੍ਥੋ. ‘‘ਵਿਜਨਪਾਤ’’ਨ੍ਤਿਪਿ ਪਾਠੋ; ਜਨਸਞ੍ਚਾਰਵਿਰਹਿਤਨ੍ਤਿ ਅਤ੍ਥੋ. ਮਨੁਸ੍ਸਰਾਹਸੇਯ੍ਯਕਨ੍ਤਿ ਮਨੁਸ੍ਸਾਨਂ ਰਹਸ੍ਸਕਿਰਿਯਟ੍ਠਾਨਿਯਂ. ਪਟਿਸਲ੍ਲਾਨਸਾਰੁਪ੍ਪਨ੍ਤਿ ਵਿਵੇਕਾਨੁਰੂਪਂ.
ਸਾਰਿਪੁਤ੍ਤਮੋਗ੍ਗਲ੍ਲਾਨਪਬ੍ਬਜ੍ਜਾਕਥਾ
੬੦. ਸਾਰਿਪੁਤ੍ਤਮੋਗ੍ਗਲ੍ਲਾਨਾਤਿ ਸਾਰਿਪੁਤ੍ਤੋ ਚ ਮੋਗ੍ਗਲ੍ਲਾਨੋ ਚ. ਤੇਹਿ ਕਤਿਕਾ ਕਤਾ ਹੋਤਿ‘‘ਯੋ ਪਠਮਂ ਅਮਤਂ ਅਧਿਗਚ੍ਛਤਿ, ਸੋ ਆਰੋਚੇਤੂ’’ਤਿ ਤੇ ਕਿਰ ਉਭੋਪਿ ਗਿਹਿਕਾਲੇ ਉਪਤਿਸ੍ਸੋ ਕੋਲਿਤੋਤਿ ਏਵਂ ਪਞ੍ਞਾਯਮਾਨਨਾਮਾ ਅਡ੍ਢਤੇਯ੍ਯਸਤਮਾਣਵਕਪਰਿਵਾਰਾ ਗਿਰਗ੍ਗਸਮਜ੍ਜਂ ਅਗਮਂਸੁ. ਤਤ੍ਰ ਨੇਸਂ ਮਹਾਜਨਂ ਦਿਸ੍ਵਾ ਏਤਦਹੋਸਿ – ‘‘ਅਯਂ ਨਾਮ ਏਵਂ ਮਹਾਸਤ੍ਤਨਿਕਾਯੋ ਅਪ੍ਪਤ੍ਤੇ ਵਸ੍ਸਸਤੇ ਮਰਣਮੁਖੇ ਪਤਿਸ੍ਸਤੀ’’ਤਿ. ਅਥ ਉਭੋਪਿ ਉਟ੍ਠਿਤਾਯ ਪਰਿਸਾਯ ਅਞ੍ਞਮਞ੍ਞਂ ਪੁਚ੍ਛਿਤ੍ਵਾ ਏਕਜ੍ਝਾਸਯਾ ਪਚ੍ਚੁਪਟ੍ਠਿਤਮਰਣਸਞ੍ਞਾ ਸਮ੍ਮਨ੍ਤਯਿਂਸੁ ‘‘ਸਮ੍ਮ ਮਰਣੇ ਸਤਿ ਅਮਤੇਨਾਪਿ ਭਵਿਤਬ੍ਬਂ, ਹਨ੍ਦ ਮਯਂ ਅਮਤਂ ਪਰਿਯੇਸਾਮਾ’’ਤਿ ਅਮਤਪਰਿਯੇਸਨਤ੍ਥਂ ਸਞ੍ਚਯਸ੍ਸ ਛਨ੍ਨਪਰਿਬ੍ਬਾਜਕਸ੍ਸ ਸਨ੍ਤਿਕੇ ਸਪਰਿਸਾ ਪਬ੍ਬਜਿਤ੍ਵਾ ਕਤਿਪਾਹੇਨੇਵ ਤਸ੍ਸ ਞਾਣਵਿਸਯੇ ਪਾਰਂ ਗਨ੍ਤ੍ਵਾ ਅਮਤਂ ਅਪਸ੍ਸਨ੍ਤਾ ਪੁਚ੍ਛਿਂਸੁ ‘‘ਕਿਂ ਨੁ ਖੋ, ਆਚਰਿਯ, ਅਞ੍ਞੋਪੇਤ੍ਥ ਸਾਰੋ ਅਤ੍ਥੀ’’ਤਿ? ‘‘ਨਤ੍ਥਾਵੁਸੋ, ਏਤ੍ਤਕਮੇਵ ਇਦ’’ਨ੍ਤਿ ਚ ਸੁਤ੍ਵਾ ‘‘ਤੁਚ੍ਛਂ ਇਦਂ ਆਵੁਸੋ ਨਿਸ੍ਸਾਰਂ, ਯੋ ਦਾਨਿ ਅਮ੍ਹੇਸੁ ਪਠਮਂ ਅਮਤਂ ਅਧਿਗਚ੍ਛਤਿ, ਸੋ ਇਤਰਸ੍ਸ ਆਰੋਚੇਤੂ’’ਤਿ ਕਤਿਕਂ ਅਕਂਸੁ. ਤੇਨ ਵੁਤ੍ਤਂ – ‘‘ਤੇਹਿ ਕਤਿਕਾ ਕਤਾ ਹੋਤੀ’’ਤਿਆਦਿ.
ਪਾਸਾਦਿਕੇਨ ਅਭਿਕ੍ਕਨ੍ਤੇਨਾਤਿਆਦੀਸੁ ਇਤ੍ਥਮ੍ਭੂਤਲਕ੍ਖਣੇ ਕਰਣਵਚਨਂ ਵੇਦਿਤਬ੍ਬਂ. ਅਤ੍ਥਿਕੇਹਿ ਉਪਞ੍ਞਾਤਂ ਮਗ੍ਗਨ੍ਤਿ ਏਤਂ ਅਨੁਬਨ੍ਧਨਸ੍ਸ ਕਾਰਣਵਚਨਂ; ਇਦਞ੍ਹਿ ਵੁਤ੍ਤਂ ਹੋਤਿ – ‘‘ਯਂਨੂਨਾਹਂ ਇਮਂ ਭਿਕ੍ਖੁਂ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧੇਯ੍ਯਂ, ਕਸ੍ਮਾ? ਯਸ੍ਮਾ ਇਦਂ ਪਿਟ੍ਠਿਤੋ ਪਿਟ੍ਠਿਤੋ ਅਨੁਬਨ੍ਧਨਂ ਨਾਮ ਅਤ੍ਥਿਕੇਹਿ ਉਪਞ੍ਞਾਤਂ ਮਗ੍ਗਂ ਞਾਤੋ ਚੇਵ ਉਪਗਤੋ ਚ ਮਗ੍ਗੋ’’ਤਿ ਅਤ੍ਥੋ. ਅਥ ਵਾ ਅਤ੍ਥਿਕੇਹਿ ਅਮ੍ਹੇਹਿ ‘‘ਮਰਣੇ ਸਤਿ ਅਮਤੇਨਾਪਿ ਭਵਿਤਬ੍ਬ’’ਨ੍ਤਿ ਏਵਂ ਕੇਵਲਂ ਅਤ੍ਥੀਤਿ ਉਪਞ੍ਞਾਤਂ ਨਿਬ੍ਬਾਨਂ ਨਾਮ, ਤਂ ਮਗ੍ਗਨ੍ਤੋ ਪਰਿਯੇਸਨ੍ਤੋਤਿ ਏਵਮ੍ਪੇਤ੍ਥ ਅਤ੍ਥੋ ਦਟ੍ਠਬ੍ਬੋ.
ਪਿਣ੍ਡਪਾਤਂ ਆਦਾਯ ਪਟਿਕ੍ਕਮੀਤਿ ਸੁਦਿਨ੍ਨਕਣ੍ਡੇ ਵੁਤ੍ਤਪ੍ਪਕਾਰਂ ਅਞ੍ਞਤਰਂ ਕੁਟ੍ਟਮੂਲਂ ਉਪਸਙ੍ਕਮਿਤ੍ਵਾ ਨਿਸੀਦਿ. ਸਾਰਿਪੁਤ੍ਤੋਪਿ ਖੋ ‘‘ਅਕਾਲੋ ਖੋ ਤਾਵ ਪਞ੍ਹਂ ਪੁਚ੍ਛਿਤੁ’’ਨ੍ਤਿ ਕਾਲਂ ਆਗਮਯਮਾਨੋ ਏਕਮਨ੍ਤਂ ਠਤ੍ਵਾ ਵਤ੍ਤਪਟਿਪਤ੍ਤਿਪੂਰਣਤ੍ਥਂ ਕਤਭਤ੍ਤਕਿਚ੍ਚਸ੍ਸ ਥੇਰਸ੍ਸ ਅਤ੍ਤਨੋ ਕਮਣ੍ਡਲੁਤੋ ਉਦਕਂ ਦਤ੍ਵਾ ਧੋਤਹਤ੍ਥਪਾਦੇਨ ਥੇਰੇਨ ਸਦ੍ਧਿਂ ਪਟਿਸਨ੍ਥਾਰਂ ਕਤ੍ਵਾ ਪਞ੍ਹਂ ਪੁਚ੍ਛਿ. ਤੇਨ ਵੁਤ੍ਤਂ – ‘‘ਅਥ ਖੋ ਸਾਰਿਪੁਤ੍ਤੋ ਪਰਿਬ੍ਬਾਜਕੋ’’ਤਿਆਦਿ. ਨ ਤਾਹਂ ਸਕ੍ਕੋਮੀਤਿ ਨ ਤੇ ਅਹਂ ਸਕ੍ਕੋਮਿ. ਏਤ੍ਥ ਚ ਪਟਿਸਮ੍ਭਿਦਾਪ੍ਪਤ੍ਤੋ ਥੇਰੋ ਨ ਏਤ੍ਤਕਂ ਨ ਸਕ੍ਕੋਤਿ. ਅਥ ਖੋ ਇਮਸ੍ਸ ਧਮ੍ਮਗਾਰਵਂ ਉਪ੍ਪਾਦੇਸ੍ਸਾਮੀਤਿ ਸਬ੍ਬਾਕਾਰੇਨ ਬੁਦ੍ਧਵਿਸਯੇ ਅਵਿਸਯਭਾਵਂ ਗਹੇਤ੍ਵਾ ਏਵਮਾਹ.
ਯੇ ਧਮ੍ਮਾ ਹੇਤੁਪ੍ਪਭਵਾਤਿ ਹੇਤੁਪ੍ਪਭਵਾ ਨਾਮ ਪਞ੍ਚਕ੍ਖਨ੍ਧਾ; ਤੇਨਸ੍ਸ ਦੁਕ੍ਖਸਚ੍ਚਂ ਦਸ੍ਸੇਤਿ. ਤੇਸਂ ਹੇਤੁਂ ਤਥਾਗਤੋ ਆਹਾਤਿ ਤੇਸਂ ਹੇਤੁ ਨਾਮ ਸਮੁਦਯਸਚ੍ਚਂ; ਤਞ੍ਚ ਤਥਾਗਤੋ ਆਹਾਤਿ ਦਸ੍ਸੇਤਿ. ਤੇਸਞ੍ਚ ਯੋ ਨਿਰੋਧੋਤਿ ਤੇਸਂ ਉਭਿਨ੍ਨਮ੍ਪਿ ਸਚ੍ਚਾਨਂ ਯੋ ਅਪ੍ਪਵਤ੍ਤਿਨਿਰੋਧੋ; ਤਞ੍ਚ ਤਥਾਗਤੋ ਆਹਾਤਿ ਅਤ੍ਥੋ. ਤੇਨਸ੍ਸ ਨਿਰੋਧਸਚ੍ਚਂ ਦਸ੍ਸੇਤਿ. ਮਗ੍ਗਸਚ੍ਚਂ ਪਨੇਤ੍ਥ ਸਰੂਪਤੋ ਅਦਸ੍ਸਿਤਮ੍ਪਿ ਨਯਤੋ ਦਸ੍ਸਿਤਂ ਹੋਤਿ, ਨਿਰੋਧੇ ਹਿ ਵੁਤ੍ਤੇ ਤਸ੍ਸ ਸਮ੍ਪਾਪਕੋ ਮਗ੍ਗੋ ਵੁਤ੍ਤੋਵ ਹੋਤਿ. ਅਥ ਵਾ ਤੇਸਞ੍ਚ ਯੋ ਨਿਰੋਧੋਤਿ ਏਤ੍ਥ ਤੇਸਂ ਯੋ ਨਿਰੋਧੋ ਚ ਨਿਰੋਧੁਪਾਯੋ ਚਾਤਿ ਏਵਂ ਦ੍ਵੇਪਿ ਸਚ੍ਚਾਨਿ ਦਸ੍ਸਿਤਾਨਿ ਹੋਨ੍ਤੀਤਿ. ਇਦਾਨਿ ਤਮੇਵਤ੍ਥਂ ਪਟਿਪਾਦੇਨ੍ਤੋ ਆਹ – ‘‘ਏਵਂਵਾਦੀ ਮਹਾਸਮਣੋ’’ਤਿ.
ਏਸੇਵ ਧਮ੍ਮੋ ਯਦਿ ਤਾਵਦੇਵਾਤਿ ਸਚੇਪਿ ਇਤੋ ਉਤ੍ਤਰਿ ਨਤ੍ਥਿ, ਏਤ੍ਤਕਮੇਵ ਇਦਂ ਸੋਤਾਪਤ੍ਤਿਫਲਮਤ੍ਤਮੇਵ ਪਤ੍ਤਬ੍ਬਂ, ਤਥਾਪਿ ਏਸੋ ਏਵ ਧਮ੍ਮੋਤਿ ਅਤ੍ਥੋ. ਪਚ੍ਚਬ੍ਯਤ੍ਥ ਪਦਮਸੋਕਨ੍ਤਿ ਯਂ ਮਯਂ ਪਰਿਯੇਸਮਾਨਾ ਵਿਚਰਾਮ, ਤਂ ਪਦਮਸੋਕਂ ਪਟਿਵਿਦ੍ਧਾਤ੍ਥ ਤੁਮ੍ਹੇ; ਪਤ੍ਤਂ ਤਂ ਤੁਮ੍ਹੇਹੀਤਿ ਅਤ੍ਥੋ. ਅਦਿਟ੍ਠਂ ਅਬ੍ਭਤੀਤਂ ਬਹੁਕੇਹਿ ਕਪ੍ਪਨਹੁਤੇਹੀਤਿ ਅਮ੍ਹੇਹਿ ਨਾਮ ਇਦਂ ਪਦਂ ਬਹੁਕੇਹਿ ਕਪ੍ਪਨਹੁਤੇਹਿ ਅਦਿਟ੍ਠਮੇਵ ਅਬ੍ਭਤੀਤਂ; ਇਤਿ ਤਸ੍ਸ ਪਦਸ੍ਸ ਅਦਿਟ੍ਠਭਾਵੇਨ ਦੀਘਰਤ੍ਤਂ ਅਤ੍ਤਨੋ ਮਹਾਜਾਨਿਭਾਵਂ ਦੀਪੇਤਿ.
੬੨. ਗਮ੍ਭੀਰੇ ਞਾਣਵਿਸਯੇਤਿ ਗਮ੍ਭੀਰੇ ਚੇਵ ਗਮ੍ਭੀਰਸ੍ਸ ਚ ਞਾਣਸ੍ਸ ਵਿਸਯਭੂਤੇ. ਅਨੁਤ੍ਤਰੇ ਉਪਧਿਸਙ੍ਖਯੇਤਿ ਨਿਬ੍ਬਾਨੇ. ਵਿਮੁਤ੍ਤੇਤਿ ਤਦਾਰਮ੍ਮਣਾਯ ਵਿਮੁਤ੍ਤਿਯਾ ਵਿਮੁਤ੍ਤੇ. ਬ੍ਯਾਕਾਸੀਤਿ ‘‘ਏਤਂ ਮੇ ਸਾਵਕਯੁਗਂ ਭਵਿਸ੍ਸਤਿ ਅਗ੍ਗਂ ਭਦ੍ਦਯੁਗ’’ਨ੍ਤਿ ਵਦਨ੍ਤੋ ਸਾਵਕਪਾਰਮਿਞ੍ਞਾਣੇ ਬ੍ਯਾਕਾਸਿ. ਸਾਵ ਤੇਸਂ ਆਯਸ੍ਮਨ੍ਤਾਨਂ ਉਪਸਮ੍ਪਦਾ ਅਹੋਸੀਤਿ ਸਾ ਏਹਿਭਿਕ੍ਖੂਪਸਮ੍ਪਦਾਯੇਵ ਤੇਸਂ ਉਪਸਮ੍ਪਦਾ ਅਹੋਸਿ. ਏਵਂ ਉਪਸਮ੍ਪਨ੍ਨੇਸੁ ਚ ਤੇਸੁ ਮਹਾਮੋਗ੍ਗਲ੍ਲਾਨਤ੍ਥੇਰੋ ਸਤ੍ਤਹਿ ਦਿਵਸੇਹਿ ਅਰਹਤ੍ਤੇ ਪਤਿਟ੍ਠਿਤੋ, ਸਾਰਿਪੁਤ੍ਤਤ੍ਥੇਰੋ ਅਡ੍ਢਮਾਸੇਨ.
ਅਤੀਤੇ ਕਿਰ ਅਨੋਮਦਸ੍ਸੀ ਨਾਮ ਬੁਦ੍ਧੋ ਲੋਕੇ ਉਦਪਾਦਿ. ਤਸ੍ਸ ਸਰਦੋ ਨਾਮ ਤਾਪਸੋ ਸਕੇ ਅਸ੍ਸਮੇ ਨਾਨਾਪੁਪ੍ਫੇਹਿ ਮਣ੍ਡਪਂ ਕਤ੍ਵਾ ਪੁਪ੍ਫਾਸਨੇਯੇਵ ਭਗਵਨ੍ਤਂ ਨਿਸੀਦਾਪੇਤ੍ਵਾ ਭਿਕ੍ਖੁਸਙ੍ਘਸ੍ਸਾਪਿ ਤਥੇਵ ਮਣ੍ਡਪਂ ਕਤ੍ਵਾ ਪੁਪ੍ਫਾਸਨਾਨਿ ਪਞ੍ਞਪੇਤ੍ਵਾ ਅਗ੍ਗਸਾਵਕਭਾਵਂ ਪਤ੍ਥੇਸਿ. ਪਤ੍ਥਯਿਤ੍ਵਾ ਚ ਸਿਰੀਵਡ੍ਢਸ੍ਸ ਨਾਮ ਸੇਟ੍ਠਿਨੋ ਪੇਸੇਸਿ ‘‘ਮਯਾ ਅਗ੍ਗਸਾਵਕਟ੍ਠਾਨਂ ਪਤ੍ਥਿਤਂ, ਤ੍ਵਮ੍ਪਿ ਆਗਨ੍ਤ੍ਵਾ ਏਕਂ ਠਾਨਂ ਪਤ੍ਥੇਹੀ’’ਤਿ. ਸੇਟ੍ਠਿ ਨੀਲੁਪ੍ਪਲਮਣ੍ਡਪਂ ਕਤ੍ਵਾ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ, ਤਤ੍ਥ ਭੋਜੇਤ੍ਵਾ ਦੁਤਿਯਸਾਵਕਭਾਵਂ ਪਤ੍ਥੇਸਿ. ਤੇਸੁ ਸਰਦਤਾਪਸੋ ਸਾਰਿਪੁਤ੍ਤਤ੍ਥੇਰੋ ਜਾਤੋ, ਸਿਰੀਵਡ੍ਢੋ ਮਹਾਮੋਗ੍ਗਲ੍ਲਾਨਤ੍ਥੇਰੋਤਿ ਇਦਂ ਨੇਸਂ ਪੁਬ੍ਬਕਮ੍ਮਂ.
੬੩. ਅਪੁਤ੍ਤਕਤਾਯਾਤਿਆਦੀਸੁ ਯੇਸਂ ਪੁਤ੍ਤਾ ਪਬ੍ਬਜਨ੍ਤਿ, ਤੇਸਂ ਅਪੁਤ੍ਤਕਤਾਯ. ਯਾਸਂ ਪਤੀ ਪਬ੍ਬਜਨ੍ਤਿ, ਤਾਸਂ ਵੇਧਬ੍ਯਾਯ ਵਿਧਵਾਭਾਵਾਯ. ਉਭਯੇਨਾਪਿ ਕੁਲੁਪਚ੍ਛੇਦਾਯ. ਸਞ੍ਚਯਾਨੀਤਿ ਸਞ੍ਚਯਸ੍ਸ ਅਨ੍ਤੇਵਾਸਿਕਾਨਿ. ਮਗਧਾਨਂ ਗਿਰਿਬ੍ਬਜਨ੍ਤਿ ਮਗਧਾਨਂ ਜਨਪਦਸ੍ਸ ਗਿਰਿਬ੍ਬਜਂ ਨਗਰਂ. ਮਹਾਵੀਰਾਤਿ ਮਹਾਵੀਰਿਯਵਨ੍ਤੋ. ਨਯਮਾਨਾਨਨ੍ਤਿ ਨਯਮਾਨੇਸੁ. ਭੁਮ੍ਮਤ੍ਥੇ ਸਾਮਿਵਚਨਂ, ਉਪਯੋਗਤ੍ਥੇ ਵਾ. ਕਾ ਉਸੂਯਾ ਵਿਜਾਨਤਨ੍ਤਿ ਧਮ੍ਮੇਨ ਨਯਨ੍ਤੀਤਿ ਏਵਂ ਵਿਜਾਨਨ੍ਤਾਨਂ ਕਾ ਇਸ੍ਸਾ.
ਸਾਰਿਪੁਤ੍ਤਮੋਗ੍ਗਲ੍ਲਾਨਪਬ੍ਬਜ੍ਜਾਕਥਾ ਨਿਟ੍ਠਿਤਾ.
ਉਪਜ੍ਝਾਯਵਤ੍ਤਕਥਾ
੬੪-੫. ਅਨੁਪਜ੍ਝਾਯਕਾਤਿ ਵਜ੍ਜਾਵਜ੍ਜਂ ਉਪਨਿਜ੍ਝਾਯਕੇਨ ਗਰੁਨਾ ਵਿਰਹਿਤਾ. ਅਨਾਕਪ੍ਪਸਮ੍ਪਨ੍ਨਾਤਿ ਨ ਆਕਪ੍ਪੇਨ ਸਮ੍ਪਨ੍ਨਾ; ਸਮਣਸਾਰੁਪ੍ਪਾਚਾਰਵਿਰਹਿਤਾਤਿ ਅਤ੍ਥੋ. ਉਪਰਿਭੋਜਨੇਤਿ ਭੋਜਨਸ੍ਸ ਉਪਰਿ. ਉਤ੍ਤਿਟ੍ਠਪਤ੍ਤਨ੍ਤਿ ਪਿਣ੍ਡਾਯ ਚਰਣਕਪਤ੍ਤਂ. ਤਸ੍ਮਿਞ੍ਹਿ ਮਨੁਸ੍ਸਾ ਉਚ੍ਛਿਟ੍ਠਸਞ੍ਞਿਨੋ, ਤਸ੍ਮਾ ਉਤ੍ਤਿਟ੍ਠਪਤ੍ਤਨ੍ਤਿ ਵੁਤ੍ਤਂ. ਅਥ ਵਾ ਉਟ੍ਠਹਿਤ੍ਵਾ ਪਤ੍ਤਂ ਉਪਨਾਮੇਨ੍ਤੀਤਿ ਏਵਮ੍ਪੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਅਨੁਜਾਨਾਮਿ ਭਿਕ੍ਖਵੇ ਉਪਜ੍ਝਾਯਨ੍ਤਿ ਉਪਜ੍ਝਾਯਂ ਗਹੇਤੁਂ ਅਨੁਜਾਨਾਮੀਤਿ ਅਤ੍ਥੋ. ਪੁਤ੍ਤਚਿਤ੍ਤਂ ਉਪਟ੍ਠਪੇਸ੍ਸਤੀਤਿ ਪੁਤ੍ਤੋ ਮੇ ਅਯਨ੍ਤਿ ਏਵਂ ਗੇਹਸ੍ਸਿਤਪੇਮਵਸੇਨ ਚਿਤ੍ਤਂ ਉਪਟ੍ਠਪੇਸ੍ਸਤਿ. ਏਸ ਨਯੋ ਦੁਤਿਯਪਦੇਪਿ. ਸਗਾਰਵਾ ਸਪ੍ਪਤਿਸ੍ਸਾਤਿ ਗਰੁਭਾਵਞ੍ਚੇਵ ਜੇਟ੍ਠਕਭਾਵਞ੍ਚ ਉਪਟ੍ਠਪੇਤ੍ਵਾ. ਸਭਾਗਵੁਤ੍ਤਿਨੋਤਿ ਸਭਾਗਜੀਵਿਕਾ. ਸਾਹੂਤਿ ਵਾਤਿਆਦੀਨਿ ਪਞ੍ਚ ਪਦਾਨਿ ਉਪਜ੍ਝਾਯਭਾਵਸਮ੍ਪਟਿਚ੍ਛਨਵੇਵਚਨਾਨਿ. ਕਾਯੇਨ ਵਿਞ੍ਞਾਪੇਤੀਤਿ ਏਵਂ ਸਦ੍ਧਿਵਿਹਾਰਿਕੇਨ ‘‘ਉਪਜ੍ਝਾਯੋ ਮੇ ਭਨ੍ਤੇ ਹੋਹੀ’’ਤਿ ਤਿਕ੍ਖਤ੍ਤੁਂ ਵੁਤ੍ਤੇ ਸਚੇ ਉਪਜ੍ਝਾਯੋ ‘‘ਸਾਹੂ’’ਤਿਆਦੀਸੁ ਪਞ੍ਚਸੁ ਪਦੇਸੁ ਯਸ੍ਸ ਕਸ੍ਸਚਿ ਪਦਸ੍ਸ ਵਸੇਨ ਕਾਯੇਨ ਵਾ ਵਾਚਾਯ ਵਾ ਕਾਯਵਾਚਾਹਿ ਵਾ ‘‘ਗਹਿਤੋ ਤਯਾ ਉਪਜ੍ਝਾਯੋ’’ਤਿ ਉਪਜ੍ਝਾਯਗ੍ਗਹਣਂ ਵਿਞ੍ਞਾਪੇਤਿ, ਗਹਿਤੋ ਹੋਤਿ ਉਪਜ੍ਝਾਯੋ. ਇਦਮੇਵ ਹਿ ਏਤ੍ਥ ਉਪਜ੍ਝਾਯਗ੍ਗਹਣਂ, ਯਦਿਦਂ ਉਪਜ੍ਝਾਯਸ੍ਸ ਇਮੇਸੁ ਪਞ੍ਚਸੁ ਪਦੇਸੁ ਯਸ੍ਸ ਕਸ੍ਸਚਿ ਪਦਸ੍ਸ ਵਾਚਾਯ ਵਾ ਸਾਵਨਂ ਕਾਯੇਨ ਵਾ ਅਤ੍ਥਵਿਞ੍ਞਾਪਨਨ੍ਤਿ. ਕੇਚਿ ਪਨ ਸਾਧੂਤਿ ਸਮ੍ਪਟਿਚ੍ਛਨਂ ਸਨ੍ਧਾਯ ਵਦਨ੍ਤਿ. ਨ ਤਂ ਪਮਾਣਂ, ਆਯਾਚਨਦਾਨਮਤ੍ਤੇਨ ਹਿ ਗਹਿਤੋ ਹੋਤਿ ਉਪਜ੍ਝਾਯੋ, ਨ ਏਤ੍ਥ ਸਮ੍ਪਟਿਚ੍ਛਨਂ ਅਙ੍ਗਂ. ਸਦ੍ਧਿਵਿਹਾਰਿਕੇਨਾਪਿ ਨ ਕੇਵਲਂ ਇਮਿਨਾ ਮੇ ਪਦੇਨ ਉਪਜ੍ਝਾਯੋ ਗਹਿਤੋਤਿ ਞਾਤੁਂ ਵਟ੍ਟਤਿ. ‘‘ਅਜ੍ਜਤਗ੍ਗੇ ਦਾਨਿ ਥੇਰੋ ਮਯ੍ਹਂ ਭਾਰੋ, ਅਹਮ੍ਪਿ ਥੇਰਸ੍ਸ ਭਾਰੋ’’ਤਿ ਇਦਮ੍ਪਿ ਞਾਤੁਂ ਵਟ੍ਟਤਿ.
੬੬. ਤਤ੍ਰਾਯਂ ਸਮ੍ਮਾਵਤ੍ਤਨਾਤਿ ਯਂ ਵੁਤ੍ਤਂ ਸਮ੍ਮਾ ਵਤ੍ਤਿਤਬ੍ਬਨ੍ਤਿ, ਤਤ੍ਰ ਅਯਂ ਸਮ੍ਮਾਵਤ੍ਤਨਾ. ਕਾਲਸ੍ਸੇਵ ਉਟ੍ਠਾਯ ਉਪਾਹਨਾ ਓਮੁਞ੍ਚਿਤ੍ਵਾਤਿ ਸਚਸ੍ਸ ਪਚ੍ਚੂਸਕਾਲੇ ਚਙ੍ਕਮਨਤ੍ਥਾਯ ਵਾ ਧੋਤਪਾਦਪਰਿਹਰਣਤ੍ਥਾਯ ਵਾ ਪਟਿਮੁਕ੍ਕਾ ਉਪਾਹਨਾ ਪਾਦਗਤਾ ਹੋਨ੍ਤਿ, ਤਾ ਕਾਲਸ੍ਸੇਵ ਉਟ੍ਠਾਯ ਅਪਨੇਤ੍ਵਾ. ਦਨ੍ਤਕਟ੍ਠਂ ਦਾਤਬ੍ਬਨ੍ਤਿ ਮਹਨ੍ਤਂ ਮਜ੍ਝਿਮਂ ਖੁਦ੍ਦਕਨ੍ਤਿ ਤੀਣਿ ਦਨ੍ਤਕਟ੍ਠਾਨਿ ਉਪਨੇਤ੍ਵਾ ਤਤੋ ਯਂ ਤੀਣਿ ਦਿਵਸਾਨਿ ਗਣ੍ਹਾਤਿ, ਚਤੁਤ੍ਥਦਿਵਸਤੋ ਪਟ੍ਠਾਯ ਤਾਦਿਸਮੇਵ ਦਾਤਬ੍ਬਂ. ਸਚੇ ਅਨਿਯਮਂ ਕਤ੍ਵਾ ਯਂ ਵਾ ਤਂ ਵਾ ਗਣ੍ਹਾਤਿ, ਅਥ ਯਾਦਿਸਂ ਲਭਤਿ ਤਾਦਿਸਂ ਦਾਤਬ੍ਬਂ.
ਮੁਖੋਦਕਂ ਦਾਤਬ੍ਬਨ੍ਤਿ ਸੀਤਞ੍ਚ ਉਣ੍ਹਞ੍ਚ ਉਦਕਂ ਉਪਨੇਤ੍ਵਾ ਤਤੋ ਯਂ ਤੀਣਿ ਦਿਵਸਾਨਿ ਵਲ਼ਞ੍ਜੇਤਿ, ਚਤੁਤ੍ਥਦਿਵਸਤੋ ਪਟ੍ਠਾਯ ਤਾਦਿਸਮੇਵ ਮੁਖਧੋਵਨੋਦਕਂ ਦਾਤਬ੍ਬਂ. ਸਚੇ ਅਨਿਯਮਂ ਕਤ੍ਵਾ ਯਂ ਵਾ ਤਂ ਵਾ ਗਣ੍ਹਾਤਿ, ਅਥ ਯਾਦਿਸਂ ਲਭਤਿ ਤਾਦਿਸਂ ਦਾਤਬ੍ਬਂ. ਸਚੇ ਦੁਵਿਧਮ੍ਪਿ ਵਲ਼ਞ੍ਜੇਤਿ, ਦੁਵਿਧਮ੍ਪਿ ਉਪਨੇਤਬ੍ਬਂ. ਉਦਕਂ ਮੁਖਧੋਵਨਟ੍ਠਾਨੇ ਠਪੇਤ੍ਵਾ ਵਚ੍ਚਕੁਟਿਤੋ ਪਟ੍ਠਾਯ ਸਮ੍ਮਜ੍ਜਿਤਬ੍ਬਂ. ਥੇਰੇ ਵਚ੍ਚਕੁਟਿਂ ਗਤੇ ਪਰਿਵੇਣਂ ਸਮ੍ਮਜ੍ਜਿਤਬ੍ਬਂ; ਏਵਂ ਪਰਿਵੇਣਂ ਅਸੁਞ੍ਞਂ ਹੋਤਿ. ਥੇਰੇ ਵਚ੍ਚਕੁਟਿਤੋ ਅਨਿਕ੍ਖਨ੍ਤੇਯੇਵ ਆਸਨਂ ਪਞ੍ਞਪੇਤਬ੍ਬਂ. ਸਰੀਰਕਿਚ੍ਚਂ ਕਤ੍ਵਾ ਆਗਨ੍ਤ੍ਵਾ ਤਸ੍ਮਿਂ ਨਿਸਿਨ੍ਨਸ੍ਸ ‘‘ਸਚੇ ਯਾਗੁ ਹੋਤੀ’’ਤਿਆਦਿਨਾ ਨਯੇਨ ਵੁਤ੍ਤਵਤ੍ਤਂ ਕਾਤਬ੍ਬਂ. ਉਕ੍ਲਾਪੋਤਿ ਕੇਨਚਿ ਕਚਵਰੇਨ ਸਙ੍ਕਿਣ੍ਣੋ, ਸਚੇ ਪਨ ਅਞ੍ਞੋ ਕਚਵਰੋ ਨਤ੍ਥਿ, ਉਦਕਫੁਸਿਤਾਨੇਵ ਹੋਨ੍ਤਿ, ਹਤ੍ਥੇਨਪਿ ਪਮਜ੍ਜਿਤਬ੍ਬੋ.
ਸਗੁਣਂ ਕਤ੍ਵਾਤਿ ਦ੍ਵੇ ਚੀਵਰਾਨਿ ਏਕਤੋ ਕਤ੍ਵਾ, ਤਾ ਏਕਤੋ ਕਤਾ ਦ੍ਵੇਪਿ ਸਙ੍ਘਾਟਿਯੋ ਦਾਤਬ੍ਬਾ. ਸਬ੍ਬਞ੍ਹਿ ਚੀਵਰਂ ਸਙ੍ਘਟਿਤਤ੍ਤਾ ‘‘ਸਙ੍ਘਾਟੀ’’ਤਿ ਵੁਚ੍ਚਤਿ. ਤੇਨ ਵੁਤ੍ਤਂ – ‘‘ਸਙ੍ਘਾਟਿਯੋ ਦਾਤਬ੍ਬਾ’’ਤਿ. ਨਾਤਿਦੂਰੇ ਗਨ੍ਤਬ੍ਬਂ ਨਾਚ੍ਚਾਸਨ੍ਨੇਤਿ ਏਤ੍ਥ ਸਚੇ ਉਪਜ੍ਝਾਯਂ ਨਿਵਤ੍ਤਿਤ੍ਵਾ ਓਲੋਕੇਨ੍ਤਂ ਏਕੇਨ ਵਾ ਦ੍ਵੀਹਿ ਵਾ ਪਦਵੀਤਿਹਾਰੇਹਿ ਸਮ੍ਪਾਪੁਣਾਤਿ, ਏਤ੍ਤਾਵਤਾ ਨਾਤਿਦੂਰੇ ਨਾਚ੍ਚਾਸਨ੍ਨੇ ਗਤੋ ਹੋਤੀਤਿ ਵੇਦਿਤਬ੍ਬਂ. ਪਤ੍ਤਪਰਿਯਾਪਨ੍ਨਂ ਪਟਿਗ੍ਗਹੇਤਬ੍ਬਨ੍ਤਿ ਸਚੇ ਉਪਜ੍ਝਾਯੇਨ ਭਿਕ੍ਖਾਚਾਰੇ ਯਾਗੁਯਾ ਵਾ ਭਤ੍ਤੇ ਵਾ ਲਦ੍ਧੇ ਪਤ੍ਤੋ ਉਣ੍ਹੋ ਵਾ ਭਾਰਿਕੋ ਵਾ ਹੋਤਿ, ਅਤ੍ਤਨੋ ਪਤ੍ਤਂ ਤਸ੍ਸ ਦਤ੍ਵਾ ਸੋ ਪਤ੍ਤੋ ਗਹੇਤਬ੍ਬੋਤਿ ਅਤ੍ਥੋ. ਨ ਉਪਜ੍ਝਾਯਸ੍ਸ ਭਣਮਾਨਸ੍ਸ ਅਨ੍ਤਰਨ੍ਤਰਾ ਕਥਾ ਓਪਾਤੇਤਬ੍ਬਾਤਿ ਅਨ੍ਤਰਘਰੇ ਵਾ ਅਞ੍ਞਤ੍ਰ ਵਾ ਭਣਮਾਨਸ੍ਸ ਅਨਿਟ੍ਠਿਤੇ ਤਸ੍ਸ ਵਚਨੇ ਅਞ੍ਞਾ ਕਥਾ ਨ ਸਮੁਟ੍ਠਾਪੇਤਬ੍ਬਾ. ਇਤੋ ਪਟ੍ਠਾਯ ਚ ਪਨ ਯਤ੍ਥ ਯਤ੍ਥ ਨਕਾਰੇਨ ਪਟਿਸੇਧੋ ਕਰਿਯਤਿ, ਸਬ੍ਬਤ੍ਥ ਦੁਕ੍ਕਟਾਪਤ੍ਤਿ ਵੇਦਿਤਬ੍ਬਾ. ਅਯਞ੍ਹਿ ਖਨ੍ਧਕਧਮ੍ਮਤਾ. ਆਪਤ੍ਤਿਸਾਮਨ੍ਤਾ ਭਣਮਾਨੋਤਿ ਪਦਸੋਧਮ੍ਮਦੁਟ੍ਠੁਲ੍ਲਾਦਿਵਸੇਨ ਆਪਤ੍ਤਿਯਾ ਆਸਨ੍ਨਵਾਚਂ ਭਣਮਾਨੋ. ਨਿਵਾਰੇਤਬ੍ਬੋਤਿ ‘‘ਕਿਂ ਭਨ੍ਤੇ ਈਦਿਸਂ ਨਾਮ ਵਤ੍ਤੁਂ ਵਟ੍ਟਤਿ, ਆਪਤ੍ਤਿ ਨ ਹੋਤੀ’’ਤਿ ਏਵਂ ਪੁਚ੍ਛਨ੍ਤੇਨ ਵਿਯ ਵਾਰੇਤਬ੍ਬੋ. ਵਾਰੇਸ੍ਸਾਮੀਤਿ ਪਨ ਕਤ੍ਵਾ ‘‘ਮਹਲ੍ਲਕ, ਮਾ ਏਵਂ ਭਣਾ’’ਤਿ ਨ ਵਤ੍ਤਬ੍ਬੋ.
ਪਠਮਤਰਂ ਆਗਨ੍ਤ੍ਵਾਤਿ ਸਚੇ ਆਸਨ੍ਨੇ ਗਾਮੋ ਹੋਤਿ, ਵਿਹਾਰੇ ਵਾ ਗਿਲਾਨੋ ਭਿਕ੍ਖੁ ਹੋਤਿ, ਗਾਮਤੋ ਪਠਮਤਰਂ ਆਗਨ੍ਤਬ੍ਬਂ. ਸਚੇ ਦੂਰੇ ਗਾਮੋ ਹੋਤਿ, ਉਪਜ੍ਝਾਯੇਨ ਸਦ੍ਧਿਂ ਆਗਚ੍ਛਨ੍ਤੋ ਨਤ੍ਥਿ, ਤੇਨੇਵ ਸਦ੍ਧਿਂ ਗਾਮਤੋ ਨਿਕ੍ਖਮਿਤ੍ਵਾ ਚੀਵਰੇਨ ਪਤ੍ਤਂ ਵੇਠੇਤ੍ਵਾ ਅਨ੍ਤਰਾਮਗ੍ਗਤੋ ਪਠਮਤਰਂ ਆਗਨ੍ਤਬ੍ਬਂ. ਏਵਂ ਨਿਵਤ੍ਤਨ੍ਤੇਨ ਪਠਮਤਰਂ ਆਗਨ੍ਤ੍ਵਾ ਆਸਨਪਞ੍ਞਾਪਨਾਦਿ ਸਬ੍ਬਂ ਕਿਚ੍ਚਂ ਕਾਤਬ੍ਬਂ. ਸਿਨ੍ਨਂ ਹੋਤੀਤਿ ਤਿਨ੍ਤਂ ਸੇਦਗ੍ਗਹਿਤਂ. ਚਤੁਰਙ੍ਗੁਲਂ ਕਣ੍ਣਂ ਉਸ੍ਸਾਰੇਤ੍ਵਾਤਿ ਕਣ੍ਣਂ ਚਤੁਰਙ੍ਗੁਲਪ੍ਪਮਾਣਂ ਅਤਿਰੇਕਂ ਕਤ੍ਵਾ ਏਵਂ ਚੀਵਰਂ ਸਂਹਰਿਤਬ੍ਬਂ. ਕਿਂ ਕਾਰਣਾ? ਮਾ ਮਜ੍ਝੇ ਭਙ੍ਗੋ ਅਹੋਸੀਤਿ. ਸਮਂ ਕਤ੍ਵਾ ਸਂਹਰਿਤਸ੍ਸ ਹਿ ਮਜ੍ਝੇ ਭਙ੍ਗੋ ਹੋਤਿ, ਤਤੋ ਨਿਚ੍ਚਂ ਭਿਜ੍ਜਮਾਨਂ ਦੁਬ੍ਬਲਂ ਹੋਤਿ ਤਂ ਨਿਵਾਰਣਤ੍ਥਮੇਤਂ ਵੁਤ੍ਤਂ. ਤਸ੍ਮਾ ਯਥਾ ਅਜ੍ਜ ਭਙ੍ਗਟ੍ਠਾਨੇਯੇਵ ਸ੍ਵੇ ਨ ਭਿਜ੍ਜਤਿ, ਤਥਾ ਦਿਵਸੇ ਦਿਵਸੇ ਚਤੁਰਙ੍ਗੁਲਂ ਉਸ੍ਸਾਰੇਤ੍ਵਾ ਸਂਹਰਿਤਬ੍ਬਂ. ਓਭੋਗੇ ਕਾਯਬਨ੍ਧਨਂ ਕਾਤਬ੍ਬਨ੍ਤਿ ਕਾਯਬਨ੍ਧਨਂ ਸਂਹਰਿਤ੍ਵਾ ਚੀਵਰਭੋਗੇ ਪਕ੍ਖਿਪਿਤ੍ਵਾ ਠਪੇਤਬ੍ਬਂ.
ਸਚੇ ਪਿਣ੍ਡਪਾਤੋ ਹੋਤੀਤਿ ਏਤ੍ਥ ਯੋ ਗਾਮੇਯੇਵ ਵਾ ਅਨ੍ਤਰਘਰੇ ਵਾ ਪਟਿਕ੍ਕਮਨੇ ਵਾ ਭੁਞ੍ਜਿਤ੍ਵਾ ਆਗਚ੍ਛਤਿ, ਪਿਣ੍ਡਂ ਵਾ ਨ ਲਭਤਿ, ਤਸ੍ਸ ਪਿਣ੍ਡਪਾਤੋ ਨ ਹੋਤਿ, ਗਾਮੇ ਅਭੁਤ੍ਤਸ੍ਸ ਪਨ ਲਦ੍ਧਭਿਕ੍ਖਸ੍ਸ ਵਾ ਹੋਤਿ; ਤਸ੍ਮਾ ‘‘ਸਚੇ ਪਿਣ੍ਡਪਾਤੋ ਹੋਤੀ’’ਤਿਆਦਿ ਵੁਤ੍ਤਂ. ਸਚੇਪਿ ਤਸ੍ਸ ਨ ਹੋਤਿ, ਭੁਞ੍ਜਿਤੁਕਾਮੋ ਚ ਹੋਤਿ, ਉਦਕਂ ਦਤ੍ਵਾ ਅਤ੍ਤਨਾ ਲਦ੍ਧਤੋਪਿ ਪਿਣ੍ਡਪਾਤੋ ਉਪਨੇਤਬ੍ਬੋ. ਪਾਨੀਯੇਨ ਪੁਚ੍ਛਿਤਬ੍ਬੋਤਿ ਭੁਞ੍ਜਮਾਨੋ ਤਿਕ੍ਖਤ੍ਤੁਂ ‘‘ਪਾਨੀਯਂ ਭਨ੍ਤੇ ਆਹਰਿਯਤੂ’’ਤਿ ਪਾਨੀਯੇਨ ਪੁਚ੍ਛਿਤਬ੍ਬੋ. ਸਚੇ ਕਾਲੋ ਅਤ੍ਥਿ, ਉਪਜ੍ਝਾਯੇ ਭੁਤ੍ਤੇ ਸਯਂ ਭੁਞ੍ਜਿਤਬ੍ਬਂ. ਸਚੇ ਉਪਕਟ੍ਠੋ ਕਾਲੋ, ਪਾਨੀਯਂ ਉਪਜ੍ਝਾਯਸ੍ਸ ਸਨ੍ਤਿਕੇ ਠਪੇਤ੍ਵਾ ਸਯਮ੍ਪਿ ਭੁਞ੍ਜਿਤਬ੍ਬਂ.
ਅਨਨ੍ਤਰਹਿਤਾਯਾਤਿ ਤਟ੍ਟਿਕਧਮ੍ਮਖਣ੍ਡਾਦੀਸੁ ਯੇਨ ਕੇਨਚਿ ਅਨਤ੍ਥਤਾਯ ਪਂਸੁਸਕ੍ਖਰਮਿਸ੍ਸਾਯ ਭੂਮਿਯਾ ਪਤ੍ਥੋ ਨ ਠਪੇਤਬ੍ਬੋਤਿ ਅਤ੍ਥੋ. ਸਚੇ ਪਨ ਕਾਲ਼ਵਣ੍ਣਕਤਾ ਵਾ ਸੁਧਾਬਦ੍ਧਾ ਵਾ ਹੋਤਿ ਨਿਰਜਮਤ੍ਤਿਕਾ, ਤਥਾਰੂਪਾਯ ਭੂਮਿਯਾ ਠਪੇਤੁਂ ਵਟ੍ਟਤਿ. ਧੋਤਵਾਲਿਕਾਯਪਿ ਠਪੇਤੁਂ ਵਟ੍ਟਤਿ. ਪਂਸੁਰਜਸਕ੍ਖਰਾਦੀਸੁ ਨ ਵਟ੍ਟਤਿ. ਤਤ੍ਰ ਪਨ ਪਣ੍ਣਂ ਵਾ ਆਧਾਰਕਂ ਵਾ ਠਪੇਤ੍ਵਾ ਤਤ੍ਰ ਨਿਕ੍ਖਿਪਿਤਬ੍ਬੋ. ਪਾਰਤੋ ਅਨ੍ਤਂ ਓਰਤੋ ਭੋਗਨ੍ਤਿ ਇਦਂ ਚੀਵਰਵਂਸਾਦੀਨਂ ਹੇਟ੍ਠਾ ਹਤ੍ਥਂ ਪਵੇਸੇਤ੍ਵਾ ਅਭਿਮੁਖੇਨ ਹਤ੍ਥੇਨ ਸਣਿਕਂ ਨਿਕ੍ਖਿਪਨਤ੍ਥਂ ਵੁਤ੍ਤਂ. ਅਨ੍ਤੇ ਪਨ ਗਹੇਤ੍ਵਾ ਭੋਗੇਨ ਚੀਵਰਵਂਸਾਦੀਨਂ ਉਪਰਿ ਨਿਕ੍ਖਿਪਨ੍ਤਸ੍ਸ ਭਿਤ੍ਤਿਯਂ ਭੋਗੋ ਪਟਿਹਞ੍ਞਤਿ, ਤਸ੍ਮਾ ਤਥਾ ਨ ਕਾਤਬ੍ਬਂ.
ਚੁਣ੍ਣਂ ਸਨ੍ਨੇਤਬ੍ਬਨ੍ਤਿ ਨ੍ਹਾਨਚੁਣ੍ਣਂ ਉਦਕੇਨ ਤੇਮੇਤ੍ਵਾ ਪਿਣ੍ਡਿ ਕਾਤਬ੍ਬਾ. ਏਕਮਨ੍ਤਂ ਨਿਕ੍ਖਿਪਿਤਬ੍ਬਨ੍ਤਿ ਏਕਸ੍ਮਿਂ ਨਿਦ੍ਧੂਮੇ ਠਾਨੇ ਠਪੇਤਬ੍ਬਂ. ਜਨ੍ਤਾਘਰੇ ਪਰਿਕਮ੍ਮਂ ਨਾਮ ਅਙ੍ਗਾਰਮਤ੍ਤਿਕਉਣ੍ਹੋਦਕਦਾਨਾਦਿਕਂ ਸਬ੍ਬਂ ਕਿਚ੍ਚਂ. ਉਦਕੇਪਿ ਪਰਿਕਮ੍ਮਨ੍ਤਿ ਅਙ੍ਗਪਚ੍ਚਙ੍ਗਘਂਸਨਾਦਿਕਂ ਸਬ੍ਬਂ ਕਿਚ੍ਚਂ. ਪਾਨੀਯੇਨ ਪੁਚ੍ਛਿਤਬ੍ਬੋਤਿ ਜਨ੍ਤਾਘਰੇ ਉਣ੍ਹਸਨ੍ਤਾਪੇਨ ਪਿਪਾਸਾ ਹੋਤਿ, ਤਸ੍ਮਾ ਪੁਚ੍ਛਿਤਬ੍ਬੋ.
ਸਚੇ ਉਸ੍ਸਹਤੀਤਿ ਸਚੇ ਪਹੋਤਿ; ਨ ਕੇਨਚਿ ਗੇਲਞ੍ਞੇਨ ਅਭਿਭੂਤੋ ਹੋਤਿ; ਅਗਿਲਾਨੇਨ ਹਿ ਸਦ੍ਧਿਵਿਹਾਰਿਕੇਨ ਸਟ੍ਠਿਵਸ੍ਸੇਨਾਪਿ ਸਬ੍ਬਂ ਉਪਜ੍ਝਾਯਵਤ੍ਤਂ ਕਾਤਬ੍ਬਂ, ਅਨਾਦਰੇਨ ਅਕਰੋਨ੍ਤਸ੍ਸ ਵਤ੍ਤਭੇਦੇ ਦੁਕ੍ਕਟਂ. ਨਕਾਰਪਟਿਸਂਯੁਤ੍ਤੇਸੁ ਪਨ ਪਦੇਸੁ ਗਿਲਾਨਸ੍ਸਾਪਿ ਪਟਿਕ੍ਖਿਤ੍ਤਕਿਰਿਯਂ ਕਰੋਨ੍ਤਸ੍ਸ ਦੁਕ੍ਕਟਮੇਵ. ਅਪ੍ਪਟਿਘਂਸਨ੍ਤੇਨਾਤਿ ਭੂਮਿਯਂ ਅਪ੍ਪਟਿਘਂਸਨ੍ਤੇਨ. ਕਵਾਟਪਿਟ੍ਠਨ੍ਤਿ ਕਵਾਟਞ੍ਚ ਪਿਟ੍ਠਸਙ੍ਘਾਤਞ੍ਚ ਅਚ੍ਛੁਪਨ੍ਤੇਨ. ਸਨ੍ਤਾਨਕਨ੍ਤਿ ਯਂਕਿਞ੍ਚਿ ਕੀਟਕੁਲਾਵਕਮਕ੍ਕਟਕਸੁਤ੍ਤਾਦਿ. ਉਲ੍ਲੋਕਾ ਪਠਮਂ ਓਹਾਰੇਤਬ੍ਬਨ੍ਤਿ ਉਲ੍ਲੋਕਤੋ ਪਠਮਂ ਉਲ੍ਲੋਕਂ ਆਦਿਂਕਤ੍ਵਾ ਅਵਹਰਿਤਬ੍ਬਨ੍ਤਿ ਅਤ੍ਥੋ. ਆਲੋਕਸਨ੍ਧਿਕਣ੍ਣਭਾਗਾਤਿ ਆਲੋਕਸਨ੍ਧਿਭਾਗਾ ਚ ਕਣ੍ਣਭਾਗਾ ਚ ਅਨ੍ਤਰਬਾਹਿਰਵਾਤਪਾਨਕਵਾਟਕਾਨਿ ਚ ਗਬ੍ਭਸ੍ਸ ਚ ਚਤ੍ਤਾਰੋ ਕੋਣਾ ਪਮਜ੍ਜਿਤਬ੍ਬਾਤਿ ਅਤ੍ਥੋ.
ਯਥਾਪਞ੍ਞਤ੍ਤਂ ਪਞ੍ਞਪੇਤਬ੍ਬਨ੍ਤਿ ਯਥਾ ਪਠਮਂ ਪਞ੍ਞਤ੍ਤਂ ਅਹੋਸਿ, ਤਥੇਵ ਪਞ੍ਞਪੇਤਬ੍ਬਂ. ਏਤਦਤ੍ਥਮੇਵ ਹਿ ਯਥਾਪਞ੍ਞਤ੍ਤਂ ਸਲ੍ਲਕ੍ਖੇਤ੍ਵਾ ਨੀਹਰਿਤ੍ਵਾ ਏਕਮਨ੍ਤਂ ਨਿਕ੍ਖਿਪਿਤਬ੍ਬਨ੍ਤਿ ਪੁਰਿਮਵਤ੍ਤਂ ਪਞ੍ਞਤ੍ਤਂ. ਸਚੇ ਪਨ ਪਠਮਂ ਅਜਾਨਨ੍ਤੇਨ ਕੇਨਚਿ ਪਞ੍ਞਤ੍ਤਂ ਅਹੋਸਿ, ਸਮਨ੍ਤਤੋ ਭਿਤ੍ਤਿਂ ਦ੍ਵਙ੍ਗੁਲਮਤ੍ਤੇਨ ਵਾ ਤਿਵਙ੍ਗੁਲਮਤ੍ਤੇਨ ਵਾ ਮੋਚੇਤ੍ਵਾ ਪਞ੍ਞਪੇਤਬ੍ਬਂ. ਇਦਞ੍ਹਿ ਪਞ੍ਞਾਪਨਵਤ੍ਤਂ. ਸਚੇ ਕਟਸਾਰਕੋ ਹੋਤਿ ਅਤਿਮਹਨ੍ਤੋ ਚ, ਛਿਨ੍ਦਿਤ੍ਵਾ ਕੋਟਿਂ ਨਿਵਤ੍ਤੇਤ੍ਵਾ ਬਨ੍ਧਿਤ੍ਵਾ ਪਞ੍ਞਪੇਤਬ੍ਬੋ. ਸਚੇ ਕੋਟਿਂ ਨਿਵਤ੍ਤੇਤ੍ਵਾ ਬਨ੍ਧਿਤੁਂ ਨ ਜਾਨਾਤਿ, ਨ ਛਿਨ੍ਦਿਤਬ੍ਬੋ. ਪੁਰਤ੍ਥਿਮਾ ਵਾਤਪਾਨਾ ਥਕੇਤਬ੍ਬਾਤਿ ਪੁਰਤ੍ਥਿਮਾਯ ਵਾਤਪਾਨਾ ਥਕੇਤਬ੍ਬਾ. ਏਵਂ ਸੇਸਾਪਿ ਵਾਤਪਾਨਾ ਥਕੇਤਬ੍ਬਾ.
ਵੂਪਕਾਸੇਤਬ੍ਬੋਤਿ ਅਞ੍ਞਤ੍ਥ ਨੇਤਬ੍ਬੋ. ਵੂਪਕਾਸਾਪੇਤਬ੍ਬੋਤਿ ਅਞ੍ਞੋ ਭਿਕ੍ਖੁ ਵਤ੍ਤਬ੍ਬੋ ‘‘ਥੇਰਂ ਗਹੇਤ੍ਵਾ ਅਞ੍ਞਤ੍ਥ ਗਚ੍ਛਾ’’ਤਿ ਵਿਵੇਚੇਤਬ੍ਬਨ੍ਤਿ ਵਿਸ੍ਸਜ੍ਜਾਪੇਤਬ੍ਬਂ. ਵਿਵੇਚਾਪੇਤਬ੍ਬਨ੍ਤਿ ਅਞ੍ਞੋ ਵਤ੍ਤਬ੍ਬੋ ‘‘ਥੇਰਂ ਦਿਟ੍ਠਿਗਤਂ ਵਿਸ੍ਸਜ੍ਜਾਪੇਹੀ’’ਤਿ. ਉਸ੍ਸੁਕ੍ਕਂ ਕਾਤਬ੍ਬਨ੍ਤਿ ਪਰਿਵਾਸਦਾਨਤ੍ਥਂ ਸੋ ਸੋ ਭਿਕ੍ਖੁ ਉਪਸਙ੍ਕਮਿਤ੍ਵਾ ਯਾਚਿਤਬ੍ਬੋ. ਸਚੇ ਅਤ੍ਤਨਾ ਪਟਿਬਲੋ ਹੋਤਿ, ਅਤ੍ਤਨਾਵ ਦਾਤਬ੍ਬੋ. ਨੋ ਚੇ ਪਟਿਬਲੋ ਹੋਤਿ, ਅਞ੍ਞੇਨ ਦਾਪੇਤਬ੍ਬੋ. ਕਿਨ੍ਤਿ ਨੁ ਖੋਤਿ ਕੇਨ ਨੁ ਖੋ ਉਪਾਯੇਨ. ਏਸ ਨਯੋ ਸਬ੍ਬਤ੍ਥ. ਲਹੁਕਾਯ ਵਾ ਪਰਿਣਾਮੇਯ੍ਯਾਤਿ ਉਕ੍ਖੇਪਨੀਯਂ ਅਕਤ੍ਵਾ ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਕਰੇਯ੍ਯਾਤਿ ਅਤ੍ਥੋ. ਤੇਨ ਹਿ ‘‘ਉਪਜ੍ਝਾਯਸ੍ਸ ਉਕ੍ਖੇਪਨੀਯਕਮ੍ਮਂ ਕਤ੍ਤੁਕਾਮੋ ਸਙ੍ਘੋ’’ਤਿ ਞਤ੍ਵਾ ਏਕਮੇਕਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ‘‘ਮਾ ਭਨ੍ਤੇ ਅਮ੍ਹਾਕਂ ਉਪਜ੍ਝਾਯਸ੍ਸ ਕਮ੍ਮਂ ਕਰਿਤ੍ਥਾ’’ਤਿ ਯਾਚਿਤਬ੍ਬਾ. ਸਚੇ ਕਰੋਨ੍ਤਿਯੇਵ, ‘‘ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਕਰੋਥਾ’’ਤਿ ਯਾਚਿਤਬ੍ਬਾ. ਸਚੇ ਕਰੋਨ੍ਤਿਯੇਵ, ਅਥ ਉਪਜ੍ਝਾਯੋ ‘‘ਸਮ੍ਮਾ ਵਤ੍ਤਥ ਭਨ੍ਤੇ’’ਤਿ ਯਾਚਿਤਬ੍ਬੋ. ਇਤਿ ਤਂ ਸਮ੍ਮਾ ਵਤ੍ਤਾਪੇਤ੍ਵਾ ‘‘ਪਟਿਪ੍ਪਸ੍ਸਮ੍ਭੇਥ ਭਨ੍ਤੇ ਕਮ੍ਮ’’ਨ੍ਤਿ ਭਿਕ੍ਖੂ ਯਾਚਿਤਬ੍ਬਾ.
ਸਮ੍ਪਰਿਵਤ੍ਤਕਂ ਸਮ੍ਪਰਿਵਤ੍ਤਕਨ੍ਤਿ ਸਮ੍ਪਰਿਵਤ੍ਤੇਤ੍ਵਾ ਸਮ੍ਪਰਿਵਤ੍ਤੇਤ੍ਵਾ. ਨ ਚ ਅਚ੍ਛਿਨ੍ਨੇ ਥੇਵੇ ਪਕ੍ਕਮਿਤਬ੍ਬਨ੍ਤਿ ਯਦਿ ਅਪ੍ਪਮਤ੍ਤਕਮ੍ਪਿ ਰਜਨਂ ਗਲ਼ਤਿ, ਨ ਤਾਵ ਪਕ੍ਕਮਿਤਬ੍ਬਂ. ਨ ਉਪਜ੍ਝਾਯਂ ਅਨਾਪੁਚ੍ਛਾ ਏਕਚ੍ਚਸ੍ਸ ਪਤ੍ਤੋ ਦਾਤਬ੍ਬੋਤਿਆਦਿ ਸਬ੍ਬਂ ਉਪਜ੍ਝਾਯਸ੍ਸ ਵਿਸਭਾਗਪੁਗ੍ਗਲਵਸੇਨ ਕਥਿਤਂ. ਨ ਉਪਜ੍ਝਾਯਂ ਅਨਾਪੁਚ੍ਛਾ ਗਾਮੋ ਪਵਿਸਿਤਬ੍ਬੋਤਿ ਪਿਣ੍ਡਾਯ ਵਾ ਅਞ੍ਞੇਨ ਵਾ ਕਰਣੀਯੇਨ ਪਵਿਸਿਤੁਕਾਮੇਨ ਆਪੁਚ੍ਛਿਤ੍ਵਾਵ ਪਵਿਸਿਤਬ੍ਬੋ. ਸਚੇ ਉਪਜ੍ਝਾਯੋ ਕਾਲਸ੍ਸੇਵ ਵੁਟ੍ਠਾਯ ਦੂਰਂ ਭਿਕ੍ਖਾਚਾਰਂ ਗਨ੍ਤੁਕਾਮੋ ਹੋਤਿ, ‘‘ਦਹਰਾ ਪਿਣ੍ਡਾਯ ਪਵਿਸਨ੍ਤੂ’’ਤਿ ਵਤ੍ਵਾ ਗਨ੍ਤਬ੍ਬਂ. ਅਵਤ੍ਵਾ ਗਤੇ ਪਰਿਵੇਣਂ ਗਨ੍ਤ੍ਵਾ ਉਪਜ੍ਝਾਯਂ ਅਪਸ੍ਸਨ੍ਤੇਨ ਗਾਮਂ ਪਵਿਸਿਤੁਂ ਵਟ੍ਟਤਿ. ਸਚੇ ਗਾਮਂ ਪਵਿਸਨ੍ਤੋਪਿ ਪਸ੍ਸਤਿ, ਦਿਟ੍ਠਟ੍ਠਾਨਤੋ ਪਟ੍ਠਾਯ ਆਪੁਚ੍ਛਿਤੁਂਯੇਵ ਵਟ੍ਟਤਿ.
ਨ ਸੁਸਾਨਂ ਗਨ੍ਤਬ੍ਬਨ੍ਤਿ ਵਾਸਤ੍ਥਾਯ ਵਾ ਦਸ੍ਸਨਤ੍ਥਾਯ ਵਾ ਨ ਗਨ੍ਤਬ੍ਬਂ. ਨ ਦਿਸਾ ਪਕ੍ਕਮਿਤਬ੍ਬਾਤਿ ਏਤ੍ਥ ਪਕ੍ਕਮਿਤੁਕਾਮੇਨ ਕਮ੍ਮਂ ਆਚਿਕ੍ਖਿਤ੍ਵਾ ਯਾਵਤਤਿਯਂ ਯਾਚਿਤਬ੍ਬੋ. ਸਚੇ ਅਨੁਜਾਨਾਤਿ, ਸਾਧੁ; ਨੋ ਚੇ ਅਨੁਜਾਨਾਤਿ, ਤਂ ਨਿਸ੍ਸਾਯ ਵਸਤੋ ਚਸ੍ਸ ਉਦ੍ਦੇਸੋ ਵਾ ਪਰਿਪੁਚ੍ਛਾ ਵਾ ਕਮ੍ਮਟ੍ਠਾਨਂ ਵਾ ਨ ਸਮ੍ਪਜ੍ਜਤਿ, ਉਪਜ੍ਝਾਯੋ ਬਾਲੋ ਹੋਤਿ ਅਬ੍ਯਤ੍ਤੋ, ਕੇਵਲਂ ਅਤ੍ਤਨੋ ਸਨ੍ਤਿਕੇ ਵਸਾਪੇਤੁਕਾਮਤਾਯ ਏਵ ਗਨ੍ਤੁਂ ਨ ਦੇਤਿ, ਏਵਰੂਪੇ ਨਿਵਾਰੇਨ੍ਤੇਪਿ ਗਨ੍ਤੁਂ ਵਟ੍ਟਤਿ. ਵੁਟ੍ਠਾਨਮਸ੍ਸ ਆਗਮੇਤਬ੍ਬਨ੍ਤਿ ਗੇਲਞ੍ਞਤੋ ਵੁਟ੍ਠਾਨਂ ਅਸ੍ਸ ਆਗਮੇਤਬ੍ਬਂ; ਨ ਕਤ੍ਥਚਿ ਗਨ੍ਤਬ੍ਬਂ. ਸਚੇ ਅਞ੍ਞੋ ਭਿਕ੍ਖੁ ਉਪਟ੍ਠਾਕੋ ਅਤ੍ਥਿ, ਭੇਸਜ੍ਜਂ ਪਰਿਯੇਸਿਤ੍ਵਾ ਤਸ੍ਸ ਹਤ੍ਥੇ ਦਤ੍ਵਾ ‘‘ਭਨ੍ਤੇ ਅਯਂ ਉਪਟ੍ਠਹਿਸ੍ਸਤੀ’’ਤਿ ਵਤ੍ਵਾ ਗਨ੍ਤਬ੍ਬਂ.
ਉਪਜ੍ਝਾਯਵਤ੍ਤਕਥਾ ਨਿਟ੍ਠਿਤਾ.
ਸਦ੍ਧਿਵਿਹਾਰਿਕਵਤ੍ਤਕਥਾ
੬੭. ਉਪਜ੍ਝਾਯੇਨ ਸਦ੍ਧਿਵਿਹਾਰਿਕਮ੍ਹਿ ਸਮ੍ਮਾਵਤ੍ਤਨਾਯਂ – ਸਙ੍ਗਹੇਤਬ੍ਬੋ ਅਨੁਗ੍ਗਹੇਤਬ੍ਬੋਤਿ ਉਦ੍ਦੇਸਾਦੀਹਿਸ੍ਸ ਸਙ੍ਗਹੋ ਚ ਅਨੁਗ੍ਗਹੋ ਚ ਕਤ੍ਤਬ੍ਬੋ. ਤਤ੍ਥ ਉਦ੍ਦੇਸੋਤਿ ਪਾਲ਼ਿਵਾਚਨਂ. ਪਰਿਪੁਚ੍ਛਾਤਿ ਪਾਲ਼ਿਯਾ ਅਤ੍ਥਵਣ੍ਣਨਾ. ਓਵਾਦੋਤਿ ਅਨੋਤਿਣ੍ਣੇ ਵਤ੍ਥੁਸ੍ਮਿਂ ‘‘ਇਦਂ ਕਰੋਹਿ, ਇਦਂ ਮਾ ਕਰਿਤ੍ਥਾ’’ਤਿ ਵਚਨਂ. ਅਨੁਸਾਸਨੀਤਿ ਓਤਿਣ੍ਣੇ ਵਤ੍ਥੁਸ੍ਮਿਂ. ਅਪਿ ਚ ਓਤਿਣ੍ਣੇ ਵਾ ਅਨੋਤਿਣ੍ਣੇ ਵਾ ਪਠਮਂ ਵਚਨਂ ਓਵਾਦੋ; ਪੁਨਪ੍ਪੁਨਂ ਵਚਨਂ ਅਨੁਸਾਸਨੀਤਿ. ਸਚੇ ਉਪਜ੍ਝਾਯਸ੍ਸ ਪਤ੍ਤੋ ਹੋਤੀਤਿ ਸਚੇ ਅਤਿਰੇਕਪਤ੍ਤੋ ਹੋਤਿ. ਏਸ ਨਯੋ ਸਬ੍ਬਤ੍ਥ. ਪਰਿਕ੍ਖਾਰੋਤਿ ਅਞ੍ਞੋਪਿ ਸਮਣਪਰਿਕ੍ਖਾਰੋ. ਇਧ ਉਸ੍ਸੁਕ੍ਕਂ ਨਾਮ ਧਮ੍ਮਿਕੇਨ ਨਯੇਨ ਉਪ੍ਪਜ੍ਜਮਾਨਉਪਾਯਪਰਿਯੇਸਨਂ. ਇਤੋ ਪਰਂ ਦਨ੍ਤਕਟ੍ਠਦਾਨਂ ਆਦਿਂ ਕਤ੍ਵਾ ਆਚਮਨਕੁਮ੍ਭਿਯਾ ਉਦਕਾਸਿਞ੍ਚਨਪਰਿਯੋਸਾਨਂ ਵਤ੍ਤਂ ਗਿਲਾਨਸ੍ਸੇਵ ਸਦ੍ਧਿਵਿਹਾਰਿਕਸ੍ਸ ਕਾਤਬ੍ਬਂ. ਅਨਭਿਰਤਿਵੂਪਕਾਸਨਾਦਿ ਪਨ ਅਗਿਲਾਨਸ੍ਸਾਪਿ ਕਤ੍ਤਬ੍ਬਮੇਵ. ਚੀਵਰਂ ਰਜਨ੍ਤੇਨਾਤਿ ‘‘ਏਵਂ ਰਜੇਯ੍ਯਾਸੀ’’ਤਿ ਉਪਜ੍ਝਾਯਤੋ ਉਪਾਯਂ ਸੁਤ੍ਵਾ ਰਜਨ੍ਤੇਨ. ਸੇਸਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.
ਸਦ੍ਧਿਵਿਹਾਰਿਕਵਤ੍ਤਕਥਾ ਨਿਟ੍ਠਿਤਾ.
ਨਸਮ੍ਮਾਵਤ੍ਤਨਾਦਿਕਥਾ
੬੮. ਨ ਸਮ੍ਮਾ ਵਤ੍ਤਨ੍ਤੀਤਿ ਯਥਾਪਞ੍ਞਤ੍ਤਂ ਉਪਜ੍ਝਾਯਵਤ੍ਤਂ ਨ ਪੂਰੇਨ੍ਤਿ. ਯੋ ਨ ਸਮ੍ਮਾ ਵਤ੍ਤੇਯ੍ਯਾਤਿ ਯੋ ਯਥਾਪਞ੍ਞਤ੍ਤਂ ਵਤ੍ਤਂ ਨ ਪੂਰੇਯ੍ਯ; ਸੋ ਦੁਕ੍ਕਟਂ ਆਪਜ੍ਜਤੀਤਿ ਅਤ੍ਥੋ. ਪਣਾਮੇਤਬ੍ਬੋਤਿ ਅਪਸਾਦੇਤਬ੍ਬੋ. ਨ ਅਧਿਮਤ੍ਤਂ ਪੇਮਂ ਹੋਤੀਤਿ ਉਪਜ੍ਝਾਯਮ੍ਹਿ ਅਧਿਮਤ੍ਤਂ ਗੇਹਸ੍ਸਿਤਪੇਮਂ ਨ ਹੋਤਿ. ਨਾਧਿਮਤ੍ਤਾ ਭਾਵਨਾ ਹੋਤੀਤਿ ਅਧਿਮਤ੍ਤਾ ਮੇਤ੍ਤਾਭਾਵਨਾ ਨ ਹੋਤਿ; ਵੁਤ੍ਤਪਟਿਪਕ੍ਖਨਯੇਨ ਸੁਕ੍ਕਪਕ੍ਖੋ ਵੇਦਿਤਬ੍ਬੋ. ਅਲਂ ਪਣਾਮੇਤੁਨ੍ਤਿ ਯੁਤ੍ਤੋ ਪਣਾਮੇਤੁਂ.
ਅਪ੍ਪਣਾਮੇਨ੍ਤੋ ਉਪਜ੍ਝਾਯੋ ਸਾਤਿਸਾਰੋ ਹੋਤੀਤਿ ਸਦੋਸੋ ਹੋਤਿ, ਆਪਤ੍ਤਿਂ ਆਪਜ੍ਜਤਿ; ਤਸ੍ਮਾ ਨ ਸਮ੍ਮਾ ਵਤ੍ਤਨ੍ਤੋ ਪਣਾਮੇਤਬ੍ਬੋਵ. ਨ ਸਮ੍ਮਾਵਤ੍ਤਨਾਯ ਚ ਯਾਵ ਚੀਵਰਰਜਨਂ ਤਾਵ ਵਤ੍ਤੇ ਅਕਰਿਯਮਾਨੇ ਉਪਜ੍ਝਾਯਸ੍ਸ ਪਰਿਹਾਨਿ ਹੋਤਿ. ਤਸ੍ਮਾ ਤਂ ਅਕਰੋਨ੍ਤਸ੍ਸ ਨਿਸ੍ਸਯਮੁਤ੍ਤਕਸ੍ਸਾਪਿ ਅਮੁਤ੍ਤਕਸ੍ਸਾਪਿ ਆਪਤ੍ਤਿਯੇਵ. ਏਕਚ੍ਚਸ੍ਸ ਪਤ੍ਤਦਾਨਤੋ ਪਟ੍ਠਾਯ ਅਮੁਤ੍ਤਕਨਿਸ੍ਸਯਸ੍ਸੇਵ ਆਪਤ੍ਤਿ.
ਸਦ੍ਧਿਵਿਹਾਰਿਕਾ ਸਮ੍ਮਾ ਵਤ੍ਤਨ੍ਤਿ, ਉਪਜ੍ਝਾਯੋ ਸਮ੍ਮਾ ਨ ਵਤ੍ਤਤਿ, ਉਪਜ੍ਝਾਯਸ੍ਸ ਆਪਤ੍ਤਿ. ਉਪਜ੍ਝਾਯੋ ਸਮ੍ਮਾ ਵਤ੍ਤਤਿ, ਸਦ੍ਧਿਵਿਹਾਰਿਕਾ ਸਮ੍ਮਾ ਨ ਵਤ੍ਤਨ੍ਤਿ, ਤੇਸਂ ਆਪਤ੍ਤਿ. ਉਪਜ੍ਝਾਯੇ ਵਤ੍ਤਂ ਸਾਦਿਯਨ੍ਤੇ ਸਦ੍ਧਿਵਿਹਾਰਿਕਾ ਬਹੁਕਾਪਿ ਹੋਨ੍ਤਿ, ਸਬ੍ਬੇਸਂ ਆਪਤ੍ਤਿ. ਸਚੇ ਉਪਜ੍ਝਾਯੋ ‘‘ਮਯ੍ਹਂ ਉਪਟ੍ਠਾਕੋ ਅਤ੍ਥਿ, ਤੁਮ੍ਹੇ ਅਤ੍ਤਨੋ ਸਜ੍ਝਾਯਮਨਸਿਕਾਰਾਦੀਸੁ ਯੋਗਂ ਕਰੋਥਾ’’ਤਿ ਵਦਤਿ, ਸਦ੍ਧਿਵਿਹਾਰਿਕਾਨਂ ਅਨਾਪਤ੍ਤਿ. ਸਚੇ ਉਪਜ੍ਝਾਯੋ ਸਾਦਿਯਨਂ ਵਾ ਅਸਾਦਿਯਨਂ ਵਾ ਨ ਜਾਨਾਤਿ, ਬਾਲੋ ਹੋਤਿ, ਸਦ੍ਧਿਵਿਹਾਰਿਕਾ ਬਹੁਕਾ. ਤੇਸੁ ਏਕੋ ਵਤ੍ਤਸਮ੍ਪਨ੍ਨੋ ਭਿਕ੍ਖੁ ‘‘ਉਪਜ੍ਝਾਯਸ੍ਸ ਕਿਚ੍ਚਂ ਅਹਂ ਕਰਿਸ੍ਸਾਮਿ, ਤੁਮ੍ਹੇ ਅਪ੍ਪੋਸ੍ਸੁਕ੍ਕਾ ਵਿਹਰਥਾ’’ਤਿ ਏਵਞ੍ਚੇ ਅਤ੍ਤਨੋ ਭਾਰਂ ਕਤ੍ਵਾ ਇਤਰੇ ਵਿਸ੍ਸਜ੍ਜੇਤਿ, ਤਸ੍ਸ ਭਾਰਕਰਣਤੋ ਪਟ੍ਠਾਯ ਤੇਸਂ ਅਨਾਪਤ੍ਤਿ.
ਨਸਮ੍ਮਾਵਤ੍ਤਨਾਦਿਕਥਾ ਨਿਟ੍ਠਿਤਾ.
ਰਾਧਬ੍ਰਾਹ੍ਮਣਵਤ੍ਥੁਕਥਾ
੬੯. ਰਾਧਬ੍ਰਾਹ੍ਮਣਵਤ੍ਥੁਸ੍ਮਿਂ – ਕਿਞ੍ਚਾਪਿ ਆਯਸ੍ਮਾ ਸਾਰਿਪੁਤ੍ਤੋ ਭਗਵਤਾ ਬਾਰਾਣਸਿਯਂ ਤੀਹਿ ਸਰਣਗਮਨੇਹਿ ਅਨੁਞ੍ਞਾਤਂ ਪਬ੍ਬਜ੍ਜਞ੍ਚੇਵ ਉਪਸਮ੍ਪਦਞ੍ਚ ਜਾਨਾਤਿ, ਭਗਵਾ ਪਨ ਤਂ ਲਹੁਕਂ ਉਪਸਮ੍ਪਦਂ ਪਟਿਕ੍ਖਿਪਿਤ੍ਵਾ ਞਤ੍ਤਿਚਤੁਤ੍ਥਕਮ੍ਮੇਨ ਗਰੁਕਂ ਕਤ੍ਵਾ ਉਪਸਮ੍ਪਦਂ ਅਨੁਞ੍ਞਾਤੁਕਾਮੋ. ਅਥਸ੍ਸ ਥੇਰੋ ਅਜ੍ਝਾਸਯਂ ਵਿਦਿਤ੍ਵਾ ‘‘ਕਥਾਹਂ ਭਨ੍ਤੇ ਤਂ ਬ੍ਰਾਹ੍ਮਣਂ ਪਬ੍ਬਾਜੇਮਿ ਉਪਸਮ੍ਪਾਦੇਮੀ’’ਤਿ ਆਹ. ਬੁਦ੍ਧਾਨਞ੍ਹਿ ਪਰਿਸਾ ਅਜ੍ਝਾਸਯਕੁਸਲਾ ਹੋਨ੍ਤਿ, ਅਯਞ੍ਚ ਬੁਦ੍ਧਪਰਿਸਾਯ ਅਗ੍ਗੋ.
ਬ੍ਯਤ੍ਤੇਨ ਭਿਕ੍ਖੁਨਾ ਪਟਿਬਲੇਨਾਤਿ ਏਤ੍ਥ ਬ੍ਯਤ੍ਤੋ ਨਾਮ ਯਸ੍ਸ ਸਾਟ੍ਠਕਥਂ ਵਿਨਯਪਿਟਕਂ ਵਾਚੁਗ੍ਗਤਂ ਪਵਤ੍ਤਤਿ, ਤਸ੍ਮਿਂ ਅਸਤਿ ਯਸ੍ਸ ਅਨ੍ਤਮਸੋ ਇਦਂ ਞਤ੍ਤਿਚਤੁਤ੍ਥਕਮ੍ਮਵਾਚਾਮਤ੍ਤਮ੍ਪਿ ਸੁਗ੍ਗਹਿਤਂ ਹੋਤਿ, ਵਾਚੁਗ੍ਗਤਂ ਪਵਤ੍ਤਤਿ, ਅਯਮ੍ਪਿ ਇਮਸ੍ਮਿਂ ਅਤ੍ਥੇ ਬ੍ਯਤ੍ਤੋ. ਯੋ ਪਨ ਕਾਸਸੋਸਸੇਮ੍ਹਾਦਿਨਾ ਵਾ ਗੇਲਞ੍ਞੇਨ ਓਟ੍ਠਦਨ੍ਤਜਿਵ੍ਹਾਦੀਨਂ ਵਾ ਅਸਮ੍ਪਤ੍ਤਿਯਾ ਪਰਿਯਤ੍ਤਿਯਂ ਵਾ ਅਕਤਪਰਿਚਯਤ੍ਤਾ ਨ ਸਕ੍ਕੋਤਿ ਪਰਿਮਣ੍ਡਲੇਹਿ ਪਦਬ੍ਯਞ੍ਜਨੇਹਿ ਕਮ੍ਮਵਾਚਂ ਸਾਵੇਤੁਂ, ਬ੍ਯਞ੍ਜਨਂ ਵਾ ਪਦਂ ਵਾ ਹਾਪੇਤਿ, ਅਞ੍ਞਥਾ ਵਾ ਵਤ੍ਤਬ੍ਬਂ ਅਞ੍ਞਥਾ ਵਦਤਿ, ਅਯਂ ਅਪ੍ਪਟਿਬਲੋ. ਤਬ੍ਬਿਪਰੀਤੋ ਇਮਸ੍ਮਿਂ ਅਤ੍ਥੇ ‘‘ਪਟਿਬਲੋ’’ਤਿ ਵੇਦਿਤਬ੍ਬੋ. ਸਙ੍ਘੋ ਞਾਪੇਤਬ੍ਬੋਤਿ ਸਙ੍ਘੋ ਜਾਨਾਪੇਤਬ੍ਬੋ. ਤਤੋ ਪਰਂ ਯਂ ਸਙ੍ਘੋ ਜਾਨਾਪੇਤਬ੍ਬੋ, ਤਂ ਦਸ੍ਸੇਤੁਂ ‘‘ਸੁਣਾਤੁ ਮੇ ਭਨ੍ਤੇ’’ਤਿਆਦਿਮਾਹ.
੭੧. ਉਪਸਮ੍ਪਨ੍ਨਸਮਨਨ੍ਤਰਾਤਿ ਉਪਸਮ੍ਪਨ੍ਨੋ ਹੁਤ੍ਵਾ ਸਮਨਨ੍ਤਰਾ. ਅਨਾਚਾਰਂ ਆਚਰਤੀਤਿ ਪਣ੍ਣਤ੍ਤਿਵੀਤਿਕ੍ਕਮਂ ਕਰੋਤਿ. ਉਲ੍ਲੁਮ੍ਪਤੁ ਮਨ੍ਤਿ ਉਦ੍ਧਰਤੁ ਮਂ, ਅਕੁਸਲਾ ਵੁਟ੍ਠਾਪੇਤ੍ਵਾ ਕੁਸਲੇ ਪਤਿਟ੍ਠਪੇਤੁ; ਸਾਮਣੇਰਭਾਵਾ ਵਾ ਉਦ੍ਧਰਿਤ੍ਵਾ ਭਿਕ੍ਖੁਭਾਵੇ ਪਤਿਟ੍ਠਾਪੇਤੂਤਿ. ਅਨੁਕਮ੍ਪਂ ਉਪਾਦਾਯਾਤਿ ਅਨੁਦ੍ਦਯਂ ਪਟਿਚ੍ਚ; ਮਯਿ ਅਨੁਕਪ੍ਪਂ ਕਤ੍ਵਾਤਿ ਅਤ੍ਥੋ.
੭੩. ਅਟ੍ਠਿਤਾ ਹੋਤੀਤਿ ਨਿਚ੍ਚਪ੍ਪਵਤ੍ਤਿਨੀ ਹੋਤਿ. ਚਤ੍ਤਾਰੋ ਨਿਸ੍ਸਯੇਤਿ ਚਤ੍ਤਾਰੋ ਪਚ੍ਚਯੇ. ਯਸ੍ਮਾ ਚਤ੍ਤਾਰੋ ਪਚ੍ਚਯੇ ਨਿਸ੍ਸਾਯ ਅਤ੍ਤਭਾਵੋ ਪਵਤ੍ਤਤਿ, ਤਸ੍ਮਾ ਤੇ ਨਿਸ੍ਸਯਾਤਿ ਵੁਚ੍ਚਨ੍ਤਿ.